| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၇၂-၇၃. သဗ္ဗညုတဉာဏနိဒ္ဒေသော
72-73. Sabbaññutañāṇaniddeso
၁၁၉. ကတမံ တထာဂတသ္သ သဗ္ဗညုတညာဏံ? သဗ္ဗံ သင္ခတမသင္ခတံ အနဝသေသံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ 1။
119. Katamaṃ tathāgatassa sabbaññutaññāṇaṃ? Sabbaṃ saṅkhatamasaṅkhataṃ anavasesaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ 2.
၁၂၀. အတီတံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ အနာဂတံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ပစ္စုပ္ပန္နံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
120. Atītaṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Anāgataṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Paccuppannaṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
စက္ခု စေဝ ရူပာ စ, ဧဝံ တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ သောတဉ္စေဝ သဒ္ဒာ စ။ပေ.။ ဃာနဉ္စေဝ ဂန္ဓာ စ။ ဇိဝ္ဟာ စေဝ ရသာ စ။ ကာယော စေဝ ဖောဋ္ဌဗ္ဗာ စ။ မနော စေဝ ဓမ္မာ စ, ဧဝံ တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Cakkhu ceva rūpā ca, evaṃ taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Sotañceva saddā ca…pe… ghānañceva gandhā ca… jivhā ceva rasā ca… kāyo ceva phoṭṭhabbā ca… mano ceva dhammā ca, evaṃ taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ အနိစ္စဋ္ဌံ ဒုက္ခဋ္ဌံ အနတ္တဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ ရူပသ္သ အနိစ္စဋ္ဌံ ဒုက္ခဋ္ဌံ အနတ္တဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ ဝေဒနာယ။ပေ.။ ယာဝတာ သညာယ။ပေ.။ ယာဝတာ သင္ခာရာနံ။ပေ.။ ယာဝတာ ဝိညာဏသ္သ ။ပေ.။ ယာဝတာ စက္ခုသ္သ။ပေ.။ ဇရာမရဏသ္သ အနိစ္စဋ္ဌံ ဒုက္ခဋ္ဌံ အနတ္တဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā rūpassa aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā vedanāya…pe… yāvatā saññāya…pe… yāvatā saṅkhārānaṃ…pe… yāvatā viññāṇassa …pe… yāvatā cakkhussa…pe… jarāmaraṇassa aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ အဘိညာယ အဘိညဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ ပရိညာယ ပရိညဋ္ဌံ။ပေ.။ ယာဝတာ ပဟာနသ္သ 3 ပဟာနဋ္ဌံ။ပေ.။ ယာဝတာ ဘာဝနာယ ဘာဝနဋ္ဌံ။ပေ.။ ယာဝတာ သစ္ဆိကိရိယာယ သစ္ဆိကိရိယဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā abhiññāya abhiññaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā pariññāya pariññaṭṭhaṃ…pe… yāvatā pahānassa 4 pahānaṭṭhaṃ…pe… yāvatā bhāvanāya bhāvanaṭṭhaṃ…pe… yāvatā sacchikiriyāya sacchikiriyaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ ခန္ဓာနံ ခန္ဓဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ ဓာတူနံ ဓာတုဋ္ဌံ။ပေ.။ ယာဝတာ အာယတနာနံ အာယတနဋ္ဌံ။ပေ.။ ယာဝတာ သင္ခတာနံ သင္ခတဋ္ဌံ။ပေ.