| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. দুতিযপণ্ণাসকং
2. Dutiyapaṇṇāsakaṃ
(৬) ১. পুগ্গলৰগ্গো
(6) 1. Puggalavaggo
৫৩. ‘‘দ্ৰেমে , ভিক্খৰে, পুগ্গলা লোকে উপ্পজ্জমানা উপ্পজ্জন্তি বহুজনহিতায বহুজনসুখায, বহুনো জনস্স অত্থায হিতায সুখায দেৰমনুস্সানং। কতমে দ্ৰে? তথাগতো চ অরহং সম্মাসম্বুদ্ধো, রাজা চ চক্কৰত্তী। ইমে খো, ভিক্খৰে, দ্ৰে পুগ্গলা লোকে উপ্পজ্জমানা উপ্পজ্জন্তি বহুজনহিতায বহুজনসুখায, বহুনো জনস্স অত্থায হিতায সুখায দেৰমনুস্সান’’ন্তি।
53. ‘‘Dveme , bhikkhave, puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
৫৪. ‘‘দ্ৰেমে, ভিক্খৰে, পুগ্গলা লোকে উপ্পজ্জমানা উপ্পজ্জন্তি অচ্ছরিযমনুস্সা। কতমে দ্ৰে? তথাগতো চ অরহং সম্মাসম্বুদ্ধো, রাজা চ চক্কৰত্তী। ইমে খো, ভিক্খৰে, দ্ৰে পুগ্গলা লোকে উপ্পজ্জমানা উপ্পজ্জন্তি অচ্ছরিযমনুস্সা’’তি।
54. ‘‘Dveme, bhikkhave, puggalā loke uppajjamānā uppajjanti acchariyamanussā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti acchariyamanussā’’ti.
৫৫. ‘‘দ্ৰিন্নং, ভিক্খৰে, পুগ্গলানং কালকিরিযা বহুনো জনস্স অনুতপ্পা হোতি। কতমেসং দ্ৰিন্নং? তথাগতস্স চ অরহতো সম্মাসম্বুদ্ধস্স, রঞ্ঞো চ চক্কৰত্তিস্স। ইমেসং খো, ভিক্খৰে, দ্ৰিন্নং পুগ্গলানং কালকিরিযা বহুনো জনস্স অনুতপ্পা হোতী’’তি।
55. ‘‘Dvinnaṃ, bhikkhave, puggalānaṃ kālakiriyā bahuno janassa anutappā hoti. Katamesaṃ dvinnaṃ? Tathāgatassa ca arahato sammāsambuddhassa, rañño ca cakkavattissa. Imesaṃ kho, bhikkhave, dvinnaṃ puggalānaṃ kālakiriyā bahuno janassa anutappā hotī’’ti.
৫৬. ‘‘দ্ৰেমে, ভিক্খৰে, থূপারহা। কতমে দ্ৰে? তথাগতো চ অরহং সম্মাসম্বুদ্ধো, রাজা চ চক্কৰত্তী। ইমে খো, ভিক্খৰে, দ্ৰে থূপারহা’’তি।
56. ‘‘Dveme, bhikkhave, thūpārahā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve thūpārahā’’ti.
৫৭. ‘‘দ্ৰেমে, ভিক্খৰে, বুদ্ধা। কতমে দ্ৰে? তথাগতো চ অরহং সম্মাসম্বুদ্ধো, পচ্চেকবুদ্ধো চ। ইমে খো, ভিক্খৰে, দ্ৰে বুদ্ধা’’তি।
57. ‘‘Dveme, bhikkhave, buddhā. Katame dve? Tathāgato ca arahaṃ sammāsambuddho, paccekabuddho ca. Ime kho, bhikkhave, dve buddhā’’ti.
৫৮. ‘‘দ্ৰেমে , ভিক্খৰে, অসনিযা ফলন্তিযা ন সন্তসন্তি। কতমে দ্ৰে? ভিক্খু চ খীণাসৰো, হত্থাজানীযো চ। ইমে খো, ভিক্খৰে, দ্ৰে অসনিযা ফলন্তিযা ন সন্তসন্তী’’তি।
58. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, hatthājānīyo ca. Ime kho, bhikkhave, dve asaniyā phalantiyā na santasantī’’ti.
৫৯. ‘‘দ্ৰেমে, ভিক্খৰে, অসনিযা ফলন্তিযা ন সন্তসন্তি। কতমে দ্ৰে? ভিক্খু চ খীণাসৰো, অস্সাজানীযো চ। ইমে খো, ভিক্খৰে, দ্ৰে অসনিযা ফলন্তিযা ন সন্তসন্তী’’তি।
59. ‘‘Dveme, bhikkhave, asaniyā phalantiyā na santasanti. Katame dve? Bhikkhu ca khīṇāsavo, assājānīyo ca. Ime kho, bhikkhave, dve asaniyā phalantiyā na santasantī’’ti.
