| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ದುತಿಯಪಣ್ಣಾಸಕಂ
2. Dutiyapaṇṇāsakaṃ
(೬) ೧. ಪುಗ್ಗಲವಗ್ಗೋ
(6) 1. Puggalavaggo
೫೩. ‘‘ದ್ವೇಮೇ , ಭಿಕ್ಖವೇ, ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಬಹುಜನಹಿತಾಯ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ। ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ರಾಜಾ ಚ ಚಕ್ಕವತ್ತೀ। ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಬಹುಜನಹಿತಾಯ ಬಹುಜನಸುಖಾಯ, ಬಹುನೋ ಜನಸ್ಸ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನ’’ನ್ತಿ।
53. ‘‘Dveme , bhikkhave, puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
೫೪. ‘‘ದ್ವೇಮೇ, ಭಿಕ್ಖವೇ, ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಅಚ್ಛರಿಯಮನುಸ್ಸಾ। ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ರಾಜಾ ಚ ಚಕ್ಕವತ್ತೀ। ಇಮೇ ಖೋ, ಭಿಕ್ಖವೇ, ದ್ವೇ ಪುಗ್ಗಲಾ ಲೋಕೇ ಉಪ್ಪಜ್ಜಮಾನಾ ಉಪ್ಪಜ್ಜನ್ತಿ ಅಚ್ಛರಿಯಮನುಸ್ಸಾ’’ತಿ।
54. ‘‘Dveme, bhikkhave, puggalā loke uppajjamānā uppajjanti acchariyamanussā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti acchariyamanussā’’ti.
೫೫. ‘‘ದ್ವಿನ್ನಂ, ಭಿಕ್ಖವೇ, ಪುಗ್ಗಲಾನಂ ಕಾಲಕಿರಿಯಾ ಬಹುನೋ ಜನಸ್ಸ ಅನುತಪ್ಪಾ ಹೋತಿ। ಕತಮೇಸಂ ದ್ವಿನ್ನಂ? ತಥಾಗತಸ್ಸ ಚ ಅರಹತೋ ಸಮ್ಮಾಸಮ್ಬುದ್ಧಸ್ಸ, ರಞ್ಞೋ ಚ ಚಕ್ಕವತ್ತಿಸ್ಸ। ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಪುಗ್ಗಲಾನಂ ಕಾಲಕಿರಿಯಾ ಬಹುನೋ ಜನಸ್ಸ ಅನುತಪ್ಪಾ ಹೋತೀ’’ತಿ।
55. ‘‘Dvinnaṃ, bhikkhave, puggalānaṃ kālakiriyā bahuno janassa anutappā hoti. Katamesaṃ dvinnaṃ? Tathāgatassa ca arahato sammāsambuddhassa, rañño ca cakkavattissa. Imesaṃ kho, bhikkhave, dvinnaṃ puggalānaṃ kālakiriyā bahuno janassa anutappā hotī’’ti.
೫೬. ‘‘ದ್ವೇಮೇ, ಭಿಕ್ಖವೇ, ಥೂಪಾರಹಾ। ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ರಾಜಾ ಚ ಚಕ್ಕವತ್ತೀ। ಇಮೇ ಖೋ, ಭಿಕ್ಖವೇ, ದ್ವೇ ಥೂಪಾರಹಾ’’ತಿ।
56. ‘‘Dveme, bhikkhave, thūpārahā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve thūpārahā’’ti.
೫೭. ‘‘ದ್ವೇಮೇ, ಭಿಕ್ಖವೇ, ಬುದ್ಧಾ। ಕತಮೇ ದ್ವೇ? ತಥಾಗತೋ ಚ ಅರಹಂ ಸಮ್ಮಾಸಮ್ಬುದ್ಧೋ, ಪಚ್ಚೇಕಬುದ್ಧೋ ಚ। ಇಮೇ ಖೋ, ಭಿಕ್ಖವೇ, ದ್ವೇ ಬುದ್ಧಾ’’ತಿ।
57. ‘‘Dveme, bhikkhave, buddhā. Katame dve? Tathāgato ca arahaṃ sammāsambuddho, paccekabuddho ca. Ime kho, bhikkhave, dve buddhā’’ti.
೫೮. ‘‘ದ್ವೇಮೇ , ಭಿಕ್ಖವೇ, ಅಸನಿಯಾ ಫಲನ್ತಿಯಾ ನ ಸನ್ತಸನ್ತಿ। ಕತಮೇ ದ್ವೇ? ಭಿಕ್ಖು ಚ ಖೀಣಾಸವೋ, ಹತ್ಥಾಜಾನೀಯೋ ಚ। ಇಮೇ ಖೋ, ಭಿಕ್ಖವೇ, ದ್ವೇ ಅಸನಿಯಾ ಫಲನ್ತಿಯಾ ನ ಸನ್ತಸನ್ತೀ’’ತಿ।
58. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, hatthājānīyo ca. Ime kho, bhikkhave, dve asaniyā phalantiyā na santasantī’’ti.
