| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. බලසංයුත්‌තං
6. Balasaṃyuttaṃ
1. ගඞ්‌ගාපෙය්‍යාලවග්‌ගො
1. Gaṅgāpeyyālavaggo
1-12. බලාදිසුත්‌තද්‌වාදසකං
1-12. Balādisuttadvādasakaṃ
705-716. ‘‘පඤ්‌චිමානි , භික්‌ඛවෙ, බලානි. කතමානි පඤ්‌ච? සද්‌ධාබලං, වීරියබලං, සතිබලං, සමාධිබලං, පඤ්‌ඤාබලං – ඉමානි ඛො, භික්‌ඛවෙ, පඤ්‌ච බලානීති. සෙය්‍යථාපි, භික්‌ඛවෙ, ගඞ්‌ගා නදී පාචීනනින්‌නා පාචීනපොණා පාචීනපබ්‌භාරා; එවමෙව ඛො, භික්‌ඛවෙ, භික්‌ඛු පඤ්‌ච බලානි භාවෙන්‌තො පඤ්‌චබලානි බහුලීකරොන්‌තො නිබ්‌බානනින්‌නො හොති නිබ්‌බානපොණො නිබ්‌බානපබ්‌භාරො. කථඤ්‌ච, භික්‌ඛවෙ, භික්‌ඛු පඤ්‌ච බලානි භාවෙන්‌තො පඤ්‌ච බලානි බහුලීකරොන්‌තො නිබ්‌බානනින්‌නො හොති නිබ්‌බානපොණො නිබ්‌බානපබ්‌භාරො? ඉධ, භික්‌ඛවෙ, භික්‌ඛු සද්‌ධාබලං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං, වීරියබලං…පෙ.… සතිබලං… සමාධිබලං… පඤ්‌ඤාබලං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං. එවං ඛො, භික්‌ඛවෙ, භික්‌ඛු පඤ්‌ච බලානි භාවෙන්‌තො පඤ්‌ච බලානි බහුලීකරොන්‌තො නිබ්‌බානනින්‌නො හොති නිබ්‌බානපොණො නිබ්‌බානපබ්‌භාරො’’ති. ද්‌වාදසමං.
705-716. ‘‘Pañcimāni , bhikkhave, balāni. Katamāni pañca? Saddhābalaṃ, vīriyabalaṃ, satibalaṃ, samādhibalaṃ, paññābalaṃ – imāni kho, bhikkhave, pañca balānīti. Seyyathāpi, bhikkhave, gaṅgā nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu pañca balāni bhāvento pañcabalāni bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave, bhikkhu pañca balāni bhāvento pañca balāni bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu saddhābalaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ, vīriyabalaṃ…pe… satibalaṃ… samādhibalaṃ… paññābalaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu pañca balāni bhāvento pañca balāni bahulīkaronto nibbānaninno hoti nibbānapoṇo nibbānapabbhāro’’ti. Dvādasamaṃ.
ගඞ්‌ගාපෙය්‍යාලවග්‌ගො පඨමො.
Gaṅgāpeyyālavaggo paṭhamo.
තස්‌සුද්‌දානං –
Tassuddānaṃ –
ඡ පාචීනතො නින්‌නා, ඡ නින්‌නා ච සමුද්‌දතො;
Cha pācīnato ninnā, cha ninnā ca samuddato;
ද්‌වෙතෙ ඡ ද්‌වාදස හොන්‌ති, වග්‌ගො තෙන පවුච්‌චතීති.
Dvete cha dvādasa honti, vaggo tena pavuccatīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. බලසංයුත්‌තවණ්‌ණනා • 6. Balasaṃyuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. බලසංයුත්‌තවණ්‌ණනා • 6. Balasaṃyuttavaṇṇanā