။ ယာဝတာ အသင္ခတသ္သ အသင္ခတဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā khandhānaṃ khandhaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dhātūnaṃ dhātuṭṭhaṃ…pe… yāvatā āyatanānaṃ āyatanaṭṭhaṃ…pe… yāvatā saṅkhatānaṃ saṅkhataṭṭhaṃ…pe… yāvatā asaṅkhatassa asaṅkhataṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ ကုသလေ ဓမ္မေ, သဗ္ဗံ 5 ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ အကုသလေ ဓမ္မေ။ပေ.။ ယာဝတာ အဗ္ယာကတေ ဓမ္မေ။ ယာဝတာ ကာမာဝစရေ ဓမ္မေ။ ယာဝတာ ရူပာဝစရေ ဓမ္မေ။ ယာဝတာ အရူပာဝစရေ ဓမ္မေ။ ယာဝတာ အပရိယာပန္နေ ဓမ္မေ, သဗ္ဗံ 6 ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā kusale dhamme, sabbaṃ 7 jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā akusale dhamme…pe… yāvatā abyākate dhamme… yāvatā kāmāvacare dhamme… yāvatā rūpāvacare dhamme… yāvatā arūpāvacare dhamme… yāvatā apariyāpanne dhamme, sabbaṃ 8 jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ ဒုက္ခသ္သ ဒုက္ခဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ သမုဒယသ္သ သမုဒယဋ္ဌံ။ပေ.။ ယာဝတာ နိရောဓသ္သ နိရောဓဋ္ဌံ။ပေ.။ ယာဝတာ မဂ္ဂသ္သ မဂ္ဂဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā dukkhassa dukkhaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā samudayassa samudayaṭṭhaṃ…pe… yāvatā nirodhassa nirodhaṭṭhaṃ…pe… yāvatā maggassa maggaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ အတ္ထပဋိသမ္ဘိဒာယ အတ္ထပဋိသမ္ဘိဒဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ ဓမ္မပဋိသမ္ဘိဒာယ ဓမ္မပဋိသမ္ဘိဒဋ္ဌံ။ပေ.။ ယာဝတာ နိရုတ္တိပဋိသမ္ဘိဒာယ နိရုတ္တိပဋိသမ္ဘိဒဋ္ဌံ။ပေ.။ ယာဝတာ ပဋိဘာနပဋိသမ္ဘိဒာယ ပဋိဘာနပဋိသမ္ဘိဒဋ္ဌံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā atthapaṭisambhidāya atthapaṭisambhidaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dhammapaṭisambhidāya dhammapaṭisambhidaṭṭhaṃ…pe… yāvatā niruttipaṭisambhidāya niruttipaṭisambhidaṭṭhaṃ…pe… yāvatā paṭibhānapaṭisambhidāya paṭibhānapaṭisambhidaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ ဣန္ဒ္ရိယပရောပရိယတ္တဉာဏံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ သတ္တာနံ အာသယာနုသယေ ဉာဏံ။ပေ.။ ယာဝတာ ယမကပာဋိဟီရေ ဉာဏံ။ပေ.။ ယာဝတာ မဟာကရုဏာသမာပတ္တိယာ ဉာဏံ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā indriyaparopariyattañāṇaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā sattānaṃ āsayānusaye ñāṇaṃ…pe… yāvatā yamakapāṭihīre ñāṇaṃ…pe… yāvatā mahākaruṇāsamāpattiyā ñāṇaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ သဒေဝကသ္သ လောကသ္သ သမာရကသ္သ သဗ္ရဟ္မကသ္သ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ ဒိဋ္ဌံ သုတံ မုတံ ဝိညာတံ ပတ္တံ ပရိယေသိတံ အနုဝိစရိတံ မနသာ, တံ သဗ္ဗံ ဇာနာတီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
၁၂၁.
121.
န တသ္သ အဒ္ဒိဋ္ဌမိဓတ္ထိ ကိဉ္စိ, အထော အဝိညာတမဇာနိတဗ္ဗံ။
Na tassa addiṭṭhamidhatthi kiñci, atho aviññātamajānitabbaṃ.
သဗ္ဗံ အဘိညာသိ ယဒတ္ထိ နေယ္ယံ၊ တထာဂတော တေန သမန္တစက္ခူတိ 9။
Sabbaṃ abhiññāsi yadatthi neyyaṃ, tathāgato tena samantacakkhūti 10.
