| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៨. គង្គាបេយ្យាលវគ្គោ
8. Gaṅgāpeyyālavaggo
១-១២. បាចីនាទិសុត្តទ្វាទសកំ
1-12. Pācīnādisuttadvādasakaṃ
៥៤១-៥៥២. ‘‘សេយ្យថាបិ , ភិក្ខវេ, គង្គា នទី បាចីននិន្នា បាចីនបោណា បាចីនបព្ភារា; ឯវមេវ ខោ, ភិក្ខវេ, ភិក្ខុ បញ្ចិន្ទ្រិយានិ ភាវេន្តោ បញ្ចិន្ទ្រិយានិ ពហុលីករោន្តោ និព្ពាននិន្នោ ហោតិ និព្ពានបោណោ និព្ពានបព្ភារោ។ កថញ្ច, ភិក្ខវេ, ភិក្ខុ បញ្ចិន្ទ្រិយានិ ភាវេន្តោ បញ្ចិន្ទ្រិយានិ ពហុលីករោន្តោ និព្ពាននិន្នោ ហោតិ និព្ពានបោណោ និព្ពានបព្ភារោ? ឥធ, ភិក្ខវេ, ភិក្ខុ សទ្ធិន្ទ្រិយំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមិំ, វីរិយិន្ទ្រិយំ…បេ.… សតិន្ទ្រិយំ… សមាធិន្ទ្រិយំ… បញ្ញិន្ទ្រិយំ ភាវេតិ វិវេកនិស្សិតំ វិរាគនិស្សិតំ និរោធនិស្សិតំ វោស្សគ្គបរិណាមិំ។ ឯវំ ខោ, ភិក្ខវេ, ភិក្ខុ បញ្ចិន្ទ្រិយានិ ភាវេន្តោ បញ្ចិន្ទ្រិយានិ ពហុលីករោន្តោ និព្ពាននិន្នោ ហោតិ និព្ពានបោណោ និព្ពានបព្ភារោ’’តិ។ ទ្វាទសមំ។
541-552. ‘‘Seyyathāpi , bhikkhave, gaṅgā nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu pañcindriyāni bhāvento pañcindriyāni bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave, bhikkhu pañcindriyāni bhāvento pañcindriyāni bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu saddhindriyaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ, vīriyindriyaṃ…pe… satindriyaṃ… samādhindriyaṃ… paññindriyaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu pañcindriyāni bhāvento pañcindriyāni bahulīkaronto nibbānaninno hoti nibbānapoṇo nibbānapabbhāro’’ti. Dvādasamaṃ.
គង្គាបេយ្យាលវគ្គោ អដ្ឋមោ។
Gaṅgāpeyyālavaggo aṭṭhamo.
តស្សុទ្ទានំ –
Tassuddānaṃ –
ឆ បាចីនតោ និន្នា, ឆ និន្នា ច សមុទ្ទតោ;
Cha pācīnato ninnā, cha ninnā ca samuddato;
ទ្វេតេ ឆ ទ្វាទស ហោន្តិ, វគ្គោ តេន បវុច្ចតីតិ។
Dvete cha dvādasa honti, vaggo tena pavuccatīti.
អប្បមាទវគ្គោ វិត្ថារេតព្ពោ។
Appamādavaggo vitthāretabbo.
តស្សុទ្ទានំ –
Tassuddānaṃ –
តថាគតំ បទំ កូដំ, មូលំ សារេន វស្សិកំ;
Tathāgataṃ padaṃ kūṭaṃ, mūlaṃ sārena vassikaṃ;
រាជា ចន្ទិមសូរិយា, វត្ថេន ទសមំ បទន្តិ។
Rājā candimasūriyā, vatthena dasamaṃ padanti.
ពលករណីយវគ្គោ វិត្ថារេតព្ពោ។
Balakaraṇīyavaggo vitthāretabbo.
តស្សុទ្ទានំ –
Tassuddānaṃ –
ពលំ ពីជញ្ច នាគោ ច, រុក្ខោ កុម្ភេន សូកិយា;
Balaṃ bījañca nāgo ca, rukkho kumbhena sūkiyā;
អាកាសេន ច ទ្វេ មេឃា, នាវា អាគន្តុកា នទីតិ។
Ākāsena ca dve meghā, nāvā āgantukā nadīti.
ឯសនាវគ្គោ វិត្ថារេតព្ពោ។
Esanāvaggo vitthāretabbo.
តស្សុទ្ទានំ –
Tassuddānaṃ –
ឯសនា វិធា អាសវោ, ភវោ ច ទុក្ខតា តិស្សោ;
Esanā vidhā āsavo, bhavo ca dukkhatā tisso;
ខិលំ មលញ្ច នីឃោ ច, វេទនា តណ្ហា តសិនា ចាតិ។
Khilaṃ malañca nīgho ca, vedanā taṇhā tasinā cāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧. ពោធិបក្ខិយវគ្គោ • 7. Bodhipakkhiyavaggo
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៧. ពោធិបក្ខិយវគ្គវណ្ណនា • 7. Bodhipakkhiyavaggavaṇṇanā
