| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၂၅-၂၈. ပဋိသမ္ဘိဒာဉာဏနိဒ္ဒေသော
25-28. Paṭisambhidāñāṇaniddeso
၇၆. ကထံ အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ, ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ, နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ, ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ? သဒ္ဓိန္ဒ္ရိယံ ဓမ္မော, ဝီရိယိန္ဒ္ရိယံ ဓမ္မော, သတိန္ဒ္ရိယံ ဓမ္မော, သမာဓိန္ဒ္ရိယံ ဓမ္မော, ပညိန္ဒ္ရိယံ ဓမ္မော။ အညော သဒ္ဓိန္ဒ္ရိယံ ဓမ္မော, အညော ဝီရိယိန္ဒ္ရိယံ ဓမ္မော, အညော သတိန္ဒ္ရိယံ ဓမ္မော, အညော သမာဓိန္ဒ္ရိယံ ဓမ္မော, အညော ပညိန္ဒ္ရိယံ ဓမ္မော။ ယေန ဉာဏေန ဣမေ နာနာ ဓမ္မာ ဉာတာ, တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ။ တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’။
76. Kathaṃ atthanānatte paññā atthapaṭisambhide ñāṇaṃ, dhammanānatte paññā dhammapaṭisambhide ñāṇaṃ, niruttinānatte paññā niruttipaṭisambhide ñāṇaṃ, paṭibhānanānatte paññā paṭibhānapaṭisambhide ñāṇaṃ? Saddhindriyaṃ dhammo, vīriyindriyaṃ dhammo, satindriyaṃ dhammo, samādhindriyaṃ dhammo, paññindriyaṃ dhammo. Añño saddhindriyaṃ dhammo, añño vīriyindriyaṃ dhammo, añño satindriyaṃ dhammo, añño samādhindriyaṃ dhammo, añño paññindriyaṃ dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
အဓိမောက္ခဋ္ဌော အတ္ထော, ပဂ္ဂဟဋ္ဌော အတ္ထော, ဥပဋ္ဌာနဋ္ဌော အတ္ထော, အဝိက္ခေပဋ္ဌော အတ္ထော, ဒသ္သနဋ္ဌော အတ္ထော။ အညော အဓိမောက္ခဋ္ဌော အတ္ထော, အညော ပဂ္ဂဟဋ္ဌော အတ္ထော, အညော ဥပဋ္ဌာနဋ္ဌော အတ္ထော, အညော အဝိက္ခေပဋ္ဌော အတ္ထော, အညော ဒသ္သနဋ္ဌော အတ္ထော။ ယေန ဉာဏေန ဣမေ နာနာ အတ္ထာ ဉာတာ, တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ။ တေန ဝုစ္စတိ ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’။
Adhimokkhaṭṭho attho, paggahaṭṭho attho, upaṭṭhānaṭṭho attho, avikkhepaṭṭho attho, dassanaṭṭho attho. Añño adhimokkhaṭṭho attho, añño paggahaṭṭho attho, añño upaṭṭhānaṭṭho attho, añño avikkhepaṭṭho attho, añño dassanaṭṭho attho. Yena ñāṇena ime nānā atthā ñātā, teneva ñāṇena ime nānā atthā paṭividitāti. Tena vuccati ‘‘atthanānatte paññā atthapaṭisambhide ñāṇaṃ’’.
ပဉ္စ ဓမ္မေ သန္ဒသ္သေတုံ ဗ္ယဉ္ဇနနိရုတ္တာဘိလာပာ, ပဉ္စ အတ္ထေ သန္ဒသ္သေတုံ ဗ္ယဉ္ဇနနိရုတ္တာဘိလာပာ။ အညာ ဓမ္မနိရုတ္တိယော, အညာ အတ္ထနိရုတ္တိယော။ ယေန ဉာဏေန ဣမာ နာနာ နိရုတ္တိယော ဉာတာ, တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ။ တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’။
Pañca dhamme sandassetuṃ byañjananiruttābhilāpā, pañca atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā, teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
ပဉ္စသု ဓမ္မေသု ဉာဏာနိ, ပဉ္စသု အတ္ထေသု ဉာဏာနိ, ဒသသု နိရုတ္တီသု ဉာဏာနိ။ အညာနိ ဓမ္မေသု ဉာဏာနိ, အညာနိ အတ္ထေသု ဉာဏာနိ, အညာနိ နိရုတ္တီသု ဉာဏာနိ။ ယေန ဉာဏေန ဣမေ နာနာ ဉာဏာ ဉာတာ, တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ။ တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’။
Pañcasu dhammesu ñāṇāni, pañcasu atthesu ñāṇāni, dasasu niruttīsu ñāṇāni. Aññāni dhammesu ñāṇāni, aññāni atthesu ñāṇāni, aññāni niruttīsu ñāṇāni. Yena ñāṇena ime nānā ñāṇā ñātā, teneva ñāṇena ime nānā ñāṇā paṭividitāti. Tena vuccati – ‘‘paṭibhānanānatte paññā paṭibhānapaṭisambhide ñāṇaṃ’’.
