| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๖๔-๖๗. สุทฺธิกปฎิสมฺภิทาญาณนิเทฺทโส
64-67. Suddhikapaṭisambhidāñāṇaniddeso
๑๑๐. กถํ อตฺถปฎิสมฺภิเท ญาณํ, ธมฺมปฎิสมฺภิเท ญาณํ, นิรุตฺติปฎิสมฺภิเท ญาณํ, ปฎิภานปฎิสมฺภิเท ญาณํ? อเตฺถสุ ญาณํ อตฺถปฎิสมฺภิทา, ธเมฺมสุ ญาณํ ธมฺมปฎิสมฺภิทา, นิรุตฺตีสุ ญาณํ นิรุตฺติปฎิสมฺภิทา, ปฎิภาเนสุ ญาณํ ปฎิภานปฎิสมฺภิทาฯ อตฺถนานเตฺต ปญฺญา อตฺถปฎิสมฺภิเท ญาณํ, ธมฺมนานเตฺต ปญฺญา ธมฺมปฎิสมฺภิเท ญาณํ, นิรุตฺตินานเตฺต ปญฺญา นิรุตฺติปฎิสมฺภิเท ญาณํ, ปฎิภานนานเตฺต ปญฺญา ปฎิภานปฎิสมฺภิเท ญาณํ, อตฺถววตฺถาเน ปญฺญา อตฺถปฎิสมฺภิเท ญาณํ, ธมฺมววตฺถาเน ปญฺญา ธมฺมปฎิสมฺภิเท ญาณํ นิรุตฺติววตฺถาเน ปญฺญา นิรุตฺติปฎิสมฺภิเท ญาณํ, ปฎิภานววตฺถาเน ปญฺญา ปฎิภานปฎิสมฺภิเท ญาณํฯ
110. Kathaṃ atthapaṭisambhide ñāṇaṃ, dhammapaṭisambhide ñāṇaṃ, niruttipaṭisambhide ñāṇaṃ, paṭibhānapaṭisambhide ñāṇaṃ? Atthesu ñāṇaṃ atthapaṭisambhidā, dhammesu ñāṇaṃ dhammapaṭisambhidā, niruttīsu ñāṇaṃ niruttipaṭisambhidā, paṭibhānesu ñāṇaṃ paṭibhānapaṭisambhidā. Atthanānatte paññā atthapaṭisambhide ñāṇaṃ, dhammanānatte paññā dhammapaṭisambhide ñāṇaṃ, niruttinānatte paññā niruttipaṭisambhide ñāṇaṃ, paṭibhānanānatte paññā paṭibhānapaṭisambhide ñāṇaṃ, atthavavatthāne paññā atthapaṭisambhide ñāṇaṃ, dhammavavatthāne paññā dhammapaṭisambhide ñāṇaṃ niruttivavatthāne paññā niruttipaṭisambhide ñāṇaṃ, paṭibhānavavatthāne paññā paṭibhānapaṭisambhide ñāṇaṃ.
อตฺถสลฺลกฺขเณ ปญฺญา อตฺถปฎิสมฺภิเท ญาณํ, ธมฺมสลฺลกฺขเณ ปญฺญา ธมฺมปฎิสมฺภิเท ญาณํ, นิรุตฺติสลฺลกฺขเณ ปญฺญา นิรุตฺติปฎิสมฺภิเท ญาณํ, ปฎิภานสลฺลกฺขเณ ปญฺญา ปฎิภานปฎิสมฺภิเท ญาณํฯ อตฺถูปลกฺขเณ ปญฺญา อตฺถปฎิสมฺภิเท ญาณํ, ธมฺมูปลกฺขเณ ปญฺญา ธมฺมปฎิสมฺภิเท ญาณํ, นิรุตฺตูปลกฺขเณ ปญฺญา นิรุตฺติปฎิสมฺภิเท ญาณํ, ปฎิภานูปลกฺขเณ ปญฺญา ปฎิภานปฎิสมฺภิเท ญาณํฯ
Atthasallakkhaṇe paññā atthapaṭisambhide ñāṇaṃ, dhammasallakkhaṇe paññā dhammapaṭisambhide ñāṇaṃ, niruttisallakkhaṇe paññā niruttipaṭisambhide ñāṇaṃ, paṭibhānasallakkhaṇe paññā paṭibhānapaṭisambhide ñāṇaṃ. Atthūpalakkhaṇe paññā atthapaṭisambhide ñāṇaṃ, dhammūpalakkhaṇe paññā dhammapaṭisambhide ñāṇaṃ, niruttūpalakkhaṇe paññā niruttipaṭisambhide ñāṇaṃ, paṭibhānūpalakkhaṇe paññā paṭibhānapaṭisambhide ñāṇaṃ.
