| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
56-63. ஸச்சஞாணசதுக்கத்³வயனித்³தே³ஸோ
56-63. Saccañāṇacatukkadvayaniddeso
108. கத²ங் பரிஞ்ஞட்டே² பஞ்ஞா து³க்கே² ஞாணங், பஹானட்டே² பஞ்ஞா ஸமுத³யே ஞாணங், ஸச்சி²கிரியட்டே² பஞ்ஞா நிரோதே⁴ ஞாணங், பா⁴வனட்டே² பஞ்ஞா மக்³கே³ ஞாணங்? து³க்க²ஸ்ஸ பீளனட்டோ² ஸங்க²தட்டோ² ஸந்தாபட்டோ² விபரிணாமட்டோ² பரிஞ்ஞாதட்டோ²; ஸமுத³யஸ்ஸ ஆயூஹனட்டோ² நிதா³னட்டோ² ஸஞ்ஞோக³ட்டோ² பலிபோ³த⁴ட்டோ² பஹானட்டோ²; நிரோத⁴ஸ்ஸ நிஸ்ஸரணட்டோ² விவேகட்டோ² அஸங்க²தட்டோ² அமதட்டோ² ஸச்சி²கிரியட்டோ²; மக்³க³ஸ்ஸ நிய்யானட்டோ² ஹேதுட்டோ² த³ஸ்ஸனட்டோ² ஆதி⁴பதெய்யட்டோ² பா⁴வனட்டோ². தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘பரிஞ்ஞட்டே² பஞ்ஞா து³க்கே² ஞாணங், பஹானட்டே² பஞ்ஞா ஸமுத³யே ஞாணங், ஸச்சி²கிரியட்டே² பஞ்ஞா நிரோதே⁴ ஞாணங், பா⁴வனட்டே² பஞ்ஞா மக்³கே³ ஞாணங்’’.
108. Kathaṃ pariññaṭṭhe paññā dukkhe ñāṇaṃ, pahānaṭṭhe paññā samudaye ñāṇaṃ, sacchikiriyaṭṭhe paññā nirodhe ñāṇaṃ, bhāvanaṭṭhe paññā magge ñāṇaṃ? Dukkhassa pīḷanaṭṭho saṅkhataṭṭho santāpaṭṭho vipariṇāmaṭṭho pariññātaṭṭho; samudayassa āyūhanaṭṭho nidānaṭṭho saññogaṭṭho palibodhaṭṭho pahānaṭṭho; nirodhassa nissaraṇaṭṭho vivekaṭṭho asaṅkhataṭṭho amataṭṭho sacchikiriyaṭṭho; maggassa niyyānaṭṭho hetuṭṭho dassanaṭṭho ādhipateyyaṭṭho bhāvanaṭṭho. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘pariññaṭṭhe paññā dukkhe ñāṇaṃ, pahānaṭṭhe paññā samudaye ñāṇaṃ, sacchikiriyaṭṭhe paññā nirodhe ñāṇaṃ, bhāvanaṭṭhe paññā magge ñāṇaṃ’’.
109. கத²ங் து³க்கே² ஞாணங், து³க்க²ஸமுத³யே ஞாணங், து³க்க²னிரோதே⁴ ஞாணங், து³க்க²னிரோத⁴கா³மினியா படிபதா³ய ஞாணங்? மக்³க³ஸமங்கி³ஸ்ஸ ஞாணங் து³க்கே² பேதங் ஞாணங், து³க்க²ஸமுத³யே பேதங் ஞாணங், து³க்க²னிரோதே⁴ பேதங் ஞாணங், து³க்க²னிரோத⁴கா³மினியா படிபதா³ய பேதங் ஞாணங்.
