| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. དུཏིཡཔཎྞཱསཀཾ
2. Dutiyapaṇṇāsakaṃ
(༦) ༡. པུགྒལཝགྒོ
(6) 1. Puggalavaggo
༥༣. ‘‘དྭེམེ , བྷིཀྑཝེ, པུགྒལཱ ལོཀེ ཨུཔྤཛྫམཱནཱ ཨུཔྤཛྫནྟི བཧུཛནཧིཏཱཡ བཧུཛནསུཁཱཡ, བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱནཾ། ཀཏམེ དྭེ? ཏཐཱགཏོ ཙ ཨརཧཾ སམྨཱསམྦུདྡྷོ, རཱཛཱ ཙ ཙཀྐཝཏྟཱི། ཨིམེ ཁོ, བྷིཀྑཝེ, དྭེ པུགྒལཱ ལོཀེ ཨུཔྤཛྫམཱནཱ ཨུཔྤཛྫནྟི བཧུཛནཧིཏཱཡ བཧུཛནསུཁཱཡ, བཧུནོ ཛནསྶ ཨཏྠཱཡ ཧིཏཱཡ སུཁཱཡ དེཝམནུསྶཱན’’ནྟི།
53. ‘‘Dveme , bhikkhave, puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussānaṃ. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti bahujanahitāya bahujanasukhāya, bahuno janassa atthāya hitāya sukhāya devamanussāna’’nti.
༥༤. ‘‘དྭེམེ, བྷིཀྑཝེ, པུགྒལཱ ལོཀེ ཨུཔྤཛྫམཱནཱ ཨུཔྤཛྫནྟི ཨཙྪརིཡམནུསྶཱ། ཀཏམེ དྭེ? ཏཐཱགཏོ ཙ ཨརཧཾ སམྨཱསམྦུདྡྷོ, རཱཛཱ ཙ ཙཀྐཝཏྟཱི། ཨིམེ ཁོ, བྷིཀྑཝེ, དྭེ པུགྒལཱ ལོཀེ ཨུཔྤཛྫམཱནཱ ཨུཔྤཛྫནྟི ཨཙྪརིཡམནུསྶཱ’’ཏི།
54. ‘‘Dveme, bhikkhave, puggalā loke uppajjamānā uppajjanti acchariyamanussā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve puggalā loke uppajjamānā uppajjanti acchariyamanussā’’ti.
༥༥. ‘‘དྭིནྣཾ, བྷིཀྑཝེ, པུགྒལཱནཾ ཀཱལཀིརིཡཱ བཧུནོ ཛནསྶ ཨནུཏཔྤཱ ཧོཏི། ཀཏམེསཾ དྭིནྣཾ? ཏཐཱགཏསྶ ཙ ཨརཧཏོ སམྨཱསམྦུདྡྷསྶ, རཉྙོ ཙ ཙཀྐཝཏྟིསྶ། ཨིམེསཾ ཁོ, བྷིཀྑཝེ, དྭིནྣཾ པུགྒལཱནཾ ཀཱལཀིརིཡཱ བཧུནོ ཛནསྶ ཨནུཏཔྤཱ ཧོཏཱི’’ཏི།
55. ‘‘Dvinnaṃ, bhikkhave, puggalānaṃ kālakiriyā bahuno janassa anutappā hoti. Katamesaṃ dvinnaṃ? Tathāgatassa ca arahato sammāsambuddhassa, rañño ca cakkavattissa. Imesaṃ kho, bhikkhave, dvinnaṃ puggalānaṃ kālakiriyā bahuno janassa anutappā hotī’’ti.
༥༦. ‘‘དྭེམེ, བྷིཀྑཝེ, ཐཱུཔཱརཧཱ། ཀཏམེ དྭེ? ཏཐཱགཏོ ཙ ཨརཧཾ སམྨཱསམྦུདྡྷོ, རཱཛཱ ཙ ཙཀྐཝཏྟཱི། ཨིམེ ཁོ, བྷིཀྑཝེ, དྭེ ཐཱུཔཱརཧཱ’’ཏི།
56. ‘‘Dveme, bhikkhave, thūpārahā. Katame dve? Tathāgato ca arahaṃ sammāsambuddho, rājā ca cakkavattī. Ime kho, bhikkhave, dve thūpārahā’’ti.
