| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၄၄-၄၉. ဆဝိဝဋ္ဋဉာဏနိဒ္ဒေသော
44-49. Chavivaṭṭañāṇaniddeso
၉၅. ကထံ အဓိပတတ္တာ ပညာ သညာဝိဝဋ္ဋေ ဉာဏံ? နေက္ခမ္မာဓိပတတ္တာ ပညာ ကာမစ္ဆန္ဒတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ အဗ္ယာပာဒာဓိပတတ္တာ ပညာ ဗ္ယာပာဒတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ အာလောကသညာဓိပတတ္တာ ပညာ ထိနမိဒ္ဓတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ အဝိက္ခေပာဓိပတတ္တာ ပညာ ဥဒ္ဓစ္စတော သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ ဓမ္မဝဝတ္ထာနာဓိပတတ္တာ ပညာ ဝိစိကိစ္ဆာယ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ ဉာဏာဓိပတတ္တာ ပညာ အဝိဇ္ဇာယ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ ပာမောဇ္ဇာဓိပတတ္တာ ပညာ အရတိယာ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ ပဌမဇ္ဈာနာဓိပတတ္တာ ပညာ နီဝရဏေဟိ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ။ပေ.။ အရဟတ္တမဂ္ဂာဓိပတတ္တာ ပညာ သဗ္ဗကိလေသေဟိ သညာယ ဝိဝဋ္ဋတီတိ – အဓိပတတ္တာ ပညာ သညာဝိဝဋ္ဋေ ဉာဏံ ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘အဓိပတတ္တာ ပညာ သညာဝိဝဋ္ဋေ ဉာဏံ’’။
95. Kathaṃ adhipatattā paññā saññāvivaṭṭe ñāṇaṃ? Nekkhammādhipatattā paññā kāmacchandato saññāya vivaṭṭatīti – adhipatattā paññā saññāvivaṭṭe ñāṇaṃ. Abyāpādādhipatattā paññā byāpādato saññāya vivaṭṭatīti – adhipatattā paññā saññāvivaṭṭe ñāṇaṃ. Ālokasaññādhipatattā paññā thinamiddhato saññāya vivaṭṭatīti – adhipatattā paññā saññāvivaṭṭe ñāṇaṃ. Avikkhepādhipatattā paññā uddhaccato saññāya vivaṭṭatīti – adhipatattā paññā saññāvivaṭṭe ñāṇaṃ. Dhammavavatthānādhipatattā paññā vicikicchāya saññāya vivaṭṭatīti – adhipatattā paññā saññāvivaṭṭe ñāṇaṃ. Ñāṇādhipatattā paññā avijjāya saññāya vivaṭṭatīti – adhipatattā paññā saññāvivaṭṭe ñāṇaṃ. Pāmojjādhipatattā paññā aratiyā saññāya vivaṭṭatīti – adhipatattā paññā saññāvivaṭṭe ñāṇaṃ. Paṭhamajjhānādhipatattā paññā nīvaraṇehi saññāya vivaṭṭatīti – adhipatattā paññā saññāvivaṭṭe ñāṇaṃ…pe… arahattamaggādhipatattā paññā sabbakilesehi saññāya vivaṭṭatīti – adhipatattā paññā saññāvivaṭṭe ñāṇaṃ . Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘adhipatattā paññā saññāvivaṭṭe ñāṇaṃ’’.