109. Kathaṃ dukkhe ñāṇaṃ, dukkhasamudaye ñāṇaṃ, dukkhanirodhe ñāṇaṃ, dukkhanirodhagāminiyā paṭipadāya ñāṇaṃ? Maggasamaṅgissa ñāṇaṃ dukkhe petaṃ ñāṇaṃ, dukkhasamudaye petaṃ ñāṇaṃ, dukkhanirodhe petaṃ ñāṇaṃ, dukkhanirodhagāminiyā paṭipadāya petaṃ ñāṇaṃ.
தத்த² கதமங் து³க்கே² ஞாணங்? து³க்க²ங் ஆரப்³ப⁴ யா உப்பஜ்ஜதி பஞ்ஞா பஜானநா விசயோ பவிசயோ த⁴ம்மவிசயோ ஸல்லக்க²ணா உபலக்க²ணா பச்சுபலக்க²ணா பண்டி³ச்சங் கோஸல்லங் நேபுஞ்ஞங் வேப⁴ப்³யா சிந்தா உபபரிக்கா² பூ⁴ரி மேதா⁴ பரிணாயிகா விபஸ்ஸனா ஸம்பஜஞ்ஞங் பதோதோ³ பஞ்ஞா பஞ்ஞிந்த்³ரியங் பஞ்ஞாப³லங் பஞ்ஞாஸத்த²ங் பஞ்ஞாபாஸாதோ³ பஞ்ஞாஆலோகோ பஞ்ஞாஓபா⁴ஸோ பஞ்ஞாபஜ்ஜோதோ பஞ்ஞாரதனங் அமோஹோ த⁴ம்மவிசயோ ஸம்மாதி³ட்டி² – இத³ங் வுச்சதி து³க்கே² ஞாணங். து³க்க²ஸமுத³யங் ஆரப்³ப⁴…பே॰… து³க்க²னிரோத⁴ங் ஆரப்³ப⁴…பே॰… து³க்க²னிரோத⁴கா³மினிங் படிபத³ங் ஆரப்³ப⁴ யா உப்பஜ்ஜதி பஞ்ஞா பஜானநா…பே॰… அமோஹோ த⁴ம்மவிசயோ ஸம்மாதி³ட்டி² – இத³ங் வுச்சதி து³க்க²னிரோத⁴கா³மினியா படிபதா³ய ஞாணங். தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘து³க்கே² ஞாணங், து³க்க²ஸமுத³யே ஞாணங் , து³க்க²னிரோதே⁴ ஞாணங், து³க்க²னிரோத⁴கா³மினியா படிபதா³ய ஞாணங்’’.
Tattha katamaṃ dukkhe ñāṇaṃ? Dukkhaṃ ārabbha yā uppajjati paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṃ kosallaṃ nepuññaṃ vebhabyā cintā upaparikkhā bhūri medhā pariṇāyikā vipassanā sampajaññaṃ patodo paññā paññindriyaṃ paññābalaṃ paññāsatthaṃ paññāpāsādo paññāāloko paññāobhāso paññāpajjoto paññāratanaṃ amoho dhammavicayo sammādiṭṭhi – idaṃ vuccati dukkhe ñāṇaṃ. Dukkhasamudayaṃ ārabbha…pe… dukkhanirodhaṃ ārabbha…pe… dukkhanirodhagāminiṃ paṭipadaṃ ārabbha yā uppajjati paññā pajānanā…pe… amoho dhammavicayo sammādiṭṭhi – idaṃ vuccati dukkhanirodhagāminiyā paṭipadāya ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘dukkhe ñāṇaṃ, dukkhasamudaye ñāṇaṃ , dukkhanirodhe ñāṇaṃ, dukkhanirodhagāminiyā paṭipadāya ñāṇaṃ’’.
ஸச்சஞாணசதுக்கத்³வயனித்³தே³ஸோ தேஸட்டி²மோ.
Saccañāṇacatukkadvayaniddeso tesaṭṭhimo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 56-63. ஸச்சஞாணசதுக்கத்³வயனித்³தே³ஸவண்ணனா • 56-63. Saccañāṇacatukkadvayaniddesavaṇṇanā