೫೯. ‘‘ದ್ವೇಮೇ, ಭಿಕ್ಖವೇ, ಅಸನಿಯಾ ಫಲನ್ತಿಯಾ ನ ಸನ್ತಸನ್ತಿ। ಕತಮೇ ದ್ವೇ? ಭಿಕ್ಖು ಚ ಖೀಣಾಸವೋ, ಅಸ್ಸಾಜಾನೀಯೋ ಚ। ಇಮೇ ಖೋ, ಭಿಕ್ಖವೇ, ದ್ವೇ ಅಸನಿಯಾ ಫಲನ್ತಿಯಾ ನ ಸನ್ತಸನ್ತೀ’’ತಿ।
59. ‘‘Dveme, bhikkhave, asaniyā phalantiyā na santasanti. Katame dve? Bhikkhu ca khīṇāsavo, assājānīyo ca. Ime kho, bhikkhave, dve asaniyā phalantiyā na santasantī’’ti.
೬೦. ‘‘ದ್ವೇಮೇ , ಭಿಕ್ಖವೇ, ಅಸನಿಯಾ ಫಲನ್ತಿಯಾ ನ ಸನ್ತಸನ್ತಿ। ಕತಮೇ ದ್ವೇ? ಭಿಕ್ಖು ಚ ಖೀಣಾಸವೋ, ಸೀಹೋ ಚ ಮಿಗರಾಜಾ। ಇಮೇ ಖೋ, ಭಿಕ್ಖವೇ, ದ್ವೇ ಅಸನಿಯಾ ಫಲನ್ತಿಯಾ ನ ಸನ್ತಸನ್ತೀ’’ತಿ।
60. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, sīho ca migarājā. Ime kho, bhikkhave, dve asaniyā phalantiyā na santasantī’’ti.
೬೧. ‘‘ದ್ವೇಮೇ, ಭಿಕ್ಖವೇ, ಅತ್ಥವಸೇ ಸಮ್ಪಸ್ಸಮಾನಾ ಕಿಂಪುರಿಸಾ ಮಾನುಸಿಂ ವಾಚಂ ನ ಭಾಸನ್ತಿ। ಕತಮೇ ದ್ವೇ? ಮಾ ಚ ಮುಸಾ ಭಣಿಮ್ಹಾ, ಮಾ ಚ ಪರಂ ಅಭೂತೇನ ಅಬ್ಭಾಚಿಕ್ಖಿಮ್ಹಾತಿ। ಇಮೇ ಖೋ, ಭಿಕ್ಖವೇ, ದ್ವೇ ಅತ್ಥವಸೇ ಸಮ್ಪಸ್ಸಮಾನಾ ಕಿಂಪುರಿಸಾ ಮಾನುಸಿಂ ವಾಚಂ ನ ಭಾಸನ್ತೀ’’ತಿ।
61. ‘‘Dveme, bhikkhave, atthavase sampassamānā kiṃpurisā mānusiṃ vācaṃ na bhāsanti. Katame dve? Mā ca musā bhaṇimhā, mā ca paraṃ abhūtena abbhācikkhimhāti. Ime kho, bhikkhave, dve atthavase sampassamānā kiṃpurisā mānusiṃ vācaṃ na bhāsantī’’ti.
೬೨. ‘‘ದ್ವಿನ್ನಂ ಧಮ್ಮಾನಂ, ಭಿಕ್ಖವೇ, ಅತಿತ್ತೋ ಅಪ್ಪಟಿವಾನೋ ಮಾತುಗಾಮೋ ಕಾಲಂ ಕರೋತಿ। ಕತಮೇಸಂ ದ್ವಿನ್ನಂ? ಮೇಥುನಸಮಾಪತ್ತಿಯಾ ಚ ವಿಜಾಯನಸ್ಸ ಚ। ಇಮೇಸಂ ಖೋ, ಭಿಕ್ಖವೇ, ದ್ವಿನ್ನಂ ಧಮ್ಮಾನಂ ಅತಿತ್ತೋ ಅಪ್ಪಟಿವಾನೋ ಮಾತುಗಾಮೋ ಕಾಲಂ ಕರೋತೀ’’ತಿ।
62. ‘‘Dvinnaṃ dhammānaṃ, bhikkhave, atitto appaṭivāno mātugāmo kālaṃ karoti. Katamesaṃ dvinnaṃ? Methunasamāpattiyā ca vijāyanassa ca. Imesaṃ kho, bhikkhave, dvinnaṃ dhammānaṃ atitto appaṭivāno mātugāmo kālaṃ karotī’’ti.
