| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
২৫-২৮. পটিসম্ভিদাঞাণনিদ্দেসো
25-28. Paṭisambhidāñāṇaniddeso
৭৬. কথং অত্থনানত্তে পঞ্ঞা অত্থপটিসম্ভিদে ঞাণং, ধম্মনানত্তে পঞ্ঞা ধম্মপটিসম্ভিদে ঞাণং, নিরুত্তিনানত্তে পঞ্ঞা নিরুত্তিপটিসম্ভিদে ঞাণং, পটিভাননানত্তে পঞ্ঞা পটিভানপটিসম্ভিদে ঞাণং? সদ্ধিন্দ্রিযং ধম্মো, ৰীরিযিন্দ্রিযং ধম্মো, সতিন্দ্রিযং ধম্মো, সমাধিন্দ্রিযং ধম্মো, পঞ্ঞিন্দ্রিযং ধম্মো। অঞ্ঞো সদ্ধিন্দ্রিযং ধম্মো, অঞ্ঞো ৰীরিযিন্দ্রিযং ধম্মো, অঞ্ঞো সতিন্দ্রিযং ধম্মো, অঞ্ঞো সমাধিন্দ্রিযং ধম্মো, অঞ্ঞো পঞ্ঞিন্দ্রিযং ধম্মো। যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি। তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’।
76. Kathaṃ atthanānatte paññā atthapaṭisambhide ñāṇaṃ, dhammanānatte paññā dhammapaṭisambhide ñāṇaṃ, niruttinānatte paññā niruttipaṭisambhide ñāṇaṃ, paṭibhānanānatte paññā paṭibhānapaṭisambhide ñāṇaṃ? Saddhindriyaṃ dhammo, vīriyindriyaṃ dhammo, satindriyaṃ dhammo, samādhindriyaṃ dhammo, paññindriyaṃ dhammo. Añño saddhindriyaṃ dhammo, añño vīriyindriyaṃ dhammo, añño satindriyaṃ dhammo, añño samādhindriyaṃ dhammo, añño paññindriyaṃ dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
অধিমোক্খট্ঠো অত্থো, পগ্গহট্ঠো অত্থো, উপট্ঠানট্ঠো অত্থো, অৰিক্খেপট্ঠো অত্থো, দস্সনট্ঠো অত্থো। অঞ্ঞো অধিমোক্খট্ঠো অত্থো, অঞ্ঞো পগ্গহট্ঠো অত্থো, অঞ্ঞো উপট্ঠানট্ঠো অত্থো, অঞ্ঞো অৰিক্খেপট্ঠো অত্থো, অঞ্ঞো দস্সনট্ঠো অত্থো। যেন ঞাণেন ইমে নানা অত্থা ঞাতা, তেনেৰ ঞাণেন ইমে নানা অত্থা পটিৰিদিতাতি। তেন ৰুচ্চতি ‘‘অত্থনানত্তে পঞ্ঞা অত্থপটিসম্ভিদে ঞাণং’’।
Adhimokkhaṭṭho attho, paggahaṭṭho attho, upaṭṭhānaṭṭho attho, avikkhepaṭṭho attho, dassanaṭṭho attho. Añño adhimokkhaṭṭho attho, añño paggahaṭṭho attho, añño upaṭṭhānaṭṭho attho, añño avikkhepaṭṭho attho, añño dassanaṭṭho attho. Yena ñāṇena ime nānā atthā ñātā, teneva ñāṇena ime nānā atthā paṭividitāti. Tena vuccati ‘‘atthanānatte paññā atthapaṭisambhide ñāṇaṃ’’.