อตฺถปฺปเภเท ปญฺญา อตฺถปฎิสมฺภิเท ญาณํ, ธมฺมปฺปเภเท ปญฺญา ธมฺมปฎิสมฺภิเท ญาณํ, นิรุตฺติปฺปเภเท ปญฺญา นิรุตฺติปฎิสมฺภิเท ญาณํ, ปฎิภานปฺปเภเท ปญฺญา ปฎิภานปฎิสมฺภิเท ญาณํฯ อตฺถปฺปภาวเน ปญฺญา อตฺถปฎิสมฺภิเท ญาณํ, ธมฺมปฺปภาวเน ปญฺญา ธมฺมปฎิสมฺภิเท ญาณํ, นิรุตฺติปฺปภาวเน ปญฺญา นิรุตฺติปฎิสมฺภิเท ญาณํ, ปฎิภานปฺปภาวเน ปญฺญา ปฎิภานปฎิสมฺภิเท ญาณํฯ
Atthappabhede paññā atthapaṭisambhide ñāṇaṃ, dhammappabhede paññā dhammapaṭisambhide ñāṇaṃ, niruttippabhede paññā niruttipaṭisambhide ñāṇaṃ, paṭibhānappabhede paññā paṭibhānapaṭisambhide ñāṇaṃ. Atthappabhāvane paññā atthapaṭisambhide ñāṇaṃ, dhammappabhāvane paññā dhammapaṭisambhide ñāṇaṃ, niruttippabhāvane paññā niruttipaṭisambhide ñāṇaṃ, paṭibhānappabhāvane paññā paṭibhānapaṭisambhide ñāṇaṃ.
อตฺถโชตเน ปญฺญา อตฺถปฎิสมฺภิเท ญาณํ, ธมฺมโชตเน ปญฺญา ธมฺมปฎิสมฺภิเท ญาณํ, นิรุตฺติโชตเน ปญฺญา นิรุตฺติปฎิสมฺภิเท ญาณํ, ปฎิภานโชตเน ปญฺญา ปฎิภานปฎิสมฺภิเท ญาณํฯ อตฺถวิโรจเน ปญฺญา อตฺถปฎิสมฺภิเท ญาณํ, ธมฺมวิโรจเน ปญฺญา ธมฺมปฎิสมฺภิเท ญาณํ, นิรุตฺติวิโรจเน ปญฺญา นิรุตฺติปฎิสมฺภิเท ญาณํ, ปฎิภานวิโรจเน ปญฺญา ปฎิภานปฎิสมฺภิเท ญาณํฯ อตฺถปฺปกาสเน ปญฺญา อตฺถปฎิสมฺภิเท ญาณํ, ธมฺมปฺปกาสเน ปญฺญา ธมฺมปฎิสมฺภิเท ญาณํ, นิรุตฺติปฺปกาสเน ปญฺญา นิรุตฺติปฎิสมฺภิเท ญาณํ, ปฎิภานปฺปกาสเน ปญฺญา ปฎิภานปฎิสมฺภิเท ญาณํฯ ตํ ญาตเฎฺฐน ญาณํ, ปชานนเฎฺฐน ปญฺญาฯ เตน วุจฺจติ – ‘‘อตฺถปฎิสมฺภิเท ญาณํ, ธมฺมปฎิสมฺภิเท ญาณํ, นิรุตฺติปฎิสมฺภิเท ญาณํ, ปฎิภานปฎิสมฺภิเท ญาณํ’’ฯ
Atthajotane paññā atthapaṭisambhide ñāṇaṃ, dhammajotane paññā dhammapaṭisambhide ñāṇaṃ, niruttijotane paññā niruttipaṭisambhide ñāṇaṃ, paṭibhānajotane paññā paṭibhānapaṭisambhide ñāṇaṃ. Atthavirocane paññā atthapaṭisambhide ñāṇaṃ, dhammavirocane paññā dhammapaṭisambhide ñāṇaṃ, niruttivirocane paññā niruttipaṭisambhide ñāṇaṃ, paṭibhānavirocane paññā paṭibhānapaṭisambhide ñāṇaṃ. Atthappakāsane paññā atthapaṭisambhide ñāṇaṃ, dhammappakāsane paññā dhammapaṭisambhide ñāṇaṃ, niruttippakāsane paññā niruttipaṭisambhide ñāṇaṃ, paṭibhānappakāsane paññā paṭibhānapaṭisambhide ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘atthapaṭisambhide ñāṇaṃ, dhammapaṭisambhide ñāṇaṃ, niruttipaṭisambhide ñāṇaṃ, paṭibhānapaṭisambhide ñāṇaṃ’’.
สุทฺธิกปฎิสมฺภิทาญาณนิเทฺทโส สตฺตสฎฺฐิโมฯ
Suddhikapaṭisambhidāñāṇaniddeso sattasaṭṭhimo.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / ๖๔-๖๗. สุทฺธิกปฎิสมฺภิทาญาณนิเทฺทสวณฺณนา • 64-67. Suddhikapaṭisambhidāñāṇaniddesavaṇṇanā
