| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. සබ්‌බඅනිච්‌චවග්‌ගො
5. Sabbaaniccavaggo
1-9. අනිච්‌චාදිසුත්‌තනවකං
1-9. Aniccādisuttanavakaṃ
43. සාවත්‌ථිනිදානං . තත්‍ර ඛො…පෙ.… ‘‘සබ්‌බං, භික්‌ඛවෙ, අනිච්‌චං. කිඤ්‌ච, භික්‌ඛවෙ, සබ්‌බං අනිච්‌චං? චක්‌ඛු, භික්‌ඛවෙ, අනිච්‌චං, රූපා අනිච්‌චා, චක්‌ඛුවිඤ්‌ඤාණං අනිච්‌චං, චක්‌ඛුසම්‌ඵස්‌සො අනිච්‌චො. යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චං…පෙ.… ජිව්‌හා අනිච්‌චා, රසා අනිච්‌චා, ජිව්‌හාවිඤ්‌ඤාණං අනිච්‌චං, ජිව්‌හාසම්‌ඵස්‌සො අනිච්‌චො. යම්‌පිදං ජිව්‌හාසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චං. කායො අනිච්‌චො…පෙ.… මනො අනිච්‌චො, ධම්‌මා අනිච්‌චා, මනොවිඤ්‌ඤාණං අනිච්‌චං, මනොසම්‌ඵස්‌සො අනිච්‌චො. යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනිච්‌චං. එවං පස්‌සං, භික්‌ඛවෙ, සුතවා අරියසාවකො චක්‌ඛුස්‌මිම්‌පි නිබ්‌බින්‌දති, රූපෙසුපි නිබ්‌බින්‌දති, චක්‌ඛුවිඤ්‌ඤාණෙපි නිබ්‌බින්‌දති, චක්‌ඛුසම්‌ඵස්‌සෙපි නිබ්‌බින්‌දති. යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තස්‌මිම්‌පි නිබ්‌බින්‌දති…පෙ.… මනස්‌මිම්‌පි නිබ්‌බින්‌දති, ධම්‌මෙසුපි නිබ්‌බින්‌දති, මනොවිඤ්‌ඤාණෙපි නිබ්‌බින්‌දති, මනොසම්‌ඵස්‌සෙපි නිබ්‌බින්‌දති, යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තස්‌මිම්‌පි නිබ්‌බින්‌දති. නිබ්‌බින්‌දං විරජ්‌ජති; විරාගා විමුච්‌චති; විමුත්‌තස්‌මිං විමුත්‌තමිති ඤාණං හොති. ‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’ති පජානාතී’’ති. පඨමං.
43. Sāvatthinidānaṃ . Tatra kho…pe… ‘‘sabbaṃ, bhikkhave, aniccaṃ. Kiñca, bhikkhave, sabbaṃ aniccaṃ? Cakkhu, bhikkhave, aniccaṃ, rūpā aniccā, cakkhuviññāṇaṃ aniccaṃ, cakkhusamphasso anicco. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ…pe… jivhā aniccā, rasā aniccā, jivhāviññāṇaṃ aniccaṃ, jivhāsamphasso anicco. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ. Kāyo anicco…pe… mano anicco, dhammā aniccā, manoviññāṇaṃ aniccaṃ, manosamphasso anicco. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi aniccaṃ. Evaṃ passaṃ, bhikkhave, sutavā ariyasāvako cakkhusmimpi nibbindati, rūpesupi nibbindati, cakkhuviññāṇepi nibbindati, cakkhusamphassepi nibbindati. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tasmimpi nibbindati…pe… manasmimpi nibbindati, dhammesupi nibbindati, manoviññāṇepi nibbindati, manosamphassepi nibbindati, yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tasmimpi nibbindati. Nibbindaṃ virajjati; virāgā vimuccati; vimuttasmiṃ vimuttamiti ñāṇaṃ hoti. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Paṭhamaṃ.
44. ‘‘සබ්‌බං , භික්‌ඛවෙ, දුක්‌ඛං…පෙ.…. දුතියං.
44. ‘‘Sabbaṃ , bhikkhave, dukkhaṃ…pe…. Dutiyaṃ.
45. ‘‘සබ්‌බං, භික්‌ඛවෙ, අනත්‌තා…පෙ.…. තතියං.
45. ‘‘Sabbaṃ, bhikkhave, anattā…pe…. Tatiyaṃ.
46. ‘‘සබ්‌බං , භික්‌ඛවෙ, අභිඤ්‌ඤෙය්‍යං…පෙ.… . චතුත්‌ථං.
46. ‘‘Sabbaṃ , bhikkhave, abhiññeyyaṃ…pe… . Catutthaṃ.
47. ‘‘සබ්‌බං, භික්‌ඛවෙ, පරිඤ්‌ඤෙය්‍යං…පෙ.…. පඤ්‌චමං.
47. ‘‘Sabbaṃ, bhikkhave, pariññeyyaṃ…pe…. Pañcamaṃ.
48. ‘‘සබ්‌බං, භික්‌ඛවෙ, පහාතබ්‌බං…පෙ.…. ඡට්‌ඨං.
48. ‘‘Sabbaṃ, bhikkhave, pahātabbaṃ…pe…. Chaṭṭhaṃ.
49. ‘‘සබ්‌බං, භික්‌ඛවෙ, සච්‌ඡිකාතබ්‌බං…පෙ.… . සත්‌තමං.
49. ‘‘Sabbaṃ, bhikkhave, sacchikātabbaṃ…pe… . Sattamaṃ.
50. ‘‘සබ්‌බං, භික්‌ඛවෙ, අභිඤ්‌ඤාපරිඤ්‌ඤෙය්‍යං…පෙ.…. අට්‌ඨමං.
50. ‘‘Sabbaṃ, bhikkhave, abhiññāpariññeyyaṃ…pe…. Aṭṭhamaṃ.
51. ‘‘සබ්‌බං , භික්‌ඛවෙ, උපද්‌දුතං…පෙ.…. නවමං.
51. ‘‘Sabbaṃ , bhikkhave, upaddutaṃ…pe…. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. සබ්‌බඅනිච්‌චවග්‌ගවණ්‌ණනා • 5. Sabbaaniccavaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. සබ්‌බඅනිච්‌චවග්‌ගවණ්‌ණනා • 5. Sabbaaniccavaggavaṇṇanā
