| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. এসনাৰগ্গো
4. Esanāvaggo
১-১০. এসনাদিসুত্তদসকং
1-10. Esanādisuttadasakaṃ
৬৮৫-৬৯৪. ‘‘তিস্সো ইমা, ভিক্খৰে, এসনা। কতমা তিস্সো? কামেসনা, ভৰেসনা, ব্রহ্মচরিযেসনা – ইমা খো, ভিক্খৰে, তিস্সো এসনা। ইমাসং খো, ভিক্খৰে, তিস্সন্নং এসনানং অভিঞ্ঞায পরিঞ্ঞায পরিক্খযায পহানায চত্তারো সম্মপ্পধানা ভাৰেতব্বা। কতমে চত্তারো? ইধ, ভিক্খৰে, ভিক্খু অনুপ্পন্নানং…পে॰… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি। ইমাসং খো, ভিক্খৰে, তিস্সন্নং এসনানং অভিঞ্ঞায পরিঞ্ঞায পরিক্খযায পহানায ইমে চত্তারো সম্মপ্পধানা ভাৰেতব্বা’’তি। (ৰিত্থারেতব্বং)। দসমং।
685-694. ‘‘Tisso imā, bhikkhave, esanā. Katamā tisso? Kāmesanā, bhavesanā, brahmacariyesanā – imā kho, bhikkhave, tisso esanā. Imāsaṃ kho, bhikkhave, tissannaṃ esanānaṃ abhiññāya pariññāya parikkhayāya pahānāya cattāro sammappadhānā bhāvetabbā. Katame cattāro? Idha, bhikkhave, bhikkhu anuppannānaṃ…pe… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati. Imāsaṃ kho, bhikkhave, tissannaṃ esanānaṃ abhiññāya pariññāya parikkhayāya pahānāya ime cattāro sammappadhānā bhāvetabbā’’ti. (Vitthāretabbaṃ). Dasamaṃ.
এসনাৰগ্গো চতুত্থো।
Esanāvaggo catuttho.
তস্সুদ্দানং –
Tassuddānaṃ –
এসনা ৰিধা আসৰো, ভৰো চ দুক্খতা তিস্সো।
Esanā vidhā āsavo, bhavo ca dukkhatā tisso;
খিলং মলঞ্চ নীঘো চ, ৰেদনা তণ্হা তসিনা চাতি॥
Khilaṃ malañca nīgho ca, vedanā taṇhā tasinā cāti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. সম্মপ্পধানসংযুত্তৰণ্ণনা • 5. Sammappadhānasaṃyuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. সম্মপ্পধানসংযুত্তৰণ্ণনা • 5. Sammappadhānasaṃyuttavaṇṇanā
