| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(12) 2. ආයාචනවග්‌ගො
(12) 2. Āyācanavaggo
131. ‘‘සද්‌ධො , භික්‌ඛවෙ, භික්‌ඛු එවං සම්‌මා ආයාචමානො ආයාචෙය්‍ය – ‘තාදිසො හොමි යාදිසා සාරිපුත්‌තමොග්‌ගල්‌ලානා’ති. එසා, භික්‌ඛවෙ, තුලා එතං පමාණං මම සාවකානං භික්‌ඛූනං යදිදං සාරිපුත්‌තමොග්‌ගල්‌ලානා’’ති.
131. ‘‘Saddho , bhikkhave, bhikkhu evaṃ sammā āyācamāno āyāceyya – ‘tādiso homi yādisā sāriputtamoggallānā’ti. Esā, bhikkhave, tulā etaṃ pamāṇaṃ mama sāvakānaṃ bhikkhūnaṃ yadidaṃ sāriputtamoggallānā’’ti.
132. ‘‘සද්‌ධා, භික්‌ඛවෙ, භික්‌ඛුනී එවං සම්‌මා ආයාචමානා ආයාචෙය්‍ය – ‘තාදිසී හොමි යාදිසී ඛෙමා ච භික්‌ඛුනී උප්‌පලවණ්‌ණා චා’ති. එසා, භික්‌ඛවෙ, තුලා එතං පමාණං මම සාවිකානං භික්‌ඛුනීනං යදිදං ඛෙමා ච භික්‌ඛුනී උප්‌පලවණ්‌ණා චා’’ති.
132. ‘‘Saddhā, bhikkhave, bhikkhunī evaṃ sammā āyācamānā āyāceyya – ‘tādisī homi yādisī khemā ca bhikkhunī uppalavaṇṇā cā’ti. Esā, bhikkhave, tulā etaṃ pamāṇaṃ mama sāvikānaṃ bhikkhunīnaṃ yadidaṃ khemā ca bhikkhunī uppalavaṇṇā cā’’ti.
133. ‘‘සද්‌ධො, භික්‌ඛවෙ, උපාසකො එවං සම්‌මා ආයාචමානො ආයාචෙය්‍ය – ‘තාදිසො හොමි යාදිසො චිත්‌තො ච ගහපති හත්‌ථකො ච ආළවකො’ති. එසා, භික්‌ඛවෙ, තුලා එතං පමාණං මම සාවකානං උපාසකානං යදිදං චිත්‌තො ච ගහපති හත්‌ථකො ච ආළවකො’’ති.
133. ‘‘Saddho, bhikkhave, upāsako evaṃ sammā āyācamāno āyāceyya – ‘tādiso homi yādiso citto ca gahapati hatthako ca āḷavako’ti. Esā, bhikkhave, tulā etaṃ pamāṇaṃ mama sāvakānaṃ upāsakānaṃ yadidaṃ citto ca gahapati hatthako ca āḷavako’’ti.
134. ‘‘සද්‌ධා , භික්‌ඛවෙ, උපාසිකා එවං සම්‌මා ආයාචමානා ආයාචෙය්‍ය – ‘තාදිසී හොමි යාදිසී ඛුජ්‌ජුත්‌තරා ච උපාසිකා වෙළුකණ්‌ඩකියා 1 ච නන්‌දමාතා’ති. එසා , භික්‌ඛවෙ, තුලා එතං පමාණං මම සාවිකානං උපාසිකානං යදිදං ඛුජ්‌ජුත්‌තරා ච උපාසිකා වෙළුකණ්‌ඩකියා ච නන්‌දමාතා’’ති.
134. ‘‘Saddhā , bhikkhave, upāsikā evaṃ sammā āyācamānā āyāceyya – ‘tādisī homi yādisī khujjuttarā ca upāsikā veḷukaṇḍakiyā 2 ca nandamātā’ti. Esā , bhikkhave, tulā etaṃ pamāṇaṃ mama sāvikānaṃ upāsikānaṃ yadidaṃ khujjuttarā ca upāsikā veḷukaṇḍakiyā ca nandamātā’’ti.
135. ‘‘ද්‌වීහි, භික්‌ඛවෙ, ධම්‌මෙහි සමන්‌නාගතො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවති. කතමෙහි ද්‌වීහි? අනනුවිච්‌ච අපරියොගාහෙත්‌වා අවණ්‌ණාරහස්‌ස වණ්‌ණං භාසති, අනනුවිච්‌ච අපරියොගාහෙත්‌වා වණ්‌ණාරහස්‌ස අවණ්‌ණං භාසති. ඉමෙහි ඛො, භික්‌ඛවෙ, ද්‌වීහි ධම්‌මෙහි සමන්‌නාගතො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවතීති.