၇၇. သဒ္ဓာဗလံ ဓမ္မော, ဝီရိယဗလံ ဓမ္မော, သတိဗလံ ဓမ္မော, သမာဓိဗလံ ဓမ္မော, ပညာဗလံ ဓမ္မော။ အညော သဒ္ဓာဗလံ ဓမ္မော, အညော ဝီရိယဗလံ ဓမ္မော, အညော သတိဗလံ ဓမ္မော, အညော သမာဓိဗလံ ဓမ္မော, အညော ပညာဗလံ ဓမ္မော။ ယေန ဉာဏေန ဣမေ နာနာ ဓမ္မာ ဉာတာ, တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ။ တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’။
77. Saddhābalaṃ dhammo, vīriyabalaṃ dhammo, satibalaṃ dhammo, samādhibalaṃ dhammo, paññābalaṃ dhammo. Añño saddhābalaṃ dhammo, añño vīriyabalaṃ dhammo, añño satibalaṃ dhammo, añño samādhibalaṃ dhammo, añño paññābalaṃ dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
အသ္သဒ္ဓိယေ အကမ္ပိယဋ္ဌော အတ္ထော။ ကောသဇ္ဇေ အကမ္ပိယဋ္ဌော အတ္ထော။ ပမာဒေ အကမ္ပိယဋ္ဌော အတ္ထော။ ဥဒ္ဓစ္စေ အကမ္ပိယဋ္ဌော အတ္ထော။ အဝိဇ္ဇာယ အကမ္ပိယဋ္ဌော အတ္ထော။ အညော အသ္သဒ္ဓိယေ အကမ္ပိယဋ္ဌော အတ္ထော, အညော ကောသဇ္ဇေ အကမ္ပိယဋ္ဌော အတ္ထော, အညော ပမာဒေ အကမ္ပိယဋ္ဌော အတ္ထော, အညော ဥဒ္ဓစ္စေ အကမ္ပိယဋ္ဌော အတ္ထော, အညော အဝိဇ္ဇာယ အကမ္ပိယဋ္ဌော အတ္ထော။ ယေန ဉာဏေန ဣမေ နာနာ အတ္ထာ ဉာတာ, တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ။ တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’။
Assaddhiye akampiyaṭṭho attho. Kosajje akampiyaṭṭho attho. Pamāde akampiyaṭṭho attho. Uddhacce akampiyaṭṭho attho. Avijjāya akampiyaṭṭho attho. Añño assaddhiye akampiyaṭṭho attho, añño kosajje akampiyaṭṭho attho, añño pamāde akampiyaṭṭho attho, añño uddhacce akampiyaṭṭho attho, añño avijjāya akampiyaṭṭho attho. Yena ñāṇena ime nānā atthā ñātā, teneva ñāṇena ime nānā atthā paṭividitāti. Tena vuccati – ‘‘atthanānatte paññā atthapaṭisambhide ñāṇaṃ’’.
