| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
(8) 3. සම්‌මප්‌පධානවග්‌ගො
(8) 3. Sammappadhānavaggo
1. සික්‌ඛසුත්‌තං
1-9. Sikkhasuttaṃ
73. ‘‘පඤ්‌චිමානි , භික්‌ඛවෙ, සික්‌ඛාදුබ්‌බල්‍යානි. කතමානි පඤ්‌ච? පාණාතිපාතො …පෙ.… සුරාමෙරයමජ්‌ජපමාදට්‌ඨානං – ඉමානි ඛො, භික්‌ඛවෙ, පඤ්‌ච සික්‌ඛාදුබ්‌බල්‍යානි.
73. ‘‘Pañcimāni , bhikkhave, sikkhādubbalyāni. Katamāni pañca? Pāṇātipāto …pe… surāmerayamajjapamādaṭṭhānaṃ – imāni kho, bhikkhave, pañca sikkhādubbalyāni.
‘‘ඉමෙසං ඛො, භික්‌ඛවෙ, පඤ්‌චන්‌නං සික්‌ඛාදුබ්‌බල්‍යානං පහානාය චත්‌තාරො සම්‌මප්‌පධානා භාවෙතබ්‌බා. කතමෙ චත්‌තාරො? ඉධ, භික්‌ඛවෙ, භික්‌ඛු අනුප්‌පන්‌නානං පාපකානං අකුසලානං ධම්‌මානං අනුප්‌පාදාය ඡන්‌දං ජනෙති වායමති වීරියං ආරභති චිත්‌තං පග්‌ගණ්‌හාති පදහති; උප්‌පන්‌නානං පාපකානං අකුසලානං ධම්‌මානං පහානාය ඡන්‌දං ජනෙති වායමති වීරියං ආරභති චිත්‌තං පග්‌ගණ්‌හාති පදහති; අනුප්‌පන්‌නානං කුසලානං ධම්‌මානං උප්‌පාදාය ඡන්‌දං ජනෙති වායමති වීරියං ආරභති චිත්‌තං පග්‌ගණ්‌හාති පදහති; උප්‌පන්‌නානං කුසලානං ධම්‌මානං ඨිතියා අසම්‌මොසාය භිය්‍යොභාවාය වෙපුල්‌ලාය භාවනාය පාරිපූරියා ඡන්‌දං ජනෙති වායමති වීරියං ආරභති චිත්‌තං පග්‌ගණ්‌හාති පදහති. ඉමෙසං ඛො, භික්‌ඛවෙ, පඤ්‌චන්‌නං සික්‌ඛාදුබ්‌බල්‍යානං පහානාය ඉමෙ චත්‌තාරො සම්‌මප්‌පධානා භාවෙතබ්‌බා’’ති. පඨමං.
‘‘Imesaṃ kho, bhikkhave, pañcannaṃ sikkhādubbalyānaṃ pahānāya cattāro sammappadhānā bhāvetabbā. Katame cattāro? Idha, bhikkhave, bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati; uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati; anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati; uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati. Imesaṃ kho, bhikkhave, pañcannaṃ sikkhādubbalyānaṃ pahānāya ime cattāro sammappadhānā bhāvetabbā’’ti. Paṭhamaṃ.
74-81. (යථා සතිපට්‌ඨානවග්‌ගෙ තථා සම්‌මප්‌පධානවසෙන විත්‌ථාරෙතබ්‌බා.)
74-81. (Yathā satipaṭṭhānavagge tathā sammappadhānavasena vitthāretabbā.)
