| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
64-67. සුද්‌ධිකපටිසම්‌භිදාඤාණනිද්‌දෙසො
64-67. Suddhikapaṭisambhidāñāṇaniddeso
110. කථං අත්‌ථපටිසම්‌භිදෙ ඤාණං, ධම්‌මපටිසම්‌භිදෙ ඤාණං, නිරුත්‌තිපටිසම්‌භිදෙ ඤාණං, පටිභානපටිසම්‌භිදෙ ඤාණං? අත්‌ථෙසු ඤාණං අත්‌ථපටිසම්‌භිදා, ධම්‌මෙසු ඤාණං ධම්‌මපටිසම්‌භිදා, නිරුත්‌තීසු ඤාණං නිරුත්‌තිපටිසම්‌භිදා, පටිභානෙසු ඤාණං පටිභානපටිසම්‌භිදා. අත්‌ථනානත්‌තෙ පඤ්‌ඤා අත්‌ථපටිසම්‌භිදෙ ඤාණං, ධම්‌මනානත්‌තෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිනානත්‌තෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානනානත්‌තෙ පඤ්‌ඤා පටිභානපටිසම්‌භිදෙ ඤාණං, අත්‌ථවවත්‌ථානෙ පඤ්‌ඤා අත්‌ථපටිසම්‌භිදෙ ඤාණං, ධම්‌මවවත්‌ථානෙ පඤ්‌ඤා ධම්‌මපටිසම්‌භිදෙ ඤාණං නිරුත්‌තිවවත්‌ථානෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානවවත්‌ථානෙ පඤ්‌ඤා පටිභානපටිසම්‌භිදෙ ඤාණං.
110. Kathaṃ atthapaṭisambhide ñāṇaṃ, dhammapaṭisambhide ñāṇaṃ, niruttipaṭisambhide ñāṇaṃ, paṭibhānapaṭisambhide ñāṇaṃ? Atthesu ñāṇaṃ atthapaṭisambhidā, dhammesu ñāṇaṃ dhammapaṭisambhidā, niruttīsu ñāṇaṃ niruttipaṭisambhidā, paṭibhānesu ñāṇaṃ paṭibhānapaṭisambhidā. Atthanānatte paññā atthapaṭisambhide ñāṇaṃ, dhammanānatte paññā dhammapaṭisambhide ñāṇaṃ, niruttinānatte paññā niruttipaṭisambhide ñāṇaṃ, paṭibhānanānatte paññā paṭibhānapaṭisambhide ñāṇaṃ, atthavavatthāne paññā atthapaṭisambhide ñāṇaṃ, dhammavavatthāne paññā dhammapaṭisambhide ñāṇaṃ niruttivavatthāne paññā niruttipaṭisambhide ñāṇaṃ, paṭibhānavavatthāne paññā paṭibhānapaṭisambhide ñāṇaṃ.
අත්‌ථසල්‌ලක්‌ඛණෙ පඤ්‌ඤා අත්‌ථපටිසම්‌භිදෙ ඤාණං, ධම්‌මසල්‌ලක්‌ඛණෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිසල්‌ලක්‌ඛණෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානසල්‌ලක්‌ඛණෙ පඤ්‌ඤා පටිභානපටිසම්‌භිදෙ ඤාණං. අත්‌ථූපලක්‌ඛණෙ පඤ්‌ඤා අත්‌ථපටිසම්‌භිදෙ ඤාණං, ධම්‌මූපලක්‌ඛණෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තූපලක්‌ඛණෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානූපලක්‌ඛණෙ පඤ්‌ඤා පටිභානපටිසම්‌භිදෙ ඤාණං.
Atthasallakkhaṇe paññā atthapaṭisambhide ñāṇaṃ, dhammasallakkhaṇe paññā dhammapaṭisambhide ñāṇaṃ, niruttisallakkhaṇe paññā niruttipaṭisambhide ñāṇaṃ, paṭibhānasallakkhaṇe paññā paṭibhānapaṭisambhide ñāṇaṃ. Atthūpalakkhaṇe paññā atthapaṭisambhide ñāṇaṃ, dhammūpalakkhaṇe paññā dhammapaṭisambhide ñāṇaṃ, niruttūpalakkhaṇe paññā niruttipaṭisambhide ñāṇaṃ, paṭibhānūpalakkhaṇe paññā paṭibhānapaṭisambhide ñāṇaṃ.
