| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၀-၁၂. သညောဇနိကာဒိဒိဋ္ဌိနိဒ္ဒေသော
10-12. Saññojanikādidiṭṭhiniddeso
၁၄၃. သညောဇနိကာယ ဒိဋ္ဌိယာ ကတမေဟိ အဋ္ဌာရသဟိ အာကာရေဟိ အဘိနိဝေသော ဟောတိ? ယာ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ။ပေ.။ ဒိဋ္ဌာဘိနိဝေသော ဒိဋ္ဌိပရာမာသော – သညောဇနိကာယ ဒိဋ္ဌိယာ ဣမေဟိ အဋ္ဌာရသဟိ အာကာရေဟိ အဘိနိဝေသော ဟောတိ။
143. Saññojanikāya diṭṭhiyā katamehi aṭṭhārasahi ākārehi abhiniveso hoti? Yā diṭṭhi diṭṭhigataṃ diṭṭhigahanaṃ…pe… diṭṭhābhiniveso diṭṭhiparāmāso – saññojanikāya diṭṭhiyā imehi aṭṭhārasahi ākārehi abhiniveso hoti.
၁၄၄. ‘‘အဟ’’န္တိ – မာနဝိနိဗန္ဓာယ ဒိဋ္ဌိယာ ကတမေဟိ အဋ္ဌာရသဟိ အာကာရေဟိ အဘိနိဝေသော ဟောတိ? စက္ခု အဟန္တိ – အဘိနိဝေသပရာမာသော။ အဟန္တိ – မာနဝိနိဗန္ဓာ ဒိဋ္ဌိ။ ဒိဋ္ဌိ န ဝတ္ထု, ဝတ္ထု န ဒိဋ္ဌိ။ အညာ ဒိဋ္ဌိ, အညံ ဝတ္ထု။ ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘အဟ’’န္တိ – မာနဝိနိဗန္ဓာ ဒိဋ္ဌိ။ မာနဝိနိဗန္ဓာ ဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။
144. ‘‘Aha’’nti – mānavinibandhāya diṭṭhiyā katamehi aṭṭhārasahi ākārehi abhiniveso hoti? Cakkhu ahanti – abhinivesaparāmāso. Ahanti – mānavinibandhā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘aha’’nti – mānavinibandhā diṭṭhi. Mānavinibandhā diṭṭhi micchādiṭṭhi…pe… imāni saññojanāni, na ca diṭṭhiyo.
သောတံ အဟန္တိ။ပေ.။ ဃာနံ အဟန္တိ။ပေ.။ ဇိဝ္ဟာ အဟန္တိ။ပေ.။ ကာယော အဟန္တိ။ပေ.။ မနော အဟန္တိ။ပေ.။ ရူပာ အဟန္တိ။ပေ.။ ဓမ္မာ အဟန္တိ။ စက္ခုဝိညာဏံ အဟန္တိ။ပေ.။ မနောဝိညာဏံ အဟန္တိ – အဘိနိဝေသပရာမာသော။ အဟန္တိ – မာနဝိနိဗန္ဓာ ဒိဋ္ဌိ။ ဒိဋ္ဌိ န ဝတ္ထု, ဝတ္ထု န ဒိဋ္ဌိ။ အညာ ဒိဋ္ဌိ, အညံ ဝတ္ထု။ ယာ စ ဒိဋ္ဌိ ယဉ္စ ဝတ္ထု – အယံ အဋ္ဌာရသမီ ‘‘အဟ’’န္တိ – မာနဝိနိဗန္ဓာ ဒိဋ္ဌိ။ မာနဝိနိဗန္ဓာ ဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။ ‘‘အဟ’’န္တိ – မာနဝိနိဗန္ဓာယ ဒိဋ္ဌိယာ ဣမေဟိ အဋ္ဌာရသဟိ အာကာရေဟိ အဘိနိဝေသော ဟောတိ။
Sotaṃ ahanti…pe… ghānaṃ ahanti…pe… jivhā ahanti…pe… kāyo ahanti…pe… mano ahanti…pe… rūpā ahanti…pe… dhammā ahanti… cakkhuviññāṇaṃ ahanti…pe… manoviññāṇaṃ ahanti – abhinivesaparāmāso. Ahanti – mānavinibandhā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ aṭṭhārasamī ‘‘aha’’nti – mānavinibandhā diṭṭhi. Mānavinibandhā diṭṭhi micchādiṭṭhi…pe… imāni saññojanāni, na ca diṭṭhiyo. ‘‘Aha’’nti – mānavinibandhāya diṭṭhiyā imehi aṭṭhārasahi ākārehi abhiniveso hoti.