৬০. ‘‘দ্ৰেমে , ভিক্খৰে, অসনিযা ফলন্তিযা ন সন্তসন্তি। কতমে দ্ৰে? ভিক্খু চ খীণাসৰো, সীহো চ মিগরাজা। ইমে খো, ভিক্খৰে, দ্ৰে অসনিযা ফলন্তিযা ন সন্তসন্তী’’তি।
60. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, sīho ca migarājā. Ime kho, bhikkhave, dve asaniyā phalantiyā na santasantī’’ti.
৬১. ‘‘দ্ৰেমে, ভিক্খৰে, অত্থৰসে সম্পস্সমানা কিংপুরিসা মানুসিং ৰাচং ন ভাসন্তি। কতমে দ্ৰে? মা চ মুসা ভণিম্হা, মা চ পরং অভূতেন অব্ভাচিক্খিম্হাতি। ইমে খো, ভিক্খৰে, দ্ৰে অত্থৰসে সম্পস্সমানা কিংপুরিসা মানুসিং ৰাচং ন ভাসন্তী’’তি।
61. ‘‘Dveme, bhikkhave, atthavase sampassamānā kiṃpurisā mānusiṃ vācaṃ na bhāsanti. Katame dve? Mā ca musā bhaṇimhā, mā ca paraṃ abhūtena abbhācikkhimhāti. Ime kho, bhikkhave, dve atthavase sampassamānā kiṃpurisā mānusiṃ vācaṃ na bhāsantī’’ti.
৬২. ‘‘দ্ৰিন্নং ধম্মানং, ভিক্খৰে, অতিত্তো অপ্পটিৰানো মাতুগামো কালং করোতি। কতমেসং দ্ৰিন্নং? মেথুনসমাপত্তিযা চ ৰিজাযনস্স চ। ইমেসং খো, ভিক্খৰে, দ্ৰিন্নং ধম্মানং অতিত্তো অপ্পটিৰানো মাতুগামো কালং করোতী’’তি।
62. ‘‘Dvinnaṃ dhammānaṃ, bhikkhave, atitto appaṭivāno mātugāmo kālaṃ karoti. Katamesaṃ dvinnaṃ? Methunasamāpattiyā ca vijāyanassa ca. Imesaṃ kho, bhikkhave, dvinnaṃ dhammānaṃ atitto appaṭivāno mātugāmo kālaṃ karotī’’ti.
৬৩. ‘‘অসন্তসন্নিৰাসঞ্চ ৰো, ভিক্খৰে, দেসেস্সামি সন্তসন্নিৰাসঞ্চ। তং সুণাথ, সাধুকং মনসি করোথ; ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
63. ‘‘Asantasannivāsañca vo, bhikkhave, desessāmi santasannivāsañca. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘কথঞ্চ, ভিক্খৰে, অসন্তসন্নিৰাসো হোতি, কথঞ্চ অসন্তো সন্নিৰসন্তি? ইধ, ভিক্খৰে, থেরস্স ভিক্খুনো এৰং হোতি – ‘থেরোপি মং ন ৰদেয্য, মজ্ঝিমোপি মং ন ৰদেয্য, নৰোপি মং ন ৰদেয্য; থেরম্পাহং ন ৰদেয্যং, মজ্ঝিমম্পাহং ন ৰদেয্যং, নৰম্পাহং ন ৰদেয্যং। থেরো চেপি মং ৰদেয্য অহিতানুকম্পী মং ৰদেয্য নো হিতানুকম্পী, নোতি নং ৰদেয্যং ৰিহেঠেয্যং 1 পস্সম্পিস্স নপ্পটিকরেয্যং। মজ্ঝিমো চেপি মং ৰদেয্য…পে॰… নৰো চেপি মং ৰদেয্য অহিতানুকম্পী মং ৰদেয্য নো হিতানুকম্পী, নোতি নং ৰদেয্যং ৰিহেঠেয্যং পস্সম্পিস্স নপ্পটিকরেয্যং’ । মজ্ঝিমস্সপি ভিক্খুনো এৰং হোতি…পে॰… নৰস্সপি ভিক্খুনো এৰং হোতি – ‘থেরোপি মং ন ৰদেয্য, মজ্ঝিমোপি মং ন ৰদেয্য, নৰোপি মং ন ৰদেয্য; থেরম্পাহং ন ৰদেয্যং, মজ্ঝিমম্পাহং ন ৰদেয্যং, নৰম্পাহং ন ৰদেয্যং। থেরো চেপি মং ৰদেয্য অহিতানুকম্পী মং ৰদেয্য নো হিতানুকম্পী নোতি নং ৰদেয্যং ৰিহেঠেয্যং পস্সম্পিস্স নপ্পটিকরেয্যং। মজ্ঝিমো চেপি মং ৰদেয্য…পে॰… নৰো চেপি মং ৰদেয্য অহিতানুকম্পী মং ৰদেয্য নো হিতানুকম্পী, নোতি নং ৰদেয্যং ৰিহেঠেয্যং পস্সম্পিস্স নপ্পটিকরেয্যং’। এৰং খো, ভিক্খৰে, অসন্তসন্নিৰাসো হোতি, এৰঞ্চ অসন্তো সন্নিৰসন্তি।
‘‘Kathañca, bhikkhave, asantasannivāso hoti, kathañca asanto sannivasanti? Idha, bhikkhave, therassa bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ 2 passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’ . Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheṭheyyaṃ passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’. Evaṃ kho, bhikkhave, asantasannivāso hoti, evañca asanto sannivasanti.
