| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
២១-៥០. ជលាពុជាទិទានូបការសុត្តត្តិំសកំ
21-50. Jalābujādidānūpakārasuttattiṃsakaṃ
៣៦២-៣៩១. សាវត្ថិនិទានំ។ ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘កោ នុ ខោ, ភន្តេ, ហេតុ, កោ បច្ចយោ, យេន មិធេកច្ចោ កាយស្ស ភេទា បរំ មរណា ជលាពុជានំ នាគានំ…បេ.… សំសេទជានំ នាគានំ…បេ.… ឱបបាតិកានំ នាគានំ សហព្យតំ ឧបបជ្ជតី’’តិ?
362-391. Sāvatthinidānaṃ. Ekamantaṃ nisinno kho so bhikkhu bhagavantaṃ etadavoca – ‘‘ko nu kho, bhante, hetu, ko paccayo, yena midhekacco kāyassa bhedā paraṃ maraṇā jalābujānaṃ nāgānaṃ…pe… saṃsedajānaṃ nāgānaṃ…pe… opapātikānaṃ nāgānaṃ sahabyataṃ upapajjatī’’ti?
‘‘ឥធ, ភិក្ខុ, ឯកច្ចោ កាយេន ទ្វយការី ហោតិ, វាចាយ ទ្វយការី, មនសា ទ្វយការី។ តស្ស សុតំ ហោតិ – ‘ឱបបាតិកា នាគា ទីឃាយុកា វណ្ណវន្តោ សុខពហុលា’តិ។ តស្ស ឯវំ ហោតិ – ‘អហោ វតាហំ កាយស្ស ភេទា បរំ មរណា ឱបបាតិកានំ នាគានំ សហព្យតំ ឧបបជ្ជេយ្យ’ន្តិ។ សោ អន្នំ ទេតិ…បេ.… បានំ ទេតិ…បេ.… បទីបេយ្យំ ទេតិ។ សោ កាយស្ស ភេទា បរំ មរណា ឱបបាតិកានំ នាគានំ សហព្យតំ ឧបបជ្ជតិ។ អយំ ខោ, ភិក្ខុ, ហេតុ, អយំ បច្ចយោ, យេន មិធេកច្ចោ កាយស្ស ភេទា បរំ មរណា ឱបបាតិកានំ នាគានំ សហព្យតំ ឧបបជ្ជតី’’តិ។
‘‘Idha, bhikkhu, ekacco kāyena dvayakārī hoti, vācāya dvayakārī, manasā dvayakārī. Tassa sutaṃ hoti – ‘opapātikā nāgā dīghāyukā vaṇṇavanto sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā opapātikānaṃ nāgānaṃ sahabyataṃ upapajjeyya’nti. So annaṃ deti…pe… pānaṃ deti…pe… padīpeyyaṃ deti. So kāyassa bhedā paraṃ maraṇā opapātikānaṃ nāgānaṃ sahabyataṃ upapajjati. Ayaṃ kho, bhikkhu, hetu, ayaṃ paccayo, yena midhekacco kāyassa bhedā paraṃ maraṇā opapātikānaṃ nāgānaṃ sahabyataṃ upapajjatī’’ti.
(ឥមិនា បេយ្យាលេន ទស ទស សុត្តន្តា កាតព្ពា។ ឯវំ ចតូសុ យោនីសុ ចត្តាលីសំ វេយ្យាករណា ហោន្តិ។ បុរិមេហិ បន ទសហិ សុត្តន្តេហិ សហ ហោន្តិ បណ្ណាសសុត្តន្តាតិ។)
(Iminā peyyālena dasa dasa suttantā kātabbā. Evaṃ catūsu yonīsu cattālīsaṃ veyyākaraṇā honti. Purimehi pana dasahi suttantehi saha honti paṇṇāsasuttantāti.)
នាគសំយុត្តំ សមត្តំ។
Nāgasaṃyuttaṃ samattaṃ.
តស្សុទ្ទានំ –
Tassuddānaṃ –
សុទ្ធិកំ បណីតតរំ, ចតុរោ ច ឧបោសថា;
Suddhikaṃ paṇītataraṃ, caturo ca uposathā;
តស្ស សុតំ ចតុរោ ច, ទានូបការា ច តាលីសំ;
Tassa sutaṃ caturo ca, dānūpakārā ca tālīsaṃ;
បណ្ណាស បិណ្ឌតោ សុត្តា, នាគម្ហិ សុប្បកាសិតាតិ។
Paṇṇāsa piṇḍato suttā, nāgamhi suppakāsitāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ២-៥០. បណីតតរសុត្តាទិវណ្ណនា • 2-50. Paṇītatarasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២-៥០. បណីតតរសុត្តាទិវណ្ណនា • 2-50. Paṇītatarasuttādivaṇṇanā
