| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๓-๘. ปิโณฺฑลภารทฺวาชเตฺถรอปทานํ
3-8. Piṇḍolabhāradvājattheraapadānaṃ
๖๑๓.
613.
‘‘ปทุมุตฺตโร นาม ชิโน, สยมฺภู อคฺคปุคฺคโล;
‘‘Padumuttaro nāma jino, sayambhū aggapuggalo;
ปุรโต หิมวนฺตสฺส, จิตฺตกูเฎ วสี ตทาฯ
Purato himavantassa, cittakūṭe vasī tadā.
๖๑๔.
614.
‘‘อภีตรูโป ตตฺถาสิํ, มิคราชา จตุกฺกโม;
‘‘Abhītarūpo tatthāsiṃ, migarājā catukkamo;
ตสฺส สทฺทํ สุณิตฺวาน, วิกฺขมฺภนฺติ พหุชฺชนาฯ
Tassa saddaṃ suṇitvāna, vikkhambhanti bahujjanā.
๖๑๕.
615.
‘‘สุผุลฺลํ ปทุมํ คยฺห, อุปคจฺฉิํ นราสภํ;
‘‘Suphullaṃ padumaṃ gayha, upagacchiṃ narāsabhaṃ;
วุฎฺฐิตสฺส สมาธิมฺหา, พุทฺธสฺส อภิโรปยิํฯ
Vuṭṭhitassa samādhimhā, buddhassa abhiropayiṃ.
๖๑๖.
616.
‘‘จาตุทฺทิสํ นมสฺสิตฺวา, พุทฺธเสฎฺฐํ นรุตฺตมํ;
‘‘Cātuddisaṃ namassitvā, buddhaseṭṭhaṃ naruttamaṃ;
๖๑๗.
617.
‘‘ปทุมุตฺตโร โลกวิทู, อาหุตีนํ ปฎิคฺคโห;
‘‘Padumuttaro lokavidū, āhutīnaṃ paṭiggaho;
สกาสเน นิสีทิตฺวา, อิมา คาถา อภาสถฯ
Sakāsane nisīditvā, imā gāthā abhāsatha.
๖๑๘.
618.
‘‘‘พุทฺธสฺส คิรมญฺญาย, สเพฺพ เทวา สมาคตา;
‘‘‘Buddhassa giramaññāya, sabbe devā samāgatā;
อาคโต วทตํ เสโฎฺฐ, ธมฺมํ โสสฺสาม ตํ มยํฯ
Āgato vadataṃ seṭṭho, dhammaṃ sossāma taṃ mayaṃ.
๖๑๙.
619.
‘‘‘เตสํ หาสปเรตานํ, ปุรโต โลกนายโก;
‘‘‘Tesaṃ hāsaparetānaṃ, purato lokanāyako;
๖๒๐.
620.
‘‘เยนิทํ ปทุมํ ทินฺนํ, สีหนาโท จ นาทิโต;
‘‘Yenidaṃ padumaṃ dinnaṃ, sīhanādo ca nādito;
ตมหํ กิตฺตยิสฺสามิ, สุณาถ มม ภาสโตฯ
Tamahaṃ kittayissāmi, suṇātha mama bhāsato.
๖๒๑.
621.
‘‘‘อิโต อฎฺฐมเก กเปฺป, จกฺกวตฺตี ภวิสฺสติ;
‘‘‘Ito aṭṭhamake kappe, cakkavattī bhavissati;
สตฺตรตนสมฺปโนฺน จตุทีปมฺหิ อิสฺสโรฯ
Sattaratanasampanno catudīpamhi issaro.
๖๒๒.
622.
ปทุโม นาม นาเมน, จกฺกวตฺตี มหพฺพโลฯ
Padumo nāma nāmena, cakkavattī mahabbalo.
๖๒๓.
623.
‘‘กปฺปสตสหสฺสมฺหิ , โอกฺกากกุลสมฺภโว;
‘‘Kappasatasahassamhi , okkākakulasambhavo;
โคตโม นาม โคเตฺตน, สตฺถา โลเก ภวิสฺสติฯ
Gotamo nāma gottena, satthā loke bhavissati.
๖๒๔.
624.
‘ปกาสิเต ปาวจเน, พฺรหฺมพนฺธุ ภวิสฺสติ;
‘Pakāsite pāvacane, brahmabandhu bhavissati;
พฺรหฺมญฺญา อภินิกฺขมฺม, ปพฺพชิสฺสติ ตาวเท’ฯ
Brahmaññā abhinikkhamma, pabbajissati tāvade’.
๖๒๕.
625.
‘‘ปธานปหิตโตฺต โส, อุปสโนฺต นิรูปธิ;
‘‘Padhānapahitatto so, upasanto nirūpadhi;
สพฺพาสเว ปริญฺญาย, นิพฺพายิสฺสตินาสโวฯ
Sabbāsave pariññāya, nibbāyissatināsavo.
๖๒๖.
626.
‘‘วิชเน ปนฺตเสยฺยมฺหิ, วาฬมิคสมากุเล;
‘‘Vijane pantaseyyamhi, vāḷamigasamākule;
สพฺพาสเว ปริญฺญาย, นิพฺพายิสฺสตินาสโวฯ
Sabbāsave pariññāya, nibbāyissatināsavo.
๖๒๗.
627.
‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;
‘‘Paṭisambhidā catasso, vimokkhāpi ca aṭṭhime;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
Chaḷabhiññā sacchikatā, kataṃ buddhassa sāsanaṃ’’.
อิตฺถํ สุทํ อายสฺมา ปิโณฺฑลภารทฺวาโช เถโร อิมา คาถาโย อภาสิตฺถาติฯ
Itthaṃ sudaṃ āyasmā piṇḍolabhāradvājo thero imā gāthāyo abhāsitthāti.
ปิโณฺฑลภารทฺวาชเตฺถรสฺสาปทานํ อฎฺฐมํฯ
Piṇḍolabhāradvājattherassāpadānaṃ aṭṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๓-๘. ปิโณฺฑลภารทฺวาชเตฺถรอปทานวณฺณนา • 3-8. Piṇḍolabhāradvājattheraapadānavaṇṇanā