༥༧. ‘‘དྭེམེ, བྷིཀྑཝེ, བུདྡྷཱ། ཀཏམེ དྭེ? ཏཐཱགཏོ ཙ ཨརཧཾ སམྨཱསམྦུདྡྷོ, པཙྩེཀབུདྡྷོ ཙ། ཨིམེ ཁོ, བྷིཀྑཝེ, དྭེ བུདྡྷཱ’’ཏི།
57. ‘‘Dveme, bhikkhave, buddhā. Katame dve? Tathāgato ca arahaṃ sammāsambuddho, paccekabuddho ca. Ime kho, bhikkhave, dve buddhā’’ti.
༥༨. ‘‘དྭེམེ , བྷིཀྑཝེ, ཨསནིཡཱ ཕལནྟིཡཱ ན སནྟསནྟི། ཀཏམེ དྭེ? བྷིཀྑུ ཙ ཁཱིཎཱསཝོ, ཧཏྠཱཛཱནཱིཡོ ཙ། ཨིམེ ཁོ, བྷིཀྑཝེ, དྭེ ཨསནིཡཱ ཕལནྟིཡཱ ན སནྟསནྟཱི’’ཏི།
58. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, hatthājānīyo ca. Ime kho, bhikkhave, dve asaniyā phalantiyā na santasantī’’ti.
༥༩. ‘‘དྭེམེ, བྷིཀྑཝེ, ཨསནིཡཱ ཕལནྟིཡཱ ན སནྟསནྟི། ཀཏམེ དྭེ? བྷིཀྑུ ཙ ཁཱིཎཱསཝོ, ཨསྶཱཛཱནཱིཡོ ཙ། ཨིམེ ཁོ, བྷིཀྑཝེ, དྭེ ཨསནིཡཱ ཕལནྟིཡཱ ན སནྟསནྟཱི’’ཏི།
59. ‘‘Dveme, bhikkhave, asaniyā phalantiyā na santasanti. Katame dve? Bhikkhu ca khīṇāsavo, assājānīyo ca. Ime kho, bhikkhave, dve asaniyā phalantiyā na santasantī’’ti.
༦༠. ‘‘དྭེམེ , བྷིཀྑཝེ, ཨསནིཡཱ ཕལནྟིཡཱ ན སནྟསནྟི། ཀཏམེ དྭེ? བྷིཀྑུ ཙ ཁཱིཎཱསཝོ, སཱིཧོ ཙ མིགརཱཛཱ། ཨིམེ ཁོ, བྷིཀྑཝེ, དྭེ ཨསནིཡཱ ཕལནྟིཡཱ ན སནྟསནྟཱི’’ཏི།
60. ‘‘Dveme , bhikkhave, asaniyā phalantiyā na santasanti. Katame dve? Bhikkhu ca khīṇāsavo, sīho ca migarājā. Ime kho, bhikkhave, dve asaniyā phalantiyā na santasantī’’ti.
༦༡. ‘‘དྭེམེ, བྷིཀྑཝེ, ཨཏྠཝསེ སམྤསྶམཱནཱ ཀིཾཔུརིསཱ མཱནུསིཾ ཝཱཙཾ ན བྷཱསནྟི། ཀཏམེ དྭེ? མཱ ཙ མུསཱ བྷཎིམྷཱ, མཱ ཙ པརཾ ཨབྷཱུཏེན ཨབྦྷཱཙིཀྑིམྷཱཏི། ཨིམེ ཁོ, བྷིཀྑཝེ, དྭེ ཨཏྠཝསེ སམྤསྶམཱནཱ ཀིཾཔུརིསཱ མཱནུསིཾ ཝཱཙཾ ན བྷཱསནྟཱི’’ཏི།
61. ‘‘Dveme, bhikkhave, atthavase sampassamānā kiṃpurisā mānusiṃ vācaṃ na bhāsanti. Katame dve? Mā ca musā bhaṇimhā, mā ca paraṃ abhūtena abbhācikkhimhāti. Ime kho, bhikkhave, dve atthavase sampassamānā kiṃpurisā mānusiṃ vācaṃ na bhāsantī’’ti.