পঞ্চ ধম্মে সন্দস্সেতুং ব্যঞ্জননিরুত্তাভিলাপা, পঞ্চ অত্থে সন্দস্সেতুং ব্যঞ্জননিরুত্তাভিলাপা। অঞ্ঞা ধম্মনিরুত্তিযো, অঞ্ঞা অত্থনিরুত্তিযো। যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি। তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’।
Pañca dhamme sandassetuṃ byañjananiruttābhilāpā, pañca atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā, teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
পঞ্চসু ধম্মেসু ঞাণানি, পঞ্চসু অত্থেসু ঞাণানি, দসসু নিরুত্তীসু ঞাণানি। অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি। যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি। তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’।
Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni. Aññāni dhammesu ñāṇāni, aññāni atthesu ñāṇāni, aññāni niruttīsu ñāṇāni. Yena ñāṇena ime nānā ñāṇā ñātā, teneva ñāṇena ime nānā ñāṇā paṭividitāti. Tena vuccati – ‘‘paṭibhānanānatte paññā paṭibhānapaṭisambhide ñāṇaṃ’’.
৭৭. সদ্ধাবলং ধম্মো, ৰীরিযবলং ধম্মো, সতিবলং ধম্মো, সমাধিবলং ধম্মো, পঞ্ঞাবলং ধম্মো। অঞ্ঞো সদ্ধাবলং ধম্মো, অঞ্ঞো ৰীরিযবলং ধম্মো, অঞ্ঞো সতিবলং ধম্মো, অঞ্ঞো সমাধিবলং ধম্মো, অঞ্ঞো পঞ্ঞাবলং ধম্মো। যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি। তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’।
77. Saddhābalaṃ dhammo, vīriyabalaṃ dhammo, satibalaṃ dhammo, samādhibalaṃ dhammo, paññābalaṃ dhammo. Añño saddhābalaṃ dhammo, añño vīriyabalaṃ dhammo, añño satibalaṃ dhammo, añño samādhibalaṃ dhammo, añño paññābalaṃ dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
অস্সদ্ধিযে অকম্পিযট্ঠো অত্থো। কোসজ্জে অকম্পিযট্ঠো অত্থো। পমাদে অকম্পিযট্ঠো অত্থো। উদ্ধচ্চে অকম্পিযট্ঠো অত্থো। অৰিজ্জায অকম্পিযট্ঠো অত্থো। অঞ্ঞো অস্সদ্ধিযে অকম্পিযট্ঠো অত্থো, অঞ্ঞো কোসজ্জে অকম্পিযট্ঠো অত্থো, অঞ্ঞো পমাদে অকম্পিযট্ঠো অত্থো, অঞ্ঞো উদ্ধচ্চে অকম্পিযট্ঠো অত্থো, অঞ্ঞো অৰিজ্জায অকম্পিযট্ঠো অত্থো। যেন ঞাণেন ইমে নানা অত্থা ঞাতা, তেনেৰ ঞাণেন ইমে নানা অত্থা পটিৰিদিতাতি। তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’।
Assaddhiye akampiyaṭṭho attho. Kosajje akampiyaṭṭho attho. Pamāde akampiyaṭṭho attho. Uddhacce akampiyaṭṭho attho. Avijjāya akampiyaṭṭho attho. Añño assaddhiye akampiyaṭṭho attho, añño kosajje akampiyaṭṭho attho, añño pamāde akampiyaṭṭho attho, añño uddhacce akampiyaṭṭho attho, añño avijjāya akampiyaṭṭho attho. Yena ñāṇena ime nānā atthā ñātā, teneva ñāṇena ime nānā atthā paṭividitāti. Tena vuccati – ‘‘atthanānatte paññā atthapaṭisambhide ñāṇaṃ’’.
