| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. තතියගමනවග්‌ගො
3. Tatiyagamanavaggo
1. නවාතසුත්‌තං
1-25. Navātasuttaṃ
250. සාවත්‌ථිනිදානං . ‘‘කිස්‌මිං නු ඛො, භික්‌ඛවෙ, සති, කිං උපාදාය, කිං අභිනිවිස්‌ස එවං දිට්‌ඨි උප්‌පජ්‌ජති – ‘න වාතා වායන්‌ති, න නජ්‌ජො සන්‌දන්‌ති, න ගබ්‌භිනියො විජායන්‌ති, න චන්‌දිමසූරියා උදෙන්‌ති වා අපෙන්‌ති වා එසිකට්‌ඨායිට්‌ඨිතා’’’ති? භගවංමූලකා නො, භන්‌තෙ, ධම්‌මා…පෙ.….
250. Sāvatthinidānaṃ . ‘‘Kismiṃ nu kho, bhikkhave, sati, kiṃ upādāya, kiṃ abhinivissa evaṃ diṭṭhi uppajjati – ‘na vātā vāyanti, na najjo sandanti, na gabbhiniyo vijāyanti, na candimasūriyā udenti vā apenti vā esikaṭṭhāyiṭṭhitā’’’ti? Bhagavaṃmūlakā no, bhante, dhammā…pe….
‘‘රූපෙ ඛො, භික්‌ඛවෙ, සති, රූපං උපාදාය, රූපං අභිනිවිස්‌ස එවං දිට්‌ඨි උප්‌පජ්‌ජති – න වාතා වායන්‌ති…පෙ.… වෙදනාය සති… සඤ්‌ඤාය සති… සඞ්‌ඛාරෙසු සති… විඤ්‌ඤාණෙ සති, විඤ්‌ඤාණං උපාදාය, විඤ්‌ඤාණං අභිනිවිස්‌ස එවං දිට්‌ඨි උප්‌පජ්‌ජති – ‘න වාතා වායන්‌ති…පෙ.… එසිකට්‌ඨායිට්‌ඨිතා’’’ති.
‘‘Rūpe kho, bhikkhave, sati, rūpaṃ upādāya, rūpaṃ abhinivissa evaṃ diṭṭhi uppajjati – na vātā vāyanti…pe… vedanāya sati… saññāya sati… saṅkhāresu sati… viññāṇe sati, viññāṇaṃ upādāya, viññāṇaṃ abhinivissa evaṃ diṭṭhi uppajjati – ‘na vātā vāyanti…pe… esikaṭṭhāyiṭṭhitā’’’ti.
‘‘තං කිං මඤ්‌ඤථ, භික්‌ඛවෙ, රූපං නිච්‌චං වා අනිච්‌චං වා’’ති? ‘‘අනිච්‌චං, භන්‌තෙ’’…පෙ.… විපරිණාමධම්‌මං, අපි නු තං අනුපාදාය එවං දිට්‌ඨි උප්‌පජ්‌ජෙය්‍ය – ‘න වාතා වායන්‌ති…පෙ.… එසිකට්‌ඨායිට්‌ඨිතා’’’ති? ‘‘නො හෙතං, භන්‌තෙ’’. ‘‘ඉති ඛො, භික්‌ඛවෙ, යදනිච්‌චං තං දුක්‌ඛං. තස්‌මිං සති, තදුපාදාය, එවං දිට්‌ඨි උප්‌පජ්‌ජති – ‘න වාතා වායන්‌ති, න නජ්‌ජො සන්‌දන්‌ති, න ගබ්‌භිනියො විජායන්‌ති, න චන්‌දිමසූරියා උදෙන්‌ති වා අපෙන්‌ති වා එසිකට්‌ඨායිට්‌ඨිතා’’’ති. ‘‘වෙදනා… සඤ්‌ඤා… සඞ්‌ඛාරා… විඤ්‌ඤාණං නිච්‌චං වා අනිච්‌චං වා’’ති? ‘‘අනිච්‌චං , භන්‌තෙ’’…පෙ.… විපරිණාමධම්‌මං, අපි නු තං අනුපාදාය එවං දිට්‌ඨි උප්‌පජ්‌ජෙය්‍ය – ‘න වාතා වායන්‌ති…පෙ.… එසිකට්‌ඨායිට්‌ඨිතා’’’ති? ‘‘නො හෙතං, භන්‌තෙ’’. ‘‘ඉති ඛො, භික්‌ඛවෙ, යදනිච්‌චං තං දුක්‌ඛං. තස්‌මිං සති, තදුපාදාය එවං දිට්‌ඨි උප්‌පජ්‌ජති – ‘න වාතා වායන්‌ති…පෙ.… එසිකට්‌ඨායිට්‌ඨිතා’’’ති. පඨමං.
‘‘Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ, bhante’’…pe… vipariṇāmadhammaṃ, api nu taṃ anupādāya evaṃ diṭṭhi uppajjeyya – ‘na vātā vāyanti…pe… esikaṭṭhāyiṭṭhitā’’’ti? ‘‘No hetaṃ, bhante’’. ‘‘Iti kho, bhikkhave, yadaniccaṃ taṃ dukkhaṃ. Tasmiṃ sati, tadupādāya, evaṃ diṭṭhi uppajjati – ‘na vātā vāyanti, na najjo sandanti, na gabbhiniyo vijāyanti, na candimasūriyā udenti vā apenti vā esikaṭṭhāyiṭṭhitā’’’ti. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ , bhante’’…pe… vipariṇāmadhammaṃ, api nu taṃ anupādāya evaṃ diṭṭhi uppajjeyya – ‘na vātā vāyanti…pe… esikaṭṭhāyiṭṭhitā’’’ti? ‘‘No hetaṃ, bhante’’. ‘‘Iti kho, bhikkhave, yadaniccaṃ taṃ dukkhaṃ. Tasmiṃ sati, tadupādāya evaṃ diṭṭhi uppajjati – ‘na vātā vāyanti…pe… esikaṭṭhāyiṭṭhitā’’’ti. Paṭhamaṃ.
251-274. (දුතියවග්‌ගෙ විය චතුවීසති සුත්‌තානි පූරෙතබ්‌බානි.) පඤ්‌චවීසතිමං.
251-274. (Dutiyavagge viya catuvīsati suttāni pūretabbāni.) Pañcavīsatimaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. දුතියගමනාදිවග්‌ගවණ්‌ණනා • 2. Dutiyagamanādivaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. දුතියගමනාදිවග්‌ගවණ්‌ණනා • 2. Dutiyagamanādivaggavaṇṇanā