သမန္တစက္ခူတိ ကေနဋ္ဌေန သမန္တစက္ခု? စုဒ္ဒသ ဗုဒ္ဓဉာဏာနိ။ ဒုက္ခေ ဉာဏံ ဗုဒ္ဓဉာဏံ, ဒုက္ခသမုဒယေ ဉာဏံ ဗုဒ္ဓဉာဏံ, ဒုက္ခနိရောဓေ ဉာဏံ ဗုဒ္ဓဉာဏံ, ဒုက္ခနိရောဓဂာမိနိယာ ပဋိပဒာယ ဉာဏံ ဗုဒ္ဓဉာဏံ, အတ္ထပဋိသမ္ဘိဒေ ဉာဏံ ဗုဒ္ဓဉာဏံ, ဓမ္မပဋိသမ္ဘိဒေ ဉာဏံ ဗုဒ္ဓဉာဏံ, နိရုတ္တိပဋိသမ္ဘိဒေ ဉာဏံ ဗုဒ္ဓဉာဏံ, ပဋိဘာနပဋိသမ္ဘိဒေ ဉာဏံ ဗုဒ္ဓဉာဏံ, ဣန္ဒ္ရိယပရောပရိယတ္တေ ဉာဏံ ဗုဒ္ဓဉာဏံ, သတ္တာနံ အာသယာနုသယေ ဉာဏံ ဗုဒ္ဓဉာဏံ, ယမကပာဋိဟီရေ ဉာဏံ ဗုဒ္ဓဉာဏံ, မဟာကရုဏာသမာပတ္တိယာ ဉာဏံ ဗုဒ္ဓဉာဏံ, သဗ္ဗညုတညာဏံ ဗုဒ္ဓဉာဏံ, အနာဝရဏဉာဏံ ဗုဒ္ဓဉာဏံ – ဣမာနိ စုဒ္ဒသ ဗုဒ္ဓဉာဏာနိ။ ဣမေသံ စုဒ္ဒသန္နံ ဗုဒ္ဓဉာဏာနံ အဋ္ဌ ဉာဏာနိ သာဝကသာဓာရဏာနိ; ဆ ဉာဏာနိ အသာဓာရဏာနိ သာဝကေဟိ။
Samantacakkhūti kenaṭṭhena samantacakkhu? Cuddasa buddhañāṇāni. Dukkhe ñāṇaṃ buddhañāṇaṃ, dukkhasamudaye ñāṇaṃ buddhañāṇaṃ, dukkhanirodhe ñāṇaṃ buddhañāṇaṃ, dukkhanirodhagāminiyā paṭipadāya ñāṇaṃ buddhañāṇaṃ, atthapaṭisambhide ñāṇaṃ buddhañāṇaṃ, dhammapaṭisambhide ñāṇaṃ buddhañāṇaṃ, niruttipaṭisambhide ñāṇaṃ buddhañāṇaṃ, paṭibhānapaṭisambhide ñāṇaṃ buddhañāṇaṃ, indriyaparopariyatte ñāṇaṃ buddhañāṇaṃ, sattānaṃ āsayānusaye ñāṇaṃ buddhañāṇaṃ, yamakapāṭihīre ñāṇaṃ buddhañāṇaṃ, mahākaruṇāsamāpattiyā ñāṇaṃ buddhañāṇaṃ, sabbaññutaññāṇaṃ buddhañāṇaṃ, anāvaraṇañāṇaṃ buddhañāṇaṃ – imāni cuddasa buddhañāṇāni. Imesaṃ cuddasannaṃ buddhañāṇānaṃ aṭṭha ñāṇāni sāvakasādhāraṇāni; cha ñāṇāni asādhāraṇāni sāvakehi.
ယာဝတာ ဒုက္ခသ္သ ဒုက္ခဋ္ဌော, သဗ္ဗော ဉာတော; အညာတော ဒုက္ခဋ္ဌော နတ္ထီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ ဒုက္ခသ္သ ဒုက္ခဋ္ဌော, သဗ္ဗော ဉာတော, သဗ္ဗော ဒိဋ္ဌော, သဗ္ဗော ဝိဒိတော, သဗ္ဗော သစ္ဆိကတော, သဗ္ဗော ဖသ္သိတော ပညာယ; အဖသ္သိတော ပညာယ ဒုက္ခဋ္ဌော နတ္ထီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။ ယာဝတာ သမုဒယသ္သ သမုဒယဋ္ဌော။ပေ.။ ယာဝတာ နိရောဓသ္သ နိရောဓဋ္ဌော။ ယာဝတာ မဂ္ဂသ္သ မဂ္ဂဋ္ဌော။ပေ.။ ယာဝတာ အတ္ထပဋိသမ္ဘိဒာယ အတ္ထပဋိသမ္ဘိဒဋ္ဌော။ ယာဝတာ ဓမ္မပဋိသမ္ဘိဒာယ ဓမ္မပဋိသမ္ဘိဒဋ္ဌော။ ယာဝတာ နိရုတ္တိပဋိသမ္ဘိဒာယ နိရုတ္တိပဋိသမ္ဘိဒဋ္ဌော။ ယာဝတာ ပဋိဘာနပဋိသမ္ဘိဒာယ ပဋိဘာနပဋိသမ္ဘိဒဋ္ဌော, သဗ္ဗော ဉာတော, သဗ္ဗော ဒိဋ္ဌော, သဗ္ဗော ဝိဒိတော , သဗ္ဗော သစ္ဆိကတော, သဗ္ဗော ဖသ္သိတော ပညာယ; အဖသ္သိတော ပညာယ ပဋိဘာနပဋိသမ္ဘိဒဋ္ဌော နတ္ထီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā dukkhassa dukkhaṭṭho, sabbo ñāto; aññāto dukkhaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dukkhassa dukkhaṭṭho, sabbo ñāto, sabbo