༦༢. ‘‘དྭིནྣཾ དྷམྨཱནཾ, བྷིཀྑཝེ, ཨཏིཏྟོ ཨཔྤཊིཝཱནོ མཱཏུགཱམོ ཀཱལཾ ཀརོཏི། ཀཏམེསཾ དྭིནྣཾ? མེཐུནསམཱཔཏྟིཡཱ ཙ ཝིཛཱཡནསྶ ཙ། ཨིམེསཾ ཁོ, བྷིཀྑཝེ, དྭིནྣཾ དྷམྨཱནཾ ཨཏིཏྟོ ཨཔྤཊིཝཱནོ མཱཏུགཱམོ ཀཱལཾ ཀརོཏཱི’’ཏི།
62. ‘‘Dvinnaṃ dhammānaṃ, bhikkhave, atitto appaṭivāno mātugāmo kālaṃ karoti. Katamesaṃ dvinnaṃ? Methunasamāpattiyā ca vijāyanassa ca. Imesaṃ kho, bhikkhave, dvinnaṃ dhammānaṃ atitto appaṭivāno mātugāmo kālaṃ karotī’’ti.
༦༣. ‘‘ཨསནྟསནྣིཝཱསཉྩ ཝོ, བྷིཀྑཝེ, དེསེསྶཱམི སནྟསནྣིཝཱསཉྩ། ཏཾ སུཎཱཐ, སཱདྷུཀཾ མནསི ཀརོཐ; བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
63. ‘‘Asantasannivāsañca vo, bhikkhave, desessāmi santasannivāsañca. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘ཀཐཉྩ, བྷིཀྑཝེ, ཨསནྟསནྣིཝཱསོ ཧོཏི, ཀཐཉྩ ཨསནྟོ སནྣིཝསནྟི? ཨིདྷ, བྷིཀྑཝེ, ཐེརསྶ བྷིཀྑུནོ ཨེཝཾ ཧོཏི – ‘ཐེརོཔི མཾ ན ཝདེཡྻ, མཛ྄ཛྷིམོཔི མཾ ན ཝདེཡྻ, ནཝོཔི མཾ ན ཝདེཡྻ; ཐེརམྤཱཧཾ ན ཝདེཡྻཾ, མཛ྄ཛྷིམམྤཱཧཾ ན ཝདེཡྻཾ, ནཝམྤཱཧཾ ན ཝདེཡྻཾ། ཐེརོ ཙེཔི མཾ ཝདེཡྻ ཨཧིཏཱནུཀམྤཱི མཾ ཝདེཡྻ ནོ ཧིཏཱནུཀམྤཱི, ནོཏི ནཾ ཝདེཡྻཾ ཝིཧེཋེཡྻཾ 1 པསྶམྤིསྶ ནཔྤཊིཀརེཡྻཾ། མཛ྄ཛྷིམོ ཙེཔི མཾ ཝདེཡྻ…པེ॰… ནཝོ ཙེཔི མཾ ཝདེཡྻ ཨཧིཏཱནུཀམྤཱི མཾ ཝདེཡྻ ནོ ཧིཏཱནུཀམྤཱི, ནོཏི ནཾ ཝདེཡྻཾ ཝིཧེཋེཡྻཾ པསྶམྤིསྶ ནཔྤཊིཀརེཡྻཾ’ ། མཛ྄ཛྷིམསྶཔི བྷིཀྑུནོ ཨེཝཾ ཧོཏི…པེ॰… ནཝསྶཔི བྷིཀྑུནོ ཨེཝཾ ཧོཏི – ‘ཐེརོཔི མཾ ན ཝདེཡྻ, མཛ྄ཛྷིམོཔི མཾ ན ཝདེཡྻ, ནཝོཔི མཾ ན ཝདེཡྻ; ཐེརམྤཱཧཾ ན ཝདེཡྻཾ, མཛ྄ཛྷིམམྤཱཧཾ ན ཝདེཡྻཾ, ནཝམྤཱཧཾ ན ཝདེཡྻཾ། ཐེརོ ཙེཔི མཾ ཝདེཡྻ ཨཧིཏཱནུཀམྤཱི མཾ ཝདེཡྻ ནོ ཧིཏཱནུཀམྤཱི ནོཏི ནཾ ཝདེཡྻཾ ཝིཧེཋེཡྻཾ པསྶམྤིསྶ ནཔྤཊིཀརེཡྻཾ། མཛ྄ཛྷིམོ ཙེཔི མཾ ཝདེཡྻ…པེ॰… ནཝོ ཙེཔི མཾ ཝདེཡྻ ཨཧིཏཱནུཀམྤཱི མཾ ཝདེཡྻ ནོ ཧིཏཱནུཀམྤཱི, ནོཏི ནཾ ཝདེཡྻཾ ཝིཧེཋེཡྻཾ པསྶམྤིསྶ ནཔྤཊིཀརེཡྻཾ’། ཨེཝཾ ཁོ, བྷིཀྑཝེ, ཨསནྟསནྣིཝཱསོ ཧོཏི, ཨེཝཉྩ ཨསནྟོ སནྣིཝསནྟི།
