| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៤. គង្គាបេយ្យាលវគ្គោ
4. Gaṅgāpeyyālavaggo
១-១២. គង្គានទីអាទិសុត្តទ្វាទសកំ
1-12. Gaṅgānadīādisuttadvādasakaṃ
៨៤៥-៨៥៦. ‘‘សេយ្យថាបិ , ភិក្ខវេ, គង្គា នទី បាចីននិន្នា បាចីនបោណា បាចីនបព្ភារា; ឯវមេវ ខោ, ភិក្ខវេ, ភិក្ខុ ចត្តារោ ឥទ្ធិបាទេ ភាវេន្តោ ចត្តារោ ឥទ្ធិបាទេ ពហុលីករោន្តោ និព្ពាននិន្នោ ហោតិ និព្ពានបោណោ និព្ពានបព្ភារោ។ កថញ្ច, ភិក្ខវេ, ភិក្ខុ ចត្តារោ ឥទ្ធិបាទេ ភាវេន្តោ ចត្តារោ ឥទ្ធិបាទេ ពហុលីករោន្តោ និព្ពាននិន្នោ ហោតិ និព្ពានបោណោ និព្ពានបព្ភារោ? ឥធ, ភិក្ខវេ, ភិក្ខុ ឆន្ទសមាធិប្បធានសង្ខារសមន្នាគតំ ឥទ្ធិបាទំ ភាវេតិ, វីរិយសមាធិ…បេ.… ចិត្តសមាធិ…បេ.… វីមំសាសមាធិប្បធានសង្ខារសមន្នាគតំ ឥទ្ធិបាទំ ភាវេតិ។
845-856. ‘‘Seyyathāpi , bhikkhave, gaṅgā nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu cattāro iddhipāde bhāvento cattāro iddhipāde bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave, bhikkhu cattāro iddhipāde bhāvento cattāro iddhipāde bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti.
‘‘ឯវំ ខោ, ភិក្ខវេ, ភិក្ខុ ចត្តារោ ឥទ្ធិបាទេ ភាវេន្តោ ចត្តារោ ឥទ្ធិបាទេ ពហុលីករោន្តោ និព្ពាននិន្នោ ហោតិ និព្ពានបោណោ និព្ពានបព្ភារោ’’តិ។ ទ្វាទសមំ។
‘‘Evaṃ kho, bhikkhave, bhikkhu cattāro iddhipāde bhāvento cattāro iddhipāde bahulīkaronto nibbānaninno hoti nibbānapoṇo nibbānapabbhāro’’ti. Dvādasamaṃ.
គង្គាបេយ្យាលវគ្គោ ចតុត្ថោ។
Gaṅgāpeyyālavaggo catuttho.
តស្សុទ្ទានំ –
Tassuddānaṃ –
ឆ បាចីនតោ និន្នា, ឆ និន្នា ច សមុទ្ទតោ;
Cha pācīnato ninnā, cha ninnā ca samuddato;
ទ្វេតេ ឆ ទ្វាទស ហោន្តិ, វគ្គោ តេន បវុច្ចតីតិ។
Dvete cha dvādasa honti, vaggo tena pavuccatīti.
អប្បមាទវគ្គោ វិត្ថារេតព្ពោ។
Appamādavaggo vitthāretabbo.
តស្សុទ្ទានំ –
Tassuddānaṃ –
តថាគតំ បទំ កូដំ, មូលំ សារោ ច វស្សិកំ;
Tathāgataṃ padaṃ kūṭaṃ, mūlaṃ sāro ca vassikaṃ;
រាជា ចន្ទិមសូរិយា, វត្ថេន ទសមំ បទន្តិ។
Rājā candimasūriyā, vatthena dasamaṃ padanti.
ពលករណីយវគ្គោ វិត្ថារេតព្ពោ។
Balakaraṇīyavaggo vitthāretabbo.
តស្សុទ្ទានំ –
Tassuddānaṃ –
ពលំ ពីជញ្ច នាគោ ច, រុក្ខោ កុម្ភេន សូកិយា;
Balaṃ bījañca nāgo ca, rukkho kumbhena sūkiyā;
អាកាសេន ច ទ្វេ មេឃា, នាវា អាគន្តុកា នទីតិ។
Ākāsena ca dve meghā, nāvā āgantukā nadīti.
ឯសនាវគ្គោ វិត្ថារេតព្ពោ។
Esanāvaggo vitthāretabbo.
តស្សុទ្ទានំ –
Tassuddānaṃ –
ឯសនា វិធា អាសវោ, ភវោ ច ទុក្ខតា តិស្សោ;
Esanā vidhā āsavo, bhavo ca dukkhatā tisso;
ខិលំ មលញ្ច នីឃោ ច, វេទនា តណ្ហា តសិនា ចាតិ។
Khilaṃ malañca nīgho ca, vedanā taṇhā tasinā cāti.
