| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8-10. චන්‌දිමාදිසුත්‌තතතියකං
8-10. Candimādisuttatatiyakaṃ
146. ‘‘සෙය්‍යථාපි , භික්‌ඛවෙ, යා කාචි තාරකරූපානං පභා, සබ්‌බා තා චන්‌දිමප්‌පභාය 1 කලං නාග්‌ඝන්‌ති සොළසිං, චන්‌දප්‌පභා තාසං අග්‌ගමක්‌ඛායති; එවමෙව ඛො, භික්‌ඛවෙ…පෙ.… අට්‌ඨමං.
146. ‘‘Seyyathāpi , bhikkhave, yā kāci tārakarūpānaṃ pabhā, sabbā tā candimappabhāya 2 kalaṃ nāgghanti soḷasiṃ, candappabhā tāsaṃ aggamakkhāyati; evameva kho, bhikkhave…pe… aṭṭhamaṃ.
147. ‘‘සෙය්‍යථාපි, භික්‌ඛවෙ, සරදසමයෙ විද්‌ධෙ විගතවලාහකෙ දෙවෙ ආදිච්‌චො නභං අබ්‌භුස්‌සක්‌කමානො සබ්‌බං ආකාසගතං තමගතං අභිවිහච්‌ච භාසතෙ ච තපතෙ ච විරොචති ච; එවමෙව ඛො, භික්‌ඛවෙ…පෙ.… නවමං.
147. ‘‘Seyyathāpi, bhikkhave, saradasamaye viddhe vigatavalāhake deve ādicco nabhaṃ abbhussakkamāno sabbaṃ ākāsagataṃ tamagataṃ abhivihacca bhāsate ca tapate ca virocati ca; evameva kho, bhikkhave…pe… navamaṃ.
148. ‘‘සෙය්‍යථාපි , භික්‌ඛවෙ, යානි කානිචි තන්‌තාවුතානං වත්‌ථානං, කාසිකවත්‌ථං තෙසං අග්‌ගමක්‌ඛායති; එවමෙව ඛො, භික්‌ඛවෙ, යෙ කෙචි කුසලා ධම්‌මා, සබ්‌බෙ තෙ අප්‌පමාදමූලකා අප්‌පමාදසමොසරණා; අප්‌පමාදො තෙසං ධම්‌මානං අග්‌ගමක්‌ඛායති. අප්‌පමත්‌තස්‌සෙතං, භික්‌ඛවෙ , භික්‌ඛුනො පාටිකඞ්‌ඛං – අරියං අට්‌ඨඞ්‌ගිකං මග්‌ගං භාවෙස්‌සති අරියං අට්‌ඨඞ්‌ගිකං මග්‌ගං බහුලීකරිස්‌සති. කථඤ්‌ච , භික්‌ඛවෙ, භික්‌ඛු අප්‌පමත්‌තො අරියං අට්‌ඨඞ්‌ගිකං මග්‌ගං භාවෙති අරියං අට්‌ඨඞ්‌ගිකං මග්‌ගං බහුලීකරොති? ඉධ, භික්‌ඛවෙ, භික්‌ඛු සම්‌මාදිට්‌ඨිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… සම්‌මාසමාධිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… එවං ඛො, භික්‌ඛවෙ, භික්‌ඛු අප්‌පමත්‌තො අරියං අට්‌ඨඞ්‌ගිකං මග්‌ගං භාවෙති අරියං අට්‌ඨඞ්‌ගිකං මග්‌ගං බහුලීකරොතී’’ති. දසමං.
148. ‘‘Seyyathāpi , bhikkhave, yāni kānici tantāvutānaṃ vatthānaṃ, kāsikavatthaṃ tesaṃ aggamakkhāyati; evameva kho, bhikkhave, ye keci kusalā dhammā, sabbe te appamādamūlakā appamādasamosaraṇā; appamādo tesaṃ dhammānaṃ aggamakkhāyati. Appamattassetaṃ, bhikkhave , bhikkhuno pāṭikaṅkhaṃ – ariyaṃ aṭṭhaṅgikaṃ maggaṃ bhāvessati ariyaṃ aṭṭhaṅgikaṃ maggaṃ bahulīkarissati. Kathañca , bhikkhave, bhikkhu appamatto ariyaṃ aṭṭhaṅgikaṃ maggaṃ bhāveti ariyaṃ aṭṭhaṅgikaṃ maggaṃ bahulīkaroti? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu appamatto ariyaṃ aṭṭhaṅgikaṃ maggaṃ bhāveti ariyaṃ aṭṭhaṅgikaṃ maggaṃ bahulīkarotī’’ti. Dasamaṃ.
(යදපි තථාගතං, තදපි විත්‌ථාරෙතබ්‌බං).
(Yadapi tathāgataṃ, tadapi vitthāretabbaṃ).
අප්‌පමාදපෙය්‍යාලවග්‌ගො පඤ්‌චමො.
Appamādapeyyālavaggo pañcamo.
තස්‌සුද්‌දානං –
Tassuddānaṃ –
තථාගතං පදං කූටං, මූලං සාරො ච වස්‌සිකං;
Tathāgataṃ padaṃ kūṭaṃ, mūlaṃ sāro ca vassikaṃ;
රාජා චන්‌දිමසූරියා ච, වත්‌ථෙන දසමං පදං.
Rājā candimasūriyā ca, vatthena dasamaṃ padaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-10. කූටසුත්‌තාදිවණ්‌ණනා • 3-10. Kūṭasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-10. කූටසුත්‌තාදිවණ්‌ණනා • 3-10. Kūṭasuttādivaṇṇanā