೬೩. ‘‘ಅಸನ್ತಸನ್ನಿವಾಸಞ್ಚ ವೋ, ಭಿಕ್ಖವೇ, ದೇಸೇಸ್ಸಾಮಿ ಸನ್ತಸನ್ನಿವಾಸಞ್ಚ। ತಂ ಸುಣಾಥ, ಸಾಧುಕಂ ಮನಸಿ ಕರೋಥ; ಭಾಸಿಸ್ಸಾಮೀ’’ತಿ। ‘‘ಏವಂ, ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ। ಭಗವಾ ಏತದವೋಚ –
63. ‘‘Asantasannivāsañca vo, bhikkhave, desessāmi santasannivāsañca. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘ಕಥಞ್ಚ, ಭಿಕ್ಖವೇ, ಅಸನ್ತಸನ್ನಿವಾಸೋ ಹೋತಿ, ಕಥಞ್ಚ ಅಸನ್ತೋ ಸನ್ನಿವಸನ್ತಿ? ಇಧ, ಭಿಕ್ಖವೇ, ಥೇರಸ್ಸ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ನ ವದೇಯ್ಯ, ಮಜ್ಝಿಮೋಪಿ ಮಂ ನ ವದೇಯ್ಯ, ನವೋಪಿ ಮಂ ನ ವದೇಯ್ಯ; ಥೇರಮ್ಪಾಹಂ ನ ವದೇಯ್ಯಂ, ಮಜ್ಝಿಮಮ್ಪಾಹಂ ನ ವದೇಯ್ಯಂ, ನವಮ್ಪಾಹಂ ನ ವದೇಯ್ಯಂ। ಥೇರೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ, ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ 1 ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ। ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ॰… ನವೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ, ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ’ । ಮಜ್ಝಿಮಸ್ಸಪಿ ಭಿಕ್ಖುನೋ ಏವಂ ಹೋತಿ…ಪೇ॰… ನವಸ್ಸಪಿ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ನ ವದೇಯ್ಯ, ಮಜ್ಝಿಮೋಪಿ ಮಂ ನ ವದೇಯ್ಯ, ನವೋಪಿ ಮಂ ನ ವದೇಯ್ಯ; ಥೇರಮ್ಪಾಹಂ ನ ವದೇಯ್ಯಂ, ಮಜ್ಝಿಮಮ್ಪಾಹಂ ನ ವದೇಯ್ಯಂ, ನವಮ್ಪಾಹಂ ನ ವದೇಯ್ಯಂ। ಥೇರೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ। ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ॰… ನವೋ ಚೇಪಿ ಮಂ ವದೇಯ್ಯ ಅಹಿತಾನುಕಮ್ಪೀ ಮಂ ವದೇಯ್ಯ ನೋ ಹಿತಾನುಕಮ್ಪೀ, ನೋತಿ ನಂ ವದೇಯ್ಯಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ನಪ್ಪಟಿಕರೇಯ್ಯಂ’। ಏವಂ ಖೋ, ಭಿಕ್ಖವೇ, ಅಸನ್ತಸನ್ನಿವಾಸೋ ಹೋತಿ, ಏವಞ್ಚ ಅಸನ್ತೋ ಸನ್ನಿವಸನ್ತಿ।
‘‘Kathañca, bhikkhave, asantasannivāso hoti, kathañca asanto sannivasanti? Idha, bhikkhave, therassa bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ 2 passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’ . Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheṭheyyaṃ passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’. Evaṃ kho, bhikkhave, asantasannivāso hoti, evañca asanto sannivasanti.
