| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೭೨-೭೩. ಸಬ್ಬಞ್ಞುತಞಾಣನಿದ್ದೇಸೋ
72-73. Sabbaññutañāṇaniddeso
೧೧೯. ಕತಮಂ ತಥಾಗತಸ್ಸ ಸಬ್ಬಞ್ಞುತಞ್ಞಾಣಂ? ಸಬ್ಬಂ ಸಙ್ಖತಮಸಙ್ಖತಂ ಅನವಸೇಸಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ 1।
119. Katamaṃ tathāgatassa sabbaññutaññāṇaṃ? Sabbaṃ saṅkhatamasaṅkhataṃ anavasesaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ 2.
೧೨೦. ಅತೀತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಅನಾಗತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಪಚ್ಚುಪ್ಪನ್ನಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
120. Atītaṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Anāgataṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Paccuppannaṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಚಕ್ಖು ಚೇವ ರೂಪಾ ಚ, ಏವಂ ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಸೋತಞ್ಚೇವ ಸದ್ದಾ ಚ…ಪೇ॰… ಘಾನಞ್ಚೇವ ಗನ್ಧಾ ಚ… ಜಿವ್ಹಾ ಚೇವ ರಸಾ ಚ… ಕಾಯೋ ಚೇವ ಫೋಟ್ಠಬ್ಬಾ ಚ… ಮನೋ ಚೇವ ಧಮ್ಮಾ ಚ, ಏವಂ ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Cakkhu ceva rūpā ca, evaṃ taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Sotañceva saddā ca…pe… ghānañceva gandhā ca… jivhā ceva rasā ca… kāyo ceva phoṭṭhabbā ca… mano ceva dhammā ca, evaṃ taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಅನಿಚ್ಚಟ್ಠಂ ದುಕ್ಖಟ್ಠಂ ಅನತ್ತಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ರೂಪಸ್ಸ ಅನಿಚ್ಚಟ್ಠಂ ದುಕ್ಖಟ್ಠಂ ಅನತ್ತಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ವೇದನಾಯ…ಪೇ॰… ಯಾವತಾ ಸಞ್ಞಾಯ…ಪೇ॰… ಯಾವತಾ ಸಙ್ಖಾರಾನಂ…ಪೇ॰… ಯಾವತಾ ವಿಞ್ಞಾಣಸ್ಸ …ಪೇ॰… ಯಾವತಾ ಚಕ್ಖುಸ್ಸ…ಪೇ॰… ಜರಾಮರಣಸ್ಸ ಅನಿಚ್ಚಟ್ಠಂ ದುಕ್ಖಟ್ಠಂ ಅನತ್ತಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā rūpassa aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā vedanāya…pe… yāvatā saññāya…pe… yāvatā saṅkhārānaṃ…pe… yāvatā viññāṇassa …pe… yāvatā cakkhussa…pe… jarāmaraṇassa aniccaṭṭhaṃ dukkhaṭṭhaṃ anattaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಅಭಿಞ್ಞಾಯ ಅಭಿಞ್ಞಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಪರಿಞ್ಞಾಯ ಪರಿಞ್ಞಟ್ಠಂ…ಪೇ॰… ಯಾವತಾ ಪಹಾನಸ್ಸ 3 ಪಹಾನಟ್ಠಂ…ಪೇ॰… ಯಾವತಾ ಭಾವನಾಯ ಭಾವನಟ್ಠಂ…ಪೇ॰… ಯಾವತಾ ಸಚ್ಛಿಕಿರಿಯಾಯ ಸಚ್ಛಿಕಿರಿಯಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā abhiññāya abhiññaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā pariññāya pariññaṭṭhaṃ…pe… yāvatā pahānassa 4 pahānaṭṭhaṃ…pe… yāvatā bhāvanāya bhāvanaṭṭhaṃ…pe… yāvatā sacchikiriyāya sacchikiriyaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಖನ್ಧಾನಂ ಖನ್ಧಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಧಾತೂನಂ ಧಾತುಟ್ಠಂ…ಪೇ॰… ಯಾವತಾ ಆಯತನಾನಂ ಆಯತನಟ್ಠಂ…ಪೇ॰… ಯಾವತಾ ಸಙ್ಖತಾನಂ ಸಙ್ಖತಟ್ಠಂ…ಪೇ॰… ಯಾವತಾ ಅಸಙ್ಖತಸ್ಸ ಅಸಙ್ಖತಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā khandhānaṃ khandhaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dhātūnaṃ dhātuṭṭhaṃ…pe… yāvatā āyatanānaṃ āyatanaṭṭhaṃ…pe… yāvatā saṅkhatānaṃ saṅkhataṭṭhaṃ…pe… yāvatā asaṅkhatassa asaṅkhataṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಕುಸಲೇ ಧಮ್ಮೇ, ಸಬ್ಬಂ 5 ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಅಕುಸಲೇ ಧಮ್ಮೇ…ಪೇ॰… ಯಾವತಾ ಅಬ್ಯಾಕತೇ ಧಮ್ಮೇ… ಯಾವತಾ ಕಾಮಾವಚರೇ ಧಮ್ಮೇ… ಯಾವತಾ ರೂಪಾವಚರೇ ಧಮ್ಮೇ… ಯಾವತಾ ಅರೂಪಾವಚರೇ ಧಮ್ಮೇ… ಯಾವತಾ ಅಪರಿಯಾಪನ್ನೇ ಧಮ್ಮೇ, ಸಬ್ಬಂ 6 ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā kusale dhamme, sabbaṃ 7 jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā akusale dhamme…pe… yāvatā abyākate dhamme… yāvatā kāmāvacare dhamme… yāvatā rūpāvacare dhamme… yāvatā arūpāvacare dhamme… yāvatā apariyāpanne dhamme, sabbaṃ 8 jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ದುಕ್ಖಸ್ಸ ದುಕ್ಖಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಸಮುದಯಸ್ಸ ಸಮುದಯಟ್ಠಂ…ಪೇ॰… ಯಾವತಾ ನಿರೋಧಸ್ಸ ನಿರೋಧಟ್ಠಂ…ಪೇ॰… ಯಾವತಾ ಮಗ್ಗಸ್ಸ ಮಗ್ಗಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā dukkhassa dukkhaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā samudayassa samudayaṭṭhaṃ…pe… yāvatā nirodhassa nirodhaṭṭhaṃ…pe… yāvatā maggassa maggaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಅತ್ಥಪಟಿಸಮ್ಭಿದಾಯ ಅತ್ಥಪಟಿಸಮ್ಭಿದಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಧಮ್ಮಪಟಿಸಮ್ಭಿದಾಯ ಧಮ್ಮಪಟಿಸಮ್ಭಿದಟ್ಠಂ…ಪೇ॰… ಯಾವತಾ ನಿರುತ್ತಿಪಟಿಸಮ್ಭಿದಾಯ ನಿರುತ್ತಿಪಟಿಸಮ್ಭಿದಟ್ಠಂ…ಪೇ॰… ಯಾವತಾ ಪಟಿಭಾನಪಟಿಸಮ್ಭಿದಾಯ ಪಟಿಭಾನಪಟಿಸಮ್ಭಿದಟ್ಠಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā atthapaṭisambhidāya atthapaṭisambhidaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dhammapaṭisambhidāya dhammapaṭisambhidaṭṭhaṃ…pe… yāvatā niruttipaṭisambhidāya niruttipaṭisambhidaṭṭhaṃ…pe… yāvatā paṭibhānapaṭisambhidāya paṭibhānapaṭisambhidaṭṭhaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಇನ್ದ್ರಿಯಪರೋಪರಿಯತ್ತಞಾಣಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಸತ್ತಾನಂ ಆಸಯಾನುಸಯೇ ಞಾಣಂ…ಪೇ॰… ಯಾವತಾ ಯಮಕಪಾಟಿಹೀರೇ ಞಾಣಂ…ಪೇ॰… ಯಾವತಾ ಮಹಾಕರುಣಾಸಮಾಪತ್ತಿಯಾ ಞಾಣಂ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā indriyaparopariyattañāṇaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā sattānaṃ āsayānusaye ñāṇaṃ…pe… yāvatā yamakapāṭihīre ñāṇaṃ…pe… yāvatā mahākaruṇāsamāpattiyā ñāṇaṃ, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ತಂ ಸಬ್ಬಂ ಜಾನಾತೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, taṃ sabbaṃ jānātīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
೧೨೧.
121.