diṭṭho, sabbo vidito, sabbo sacchikato, sabbo phassito paññāya; aphassito paññāya dukkhaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā samudayassa samudayaṭṭho…pe… yāvatā nirodhassa nirodhaṭṭho… yāvatā maggassa maggaṭṭho…pe… yāvatā atthapaṭisambhidāya atthapaṭisambhidaṭṭho… yāvatā dhammapaṭisambhidāya dhammapaṭisambhidaṭṭho… yāvatā niruttipaṭisambhidāya niruttipaṭisambhidaṭṭho… yāvatā paṭibhānapaṭisambhidāya paṭibhānapaṭisambhidaṭṭho, sabbo ñāto, sabbo diṭṭho, sabbo vidito , sabbo sacchikato, sabbo phassito paññāya; aphassito paññāya paṭibhānapaṭisambhidaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ ဣန္ဒ္ရိယပရောပရိယတ္တဉာဏံ။ပေ.။ ယာဝတာ သတ္တာနံ အာသယာနုသယေ ဉာဏံ။ ယာဝတာ ယမကပာဋိဟီရေ ဉာဏံ။ ယာဝတာ မဟာကရုဏာသမာပတ္တိယာ ဉာဏံ; သဗ္ဗ ဉာတံ, သဗ္ဗံ ဒိဋ္ဌံ, သဗ္ဗံ ဝိဒိတံ, သဗ္ဗံ သစ္ဆိကတံ, သဗ္ဗံ ဖသ္သိတံ ပညာယ; အဖသ္သိတံ ပညာယ မဟာကရုဏာသမာပတ္တိယာ ဉာဏံ နတ္ထီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā indriyaparopariyattañāṇaṃ…pe… yāvatā sattānaṃ āsayānusaye ñāṇaṃ… yāvatā yamakapāṭihīre ñāṇaṃ… yāvatā mahākaruṇāsamāpattiyā ñāṇaṃ; sabba ñātaṃ, sabbaṃ diṭṭhaṃ, sabbaṃ viditaṃ, sabbaṃ sacchikataṃ, sabbaṃ phassitaṃ paññāya; aphassitaṃ paññāya mahākaruṇāsamāpattiyā ñāṇaṃ natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ယာဝတာ သဒေဝကသ္သ လောကသ္သ သမာရကသ္သ သဗ္ရဟ္မကသ္သ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ ဒိဋ္ဌံ သုတံ မုတံ ဝိညာတံ ပတ္တံ ပရိယေသိတံ အနုဝိစရိတံ မနသာ, သဗ္ဗံ ဉာတံ, သဗ္ဗံ ဒိဋ္ဌံ, သဗ္ဗံ ဝိဒိတံ, သဗ္ဗံ သစ္ဆိကတံ, သဗ္ဗံ ဖသ္သိတံ ပညာယ; အဖသ္သိတံ ပညာယ နတ္ထီတိ – သဗ္ဗညုတညာဏံ။ တတ္ထ အာဝရဏံ နတ္ထီတိ – အနာဝရဏဉာဏံ။
Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, sabbaṃ ñātaṃ, sabbaṃ diṭṭhaṃ, sabbaṃ viditaṃ, sabbaṃ sacchikataṃ, sabbaṃ phassitaṃ paññāya; aphassitaṃ paññāya natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
န တသ္သ အဒ္ဒိဋ္ဌမိဓတ္ထိ ကိဉ္စိ၊ အထော အဝိညာတမဇာနိတဗ္ဗံ။
Na tassa addiṭṭhamidhatthi kiñci, atho aviññātamajānitabbaṃ;
သဗ္ဗံ အဘိညာသိ ယဒတ္ထိ နေယ္ယံ၊ တထာဂတော တေန သမန္တစက္ခူတိ။
Sabbaṃ abhiññāsi yadatthi neyyaṃ, tathāgato tena samantacakkhūti.
သဗ္ဗညုတဉာဏနိဒ္ဒေသော တေသတ္တတိမော။
Sabbaññutañāṇaniddeso tesattatimo.
ဉာဏကထာ နိဋ္ဌိတာ။
Ñāṇakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၇၂-၇၃. သဗ္ဗညုတညာဏနိဒ္ဒေသဝဏ္ဏနာ • 72-73. Sabbaññutaññāṇaniddesavaṇṇanā
