| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༦༤-༦༧. སུདྡྷིཀཔཊིསམྦྷིདཱཉཱཎནིདྡེསོ
64-67. Suddhikapaṭisambhidāñāṇaniddeso
༡༡༠. ཀཐཾ ཨཏྠཔཊིསམྦྷིདེ ཉཱཎཾ, དྷམྨཔཊིསམྦྷིདེ ཉཱཎཾ, ནིརུཏྟིཔཊིསམྦྷིདེ ཉཱཎཾ, པཊིབྷཱནཔཊིསམྦྷིདེ ཉཱཎཾ? ཨཏྠེསུ ཉཱཎཾ ཨཏྠཔཊིསམྦྷིདཱ, དྷམྨེསུ ཉཱཎཾ དྷམྨཔཊིསམྦྷིདཱ, ནིརུཏྟཱིསུ ཉཱཎཾ ནིརུཏྟིཔཊིསམྦྷིདཱ, པཊིབྷཱནེསུ ཉཱཎཾ པཊིབྷཱནཔཊིསམྦྷིདཱ། ཨཏྠནཱནཏྟེ པཉྙཱ ཨཏྠཔཊིསམྦྷིདེ ཉཱཎཾ, དྷམྨནཱནཏྟེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིནཱནཏྟེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནནཱནཏྟེ པཉྙཱ པཊིབྷཱནཔཊིསམྦྷིདེ ཉཱཎཾ, ཨཏྠཝཝཏྠཱནེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཝཝཏྠཱནེ པཉྙཱ དྷམྨཔཊིསམྦྷིདེ ཉཱཎཾ ནིརུཏྟིཝཝཏྠཱནེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཝཝཏྠཱནེ པཉྙཱ པཊིབྷཱནཔཊིསམྦྷིདེ ཉཱཎཾ།
110. Kathaṃ atthapaṭisambhide ñāṇaṃ, dhammapaṭisambhide ñāṇaṃ, niruttipaṭisambhide ñāṇaṃ, paṭibhānapaṭisambhide ñāṇaṃ? Atthesu ñāṇaṃ atthapaṭisambhidā, dhammesu ñāṇaṃ dhammapaṭisambhidā, niruttīsu ñāṇaṃ niruttipaṭisambhidā, paṭibhānesu ñāṇaṃ paṭibhānapaṭisambhidā. Atthanānatte paññā atthapaṭisambhide ñāṇaṃ, dhammanānatte paññā dhammapaṭisambhide ñāṇaṃ, niruttinānatte paññā niruttipaṭisambhide ñāṇaṃ, paṭibhānanānatte paññā paṭibhānapaṭisambhide ñāṇaṃ, atthavavatthāne paññā atthapaṭisambhide ñāṇaṃ, dhammavavatthāne paññā dhammapaṭisambhide ñāṇaṃ niruttivavatthāne paññā niruttipaṭisambhide ñāṇaṃ, paṭibhānavavatthāne paññā paṭibhānapaṭisambhide ñāṇaṃ.
ཨཏྠསལླཀྑཎེ པཉྙཱ ཨཏྠཔཊིསམྦྷིདེ ཉཱཎཾ, དྷམྨསལླཀྑཎེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིསལླཀྑཎེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནསལླཀྑཎེ པཉྙཱ པཊིབྷཱནཔཊིསམྦྷིདེ ཉཱཎཾ། ཨཏྠཱུཔལཀྑཎེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཱུཔལཀྑཎེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟཱུཔལཀྑཎེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཱུཔལཀྑཎེ པཉྙཱ པཊིབྷཱནཔཊིསམྦྷིདེ ཉཱཎཾ།
Atthasallakkhaṇe paññā atthapaṭisambhide ñāṇaṃ, dhammasallakkhaṇe paññā dhammapaṭisambhide ñāṇaṃ, niruttisallakkhaṇe paññā niruttipaṭisambhide ñāṇaṃ, paṭibhānasallakkhaṇe paññā paṭibhānapaṭisambhide ñāṇaṃ. Atthūpalakkhaṇe paññā atthapaṭisambhide ñāṇaṃ, dhammūpalakkhaṇe paññā dhammapaṭisambhide ñāṇaṃ, niruttūpalakkhaṇe paññā niruttipaṭisambhide ñāṇaṃ, paṭibhānūpalakkhaṇe paññā paṭibhānapaṭisambhide ñāṇaṃ.
ཨཏྠཔྤབྷེདེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཔྤབྷེདེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིཔྤབྷེདེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཔྤབྷེདེ པཉྙཱ པཊིབྷཱནཔཊིསམྦྷིདེ ཉཱཎཾ། ཨཏྠཔྤབྷཱཝནེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཔྤབྷཱཝནེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིཔྤབྷཱཝནེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཔྤབྷཱཝནེ པཉྙཱ པཊིབྷཱནཔཊིསམྦྷིདེ ཉཱཎཾ།
Atthappabhede paññā atthapaṭisambhide ñāṇaṃ, dhammappabhede paññā dhammapaṭisambhide ñāṇaṃ, niruttippabhede paññā niruttipaṭisambhide ñāṇaṃ, paṭibhānappabhede paññā paṭibhānapaṭisambhide ñāṇaṃ. Atthappabhāvane paññā atthapaṭisambhide ñāṇaṃ, dhammappabhāvane paññā dhammapaṭisambhide ñāṇaṃ, niruttippabhāvane paññā niruttipaṭisambhide ñāṇaṃ, paṭibhānappabhāvane paññā paṭibhānapaṭisambhide ñāṇaṃ.
ཨཏྠཛོཏནེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཛོཏནེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིཛོཏནེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཛོཏནེ པཉྙཱ པཊིབྷཱནཔཊིསམྦྷིདེ ཉཱཎཾ། ཨཏྠཝིརོཙནེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཝིརོཙནེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིཝིརོཙནེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཝིརོཙནེ པཉྙཱ པཊིབྷཱནཔཊིསམྦྷིདེ ཉཱཎཾ། ཨཏྠཔྤཀཱསནེ པཉྙཱ ཨཏྠཔཊིསམྦྷིདེ ཉཱཎཾ, དྷམྨཔྤཀཱསནེ པཉྙཱ དྷམྨཔཊིསམྦྷིདེ ཉཱཎཾ, ནིརུཏྟིཔྤཀཱསནེ པཉྙཱ ནིརུཏྟིཔཊིསམྦྷིདེ ཉཱཎཾ, པཊིབྷཱནཔྤཀཱསནེ པཉྙཱ པཊིབྷཱནཔཊིསམྦྷིདེ ཉཱཎཾ། ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘ཨཏྠཔཊིསམྦྷིདེ ཉཱཎཾ, དྷམྨཔཊིསམྦྷིདེ ཉཱཎཾ, ནིརུཏྟིཔཊིསམྦྷིདེ ཉཱཎཾ, པཊིབྷཱནཔཊིསམྦྷིདེ ཉཱཎཾ’’།
Atthajotane paññā atthapaṭisambhide ñāṇaṃ, dhammajotane paññā dhammapaṭisambhide ñāṇaṃ, niruttijotane paññā niruttipaṭisambhide ñāṇaṃ, paṭibhānajotane paññā paṭibhānapaṭisambhide ñāṇaṃ. Atthavirocane paññā atthapaṭisambhide ñāṇaṃ, dhammavirocane paññā dhammapaṭisambhide ñāṇaṃ, niruttivirocane paññā niruttipaṭisambhide ñāṇaṃ, paṭibhānavirocane paññā paṭibhānapaṭisambhide ñāṇaṃ. Atthappakāsane paññā atthapaṭisambhide ñāṇaṃ, dhammappakāsane paññā dhammapaṭisambhide ñāṇaṃ, niruttippakāsane paññā niruttipaṭisambhide ñāṇaṃ, paṭibhānappakāsane paññā paṭibhānapaṭisambhide ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘atthapaṭisambhide ñāṇaṃ, dhammapaṭisambhide ñāṇaṃ, niruttipaṭisambhide ñāṇaṃ, paṭibhānapaṭisambhide ñāṇaṃ’’.
སུདྡྷིཀཔཊིསམྦྷིདཱཉཱཎནིདྡེསོ སཏྟསཊྛིམོ།
Suddhikapaṭisambhidāñāṇaniddeso sattasaṭṭhimo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༦༤-༦༧. སུདྡྷིཀཔཊིསམྦྷིདཱཉཱཎནིདྡེསཝཎྞནཱ • 64-67. Suddhikapaṭisambhidāñāṇaniddesavaṇṇanā
