| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮-১৩. পিতুসুত্তাদিছক্কং
8-13. Pitusuttādichakkaṃ
১৮৭. সাৰত্থিযং ৰিহরতি…পে॰… ‘‘দারুণো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায। ইধাহং , ভিক্খৰে, একচ্চং পুগ্গলং এৰং চেতসা চেতো পরিচ্চ পজানামি – ‘ন চাযমাযস্মা পিতুপি হেতু…পে॰… ভাতুপি হেতু… ভগিনিযাপি হেতু… পুত্তস্সপি হেতু… ধীতুযাপি হেতু… পজাপতিযাপি হেতু সম্পজানমুসা ভাসেয্যা’তি। তমেনং পস্সামি অপরেন সমযেন লাভসক্কারসিলোকেন অভিভূতং পরিযাদিণ্ণচিত্তং সম্পজানমুসা ভাসন্তং। এৰং দারুণো খো, ভিক্খৰে, লাভসক্কারসিলোকো কটুকো ফরুসো অন্তরাযিকো অনুত্তরস্স যোগক্খেমস্স অধিগমায। তস্মাতিহ, ভিক্খৰে, এৰং সিক্খিতব্বং – ‘উপ্পন্নং লাভসক্কারসিলোকং পজহিস্সাম, ন চ নো উপ্পন্নো লাভসক্কারসিলোকো চিত্তং পরিযাদায ঠস্সতী’তি। এৰঞ্হি ৰো, ভিক্খৰে, সিক্খিতব্ব’’ন্তি। তেরসমং।
187. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya. Idhāhaṃ , bhikkhave, ekaccaṃ puggalaṃ evaṃ cetasā ceto paricca pajānāmi – ‘na cāyamāyasmā pitupi hetu…pe… bhātupi hetu… bhaginiyāpi hetu… puttassapi hetu… dhītuyāpi hetu… pajāpatiyāpi hetu sampajānamusā bhāseyyā’ti. Tamenaṃ passāmi aparena samayena lābhasakkārasilokena abhibhūtaṃ pariyādiṇṇacittaṃ sampajānamusā bhāsantaṃ. Evaṃ dāruṇo kho, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya. Tasmātiha, bhikkhave, evaṃ sikkhitabbaṃ – ‘uppannaṃ lābhasakkārasilokaṃ pajahissāma, na ca no uppanno lābhasakkārasiloko cittaṃ pariyādāya ṭhassatī’ti. Evañhi vo, bhikkhave, sikkhitabba’’nti. Terasamaṃ.
চতুত্থো ৰগ্গো।
Catuttho vaggo.
তস্সুদ্দানং –
Tassuddānaṃ –
ভিন্দি মূলং দুৰে ধম্মা, পক্কন্তং রথ মাতরি।
Bhindi mūlaṃ duve dhammā, pakkantaṃ ratha mātari;
পিতা ভাতা চ ভগিনী, পুত্তো ধীতা পজাপতীতি॥
Pitā bhātā ca bhaginī, putto dhītā pajāpatīti.
লাভসক্কারসংযুত্তং সমত্তং।
Lābhasakkārasaṃyuttaṃ samattaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭-১৩. মাতুসুত্তাদিৰণ্ণনা • 7-13. Mātusuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭-১৩. মাতুসুত্তাদিৰণ্ণনা • 7-13. Mātusuttādivaṇṇanā