၉၆. ကထံ နာနတ္တေ ပညာ စေတောဝိဝဋ္ဋေ ဉာဏံ? ကာမစ္ဆန္ဒော နာနတ္တံ, နေက္ခမ္မံ ဧကတ္တံ။ နေက္ခမ္မေကတ္တံ စေတယတော ကာမစ္ဆန္ဒတော စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ။ ဗ္ယာပာဒော နာနတ္တံ, အဗ္ယာပာဒော ဧကတ္တံ။ အဗ္ယာပာဒေကတ္တံ စေတယတော ဗ္ယာပာဒတော စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ။ ထိနမိဒ္ဓံ နာနတ္တံ, အာလောကသညာ ဧကတ္တံ။ အာလောကသညေကတ္တံ စေတယတော ထိနမိဒ္ဓတော စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ။ပေ.။ သဗ္ဗကိလေသာ နာနတ္တံ, အရဟတ္တမဂ္ဂော ဧကတ္တံ။ အရဟတ္တမဂ္ဂေကတ္တံ စေတယတော သဗ္ဗကိလေသေဟိ စိတ္တံ ဝိဝဋ္ဋတီတိ – နာနတ္တေ ပညာ စေတောဝိဝဋ္ဋေ ဉာဏံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘နာနတ္တေ ပညာ စေတောဝိဝဋ္ဋေ ဉာဏံ’’။
96. Kathaṃ nānatte paññā cetovivaṭṭe ñāṇaṃ? Kāmacchando nānattaṃ, nekkhammaṃ ekattaṃ. Nekkhammekattaṃ cetayato kāmacchandato cittaṃ vivaṭṭatīti – nānatte paññā cetovivaṭṭe ñāṇaṃ. Byāpādo nānattaṃ, abyāpādo ekattaṃ. Abyāpādekattaṃ cetayato byāpādato cittaṃ vivaṭṭatīti – nānatte paññā cetovivaṭṭe ñāṇaṃ. Thinamiddhaṃ nānattaṃ, ālokasaññā ekattaṃ. Ālokasaññekattaṃ cetayato thinamiddhato cittaṃ vivaṭṭatīti – nānatte paññā cetovivaṭṭe ñāṇaṃ…pe… sabbakilesā nānattaṃ, arahattamaggo ekattaṃ. Arahattamaggekattaṃ cetayato sabbakilesehi cittaṃ vivaṭṭatīti – nānatte paññā cetovivaṭṭe ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘nānatte paññā cetovivaṭṭe ñāṇaṃ’’.
၉၇. ကထံ အဓိဋ္ဌာနေ ပညာ စိတ္တဝိဝဋ္ဋေ ဉာဏံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ။ ဗ္ယာပာဒံ ပဇဟန္တော အဗ္ယာပာဒဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ။ ထိနမိဒ္ဓံ ပဇဟန္တော အာလောကသညာဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ။ပေ.။ သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ အဓိဋ္ဌာတီတိ – အဓိဋ္ဌာနေ ပညာ စိတ္တဝိဝဋ္ဋေ ဉာဏံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘အဓိဋ္ဌာနေ ပညာ စိတ္တဝိဝဋ္ဋေ ဉာဏံ’’။
97. Kathaṃ adhiṭṭhāne paññā cittavivaṭṭe ñāṇaṃ? Kāmacchandaṃ pajahanto nekkhammavasena cittaṃ adhiṭṭhātīti – adhiṭṭhāne paññā cittavivaṭṭe ñāṇaṃ. Byāpādaṃ pajahanto abyāpādavasena cittaṃ adhiṭṭhātīti – adhiṭṭhāne paññā cittavivaṭṭe ñāṇaṃ. Thinamiddhaṃ pajahanto ālokasaññāvasena cittaṃ adhiṭṭhātīti – adhiṭṭhāne paññā cittavivaṭṭe ñāṇaṃ…pe… sabbakilese pajahanto arahattamaggavasena cittaṃ adhiṭṭhātīti – adhiṭṭhāne paññā cittavivaṭṭe ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘adhiṭṭhāne paññā cittavivaṭṭe ñāṇaṃ’’.