ನ ತಸ್ಸ ಅದ್ದಿಟ್ಠಮಿಧತ್ಥಿ ಕಿಞ್ಚಿ, ಅಥೋ ಅವಿಞ್ಞಾತಮಜಾನಿತಬ್ಬಂ।
Na tassa addiṭṭhamidhatthi kiñci, atho aviññātamajānitabbaṃ.
ಸಬ್ಬಂ ಅಭಿಞ್ಞಾಸಿ ಯದತ್ಥಿ ನೇಯ್ಯಂ, ತಥಾಗತೋ ತೇನ ಸಮನ್ತಚಕ್ಖೂತಿ 9॥
Sabbaṃ abhiññāsi yadatthi neyyaṃ, tathāgato tena samantacakkhūti 10.
ಸಮನ್ತಚಕ್ಖೂತಿ ಕೇನಟ್ಠೇನ ಸಮನ್ತಚಕ್ಖು? ಚುದ್ದಸ ಬುದ್ಧಞಾಣಾನಿ। ದುಕ್ಖೇ ಞಾಣಂ ಬುದ್ಧಞಾಣಂ, ದುಕ್ಖಸಮುದಯೇ ಞಾಣಂ ಬುದ್ಧಞಾಣಂ, ದುಕ್ಖನಿರೋಧೇ ಞಾಣಂ ಬುದ್ಧಞಾಣಂ, ದುಕ್ಖನಿರೋಧಗಾಮಿನಿಯಾ ಪಟಿಪದಾಯ ಞಾಣಂ ಬುದ್ಧಞಾಣಂ, ಅತ್ಥಪಟಿಸಮ್ಭಿದೇ ಞಾಣಂ ಬುದ್ಧಞಾಣಂ, ಧಮ್ಮಪಟಿಸಮ್ಭಿದೇ ಞಾಣಂ ಬುದ್ಧಞಾಣಂ, ನಿರುತ್ತಿಪಟಿಸಮ್ಭಿದೇ ಞಾಣಂ ಬುದ್ಧಞಾಣಂ, ಪಟಿಭಾನಪಟಿಸಮ್ಭಿದೇ ಞಾಣಂ ಬುದ್ಧಞಾಣಂ, ಇನ್ದ್ರಿಯಪರೋಪರಿಯತ್ತೇ ಞಾಣಂ ಬುದ್ಧಞಾಣಂ, ಸತ್ತಾನಂ ಆಸಯಾನುಸಯೇ ಞಾಣಂ ಬುದ್ಧಞಾಣಂ, ಯಮಕಪಾಟಿಹೀರೇ ಞಾಣಂ ಬುದ್ಧಞಾಣಂ, ಮಹಾಕರುಣಾಸಮಾಪತ್ತಿಯಾ ಞಾಣಂ ಬುದ್ಧಞಾಣಂ, ಸಬ್ಬಞ್ಞುತಞ್ಞಾಣಂ ಬುದ್ಧಞಾಣಂ, ಅನಾವರಣಞಾಣಂ ಬುದ್ಧಞಾಣಂ – ಇಮಾನಿ ಚುದ್ದಸ ಬುದ್ಧಞಾಣಾನಿ। ಇಮೇಸಂ ಚುದ್ದಸನ್ನಂ ಬುದ್ಧಞಾಣಾನಂ ಅಟ್ಠ ಞಾಣಾನಿ ಸಾವಕಸಾಧಾರಣಾನಿ; ಛ ಞಾಣಾನಿ ಅಸಾಧಾರಣಾನಿ ಸಾವಕೇಹಿ।
Samantacakkhūti kenaṭṭhena samantacakkhu? Cuddasa buddhañāṇāni. Dukkhe ñāṇaṃ buddhañāṇaṃ, dukkhasamudaye ñāṇaṃ buddhañāṇaṃ, dukkhanirodhe ñāṇaṃ buddhañāṇaṃ, dukkhanirodhagāminiyā paṭipadāya ñāṇaṃ buddhañāṇaṃ, atthapaṭisambhide ñāṇaṃ buddhañāṇaṃ, dhammapaṭisambhide ñāṇaṃ buddhañāṇaṃ, niruttipaṭisambhide ñāṇaṃ buddhañāṇaṃ, paṭibhānapaṭisambhide ñāṇaṃ buddhañāṇaṃ, indriyaparopariyatte ñāṇaṃ buddhañāṇaṃ, sattānaṃ āsayānusaye ñāṇaṃ buddhañāṇaṃ, yamakapāṭihīre ñāṇaṃ buddhañāṇaṃ, mahākaruṇāsamāpattiyā ñāṇaṃ buddhañāṇaṃ, sabbaññutaññāṇaṃ buddhañāṇaṃ, anāvaraṇañāṇaṃ buddhañāṇaṃ – imāni cuddasa buddhañāṇāni. Imesaṃ cuddasannaṃ buddhañāṇānaṃ aṭṭha ñāṇāni sāvakasādhāraṇāni; cha ñāṇāni asādhāraṇāni sāvakehi.