135. ‘‘Dvīhi, bhikkhave, dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Katamehi dvīhi? Ananuvicca apariyogāhetvā avaṇṇārahassa vaṇṇaṃ bhāsati, ananuvicca apariyogāhetvā vaṇṇārahassa avaṇṇaṃ bhāsati. Imehi kho, bhikkhave, dvīhi dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavatīti.
‘‘ද්‌වීහි , භික්‌ඛවෙ, ධම්‌මෙහි සමන්‌නාගතො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවති. කතමෙහි ද්‌වීහි? අනුවිච්‌ච පරියොගාහෙත්‌වා අවණ්‌ණාරහස්‌ස අවණ්‌ණං භාසති, අනුවිච්‌ච පරියොගාහෙත්‌වා වණ්‌ණාරහස්‌ස වණ්‌ණං භාසති. ඉමෙහි ඛො, භික්‌ඛවෙ, ද්‌වීහි ධම්‌මෙහි සමන්‌නාගතො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවතී’’ති.
‘‘Dvīhi , bhikkhave, dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavati. Katamehi dvīhi? Anuvicca pariyogāhetvā avaṇṇārahassa avaṇṇaṃ bhāsati, anuvicca pariyogāhetvā vaṇṇārahassa vaṇṇaṃ bhāsati. Imehi kho, bhikkhave, dvīhi dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavatī’’ti.
136. ‘‘ද්‌වීහි, භික්‌ඛවෙ, ධම්‌මෙහි සමන්‌නාගතො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවති. කතමෙහි ද්‌වීහි? අනනුවිච්‌ච අපරියොගාහෙත්‌වා අප්‌පසාදනීයෙ ඨානෙ පසාදං උපදංසෙති, අනනුවිච්‌ච අපරියොගාහෙත්‌වා පසාදනීයෙ ඨානෙ අප්‌පසාදං උපදංසෙති. ඉමෙහි ඛො, භික්‌ඛවෙ, ද්‌වීහි ධම්‌මෙහි සමන්‌නාගතො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවතීති.
136. ‘‘Dvīhi, bhikkhave, dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Katamehi dvīhi? Ananuvicca apariyogāhetvā appasādanīye ṭhāne pasādaṃ upadaṃseti, ananuvicca apariyogāhetvā pasādanīye ṭhāne appasādaṃ upadaṃseti. Imehi kho, bhikkhave, dvīhi dhammehi samannāgato bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavatīti.
‘‘ද්‌වීහි , භික්‌ඛවෙ, ධම්‌මෙහි සමන්‌නාගතො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවති. කතමෙහි ද්‌වීහි? අනුවිච්‌ච පරියොගාහෙත්‌වා අප්‌පසාදනීයෙ ඨානෙ අප්‌පසාදං උපදංසෙති, අනුවිච්‌ච පරියොගාහෙත්‌වා පසාදනීයෙ ඨානෙ පසාදං උපදංසෙති. ඉමෙහි ඛො, භික්‌ඛවෙ, ද්‌වීහි ධම්‌මෙහි සමන්‌නාගතො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවතී’’ති.
‘‘Dvīhi , bhikkhave, dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavati. Katamehi dvīhi? Anuvicca pariyogāhetvā appasādanīye ṭhāne appasādaṃ upadaṃseti, anuvicca pariyogāhetvā pasādanīye ṭhāne pasādaṃ upadaṃseti. Imehi kho, bhikkhave, dvīhi dhammehi samannāgato paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavatī’’ti.
137. ‘‘ද්‌වීසු, භික්‌ඛවෙ, මිච්‌ඡාපටිපජ්‌ජමානො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං , බහුඤ්‌ච අපුඤ්‌ඤං පසවති. කතමෙසු ද්‌වීසු? මාතරි ච පිතරි ච. ඉමෙසු ඛො, භික්‌ඛවෙ, ද්‌වීසු මිච්‌ඡාපටිපජ්‌ජමානො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවතීති.
137. ‘‘Dvīsu, bhikkhave, micchāpaṭipajjamāno bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ , bahuñca apuññaṃ pasavati. Katamesu dvīsu? Mātari ca pitari ca. Imesu kho, bhikkhave, dvīsu micchāpaṭipajjamāno bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavatīti.