ပဉ္စ ဓမ္မေ သန္ဒသ္သေတုံ ဗ္ယဉ္ဇနနိရုတ္တာဘိလာပာ, ပဉ္စ အတ္ထေ သန္ဒသ္သေတုံ ဗ္ယဉ္ဇနနိရုတ္တာဘိလာပာ။ အညာ ဓမ္မနိရုတ္တိယော, အညာ အတ္ထနိရုတ္တိယော။ ယေန ဉာဏေန ဣမာ နာနာ နိရုတ္တိယော ဉာတာ, တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ။ တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’။
Pañca dhamme sandassetuṃ byañjananiruttābhilāpā, pañca atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā, teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
သတိသမ္ဗောဇ္ဈင္ဂော ဓမ္မော, ဓမ္မဝိစယသမ္ဗောဇ္ဈင္ဂော ဓမ္မော, ဝီရိယသမ္ဗောဇ္ဈင္ဂော ဓမ္မော, ပီတိသမ္ဗောဇ္ဈင္ဂော ဓမ္မော, ပသ္သဒ္ဓိသမ္ဗောဇ္ဈင္ဂော ဓမ္မော, သမာဓိသမ္ဗောဇ္ဈင္ဂော ဓမ္မော, ဥပေက္ခာသမ္ဗောဇ္ဈင္ဂော ဓမ္မော။ အညော သတိသမ္ဗောဇ္ဈင္ဂော ဓမ္မော, အညော ဓမ္မဝိစယသမ္ဗောဇ္ဈင္ဂော ဓမ္မော, အညော ဝီရိယသမ္ဗောဇ္ဈင္ဂော ဓမ္မော, အညော ပီတိသမ္ဗောဇ္ဈင္ဂော ဓမ္မော, အညော ပသ္သဒ္ဓိသမ္ဗောဇ္ဈင္ဂော ဓမ္မော, အညော သမာဓိသမ္ဗောဇ္ဈင္ဂော ဓမ္မော, အညော ဥပေက္ခာသမ္ဗောဇ္ဈင္ဂော ဓမ္မော။ ယေန ဉာဏေန ဣမေ နာနာ ဓမ္မာ ဉာတာ, တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ။ တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’။
Satisambojjhaṅgo dhammo, dhammavicayasambojjhaṅgo dhammo, vīriyasambojjhaṅgo dhammo, pītisambojjhaṅgo dhammo, passaddhisambojjhaṅgo dhammo, samādhisambojjhaṅgo dhammo, upekkhāsambojjhaṅgo dhammo. Añño satisambojjhaṅgo dhammo, añño dhammavicayasambojjhaṅgo dhammo, añño vīriyasambojjhaṅgo dhammo, añño pītisambojjhaṅgo dhammo, añño passaddhisambojjhaṅgo dhammo, añño samādhisambojjhaṅgo dhammo, añño upekkhāsambojjhaṅgo dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
ဥပဋ္ဌာနဋ္ဌော အတ္ထော, ပဝိစယဋ္ဌော အတ္ထော, ပဂ္ဂဟဋ္ဌော အတ္ထော, ဖရဏဋ္ဌော အတ္ထော, ဥပသမဋ္ဌော အတ္ထော, အဝိက္ခေပဋ္ဌော အတ္ထော, ပဋိသင္ခာနဋ္ဌော အတ္ထော။ အညော ဥပဋ္ဌာနဋ္ဌော အတ္ထော, အညော ပဝိစယဋ္ဌော အတ္ထော, အညော ပဂ္ဂဟဋ္ဌော အတ္ထော, အညော ဖရဏဋ္ဌော အတ္ထော, အညော ဥပသမဋ္ဌော အတ္ထော, အညော အဝိက္ခေပဋ္ဌော အတ္ထော, အညော ပဋိသင္ခာနဋ္ဌော အတ္ထော။ ယေန ဉာဏေန ဣမေ နာနာ အတ္ထာ ဉာတာ, တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ။ တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’။
Upaṭṭhānaṭṭho attho, pavicayaṭṭho attho, paggahaṭṭho attho, pharaṇaṭṭho attho, upasamaṭṭho attho, avikkhepaṭṭho attho, paṭisaṅkhānaṭṭho attho. Añño upaṭṭhānaṭṭho attho, añño pavicayaṭṭho attho, añño paggahaṭṭho attho, añño pharaṇaṭṭho attho, añño upasamaṭṭho attho, añño avikkhepaṭṭho attho, añño paṭisaṅkhānaṭṭho attho. Yena ñāṇena ime nānā atthā ñātā, teneva ñāṇena ime nānā atthā paṭividitāti. Tena vuccati – ‘‘atthanānatte paññā atthapaṭisambhide ñāṇaṃ’’.
