| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๒๐-๒๔. ญาณปญฺจกนิเทฺทโส
20-24. Ñāṇapañcakaniddeso
๗๕. กถํ อภิญฺญาปญฺญา ญาตเฎฺฐ ญาณํ, ปริญฺญาปญฺญา ตีรณเฎฺฐ ญาณํ, ปหาเนปญฺญา ปริจฺจาคเฎฺฐ ญาณํ, ภาวนา ปญฺญา เอกรสเฎฺฐ ญาณํ, สจฺฉิกิริยาปญฺญา ผสฺสนเฎฺฐ ญาณํ? เย เย ธมฺมา อภิญฺญาตา โหนฺติ, เต เต ธมฺมา ญาตา โหนฺติฯ เย เย ธมฺมา ปริญฺญาตา โหนฺติ, เต เต ธมฺมา ตีริตา โหนฺติฯ เย เย ธมฺมา ปหีนา โหนฺติ, เต เต ธมฺมา ปริจฺจตฺตา โหนฺติฯ เย เย ธมฺมา ภาวิตา โหนฺติ, เต เต ธมฺมา เอกรสา โหนฺติฯ เย เย ธมฺมา สจฺฉิกตา โหนฺติ, เต เต ธมฺมา ผสฺสิตา โหนฺติฯ ตํ ญาตเฎฺฐน ญาณํ, ปชานนเฎฺฐน ปญฺญาฯ เตน วุจฺจติ – ‘‘อภิญฺญา ปญฺญา ญาตเฎฺฐ ญาณํ, ปริญฺญา ปญฺญา ตีรณเฎฺฐ ญาณํ, ปหาเน ปญฺญา ปริจฺจาคเฎฺฐ ญาณํ, ภาวนา ปญฺญา เอกรสเฎฺฐ ญาณํ, สจฺฉิกิริยา ปญฺญา ผุสนเฎฺฐ ญาณํ’’ฯ
75. Kathaṃ abhiññāpaññā ñātaṭṭhe ñāṇaṃ, pariññāpaññā tīraṇaṭṭhe ñāṇaṃ, pahānepaññā pariccāgaṭṭhe ñāṇaṃ, bhāvanā paññā ekarasaṭṭhe ñāṇaṃ, sacchikiriyāpaññā phassanaṭṭhe ñāṇaṃ? Ye ye dhammā abhiññātā honti, te te dhammā ñātā honti. Ye ye dhammā pariññātā honti, te te dhammā tīritā honti. Ye ye dhammā pahīnā honti, te te dhammā pariccattā honti. Ye ye dhammā bhāvitā honti, te te dhammā ekarasā honti. Ye ye dhammā sacchikatā honti, te te dhammā phassitā honti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘abhiññā paññā ñātaṭṭhe ñāṇaṃ, pariññā paññā tīraṇaṭṭhe ñāṇaṃ, pahāne paññā pariccāgaṭṭhe ñāṇaṃ, bhāvanā paññā ekarasaṭṭhe ñāṇaṃ, sacchikiriyā paññā phusanaṭṭhe ñāṇaṃ’’.
ญาณปญฺจกนิเทฺทโส จตุวีสติโมฯ
Ñāṇapañcakaniddeso catuvīsatimo.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / ๒๐-๒๔. ญาณปญฺจกนิเทฺทสวณฺณนา • 20-24. Ñāṇapañcakaniddesavaṇṇanā