ಯಾವತಾ ದುಕ್ಖಸ್ಸ ದುಕ್ಖಟ್ಠೋ, ಸಬ್ಬೋ ಞಾತೋ; ಅಞ್ಞಾತೋ ದುಕ್ಖಟ್ಠೋ ನತ್ಥೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ದುಕ್ಖಸ್ಸ ದುಕ್ಖಟ್ಠೋ, ಸಬ್ಬೋ ಞಾತೋ, ಸಬ್ಬೋ ದಿಟ್ಠೋ, ಸಬ್ಬೋ ವಿದಿತೋ, ಸಬ್ಬೋ ಸಚ್ಛಿಕತೋ, ಸಬ್ಬೋ ಫಸ್ಸಿತೋ ಪಞ್ಞಾಯ; ಅಫಸ್ಸಿತೋ ಪಞ್ಞಾಯ ದುಕ್ಖಟ್ಠೋ ನತ್ಥೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ। ಯಾವತಾ ಸಮುದಯಸ್ಸ ಸಮುದಯಟ್ಠೋ…ಪೇ॰… ಯಾವತಾ ನಿರೋಧಸ್ಸ ನಿರೋಧಟ್ಠೋ… ಯಾವತಾ ಮಗ್ಗಸ್ಸ ಮಗ್ಗಟ್ಠೋ…ಪೇ॰… ಯಾವತಾ ಅತ್ಥಪಟಿಸಮ್ಭಿದಾಯ ಅತ್ಥಪಟಿಸಮ್ಭಿದಟ್ಠೋ… ಯಾವತಾ ಧಮ್ಮಪಟಿಸಮ್ಭಿದಾಯ ಧಮ್ಮಪಟಿಸಮ್ಭಿದಟ್ಠೋ… ಯಾವತಾ ನಿರುತ್ತಿಪಟಿಸಮ್ಭಿದಾಯ ನಿರುತ್ತಿಪಟಿಸಮ್ಭಿದಟ್ಠೋ… ಯಾವತಾ ಪಟಿಭಾನಪಟಿಸಮ್ಭಿದಾಯ ಪಟಿಭಾನಪಟಿಸಮ್ಭಿದಟ್ಠೋ, ಸಬ್ಬೋ ಞಾತೋ, ಸಬ್ಬೋ ದಿಟ್ಠೋ, ಸಬ್ಬೋ ವಿದಿತೋ , ಸಬ್ಬೋ ಸಚ್ಛಿಕತೋ, ಸಬ್ಬೋ ಫಸ್ಸಿತೋ ಪಞ್ಞಾಯ; ಅಫಸ್ಸಿತೋ ಪಞ್ಞಾಯ ಪಟಿಭಾನಪಟಿಸಮ್ಭಿದಟ್ಠೋ ನತ್ಥೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā dukkhassa dukkhaṭṭho, sabbo ñāto; aññāto dukkhaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā dukkhassa dukkhaṭṭho, sabbo ñāto, sabbo diṭṭho, sabbo vidito, sabbo sacchikato, sabbo phassito paññāya; aphassito paññāya dukkhaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ. Yāvatā samudayassa samudayaṭṭho…pe… yāvatā nirodhassa nirodhaṭṭho… yāvatā maggassa maggaṭṭho…pe… yāvatā atthapaṭisambhidāya atthapaṭisambhidaṭṭho… yāvatā dhammapaṭisambhidāya dhammapaṭisambhidaṭṭho… yāvatā niruttipaṭisambhidāya niruttipaṭisambhidaṭṭho… yāvatā paṭibhānapaṭisambhidāya paṭibhānapaṭisambhidaṭṭho, sabbo ñāto, sabbo diṭṭho, sabbo vidito , sabbo sacchikato, sabbo phassito paññāya; aphassito paññāya paṭibhānapaṭisambhidaṭṭho natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಇನ್ದ್ರಿಯಪರೋಪರಿಯತ್ತಞಾಣಂ…ಪೇ॰… ಯಾವತಾ ಸತ್ತಾನಂ ಆಸಯಾನುಸಯೇ ಞಾಣಂ… ಯಾವತಾ ಯಮಕಪಾಟಿಹೀರೇ ಞಾಣಂ… ಯಾವತಾ ಮಹಾಕರುಣಾಸಮಾಪತ್ತಿಯಾ ಞಾಣಂ; ಸಬ್ಬ ಞಾತಂ, ಸಬ್ಬಂ ದಿಟ್ಠಂ, ಸಬ್ಬಂ ವಿದಿತಂ, ಸಬ್ಬಂ ಸಚ್ಛಿಕತಂ, ಸಬ್ಬಂ ಫಸ್ಸಿತಂ ಪಞ್ಞಾಯ; ಅಫಸ್ಸಿತಂ ಪಞ್ಞಾಯ ಮಹಾಕರುಣಾಸಮಾಪತ್ತಿಯಾ ಞಾಣಂ ನತ್ಥೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā indriyaparopariyattañāṇaṃ…pe… yāvatā sattānaṃ āsayānusaye ñāṇaṃ… yāvatā yamakapāṭihīre ñāṇaṃ… yāvatā mahākaruṇāsamāpattiyā ñāṇaṃ; sabba ñātaṃ, sabbaṃ diṭṭhaṃ, sabbaṃ viditaṃ, sabbaṃ sacchikataṃ, sabbaṃ phassitaṃ paññāya; aphassitaṃ paññāya mahākaruṇāsamāpattiyā ñāṇaṃ natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ಯಾವತಾ ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ಸಬ್ಬಂ ಞಾತಂ, ಸಬ್ಬಂ ದಿಟ್ಠಂ, ಸಬ್ಬಂ ವಿದಿತಂ, ಸಬ್ಬಂ ಸಚ್ಛಿಕತಂ, ಸಬ್ಬಂ ಫಸ್ಸಿತಂ ಪಞ್ಞಾಯ; ಅಫಸ್ಸಿತಂ ಪಞ್ಞಾಯ ನತ್ಥೀತಿ – ಸಬ್ಬಞ್ಞುತಞ್ಞಾಣಂ। ತತ್ಥ ಆವರಣಂ ನತ್ಥೀತಿ – ಅನಾವರಣಞಾಣಂ।
Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, sabbaṃ ñātaṃ, sabbaṃ diṭṭhaṃ, sabbaṃ viditaṃ, sabbaṃ sacchikataṃ, sabbaṃ phassitaṃ paññāya; aphassitaṃ paññāya natthīti – sabbaññutaññāṇaṃ. Tattha āvaraṇaṃ natthīti – anāvaraṇañāṇaṃ.
ನ ತಸ್ಸ ಅದ್ದಿಟ್ಠಮಿಧತ್ಥಿ ಕಿಞ್ಚಿ, ಅಥೋ ಅವಿಞ್ಞಾತಮಜಾನಿತಬ್ಬಂ।
Na tassa addiṭṭhamidhatthi kiñci, atho aviññātamajānitabbaṃ;
ಸಬ್ಬಂ ಅಭಿಞ್ಞಾಸಿ ಯದತ್ಥಿ ನೇಯ್ಯಂ, ತಥಾಗತೋ ತೇನ ಸಮನ್ತಚಕ್ಖೂತಿ॥
Sabbaṃ abhiññāsi yadatthi neyyaṃ, tathāgato tena samantacakkhūti.
ಸಬ್ಬಞ್ಞುತಞಾಣನಿದ್ದೇಸೋ ತೇಸತ್ತತಿಮೋ।
Sabbaññutañāṇaniddeso tesattatimo.
ಞಾಣಕಥಾ ನಿಟ್ಠಿತಾ।
Ñāṇakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೭೨-೭೩. ಸಬ್ಬಞ್ಞುತಞ್ಞಾಣನಿದ್ದೇಸವಣ್ಣನಾ • 72-73. Sabbaññutaññāṇaniddesavaṇṇanā