পঞ্চ ধম্মে সন্দস্সেতুং ব্যঞ্জননিরুত্তাভিলাপা, পঞ্চ অত্থে সন্দস্সেতুং ব্যঞ্জননিরুত্তাভিলাপা। অঞ্ঞা ধম্মনিরুত্তিযো, অঞ্ঞা অত্থনিরুত্তিযো। যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি। তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’।
Pañca dhamme sandassetuṃ byañjananiruttābhilāpā, pañca atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā, teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
সতিসম্বোজ্ঝঙ্গো ধম্মো, ধম্মৰিচযসম্বোজ্ঝঙ্গো ধম্মো, ৰীরিযসম্বোজ্ঝঙ্গো ধম্মো, পীতিসম্বোজ্ঝঙ্গো ধম্মো, পস্সদ্ধিসম্বোজ্ঝঙ্গো ধম্মো, সমাধিসম্বোজ্ঝঙ্গো ধম্মো, উপেক্খাসম্বোজ্ঝঙ্গো ধম্মো। অঞ্ঞো সতিসম্বোজ্ঝঙ্গো ধম্মো, অঞ্ঞো ধম্মৰিচযসম্বোজ্ঝঙ্গো ধম্মো, অঞ্ঞো ৰীরিযসম্বোজ্ঝঙ্গো ধম্মো, অঞ্ঞো পীতিসম্বোজ্ঝঙ্গো ধম্মো, অঞ্ঞো পস্সদ্ধিসম্বোজ্ঝঙ্গো ধম্মো, অঞ্ঞো সমাধিসম্বোজ্ঝঙ্গো ধম্মো, অঞ্ঞো উপেক্খাসম্বোজ্ঝঙ্গো ধম্মো। যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি। তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’।
Satisambojjhaṅgo dhammo, dhammavicayasambojjhaṅgo dhammo, vīriyasambojjhaṅgo dhammo, pītisambojjhaṅgo dhammo, passaddhisambojjhaṅgo dhammo, samādhisambojjhaṅgo dhammo, upekkhāsambojjhaṅgo dhammo. Añño satisambojjhaṅgo dhammo, añño dhammavicayasambojjhaṅgo dhammo, añño vīriyasambojjhaṅgo dhammo, añño pītisambojjhaṅgo dhammo, añño passaddhisambojjhaṅgo dhammo, añño samādhisambojjhaṅgo dhammo, añño upekkhāsambojjhaṅgo dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
উপট্ঠানট্ঠো অত্থো, পৰিচযট্ঠো অত্থো, পগ্গহট্ঠো অত্থো, ফরণট্ঠো অত্থো, উপসমট্ঠো অত্থো, অৰিক্খেপট্ঠো অত্থো, পটিসঙ্খানট্ঠো অত্থো। অঞ্ঞো উপট্ঠানট্ঠো অত্থো, অঞ্ঞো পৰিচযট্ঠো অত্থো, অঞ্ঞো পগ্গহট্ঠো অত্থো, অঞ্ঞো ফরণট্ঠো অত্থো, অঞ্ঞো উপসমট্ঠো অত্থো, অঞ্ঞো অৰিক্খেপট্ঠো অত্থো, অঞ্ঞো পটিসঙ্খানট্ঠো অত্থো। যেন ঞাণেন ইমে নানা অত্থা ঞাতা, তেনেৰ ঞাণেন ইমে নানা অত্থা পটিৰিদিতাতি। তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’।
Upaṭṭhānaṭṭho attho, pavicayaṭṭho attho, paggahaṭṭho attho, pharaṇaṭṭho attho, upasamaṭṭho attho, avikkhepaṭṭho attho, paṭisaṅkhānaṭṭho attho. Añño upaṭṭhānaṭṭho attho, añño pavicayaṭṭho attho, añño paggahaṭṭho attho, añño pharaṇaṭṭho attho, añño upasamaṭṭho attho, añño avikkhepaṭṭho attho, añño paṭisaṅkhānaṭṭho attho. Yena ñāṇena ime nānā atthā ñātā, teneva ñāṇena ime nānā atthā paṭividitāti. Tena vuccati – ‘‘atthanānatte paññā atthapaṭisambhide ñāṇaṃ’’.
সত্ত ধম্মে সন্দস্সেতুং ব্যঞ্জননিরুত্তাভিলাপা, সত্ত অত্থে সন্দস্সেতুং ব্যঞ্জননিরুত্তাভিলাপা। অঞ্ঞা ধম্মনিরুত্তিযো, অঞ্ঞা অত্থনিরুত্তিযো। যেন ঞাণেন ইমা নানা নিরুত্তিযো ঞাতা, তেনেৰ ঞাণেন ইমা নানা নিরুত্তিযো পটিৰিদিতাতি। তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’।
Satta dhamme sandassetuṃ byañjananiruttābhilāpā, satta atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā, teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
সত্তসু ধম্মেসু ঞাণানি, সত্তসু অত্থেসু ঞাণানি, চুদ্দসসু নিরুত্তীসু ঞাণানি। অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি। যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি। তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’।
Sattasu dhammesu ñāṇāni, sattasu atthesu ñāṇāni, cuddasasu niruttīsu ñāṇāni. Aññāni dhammesu ñāṇāni, aññāni atthesu ñāṇāni, aññāni niruttīsu ñāṇāni. Yena ñāṇena ime nānā ñāṇā ñātā, teneva ñāṇena ime nānā ñāṇā paṭividitāti. Tena vuccati – ‘‘paṭibhānanānatte paññā paṭibhānapaṭisambhide ñāṇaṃ’’.
সম্মাদিট্ঠি ধম্মো, সম্মাসঙ্কপ্পো ধম্মো, সম্মাৰাচা ধম্মো, সম্মাকম্মন্তো ধম্মো, সম্মাআজীৰো ধম্মো, সম্মাৰাযামো ধম্মো, সম্মাসতি ধম্মো, সম্মাসমাধি ধম্মো। অঞ্ঞো সম্মাদিট্ঠি ধম্মো, অঞ্ঞো সম্মাসঙ্কপ্পো ধম্মো, অঞ্ঞো সম্মাৰাচা ধম্মো, অঞ্ঞো সম্মাকম্মন্তো ধম্মো, অঞ্ঞো সম্মাআজীৰো ধম্মো, অঞ্ঞো সম্মাৰাযামো ধম্মো, অঞ্ঞো সম্মাসতি ধম্মো, অঞ্ঞো সম্মাসমাধি ধম্মো। যেন ঞাণেন ইমে নানা ধম্মা ঞাতা, তেনেৰ ঞাণেন ইমে নানা ধম্মা পটিৰিদিতাতি। তেন ৰুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’।
Sammādiṭṭhi dhammo, sammāsaṅkappo dhammo, sammāvācā dhammo, sammākammanto dhammo, sammāājīvo dhammo, sammāvāyāmo dhammo, sammāsati dhammo, sammāsamādhi dhammo. Añño sammādiṭṭhi dhammo, añño sammāsaṅkappo dhammo, añño sammāvācā dhammo, añño sammākammanto dhammo, añño sammāājīvo dhammo, añño sammāvāyāmo dhammo, añño sammāsati dhammo, añño sammāsamādhi dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
দস্সনট্ঠো অত্থো, অভিনিরোপনট্ঠো অত্থো, পরিগ্গহট্ঠো অত্থো, সমুট্ঠানট্ঠো অত্থো, ৰোদানট্ঠো অত্থো, পগ্গহট্ঠো অত্থো, উপট্ঠানট্ঠো অত্থো, অৰিক্খেপট্ঠো অত্থো। অঞ্ঞো দস্সনট্ঠো অত্থো, অঞ্ঞো অভিনিরোপনট্ঠো অত্থো, অঞ্ঞো পরিগ্গহট্ঠো অত্থো, অঞ্ঞো সমুট্ঠানট্ঠো অত্থো, অঞ্ঞো ৰোদানট্ঠো অত্থো, অঞ্ঞো পগ্গহট্ঠো অত্থো, অঞ্ঞো উপট্ঠানট্ঠো অত্থো, অঞ্ঞো অৰিক্খেপট্ঠো অত্থো। যেন ঞাণেন ইমে নানা অত্থা ঞাতা তেনেৰ ঞাণেন ইমে নানা অত্থা পটিৰিদিতাতি। তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’।
Dassanaṭṭho attho, abhiniropanaṭṭho attho, pariggahaṭṭho attho, samuṭṭhānaṭṭho attho, vodānaṭṭho attho, paggahaṭṭho attho, upaṭṭhānaṭṭho attho, avikkhepaṭṭho attho. Añño dassanaṭṭho attho, añño abhiniropanaṭṭho attho, añño pariggahaṭṭho attho, añño samuṭṭhānaṭṭho attho, añño vodānaṭṭho attho, añño paggahaṭṭho attho, añño upaṭṭhānaṭṭho attho, añño avikkhepaṭṭho attho. Yena ñāṇena ime nānā atthā ñātā teneva ñāṇena ime nānā atthā paṭividitāti. Tena vuccati – ‘‘atthanānatte paññā atthapaṭisambhide ñāṇaṃ’’.