၉၈. ကထံ သုညတေ ပညာ ဉာဏဝိဝဋ္ဋေ ဉာဏံ? ‘‘စက္ခု သုညံ အတ္တေန ဝာ အတ္တနိယေန ဝာ နိစ္စေန ဝာ ဓုဝေန ဝာ သသ္သတေန ဝာ အဝိပရိဏာမဓမ္မေန ဝာ’’တိ ယထာဘူတံ ဇာနတော 1 ပသ္သတော စက္ခာဘိနိဝေသတော 2 ဉာဏံ ဝိဝဋ္ဋတီတိ – သုညတေ ပညာ ဉာဏဝိဝဋ္ဋေ ဉာဏံ။ ‘‘သောတံ သုညံ။ပေ.။ ဃာနံ သုညံ။ ဇိဝ္ဟာ သုညာ။ ကာယော သုညော။ မနော သုညော အတ္တေန ဝာ အတ္တနိယေန ဝာ နိစ္စေန ဝာ ဓုဝေန ဝာ သသ္သတေန ဝာ အဝိပရိဏာမဓမ္မေန ဝာ’’တိ ယထာဘူတံ ဇာနတော ပသ္သတော မနာဘိနိဝေသတော ဉာဏံ ဝိဝဋ္ဋတီတိ – သုညတေ ပညာ ဉာဏဝိဝဋ္ဋေ ဉာဏံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘သုညတေ ပညာ ဉာဏဝိဝဋ္ဋေ ဉာဏံ’’။
98. Kathaṃ suññate paññā ñāṇavivaṭṭe ñāṇaṃ? ‘‘Cakkhu suññaṃ attena vā attaniyena vā niccena vā dhuvena vā sassatena vā avipariṇāmadhammena vā’’ti yathābhūtaṃ jānato 3 passato cakkhābhinivesato 4 ñāṇaṃ vivaṭṭatīti – suññate paññā ñāṇavivaṭṭe ñāṇaṃ. ‘‘Sotaṃ suññaṃ…pe… ghānaṃ suññaṃ… jivhā suññā… kāyo suñño… mano suñño attena vā attaniyena vā niccena vā dhuvena vā sassatena vā avipariṇāmadhammena vā’’ti yathābhūtaṃ jānato passato manābhinivesato ñāṇaṃ vivaṭṭatīti – suññate paññā ñāṇavivaṭṭe ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘suññate paññā ñāṇavivaṭṭe ñāṇaṃ’’.
၉၉. ကထံ ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ? နေက္ခမ္မေန ကာမစ္ဆန္ဒံ ဝောသဇ္ဇတီတိ – ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ။ အဗ္ယာပာဒေန ဗ္ယာပာဒံ ဝောသဇ္ဇတီတိ – ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ။ အာလောကသညာယ ထိနမိဒ္ဓံ ဝောသဇ္ဇတီတိ – ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ ။ အဝိက္ခေပေန ဥဒ္ဓစ္စံ ဝောသဇ္ဇတီတိ – ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ။ ဓမ္မဝဝတ္ထာနေန ဝိစိကိစ္ဆံ ဝောသဇ္ဇတီတိ – ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ။ပေ.။ အရဟတ္တမဂ္ဂေန သဗ္ဗကိလေသေ ဝောသဇ္ဇတီတိ – ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ဝောသဂ္ဂေ ပညာ ဝိမောက္ခဝိဝဋ္ဋေ ဉာဏံ’’။
99. Kathaṃ vosagge paññā vimokkhavivaṭṭe ñāṇaṃ? Nekkhammena kāmacchandaṃ vosajjatīti – vosagge paññā vimokkhavivaṭṭe ñāṇaṃ. Abyāpādena byāpādaṃ vosajjatīti – vosagge paññā vimokkhavivaṭṭe ñāṇaṃ. Ālokasaññāya thinamiddhaṃ vosajjatīti – vosagge paññā vimokkhavivaṭṭe ñāṇaṃ . Avikkhepena uddhaccaṃ vosajjatīti – vosagge paññā vimokkhavivaṭṭe ñāṇaṃ. Dhammavavatthānena vicikicchaṃ vosajjatīti – vosagge paññā vimokkhavivaṭṭe ñāṇaṃ…pe… arahattamaggena sabbakilese vosajjatīti – vosagge paññā vimokkhavivaṭṭe ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘vosagge paññā vimokkhavivaṭṭe ñāṇaṃ’’.