၁၄၅. ‘‘မမ’’န္တိ – မာနဝိနိဗန္ဓာယ ဒိဋ္ဌိယာ ကတမေဟိ အဋ္ဌာရသဟိ အာကာရေဟိ အဘိနိဝေသော ဟောတိ? စက္ခု မမန္တိ – အဘိနိဝေသပရာမာသော။ မမန္တိ – မာနဝိနိဗန္ဓာ ဒိဋ္ဌိ။ ဒိဋ္ဌိ န ဝတ္ထု, ဝတ္ထု န ဒိဋ္ဌိ။ အညာ ဒိဋ္ဌိ, အညံ ဝတ္ထု။ ယာ စ ဒိဋ္ဌိ ယဉ္စ ဝတ္ထု – အယံ ပဌမာ ‘‘မမ’’န္တိ – မာနဝိနိဗန္ဓာ ဒိဋ္ဌိ။ မာနဝိနိဗန္ဓာ ဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။
145. ‘‘Mama’’nti – mānavinibandhāya diṭṭhiyā katamehi aṭṭhārasahi ākārehi abhiniveso hoti? Cakkhu mamanti – abhinivesaparāmāso. Mamanti – mānavinibandhā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā ‘‘mama’’nti – mānavinibandhā diṭṭhi. Mānavinibandhā diṭṭhi micchādiṭṭhi…pe… imāni saññojanāni, na ca diṭṭhiyo.
သောတံ မမန္တိ။ပေ.။ ဃာနံ မမန္တိ။ပေ.။ ဇိဝ္ဟာ မမန္တိ။ပေ.။ ကာယော မမန္တိ။ပေ.။ မနော မမန္တိ။ပေ.။ ရူပာ မမန္တိ။ပေ.။ ဓမ္မာ မမန္တိ။ပေ.။ စက္ခုဝိညာဏံ မမန္တိ။ပေ.။ မနောဝိညာဏံ မမန္တိ အဘိနိဝေသပရာမာသော။ မမန္တိ မာနဝိနိဗန္ဓာ ဒိဋ္ဌိ။ ဒိဋ္ဌိ န ဝတ္ထု, ဝတ္ထု န ဒိဋ္ဌိ။ အညာ ဒိဋ္ဌိ, အညံ ဝတ္ထု။ ယာ စ ဒိဋ္ဌိ ယဉ္စ ဝတ္ထု – အယံ အဋ္ဌာရသမီ ‘‘မမ’’န္တိ – မာနဝိနိဗန္ဓာ ဒိဋ္ဌိ။ မာနဝိနိဗန္ဓာ ဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။ ‘‘မမ’’န္တိ – မာနဝိနိဗန္ဓာယ ဒိဋ္ဌိယာ ဣမေဟိ အဋ္ဌာရသဟိ အာကာရေဟိ အဘိနိဝေသော ဟောတိ။
Sotaṃ mamanti…pe… ghānaṃ mamanti…pe… jivhā mamanti…pe… kāyo mamanti…pe… mano mamanti…pe… rūpā mamanti…pe… dhammā mamanti…pe… cakkhuviññāṇaṃ mamanti…pe… manoviññāṇaṃ mamanti abhinivesaparāmāso. Mamanti mānavinibandhā diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ aṭṭhārasamī ‘‘mama’’nti – mānavinibandhā diṭṭhi. Mānavinibandhā diṭṭhi micchādiṭṭhi…pe… imāni saññojanāni, na ca diṭṭhiyo. ‘‘Mama’’nti – mānavinibandhāya diṭṭhiyā imehi aṭṭhārasahi ākārehi abhiniveso hoti.
သညောဇနိကာဒိဒိဋ္ဌိနိဒ္ဒေသော ဒ္ဝာဒသမော။
Saññojanikādidiṭṭhiniddeso dvādasamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၀-၁၂. သညောဇနိကာဒိဒိဋ္ဌိနိဒ္ဒေသဝဏ္ဏနာ • 10-12. Saññojanikādidiṭṭhiniddesavaṇṇanā