অট্ঠ ধম্মে সন্দস্সেতুং ব্যঞ্জননিরুত্তাভিলাপা, অট্ঠ অত্থে সন্দস্সেতুং ব্যঞ্জননিরুত্তাভিলাপা। অঞ্ঞা ধম্মনিরুত্তিযো, অঞ্ঞা অত্থনিরুত্তিযো। যেন ঞাণেন ইমা নানা নিরুত্তিযো ঞাতা , তেনেৰ ঞাণেন ইমা নানা নিরুত্তিযো পটিৰিদিতাতি। তেন ৰুচ্চতি – ‘‘নিরুত্তিনানত্তে পঞ্ঞা নিরুত্তিপটিসম্ভিদে ঞাণং’’।
Aṭṭha dhamme sandassetuṃ byañjananiruttābhilāpā, aṭṭha atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā , teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
অট্ঠসু ধম্মেসু ঞাণানি, অট্ঠসু অত্থেসু ঞাণানি সোল়সসু নিরুত্তীসু ঞাণানি। অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিরুত্তীসু ঞাণানি। যেন ঞাণেন ইমে নানা ঞাণা ঞাতা, তেনেৰ ঞাণেন ইমে নানা ঞাণা পটিৰিদিতাতি। তেন ৰুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং। ধম্মনানত্তে পঞ্ঞা ধম্মপটিসম্ভিদে ঞাণং। নিরুত্তিনানত্তে পঞ্ঞা নিরুত্তিপটিসম্ভিদে ঞাণং। পটিভাননানত্তে পঞ্ঞা পটিভানপটিসম্ভিদে ঞাণং’’।
Aṭṭhasu dhammesu ñāṇāni, aṭṭhasu atthesu ñāṇāni soḷasasu niruttīsu ñāṇāni. Aññāni dhammesu ñāṇāni, aññāni atthesu ñāṇāni, aññāni niruttīsu ñāṇāni. Yena ñāṇena ime nānā ñāṇā ñātā, teneva ñāṇena ime nānā ñāṇā paṭividitāti. Tena vuccati – ‘‘paṭibhānanānatte paññā paṭibhānapaṭisambhide ñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘atthanānatte paññā atthapaṭisambhide ñāṇaṃ. Dhammanānatte paññā dhammapaṭisambhide ñāṇaṃ. Niruttinānatte paññā niruttipaṭisambhide ñāṇaṃ. Paṭibhānanānatte paññā paṭibhānapaṭisambhide ñāṇaṃ’’.
পটিসম্ভিদাঞাণনিদ্দেসো অট্ঠৰীসতিমো।
Paṭisambhidāñāṇaniddeso aṭṭhavīsatimo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ২৫-২৮. পটিসম্ভিদাঞাণনিদ্দেসৰণ্ণনা • 25-28. Paṭisambhidāñāṇaniddesavaṇṇanā
