| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
२१-५०. जलाबुजादिदानूपकारसुत्तत्तिंसकं
21-50. Jalābujādidānūpakārasuttattiṃsakaṃ
३६२-३९१. सावत्थिनिदानं। एकमन्तं निसिन्नो खो सो भिक्खु भगवन्तं एतदवोच – ‘‘को नु खो, भन्ते, हेतु, को पच्चयो, येन मिधेकच्चो कायस्स भेदा परं मरणा जलाबुजानं नागानं…पे॰… संसेदजानं नागानं…पे॰… ओपपातिकानं नागानं सहब्यतं उपपज्जती’’ति?
362-391. Sāvatthinidānaṃ. Ekamantaṃ nisinno kho so bhikkhu bhagavantaṃ etadavoca – ‘‘ko nu kho, bhante, hetu, ko paccayo, yena midhekacco kāyassa bhedā paraṃ maraṇā jalābujānaṃ nāgānaṃ…pe… saṃsedajānaṃ nāgānaṃ…pe… opapātikānaṃ nāgānaṃ sahabyataṃ upapajjatī’’ti?
‘‘इध, भिक्खु, एकच्चो कायेन द्वयकारी होति, वाचाय द्वयकारी, मनसा द्वयकारी। तस्स सुतं होति – ‘ओपपातिका नागा दीघायुका वण्णवन्तो सुखबहुला’ति। तस्स एवं होति – ‘अहो वताहं कायस्स भेदा परं मरणा ओपपातिकानं नागानं सहब्यतं उपपज्जेय्य’न्ति। सो अन्नं देति…पे॰… पानं देति…पे॰… पदीपेय्यं देति। सो कायस्स भेदा परं मरणा ओपपातिकानं नागानं सहब्यतं उपपज्जति। अयं खो, भिक्खु, हेतु, अयं पच्चयो, येन मिधेकच्चो कायस्स भेदा परं मरणा ओपपातिकानं नागानं सहब्यतं उपपज्जती’’ति।
‘‘Idha, bhikkhu, ekacco kāyena dvayakārī hoti, vācāya dvayakārī, manasā dvayakārī. Tassa sutaṃ hoti – ‘opapātikā nāgā dīghāyukā vaṇṇavanto sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā opapātikānaṃ nāgānaṃ sahabyataṃ upapajjeyya’nti. So annaṃ deti…pe… pānaṃ deti…pe… padīpeyyaṃ deti. So kāyassa bhedā paraṃ maraṇā opapātikānaṃ nāgānaṃ sahabyataṃ upapajjati. Ayaṃ kho, bhikkhu, hetu, ayaṃ paccayo, yena midhekacco kāyassa bhedā paraṃ maraṇā opapātikānaṃ nāgānaṃ sahabyataṃ upapajjatī’’ti.
(इमिना पेय्यालेन दस दस सुत्तन्ता कातब्बा। एवं चतूसु योनीसु चत्तालीसं वेय्याकरणा होन्ति। पुरिमेहि पन दसहि सुत्तन्तेहि सह होन्ति पण्णाससुत्तन्ताति।)
(Iminā peyyālena dasa dasa suttantā kātabbā. Evaṃ catūsu yonīsu cattālīsaṃ veyyākaraṇā honti. Purimehi pana dasahi suttantehi saha honti paṇṇāsasuttantāti.)
नागसंयुत्तं समत्तं।
Nāgasaṃyuttaṃ samattaṃ.
तस्सुद्दानं –
Tassuddānaṃ –
सुद्धिकं पणीततरं, चतुरो च उपोसथा।
Suddhikaṃ paṇītataraṃ, caturo ca uposathā;
तस्स सुतं चतुरो च, दानूपकारा च तालीसं।
Tassa sutaṃ caturo ca, dānūpakārā ca tālīsaṃ;
पण्णास पिण्डतो सुत्ता, नागम्हि सुप्पकासिताति॥
Paṇṇāsa piṇḍato suttā, nāgamhi suppakāsitāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / २-५०. पणीततरसुत्तादिवण्णना • 2-50. Paṇītatarasuttādivaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / २-५०. पणीततरसुत्तादिवण्णना • 2-50. Paṇītatarasuttādivaṇṇanā
