| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๔. คงฺคาเปยฺยาลวโคฺค
4. Gaṅgāpeyyālavaggo
๑-๑๒. คงฺคานทีอาทิสุตฺตทฺวาทสกํ
1-12. Gaṅgānadīādisuttadvādasakaṃ
๘๔๕-๘๕๖. ‘‘เสยฺยถาปิ , ภิกฺขเว, คงฺคา นที ปาจีนนินฺนา ปาจีนโปณา ปาจีนปพฺภารา; เอวเมว โข, ภิกฺขเว, ภิกฺขุ จตฺตาโร อิทฺธิปาเท ภาเวโนฺต จตฺตาโร อิทฺธิปาเท พหุลีกโรโนฺต นิพฺพานนิโนฺน โหติ นิพฺพานโปโณ นิพฺพานปพฺภาโรฯ กถญฺจ, ภิกฺขเว, ภิกฺขุ จตฺตาโร อิทฺธิปาเท ภาเวโนฺต จตฺตาโร อิทฺธิปาเท พหุลีกโรโนฺต นิพฺพานนิโนฺน โหติ นิพฺพานโปโณ นิพฺพานปพฺภาโร? อิธ, ภิกฺขเว, ภิกฺขุ ฉนฺทสมาธิปฺปธานสงฺขารสมนฺนาคตํ อิทฺธิปาทํ ภาเวติ, วีริยสมาธิ…เป.… จิตฺตสมาธิ…เป.… วีมํสาสมาธิปฺปธานสงฺขารสมนฺนาคตํ อิทฺธิปาทํ ภาเวติฯ
845-856. ‘‘Seyyathāpi , bhikkhave, gaṅgā nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu cattāro iddhipāde bhāvento cattāro iddhipāde bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave, bhikkhu cattāro iddhipāde bhāvento cattāro iddhipāde bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti.
‘‘เอวํ โข, ภิกฺขเว, ภิกฺขุ จตฺตาโร อิทฺธิปาเท ภาเวโนฺต จตฺตาโร อิทฺธิปาเท พหุลีกโรโนฺต นิพฺพานนิโนฺน โหติ นิพฺพานโปโณ นิพฺพานปพฺภาโร’’ติฯ ทฺวาทสมํฯ
‘‘Evaṃ kho, bhikkhave, bhikkhu cattāro iddhipāde bhāvento cattāro iddhipāde bahulīkaronto nibbānaninno hoti nibbānapoṇo nibbānapabbhāro’’ti. Dvādasamaṃ.
คงฺคาเปยฺยาลวโคฺค จตุโตฺถฯ
Gaṅgāpeyyālavaggo catuttho.
ตสฺสุทฺทานํ –
Tassuddānaṃ –
ฉ ปาจีนโต นินฺนา, ฉ นินฺนา จ สมุทฺทโต;
Cha pācīnato ninnā, cha ninnā ca samuddato;
เทฺวเต ฉ ทฺวาทส โหนฺติ, วโคฺค เตน ปวุจฺจตีติฯ
Dvete cha dvādasa honti, vaggo tena pavuccatīti.
อปฺปมาทวโคฺค วิตฺถาเรตโพฺพฯ
Appamādavaggo vitthāretabbo.
ตสฺสุทฺทานํ –
Tassuddānaṃ –
ตถาคตํ ปทํ กูฎํ, มูลํ สาโร จ วสฺสิกํ;
Tathāgataṃ padaṃ kūṭaṃ, mūlaṃ sāro ca vassikaṃ;
ราชา จนฺทิมสูริยา, วเตฺถน ทสมํ ปทนฺติฯ
Rājā candimasūriyā, vatthena dasamaṃ padanti.
พลกรณียวโคฺค วิตฺถาเรตโพฺพฯ
Balakaraṇīyavaggo vitthāretabbo.
ตสฺสุทฺทานํ –
Tassuddānaṃ –
พลํ พีชญฺจ นาโค จ, รุโกฺข กุเมฺภน สูกิยา;
Balaṃ bījañca nāgo ca, rukkho kumbhena sūkiyā;
อากาเสน จ เทฺว เมฆา, นาวา อาคนฺตุกา นทีติฯ
Ākāsena ca dve meghā, nāvā āgantukā nadīti.
เอสนาวโคฺค วิตฺถาเรตโพฺพฯ
Esanāvaggo vitthāretabbo.
ตสฺสุทฺทานํ –
Tassuddānaṃ –
เอสนา วิธา อาสโว, ภโว จ ทุกฺขตา ติโสฺส;
Esanā vidhā āsavo, bhavo ca dukkhatā tisso;
ขิลํ มลญฺจ นีโฆ จ, เวทนา ตณฺหา ตสินา จาติฯ
Khilaṃ malañca nīgho ca, vedanā taṇhā tasinā cāti.