‘‘ಕಥಞ್ಚ, ಭಿಕ್ಖವೇ, ಸನ್ತಸನ್ನಿವಾಸೋ ಹೋತಿ, ಕಥಞ್ಚ ಸನ್ತೋ ಸನ್ನಿವಸನ್ತಿ? ಇಧ, ಭಿಕ್ಖವೇ, ಥೇರಸ್ಸ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ವದೇಯ್ಯ, ಮಜ್ಝಿಮೋಪಿ ಮಂ ವದೇಯ್ಯ, ನವೋಪಿ ಮಂ ವದೇಯ್ಯ; ಥೇರಮ್ಪಾಹಂ ವದೇಯ್ಯಂ, ಮಜ್ಝಿಮಮ್ಪಾಹಂ ವದೇಯ್ಯಂ, ನವಮ್ಪಾಹಂ ವದೇಯ್ಯಂ। ಥೇರೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ। ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ॰… ನವೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ನಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ’। ಮಜ್ಝಿಮಸ್ಸಪಿ ಭಿಕ್ಖುನೋ ಏವಂ ಹೋತಿ…ಪೇ॰… ನವಸ್ಸಪಿ ಭಿಕ್ಖುನೋ ಏವಂ ಹೋತಿ – ‘ಥೇರೋಪಿ ಮಂ ವದೇಯ್ಯ, ಮಜ್ಝಿಮೋಪಿ ಮಂ ವದೇಯ್ಯ, ನವೋಪಿ ಮಂ ವದೇಯ್ಯ; ಥೇರಮ್ಪಾಹಂ ವದೇಯ್ಯಂ, ಮಜ್ಝಿಮಮ್ಪಾಹಂ ವದೇಯ್ಯಂ, ನವಮ್ಪಾಹಂ ವದೇಯ್ಯಂ। ಥೇರೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ನಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ। ಮಜ್ಝಿಮೋ ಚೇಪಿ ಮಂ ವದೇಯ್ಯ…ಪೇ॰… ನವೋ ಚೇಪಿ ಮಂ ವದೇಯ್ಯ ಹಿತಾನುಕಮ್ಪೀ ಮಂ ವದೇಯ್ಯ ನೋ ಅಹಿತಾನುಕಮ್ಪೀ, ಸಾಧೂತಿ ನಂ ವದೇಯ್ಯಂ ನ ನಂ ವಿಹೇಠೇಯ್ಯಂ ಪಸ್ಸಮ್ಪಿಸ್ಸ ಪಟಿಕರೇಯ್ಯಂ’। ಏವಂ ಖೋ, ಭಿಕ್ಖವೇ, ಸನ್ತಸನ್ನಿವಾಸೋ ಹೋತಿ, ಏವಞ್ಚ ಸನ್ತೋ ಸನ್ನಿವಸನ್ತೀ’’ತಿ।
‘‘Kathañca, bhikkhave, santasannivāso hoti, kathañca santo sannivasanti? Idha, bhikkhave, therassa bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Evaṃ kho, bhikkhave, santasannivāso hoti, evañca santo sannivasantī’’ti.
೬೪. ‘‘ಯಸ್ಮಿಂ, ಭಿಕ್ಖವೇ, ಅಧಿಕರಣೇ ಉಭತೋ ವಚೀಸಂಸಾರೋ ದಿಟ್ಠಿಪಳಾಸೋ ಚೇತಸೋ ಆಘಾತೋ ಅಪ್ಪಚ್ಚಯೋ ಅನಭಿರದ್ಧಿ ಅಜ್ಝತ್ತಂ ಅವೂಪಸನ್ತಂ ಹೋತಿ, ತಸ್ಮೇತಂ, ಭಿಕ್ಖವೇ, ಅಧಿಕರಣೇ ಪಾಟಿಕಙ್ಖಂ – ‘ದೀಘತ್ತಾಯ ಖರತ್ತಾಯ ವಾಳತ್ತಾಯ ಸಂವತ್ತಿಸ್ಸತಿ, ಭಿಕ್ಖೂ ಚ ನ ಫಾಸುಂ 3 ವಿಹರಿಸ್ಸನ್ತಿ’। ಯಸ್ಮಿಞ್ಚ ಖೋ, ಭಿಕ್ಖವೇ, ಅಧಿಕರಣೇ ಉಭತೋ ವಚೀಸಂಸಾರೋ ದಿಟ್ಠಿಪಳಾಸೋ ಚೇತಸೋ ಆಘಾತೋ ಅಪ್ಪಚ್ಚಯೋ ಅನಭಿರದ್ಧಿ ಅಜ್ಝತ್ತಂ ಸುವೂಪಸನ್ತಂ ಹೋತಿ, ತಸ್ಮೇತಂ, ಭಿಕ್ಖವೇ, ಅಧಿಕರಣೇ ಪಾಟಿಕಙ್ಖಂ – ‘ನ ದೀಘತ್ತಾಯ ಖರತ್ತಾಯ ವಾಳತ್ತಾಯ ಸಂವತ್ತಿಸ್ಸತಿ, ಭಿಕ್ಖೂ ಚ ಫಾಸುಂ ವಿಹರಿಸ್ಸನ್ತೀ’’’ತಿ।
64. ‘‘Yasmiṃ, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ avūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘dīghattāya kharattāya vāḷattāya saṃvattissati, bhikkhū ca na phāsuṃ 4 viharissanti’. Yasmiñca kho, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ suvūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘na dīghattāya kharattāya vāḷattāya saṃvattissati, bhikkhū ca phāsuṃ viharissantī’’’ti.
ಪುಗ್ಗಲವಗ್ಗೋ ಪಠಮೋ।
Puggalavaggo paṭhamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / (೬) ೧. ಪುಗ್ಗಲವಗ್ಗವಣ್ಣನಾ • (6) 1. Puggalavaggavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / (೬) ೧. ಪುಗ್ಗಲವಗ್ಗವಣ್ಣನಾ • (6) 1. Puggalavaggavaṇṇanā