‘‘কথঞ্চ, ভিক্খৰে, সন্তসন্নিৰাসো হোতি, কথঞ্চ সন্তো সন্নিৰসন্তি? ইধ, ভিক্খৰে, থেরস্স ভিক্খুনো এৰং হোতি – ‘থেরোপি মং ৰদেয্য, মজ্ঝিমোপি মং ৰদেয্য, নৰোপি মং ৰদেয্য; থেরম্পাহং ৰদেয্যং, মজ্ঝিমম্পাহং ৰদেয্যং, নৰম্পাহং ৰদেয্যং। থেরো চেপি মং ৰদেয্য হিতানুকম্পী মং ৰদেয্য নো অহিতানুকম্পী, সাধূতি নং ৰদেয্যং ন ৰিহেঠেয্যং পস্সম্পিস্স পটিকরেয্যং। মজ্ঝিমো চেপি মং ৰদেয্য…পে॰… নৰো চেপি মং ৰদেয্য হিতানুকম্পী মং ৰদেয্য নো অহিতানুকম্পী, সাধূতি নং ৰদেয্যং ন নং ৰিহেঠেয্যং পস্সম্পিস্স পটিকরেয্যং’। মজ্ঝিমস্সপি ভিক্খুনো এৰং হোতি…পে॰… নৰস্সপি ভিক্খুনো এৰং হোতি – ‘থেরোপি মং ৰদেয্য, মজ্ঝিমোপি মং ৰদেয্য, নৰোপি মং ৰদেয্য; থেরম্পাহং ৰদেয্যং, মজ্ঝিমম্পাহং ৰদেয্যং, নৰম্পাহং ৰদেয্যং। থেরো চেপি মং ৰদেয্য হিতানুকম্পী মং ৰদেয্য নো অহিতানুকম্পী, সাধূতি নং ৰদেয্যং ন নং ৰিহেঠেয্যং পস্সম্পিস্স পটিকরেয্যং। মজ্ঝিমো চেপি মং ৰদেয্য…পে॰… নৰো চেপি মং ৰদেয্য হিতানুকম্পী মং ৰদেয্য নো অহিতানুকম্পী, সাধূতি নং ৰদেয্যং ন নং ৰিহেঠেয্যং পস্সম্পিস্স পটিকরেয্যং’। এৰং খো, ভিক্খৰে, সন্তসন্নিৰাসো হোতি, এৰঞ্চ সন্তো সন্নিৰসন্তী’’তি।
‘‘Kathañca, bhikkhave, santasannivāso hoti, kathañca santo sannivasanti? Idha, bhikkhave, therassa bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Evaṃ kho, bhikkhave, santasannivāso hoti, evañca santo sannivasantī’’ti.
৬৪. ‘‘যস্মিং, ভিক্খৰে, অধিকরণে উভতো ৰচীসংসারো দিট্ঠিপল়াসো চেতসো আঘাতো অপ্পচ্চযো অনভিরদ্ধি অজ্ঝত্তং অৰূপসন্তং হোতি, তস্মেতং, ভিক্খৰে, অধিকরণে পাটিকঙ্খং – ‘দীঘত্তায খরত্তায ৰাল়ত্তায সংৰত্তিস্সতি, ভিক্খূ চ ন ফাসুং 3 ৰিহরিস্সন্তি’। যস্মিঞ্চ খো, ভিক্খৰে, অধিকরণে উভতো ৰচীসংসারো দিট্ঠিপল়াসো চেতসো আঘাতো অপ্পচ্চযো অনভিরদ্ধি অজ্ঝত্তং সুৰূপসন্তং হোতি, তস্মেতং, ভিক্খৰে, অধিকরণে পাটিকঙ্খং – ‘ন দীঘত্তায খরত্তায ৰাল়ত্তায সংৰত্তিস্সতি, ভিক্খূ চ ফাসুং ৰিহরিস্সন্তী’’’তি।
64. ‘‘Yasmiṃ, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ avūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘dīghattāya kharattāya vāḷattāya saṃvattissati, bhikkhū ca na phāsuṃ 4 viharissanti’. Yasmiñca kho, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ suvūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘na dīghattāya kharattāya vāḷattāya saṃvattissati, bhikkhū ca phāsuṃ viharissantī’’’ti.
পুগ্গলৰগ্গো পঠমো।
Puggalavaggo paṭhamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / (৬) ১. পুগ্গলৰগ্গৰণ্ণনা • (6) 1. Puggalavaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (৬) ১. পুগ্গলৰগ্গৰণ্ণনা • (6) 1. Puggalavaggavaṇṇanā