‘‘Kathañca, bhikkhave, asantasannivāso hoti, kathañca asanto sannivasanti? Idha, bhikkhave, therassa bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ 2 passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’ . Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ na vadeyya, majjhimopi maṃ na vadeyya, navopi maṃ na vadeyya; therampāhaṃ na vadeyyaṃ, majjhimampāhaṃ na vadeyyaṃ, navampāhaṃ na vadeyyaṃ. Thero cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheṭheyyaṃ passampissa nappaṭikareyyaṃ. Majjhimo cepi maṃ vadeyya…pe… navo cepi maṃ vadeyya ahitānukampī maṃ vadeyya no hitānukampī, noti naṃ vadeyyaṃ viheṭheyyaṃ passampissa nappaṭikareyyaṃ’. Evaṃ kho, bhikkhave, asantasannivāso hoti, evañca asanto sannivasanti.
‘‘ཀཐཉྩ, བྷིཀྑཝེ, སནྟསནྣིཝཱསོ ཧོཏི, ཀཐཉྩ སནྟོ སནྣིཝསནྟི? ཨིདྷ, བྷིཀྑཝེ, ཐེརསྶ བྷིཀྑུནོ ཨེཝཾ ཧོཏི – ‘ཐེརོཔི མཾ ཝདེཡྻ, མཛ྄ཛྷིམོཔི མཾ ཝདེཡྻ, ནཝོཔི མཾ ཝདེཡྻ; ཐེརམྤཱཧཾ ཝདེཡྻཾ, མཛ྄ཛྷིམམྤཱཧཾ ཝདེཡྻཾ, ནཝམྤཱཧཾ ཝདེཡྻཾ། ཐེརོ ཙེཔི མཾ ཝདེཡྻ ཧིཏཱནུཀམྤཱི མཾ ཝདེཡྻ ནོ ཨཧིཏཱནུཀམྤཱི, སཱདྷཱུཏི ནཾ ཝདེཡྻཾ ན ཝིཧེཋེཡྻཾ པསྶམྤིསྶ པཊིཀརེཡྻཾ། མཛ྄ཛྷིམོ ཙེཔི མཾ ཝདེཡྻ…པེ॰… ནཝོ ཙེཔི མཾ ཝདེཡྻ ཧིཏཱནུཀམྤཱི མཾ ཝདེཡྻ ནོ ཨཧིཏཱནུཀམྤཱི, སཱདྷཱུཏི ནཾ ཝདེཡྻཾ ན ནཾ ཝིཧེཋེཡྻཾ པསྶམྤིསྶ པཊིཀརེཡྻཾ’། མཛ྄ཛྷིམསྶཔི བྷིཀྑུནོ ཨེཝཾ ཧོཏི…པེ॰… ནཝསྶཔི བྷིཀྑུནོ ཨེཝཾ ཧོཏི – ‘ཐེརོཔི མཾ ཝདེཡྻ, མཛ྄ཛྷིམོཔི མཾ ཝདེཡྻ, ནཝོཔི མཾ ཝདེཡྻ; ཐེརམྤཱཧཾ ཝདེཡྻཾ, མཛ྄ཛྷིམམྤཱཧཾ ཝདེཡྻཾ, ནཝམྤཱཧཾ ཝདེཡྻཾ། ཐེརོ ཙེཔི མཾ ཝདེཡྻ ཧིཏཱནུཀམྤཱི མཾ ཝདེཡྻ ནོ ཨཧིཏཱནུཀམྤཱི, སཱདྷཱུཏི ནཾ ཝདེཡྻཾ ན ནཾ ཝིཧེཋེཡྻཾ པསྶམྤིསྶ པཊིཀརེཡྻཾ། མཛ྄ཛྷིམོ ཙེཔི མཾ ཝདེཡྻ…པེ॰… ནཝོ ཙེཔི མཾ ཝདེཡྻ ཧིཏཱནུཀམྤཱི མཾ ཝདེཡྻ ནོ ཨཧིཏཱནུཀམྤཱི, སཱདྷཱུཏི ནཾ ཝདེཡྻཾ ན ནཾ ཝིཧེཋེཡྻཾ པསྶམྤིསྶ པཊིཀརེཡྻཾ’། ཨེཝཾ ཁོ, བྷིཀྑཝེ, སནྟསནྣིཝཱསོ ཧོཏི, ཨེཝཉྩ སནྟོ སནྣིཝསནྟཱི’’ཏི།
