| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๓-๗. อญฺญาสิโกณฺฑญฺญเตฺถรอปทานํ
3-7. Aññāsikoṇḍaññattheraapadānaṃ
๕๙๖.
596.
‘‘ปทุมุตฺตรสมฺพุทฺธํ, โลกเชฎฺฐํ วินายกํ;
‘‘Padumuttarasambuddhaṃ, lokajeṭṭhaṃ vināyakaṃ;
พุทฺธภูมิมนุปฺปตฺตํ, ปฐมํ อทฺทสํ อหํฯ
Buddhabhūmimanuppattaṃ, paṭhamaṃ addasaṃ ahaṃ.
๕๙๗.
597.
‘‘ยาวตา โพธิยา มูเล, ยกฺขา สเพฺพ สมาคตา;
‘‘Yāvatā bodhiyā mūle, yakkhā sabbe samāgatā;
สมฺพุทฺธํ ปริวาเรตฺวา, วนฺทนฺติ ปญฺชลีกตาฯ
Sambuddhaṃ parivāretvā, vandanti pañjalīkatā.
๕๙๘.
598.
‘‘สเพฺพ เทวา ตุฎฺฐมนา, อากาเส สญฺจรนฺติ เต;
‘‘Sabbe devā tuṭṭhamanā, ākāse sañcaranti te;
พุโทฺธ อยํ อนุปฺปโตฺต, อนฺธการตโมนุโทฯ
Buddho ayaṃ anuppatto, andhakāratamonudo.
๕๙๙.
599.
‘‘เตสํ หาสปเรตานํ, มหานาโท อวตฺตถ;
‘‘Tesaṃ hāsaparetānaṃ, mahānādo avattatha;
กิเลเส ฌาปยิสฺสาม, สมฺมาสมฺพุทฺธสาสเนฯ
Kilese jhāpayissāma, sammāsambuddhasāsane.
๖๐๐.
600.
‘‘เทวานํ คิรมญฺญาย, วาจาสภิมุทีริหํ;
‘‘Devānaṃ giramaññāya, vācāsabhimudīrihaṃ;
หโฎฺฐ หเฎฺฐน จิเตฺตน, อาทิภิกฺขมทาสหํฯ
Haṭṭho haṭṭhena cittena, ādibhikkhamadāsahaṃ.
๖๐๑.
601.
‘‘มม สงฺกปฺปมญฺญาย, สตฺถา โลเก อนุตฺตโร;
‘‘Mama saṅkappamaññāya, satthā loke anuttaro;
เทวสเงฺฆ นิสีทิตฺวา, อิมา คาถา อภาสถฯ
Devasaṅghe nisīditvā, imā gāthā abhāsatha.
๖๐๒.
602.
‘‘‘สตฺตาหํ อภินิกฺขมฺม, โพธิํ อชฺฌคมํ อหํ;
‘‘‘Sattāhaṃ abhinikkhamma, bodhiṃ ajjhagamaṃ ahaṃ;
อิทํ เม ปฐมํ ภตฺตํ, พฺรหฺมจาริสฺส ยาปนํฯ
Idaṃ me paṭhamaṃ bhattaṃ, brahmacārissa yāpanaṃ.
๖๐๓.
603.
‘‘‘ตุสิตา หิ อิธาคนฺตฺวา, โย เม ภิกฺขํ อุปานยิ;
‘‘‘Tusitā hi idhāgantvā, yo me bhikkhaṃ upānayi;
ตมหํ กิตฺตยิสฺสามิ, สุโณถ มม ภาสโตฯ
Tamahaṃ kittayissāmi, suṇotha mama bhāsato.
๖๐๔.
604.
สเพฺพ เทเว อภิโภตฺวา, ติทิวํ อาวสิสฺสติฯ
Sabbe deve abhibhotvā, tidivaṃ āvasissati.
๖๐๕.
605.
‘‘‘เทวโลกา จวิตฺวาน, มนุสฺสตฺตํ คมิสฺสติ;
‘‘‘Devalokā cavitvāna, manussattaṃ gamissati;
สหสฺสธา จกฺกวตฺตี, ตตฺถ รชฺชํ กริสฺสติฯ
Sahassadhā cakkavattī, tattha rajjaṃ karissati.
๖๐๖.
606.
‘‘‘กปฺปสตสหสฺสมฺหิ, โอกฺกากกุลสมฺภโว;
‘‘‘Kappasatasahassamhi, okkākakulasambhavo;
โคตโม นาม โคเตฺตน, สตฺถา โลเก ภวิสฺสติฯ
Gotamo nāma gottena, satthā loke bhavissati.
๖๐๗.
607.
‘‘‘ติทสา โส จวิตฺวาน, มนุสฺสตฺตํ คมิสฺสติ;
‘‘‘Tidasā so cavitvāna, manussattaṃ gamissati;
อคารา ปพฺพชิตฺวาน, ฉพฺพสฺสานิ วสิสฺสติฯ
Agārā pabbajitvāna, chabbassāni vasissati.
๖๐๘.
608.
‘‘‘ตโต สตฺตมเก วเสฺส, พุโทฺธ สจฺจํ กเถสฺสติ;
‘‘‘Tato sattamake vasse, buddho saccaṃ kathessati;
โกณฺฑโญฺญ นาม นาเมน, ปฐมํ สจฺฉิกาหิติ’ฯ
Koṇḍañño nāma nāmena, paṭhamaṃ sacchikāhiti’.
๖๐๙.
609.
‘‘นิกฺขเนฺตนานุปพฺพชิํ , ปธานํ สุกตํ มยา;
‘‘Nikkhantenānupabbajiṃ , padhānaṃ sukataṃ mayā;
กิเลเส ฌาปนตฺถาย, ปพฺพชิํ อนคาริยํฯ
Kilese jhāpanatthāya, pabbajiṃ anagāriyaṃ.
๖๑๐.
610.
‘‘อภิคนฺตฺวาน สพฺพญฺญู, พุโทฺธ โลเก สเทวเก;
‘‘Abhigantvāna sabbaññū, buddho loke sadevake;
๖๑๑.
611.
‘‘โส ทานิ ปโตฺต อมตํ, สนฺติปทมนุตฺตรํ;
‘‘So dāni patto amataṃ, santipadamanuttaraṃ;
สพฺพาสเว ปริญฺญาย, วิหรามิ อนาสโวฯ
Sabbāsave pariññāya, viharāmi anāsavo.
๖๑๒.
612.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
คาถาโย อภาสิตฺถาติฯ
Gāthāyo abhāsitthāti.
อญฺญาสิโกณฺฑญฺญเตฺถรสฺสาปทานํ สตฺตมํฯ
Aññāsikoṇḍaññattherassāpadānaṃ sattamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๓-๗. อญฺญาสิโกณฺฑญฺญเตฺถรอปทานวณฺณนา • 3-7. Aññāsikoṇḍaññattheraapadānavaṇṇanā