අත්‌ථප්‌පභෙදෙ පඤ්‌ඤා අත්‌ථපටිසම්‌භිදෙ ඤාණං, ධම්‌මප්‌පභෙදෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිප්‌පභෙදෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානප්‌පභෙදෙ පඤ්‌ඤා පටිභානපටිසම්‌භිදෙ ඤාණං. අත්‌ථප්‌පභාවනෙ පඤ්‌ඤා අත්‌ථපටිසම්‌භිදෙ ඤාණං, ධම්‌මප්‌පභාවනෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිප්‌පභාවනෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානප්‌පභාවනෙ පඤ්‌ඤා පටිභානපටිසම්‌භිදෙ ඤාණං.
Atthappabhede paññā atthapaṭisambhide ñāṇaṃ, dhammappabhede paññā dhammapaṭisambhide ñāṇaṃ, niruttippabhede paññā niruttipaṭisambhide ñāṇaṃ, paṭibhānappabhede paññā paṭibhānapaṭisambhide ñāṇaṃ. Atthappabhāvane paññā atthapaṭisambhide ñāṇaṃ, dhammappabhāvane paññā dhammapaṭisambhide ñāṇaṃ, niruttippabhāvane paññā niruttipaṭisambhide ñāṇaṃ, paṭibhānappabhāvane paññā paṭibhānapaṭisambhide ñāṇaṃ.
අත්‌ථජොතනෙ පඤ්‌ඤා අත්‌ථපටිසම්‌භිදෙ ඤාණං, ධම්‌මජොතනෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිජොතනෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානජොතනෙ පඤ්‌ඤා පටිභානපටිසම්‌භිදෙ ඤාණං. අත්‌ථවිරොචනෙ පඤ්‌ඤා අත්‌ථපටිසම්‌භිදෙ ඤාණං, ධම්‌මවිරොචනෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිවිරොචනෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානවිරොචනෙ පඤ්‌ඤා පටිභානපටිසම්‌භිදෙ ඤාණං. අත්‌ථප්‌පකාසනෙ පඤ්‌ඤා අත්‌ථපටිසම්‌භිදෙ ඤාණං, ධම්‌මප්‌පකාසනෙ පඤ්‌ඤා ධම්‌මපටිසම්‌භිදෙ ඤාණං, නිරුත්‌තිප්‌පකාසනෙ පඤ්‌ඤා නිරුත්‌තිපටිසම්‌භිදෙ ඤාණං, පටිභානප්‌පකාසනෙ පඤ්‌ඤා පටිභානපටිසම්‌භිදෙ ඤාණං. තං ඤාතට්‌ඨෙන ඤාණං, පජානනට්‌ඨෙන පඤ්‌ඤා. තෙන වුච්‌චති – ‘‘අත්‌ථපටිසම්‌භිදෙ ඤාණං, ධම්‌මපටිසම්‌භිදෙ ඤාණං, නිරුත්‌තිපටිසම්‌භිදෙ ඤාණං, පටිභානපටිසම්‌භිදෙ ඤාණං’’.
Atthajotane paññā atthapaṭisambhide ñāṇaṃ, dhammajotane paññā dhammapaṭisambhide ñāṇaṃ, niruttijotane paññā niruttipaṭisambhide ñāṇaṃ, paṭibhānajotane paññā paṭibhānapaṭisambhide ñāṇaṃ. Atthavirocane paññā atthapaṭisambhide ñāṇaṃ, dhammavirocane paññā dhammapaṭisambhide ñāṇaṃ, niruttivirocane paññā niruttipaṭisambhide ñāṇaṃ, paṭibhānavirocane paññā paṭibhānapaṭisambhide ñāṇaṃ. Atthappakāsane paññā atthapaṭisambhide ñāṇaṃ, dhammappakāsane paññā dhammapaṭisambhide ñāṇaṃ, niruttippakāsane paññā niruttipaṭisambhide ñāṇaṃ, paṭibhānappakāsane paññā paṭibhānapaṭisambhide ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘atthapaṭisambhide ñāṇaṃ, dhammapaṭisambhide ñāṇaṃ, niruttipaṭisambhide ñāṇaṃ, paṭibhānapaṭisambhide ñāṇaṃ’’.
සුද්‌ධිකපටිසම්‌භිදාඤාණනිද්‌දෙසො සත්‌තසට්‌ඨිමො.
Suddhikapaṭisambhidāñāṇaniddeso sattasaṭṭhimo.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 64-67. සුද්‌ධිකපටිසම්‌භිදාඤාණනිද්‌දෙසවණ්‌ණනා • 64-67. Suddhikapaṭisambhidāñāṇaniddesavaṇṇanā