‘‘ද්‌වීසු, භික්‌ඛවෙ, සම්‌මාපටිපජ්‌ජමානො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවති. කතමෙසු ද්‌වීසු? මාතරි ච පිතරි ච. ඉමෙසු ඛො, භික්‌ඛවෙ, ද්‌වීසු සම්‌මාපටිපජ්‌ජමානො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවතී’’ති.
‘‘Dvīsu, bhikkhave, sammāpaṭipajjamāno paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavati. Katamesu dvīsu? Mātari ca pitari ca. Imesu kho, bhikkhave, dvīsu sammāpaṭipajjamāno paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavatī’’ti.
138. ‘‘ද්‌වීසු, භික්‌ඛවෙ, මිච්‌ඡාපටිපජ්‌ජමානො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවති. කතමෙසු ද්‌වීසු? තථාගතෙ ච තථාගතසාවකෙ ච. ඉමෙසු ඛො, භික්‌ඛවෙ, මිච්‌ඡාපටිපජ්‌ජමානො බාලො අබ්‍යත්‌තො අසප්‌පුරිසො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවතීති.
138. ‘‘Dvīsu, bhikkhave, micchāpaṭipajjamāno bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Katamesu dvīsu? Tathāgate ca tathāgatasāvake ca. Imesu kho, bhikkhave, micchāpaṭipajjamāno bālo abyatto asappuriso khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavatīti.
‘‘ද්‌වීසු , භික්‌ඛවෙ, සම්‌මාපටිපජ්‌ජමානො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවති. කතමෙසු ද්‌වීසු? තථාගතෙ ච තථාගතසාවකෙ ච. ඉමෙසු ඛො, භික්‌ඛවෙ, ද්‌වීසු සම්‌මාපටිපජ්‌ජමානො පණ්‌ඩිතො වියත්‌තො සප්‌පුරිසො අක්‌ඛතං අනුපහතං අත්‌තානං පරිහරති, අනවජ්‌ජො ච හොති අනනුවජ්‌ජො ච විඤ්‌ඤූනං, බහුඤ්‌ච පුඤ්‌ඤං පසවතී’’ති.
‘‘Dvīsu , bhikkhave, sammāpaṭipajjamāno paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavati. Katamesu dvīsu? Tathāgate ca tathāgatasāvake ca. Imesu kho, bhikkhave, dvīsu sammāpaṭipajjamāno paṇḍito viyatto sappuriso akkhataṃ anupahataṃ attānaṃ pariharati, anavajjo ca hoti ananuvajjo ca viññūnaṃ, bahuñca puññaṃ pasavatī’’ti.
139. ‘‘ද්‌වෙමෙ, භික්‌ඛවෙ, ධම්‌මා. කතමෙ ද්‌වෙ? සචිත්‌තවොදානඤ්‌ච න ච කිඤ්‌චි ලොකෙ උපාදියති. ඉමෙ ඛො, භික්‌ඛවෙ, ද්‌වෙ ධම්‌මා’’ති.
139. ‘‘Dveme, bhikkhave, dhammā. Katame dve? Sacittavodānañca na ca kiñci loke upādiyati. Ime kho, bhikkhave, dve dhammā’’ti.
140. ‘‘ද්‌වෙමෙ, භික්‌ඛවෙ, ධම්‌මා. කතමෙ ද්‌වෙ? කොධො ච උපනාහො ච. ඉමෙ ඛො, භික්‌ඛවෙ, ද්‌වෙ ධම්‌මා’’ති.
140. ‘‘Dveme, bhikkhave, dhammā. Katame dve? Kodho ca upanāho ca. Ime kho, bhikkhave, dve dhammā’’ti.
141. ‘‘ද්‌වෙමෙ, භික්‌ඛවෙ, ධම්‌මා. කතමෙ ද්‌වෙ? කොධවිනයො ච උපනාහවිනයො ච. ඉමෙ ඛො, භික්‌ඛවෙ, ද්‌වෙ ධම්‌මා’’ති.
141. ‘‘Dveme, bhikkhave, dhammā. Katame dve? Kodhavinayo ca upanāhavinayo ca. Ime kho, bhikkhave, dve dhammā’’ti.
ආයාචනවග්‌ගො දුතියො.
Āyācanavaggo dutiyo.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / (12) 2. ආයාචනවග්‌ගවණ්‌ණනා • (12) 2. Āyācanavaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (12) 2. ආයාචනවග්‌ගවණ්‌ණනා • (12) 2. Āyācanavaggavaṇṇanā