‘‘Kathañca, bhikkhave, santasannivāso hoti, kathañca santo sannivasanti? Idha, bhikkhave, therassa bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Majjhimassapi bhikkhuno evaṃ hoti…pe… navassapi bhikkhuno evaṃ hoti – ‘theropi maṃ vadeyya, majjhimopi maṃ vadeyya, navopi maṃ vadeyya; therampāhaṃ vadeyyaṃ, majjhimampāhaṃ vadeyyaṃ, navampāhaṃ vadeyyaṃ. Thero cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ. Majjhimo cepi maṃ vadeyya…pe… navo cepi maṃ vadeyya hitānukampī maṃ vadeyya no ahitānukampī, sādhūti naṃ vadeyyaṃ na naṃ viheṭheyyaṃ passampissa paṭikareyyaṃ’. Evaṃ kho, bhikkhave, santasannivāso hoti, evañca santo sannivasantī’’ti.
༦༤. ‘‘ཡསྨིཾ, བྷིཀྑཝེ, ཨདྷིཀརཎེ ཨུབྷཏོ ཝཙཱིསཾསཱརོ དིཊྛིཔལཱ༹སོ ཙེཏསོ ཨཱགྷཱཏོ ཨཔྤཙྩཡོ ཨནབྷིརདྡྷི ཨཛ྄ཛྷཏྟཾ ཨཝཱུཔསནྟཾ ཧོཏི, ཏསྨེཏཾ, བྷིཀྑཝེ, ཨདྷིཀརཎེ པཱཊིཀངྑཾ – ‘དཱིགྷཏྟཱཡ ཁརཏྟཱཡ ཝཱལ༹ཏྟཱཡ སཾཝཏྟིསྶཏི, བྷིཀྑཱུ ཙ ན ཕཱསུཾ 3 ཝིཧརིསྶནྟི’། ཡསྨིཉྩ ཁོ, བྷིཀྑཝེ, ཨདྷིཀརཎེ ཨུབྷཏོ ཝཙཱིསཾསཱརོ དིཊྛིཔལཱ༹སོ ཙེཏསོ ཨཱགྷཱཏོ ཨཔྤཙྩཡོ ཨནབྷིརདྡྷི ཨཛ྄ཛྷཏྟཾ སུཝཱུཔསནྟཾ ཧོཏི, ཏསྨེཏཾ, བྷིཀྑཝེ, ཨདྷིཀརཎེ པཱཊིཀངྑཾ – ‘ན དཱིགྷཏྟཱཡ ཁརཏྟཱཡ ཝཱལ༹ཏྟཱཡ སཾཝཏྟིསྶཏི, བྷིཀྑཱུ ཙ ཕཱསུཾ ཝིཧརིསྶནྟཱི’’’ཏི།
64. ‘‘Yasmiṃ, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ avūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘dīghattāya kharattāya vāḷattāya saṃvattissati, bhikkhū ca na phāsuṃ 4 viharissanti’. Yasmiñca kho, bhikkhave, adhikaraṇe ubhato vacīsaṃsāro diṭṭhipaḷāso cetaso āghāto appaccayo anabhiraddhi ajjhattaṃ suvūpasantaṃ hoti, tasmetaṃ, bhikkhave, adhikaraṇe pāṭikaṅkhaṃ – ‘na dīghattāya kharattāya vāḷattāya saṃvattissati, bhikkhū ca phāsuṃ viharissantī’’’ti.
པུགྒལཝགྒོ པཋམོ།
Puggalavaggo paṭhamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / (༦) ༡. པུགྒལཝགྒཝཎྞནཱ • (6) 1. Puggalavaggavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / (༦) ༡. པུགྒལཝགྒཝཎྞནཱ • (6) 1. Puggalavaggavaṇṇanā
