| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༧. ཨོགྷཝགྒོ
17. Oghavaggo
༡-༡༠. ཨོགྷཱདིསུཏྟདསཀཾ
1-10. Oghādisuttadasakaṃ
༦༤༡-༦༥༠. ‘‘པཉྩིམཱནི , བྷིཀྑཝེ, ཨུདྡྷམྦྷཱགིཡཱནི སཾཡོཛནཱནི། ཀཏམཱནི པཉྩ? རཱུཔརཱགོ, ཨརཱུཔརཱགོ, མཱནོ, ཨུདྡྷཙྩཾ, ཨཝིཛྫཱ – ཨིམཱནི ཁོ, བྷིཀྑཝེ, པཉྩུདྡྷམྦྷཱགིཡཱནི སཾཡོཛནཱནི། ཨིམེསཾ ཁོ, བྷིཀྑཝེ, པཉྩནྣཾ ཨུདྡྷམྦྷཱགིཡཱནཾ སཾཡོཛནཱནཾ ཨབྷིཉྙཱཡ པརིཉྙཱཡ པརིཀྑཡཱཡ པཧཱནཱཡ པཉྩིནྡྲིཡཱནི བྷཱཝེཏབྦཱནི། ཀཏམཱནི པཉྩ? ཨིདྷ, བྷིཀྑཝེ, བྷིཀྑུ སདྡྷིནྡྲིཡཾ བྷཱཝེཏི རཱགཝིནཡཔརིཡོསཱནཾ དོསཝིནཡཔརིཡོསཱནཾ མོཧཝིནཡཔརིཡོསཱནཾ། ཝཱིརིཡིནྡྲིཡཾ …པེ॰… སཏིནྡྲིཡཾ… སམཱདྷིནྡྲིཡཾ … པཉྙིནྡྲིཡཾ བྷཱཝེཏི རཱགཝིནཡཔརིཡོསཱནཾ དོསཝིནཡཔརིཡོསཱནཾ མོཧཝིནཡཔརིཡོསཱནཾ། ཨིམེསཾ ཁོ, བྷིཀྑཝེ, པཉྩནྣཾ ཨུདྡྷམྦྷཱགིཡཱནཾ སཾཡོཛནཱནཾ ཨབྷིཉྙཱཡ པརིཉྙཱཡ པརིཀྑཡཱཡ པཧཱནཱཡ ཨིམཱནི པཉྩིནྡྲིཡཱནི བྷཱཝེཏབྦཱནཱི’’ཏི།
641-650. ‘‘Pañcimāni , bhikkhave, uddhambhāgiyāni saṃyojanāni. Katamāni pañca? Rūparāgo, arūparāgo, māno, uddhaccaṃ, avijjā – imāni kho, bhikkhave, pañcuddhambhāgiyāni saṃyojanāni. Imesaṃ kho, bhikkhave, pañcannaṃ uddhambhāgiyānaṃ saṃyojanānaṃ abhiññāya pariññāya parikkhayāya pahānāya pañcindriyāni bhāvetabbāni. Katamāni pañca? Idha, bhikkhave, bhikkhu saddhindriyaṃ bhāveti rāgavinayapariyosānaṃ dosavinayapariyosānaṃ mohavinayapariyosānaṃ. Vīriyindriyaṃ …pe… satindriyaṃ… samādhindriyaṃ … paññindriyaṃ bhāveti rāgavinayapariyosānaṃ dosavinayapariyosānaṃ mohavinayapariyosānaṃ. Imesaṃ kho, bhikkhave, pañcannaṃ uddhambhāgiyānaṃ saṃyojanānaṃ abhiññāya pariññāya parikkhayāya pahānāya imāni pañcindriyāni bhāvetabbānī’’ti.
ཨོགྷཝགྒོ སཏྟརསམོ།
Oghavaggo sattarasamo.
ཏསྶུདྡཱནཾ –
Tassuddānaṃ –
ཨོགྷོ ཡོགོ ཨུཔཱདཱནཾ, གནྠཱ ཨནུསཡེན ཙ།
Ogho yogo upādānaṃ, ganthā anusayena ca;
ཀཱམགུཎཱ ནཱིཝརཎཱ, ཁནྡྷཱ ཨོརུདྡྷམྦྷཱགིཡཱཏི༎
Kāmaguṇā nīvaraṇā, khandhā oruddhambhāgiyāti.
ཨིནྡྲིཡསཾཡུཏྟཾ ཙཏུཏྠཾ།
Indriyasaṃyuttaṃ catutthaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. བོདྷིཔཀྑིཡཝགྒོ • 7. Bodhipakkhiyavaggo
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༧. བོདྷིཔཀྑིཡཝགྒཝཎྞནཱ • 7. Bodhipakkhiyavaggavaṇṇanā