သတ္တ ဓမ္မေ သန္ဒသ္သေတုံ ဗ္ယဉ္ဇနနိရုတ္တာဘိလာပာ, သတ္တ အတ္ထေ သန္ဒသ္သေတုံ ဗ္ယဉ္ဇနနိရုတ္တာဘိလာပာ။ အညာ ဓမ္မနိရုတ္တိယော, အညာ အတ္ထနိရုတ္တိယော။ ယေန ဉာဏေန ဣမာ နာနာ နိရုတ္တိယော ဉာတာ, တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ။ တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’။
Satta dhamme sandassetuṃ byañjananiruttābhilāpā, satta atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā, teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
သတ္တသု ဓမ္မေသု ဉာဏာနိ, သတ္တသု အတ္ထေသု ဉာဏာနိ, စုဒ္ဒသသု နိရုတ္တီသု ဉာဏာနိ။ အညာနိ ဓမ္မေသု ဉာဏာနိ, အညာနိ အတ္ထေသု ဉာဏာနိ, အညာနိ နိရုတ္တီသု ဉာဏာနိ။ ယေန ဉာဏေန ဣမေ နာနာ ဉာဏာ ဉာတာ, တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ။ တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’။
Sattasu dhammesu ñāṇāni, sattasu atthesu ñāṇāni, cuddasasu niruttīsu ñāṇāni. Aññāni dhammesu ñāṇāni, aññāni atthesu ñāṇāni, aññāni niruttīsu ñāṇāni. Yena ñāṇena ime nānā ñāṇā ñātā, teneva ñāṇena ime nānā ñāṇā paṭividitāti. Tena vuccati – ‘‘paṭibhānanānatte paññā paṭibhānapaṭisambhide ñāṇaṃ’’.
သမ္မာဒိဋ္ဌိ ဓမ္မော, သမ္မာသင္ကပ္ပော ဓမ္မော, သမ္မာဝာစာ ဓမ္မော, သမ္မာကမ္မန္တော ဓမ္မော, သမ္မာအာဇီဝော ဓမ္မော, သမ္မာဝာယာမော ဓမ္မော, သမ္မာသတိ ဓမ္မော, သမ္မာသမာဓိ ဓမ္မော။ အညော သမ္မာဒိဋ္ဌိ ဓမ္မော, အညော သမ္မာသင္ကပ္ပော ဓမ္မော, အညော သမ္မာဝာစာ ဓမ္မော, အညော သမ္မာကမ္မန္တော ဓမ္မော, အညော သမ္မာအာဇီဝော ဓမ္မော, အညော သမ္မာဝာယာမော ဓမ္မော, အညော သမ္မာသတိ ဓမ္မော, အညော သမ္မာသမာဓိ ဓမ္မော။ ယေန ဉာဏေန ဣမေ နာနာ ဓမ္မာ ဉာတာ, တေနေဝ ဉာဏေန ဣမေ နာနာ ဓမ္မာ ပဋိဝိဒိတာတိ။ တေန ဝုစ္စတိ – ‘‘ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ’’။
Sammādiṭṭhi dhammo, sammāsaṅkappo dhammo, sammāvācā dhammo, sammākammanto dhammo, sammāājīvo dhammo, sammāvāyāmo dhammo, sammāsati dhammo, sammāsamādhi dhammo. Añño sammādiṭṭhi dhammo, añño sammāsaṅkappo dhammo, añño sammāvācā dhammo, añño sammākammanto dhammo, añño sammāājīvo dhammo, añño sammāvāyāmo dhammo, añño sammāsati dhammo, añño sammāsamādhi dhammo. Yena ñāṇena ime nānā dhammā ñātā, teneva ñāṇena ime nānā dhammā paṭividitāti. Tena vuccati – ‘‘dhammanānatte paññā dhammapaṭisambhide ñāṇaṃ’’.
ဒသ္သနဋ္ဌော အတ္ထော, အဘိနိရောပနဋ္ဌော အတ္ထော, ပရိဂ္ဂဟဋ္ဌော အတ္ထော, သမုဋ္ဌာနဋ္ဌော အတ္ထော, ဝောဒာနဋ္ဌော အတ္ထော, ပဂ္ဂဟဋ္ဌော အတ္ထော, ဥပဋ္ဌာနဋ္ဌော အတ္ထော, အဝိက္ခေပဋ္ဌော အတ္ထော။ အညော ဒသ္သနဋ္ဌော အတ္ထော, အညော အဘိနိရောပနဋ္ဌော အတ္ထော, အညော ပရိဂ္ဂဟဋ္ဌော အတ္ထော, အညော သမုဋ္ဌာနဋ္ဌော အတ္ထော, အညော ဝောဒာနဋ္ဌော အတ္ထော, အညော ပဂ္ဂဟဋ္ဌော အတ္ထော, အညော ဥပဋ္ဌာနဋ္ဌော အတ္ထော, အညော အဝိက္ခေပဋ္ဌော အတ္ထော။ ယေန ဉာဏေန ဣမေ နာနာ အတ္ထာ ဉာတာ တေနေဝ ဉာဏေန ဣမေ နာနာ အတ္ထာ ပဋိဝိဒိတာတိ။ တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ’’။
Dassanaṭṭho attho, abhiniropanaṭṭho attho, pariggahaṭṭho attho, samuṭṭhānaṭṭho attho, vodānaṭṭho attho, paggahaṭṭho attho, upaṭṭhānaṭṭho attho, avikkhepaṭṭho attho. Añño dassanaṭṭho attho, añño abhiniropanaṭṭho attho, añño pariggahaṭṭho attho, añño samuṭṭhānaṭṭho attho, añño vodānaṭṭho attho, añño paggahaṭṭho attho, añño upaṭṭhānaṭṭho attho, añño avikkhepaṭṭho attho. Yena ñāṇena ime nānā atthā ñātā teneva ñāṇena ime nānā atthā paṭividitāti. Tena vuccati – ‘‘atthanānatte paññā atthapaṭisambhide ñāṇaṃ’’.