၁၀၀. ကထံ တထဋ္ဌေ ပညာ သစ္စဝိဝဋ္ဋေ ဉာဏံ? ဒုက္ခသ္သ ပီဠနဋ္ဌံ သင္ခတဋ္ဌံ သန္တာပဋ္ဌံ ဝိပရိဏာမဋ္ဌံ ပရိဇာနန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ။ သမုဒယသ္သ အာယူဟနဋ္ဌံ နိဒာနဋ္ဌံ သညောဂဋ္ဌံ ပလိဗောဓဋ္ဌံ ပဇဟန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ။ နိရောဓသ္သ နိသ္သရဏဋ္ဌံ ဝိဝေကဋ္ဌံ အသင္ခတဋ္ဌံ အမတဋ္ဌံ သစ္ဆိကရောန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ။ မဂ္ဂသ္သ နိယ္ယာနဋ္ဌံ ဟေတုဋ္ဌံ ဒသ္သနဋ္ဌံ အာဓိပတေယ္ယဋ္ဌံ ဘာဝေန္တော ဝိဝဋ္ဋတီတိ – တထဋ္ဌေ ပညာ သစ္စဝိဝဋ္ဋေ ဉာဏံ။
100. Kathaṃ tathaṭṭhe paññā saccavivaṭṭe ñāṇaṃ? Dukkhassa pīḷanaṭṭhaṃ saṅkhataṭṭhaṃ santāpaṭṭhaṃ vipariṇāmaṭṭhaṃ parijānanto vivaṭṭatīti – tathaṭṭhe paññā saccavivaṭṭe ñāṇaṃ. Samudayassa āyūhanaṭṭhaṃ nidānaṭṭhaṃ saññogaṭṭhaṃ palibodhaṭṭhaṃ pajahanto vivaṭṭatīti – tathaṭṭhe paññā saccavivaṭṭe ñāṇaṃ. Nirodhassa nissaraṇaṭṭhaṃ vivekaṭṭhaṃ asaṅkhataṭṭhaṃ amataṭṭhaṃ sacchikaronto vivaṭṭatīti – tathaṭṭhe paññā saccavivaṭṭe ñāṇaṃ. Maggassa niyyānaṭṭhaṃ hetuṭṭhaṃ dassanaṭṭhaṃ ādhipateyyaṭṭhaṃ bhāvento vivaṭṭatīti – tathaṭṭhe paññā saccavivaṭṭe ñāṇaṃ.
သညာဝိဝဋ္ဋော, စေတောဝိဝဋ္ဋော, စိတ္တဝိဝဋ္ဋော, ဉာဏဝိဝဋ္ဋော, ဝိမောက္ခဝိဝဋ္ဋော , သစ္စဝိဝဋ္ဋော။ သဉ္ဇာနန္တော ဝိဝဋ္ဋတီတိ – သညာဝိဝဋ္ဋော။ စေတယန္တော ဝိဝဋ္ဋတီတိ – စေတောဝိဝဋ္ဋော။ ဝိဇာနန္တော ဝိဝဋ္ဋတီတိ – စိတ္တဝိဝဋ္ဋော။ ဉာဏံ ကရောန္တော ဝိဝဋ္ဋတီတိ – ဉာဏဝိဝဋ္ဋော။ ဝောသဇ္ဇန္တော ဝိဝဋ္ဋတီတိ – ဝိမောက္ခဝိဝဋ္ဋော။ တထဋ္ဌေ ဝိဝဋ္ဋတီတိ – သစ္စဝိဝဋ္ဋော။
Saññāvivaṭṭo, cetovivaṭṭo, cittavivaṭṭo, ñāṇavivaṭṭo, vimokkhavivaṭṭo , saccavivaṭṭo. Sañjānanto vivaṭṭatīti – saññāvivaṭṭo. Cetayanto vivaṭṭatīti – cetovivaṭṭo. Vijānanto vivaṭṭatīti – cittavivaṭṭo. Ñāṇaṃ karonto vivaṭṭatīti – ñāṇavivaṭṭo. Vosajjanto vivaṭṭatīti – vimokkhavivaṭṭo. Tathaṭṭhe vivaṭṭatīti – saccavivaṭṭo.