အဋ္ဌ ဓမ္မေ သန္ဒသ္သေတုံ ဗ္ယဉ္ဇနနိရုတ္တာဘိလာပာ, အဋ္ဌ အတ္ထေ သန္ဒသ္သေတုံ ဗ္ယဉ္ဇနနိရုတ္တာဘိလာပာ။ အညာ ဓမ္မနိရုတ္တိယော, အညာ အတ္ထနိရုတ္တိယော။ ယေန ဉာဏေန ဣမာ နာနာ နိရုတ္တိယော ဉာတာ , တေနေဝ ဉာဏေန ဣမာ နာနာ နိရုတ္တိယော ပဋိဝိဒိတာတိ။ တေန ဝုစ္စတိ – ‘‘နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ’’။
Aṭṭha dhamme sandassetuṃ byañjananiruttābhilāpā, aṭṭha atthe sandassetuṃ byañjananiruttābhilāpā. Aññā dhammaniruttiyo, aññā atthaniruttiyo. Yena ñāṇena imā nānā niruttiyo ñātā , teneva ñāṇena imā nānā niruttiyo paṭividitāti. Tena vuccati – ‘‘niruttinānatte paññā niruttipaṭisambhide ñāṇaṃ’’.
အဋ္ဌသု ဓမ္မေသု ဉာဏာနိ, အဋ္ဌသု အတ္ထေသု ဉာဏာနိ သောဠသသု နိရုတ္တီသု ဉာဏာနိ။ အညာနိ ဓမ္မေသု ဉာဏာနိ, အညာနိ အတ္ထေသု ဉာဏာနိ, အညာနိ နိရုတ္တီသု ဉာဏာနိ။ ယေန ဉာဏေန ဣမေ နာနာ ဉာဏာ ဉာတာ, တေနေဝ ဉာဏေန ဣမေ နာနာ ဉာဏာ ပဋိဝိဒိတာတိ။ တေန ဝုစ္စတိ – ‘‘ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘အတ္ထနာနတ္တေ ပညာ အတ္ထပဋိသမ္ဘိဒေ ဉာဏံ။ ဓမ္မနာနတ္တေ ပညာ ဓမ္မပဋိသမ္ဘိဒေ ဉာဏံ။ နိရုတ္တိနာနတ္တေ ပညာ နိရုတ္တိပဋိသမ္ဘိဒေ ဉာဏံ။ ပဋိဘာနနာနတ္တေ ပညာ ပဋိဘာနပဋိသမ္ဘိဒေ ဉာဏံ’’။
Aṭṭhasu dhammesu ñāṇāni, aṭṭhasu atthesu ñāṇāni soḷasasu niruttīsu ñāṇāni. Aññāni dhammesu ñāṇāni, aññāni atthesu ñāṇāni, aññāni niruttīsu ñāṇāni. Yena ñāṇena ime nānā ñāṇā ñātā, teneva ñāṇena ime nānā ñāṇā paṭividitāti. Tena vuccati – ‘‘paṭibhānanānatte paññā paṭibhānapaṭisambhide ñāṇaṃ’’. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘atthanānatte paññā atthapaṭisambhide ñāṇaṃ. Dhammanānatte paññā dhammapaṭisambhide ñāṇaṃ. Niruttinānatte paññā niruttipaṭisambhide ñāṇaṃ. Paṭibhānanānatte paññā paṭibhānapaṭisambhide ñāṇaṃ’’.
ပဋိသမ္ဘိဒာဉာဏနိဒ္ဒေသော အဋ္ဌဝီသတိမော။
Paṭisambhidāñāṇaniddeso aṭṭhavīsatimo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၂၅-၂၈. ပဋိသမ္ဘိဒာဉာဏနိဒ္ဒေသဝဏ္ဏနာ • 25-28. Paṭisambhidāñāṇaniddesavaṇṇanā