ယတ္ထ သညာဝိဝဋ္ဋော, တတ္ထ စေတောဝိဝဋ္ဋော။ ယတ္ထ စေတောဝိဝဋ္ဋော, တတ္ထ သညာဝိဝဋ္ဋော။ ယတ္ထ သညာဝိဝဋ္ဋော စေတောဝိဝဋ္ဋော တတ္ထ စိတ္တဝိဝဋ္ဋော။ ယတ္ထ စိတ္တဝိဝဋ္ဋော, တတ္ထ သညာဝိဝဋ္ဋော စေတောဝိဝဋ္ဋော။ ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော, တတ္ထ ဉာဏဝိဝဋ္ဋော။ ယတ္ထ ဉာဏဝိဝဋ္ဋော, တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော။ ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော, တတ္ထ ဝိမောက္ခဝိဝဋ္ဋော။ ယတ္ထ ဝိမောက္ခဝိဝဋ္ဋော, တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော။ ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော ဝိမောက္ခဝိဝဋ္ဋော, တတ္ထ သစ္စဝိဝဋ္ဋော။ ယတ္ထ သစ္စဝိဝဋ္ဋော, တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော ဝိမောက္ခဝိဝဋ္ဋော။ တံ ဉာတဋ္ဌေန ဉာဏံ , ပဇာနနဋ္ဌေန ပညာ။ တေန ဝုစ္စတိ – ‘‘တထဋ္ဌေ ပညာ သစ္စဝိဝဋ္ဋေ ဉာဏံ’’။
Yattha saññāvivaṭṭo, tattha cetovivaṭṭo. Yattha cetovivaṭṭo, tattha saññāvivaṭṭo. Yattha saññāvivaṭṭo cetovivaṭṭo tattha cittavivaṭṭo. Yattha cittavivaṭṭo, tattha saññāvivaṭṭo cetovivaṭṭo. Yattha saññāvivaṭṭo cetovivaṭṭo cittavivaṭṭo, tattha ñāṇavivaṭṭo. Yattha ñāṇavivaṭṭo, tattha saññāvivaṭṭo cetovivaṭṭo cittavivaṭṭo. Yattha saññāvivaṭṭo cetovivaṭṭo cittavivaṭṭo ñāṇavivaṭṭo, tattha vimokkhavivaṭṭo. Yattha vimokkhavivaṭṭo, tattha saññāvivaṭṭo cetovivaṭṭo cittavivaṭṭo ñāṇavivaṭṭo. Yattha saññāvivaṭṭo cetovivaṭṭo cittavivaṭṭo ñāṇavivaṭṭo vimokkhavivaṭṭo, tattha saccavivaṭṭo. Yattha saccavivaṭṭo, tattha saññāvivaṭṭo cetovivaṭṭo cittavivaṭṭo ñāṇavivaṭṭo vimokkhavivaṭṭo. Taṃ ñātaṭṭhena ñāṇaṃ , pajānanaṭṭhena paññā. Tena vuccati – ‘‘tathaṭṭhe paññā saccavivaṭṭe ñāṇaṃ’’.
ဆဝိဝဋ္ဋဉာဏနိဒ္ဒေသော နဝစတ္တာလီသမော။
Chavivaṭṭañāṇaniddeso navacattālīsamo.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄၄-၄၉. ဝိဝဋ္ဋဉာဏဆက္ကနိဒ္ဒေသဝဏ္ဏနာ • 44-49. Vivaṭṭañāṇachakkaniddesavaṇṇanā
