| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8-13. පිතුසුත්‌තාදිඡක්‌කං
8-13. Pitusuttādichakkaṃ
187. සාවත්‌ථියං විහරති…පෙ.… ‘‘දාරුණො, භික්‌ඛවෙ, ලාභසක්‌කාරසිලොකො කටුකො ඵරුසො අන්‌තරායිකො අනුත්‌තරස්‌ස යොගක්‌ඛෙමස්‌ස අධිගමාය. ඉධාහං , භික්‌ඛවෙ, එකච්‌චං පුග්‌ගලං එවං චෙතසා චෙතො පරිච්‌ච පජානාමි – ‘න චායමායස්‌මා පිතුපි හෙතු…පෙ.… භාතුපි හෙතු… භගිනියාපි හෙතු… පුත්‌තස්‌සපි හෙතු… ධීතුයාපි හෙතු… පජාපතියාපි හෙතු සම්‌පජානමුසා භාසෙය්‍යා’ති. තමෙනං පස්‌සාමි අපරෙන සමයෙන ලාභසක්‌කාරසිලොකෙන අභිභූතං පරියාදිණ්‌ණචිත්‌තං සම්‌පජානමුසා භාසන්‌තං. එවං දාරුණො ඛො, භික්‌ඛවෙ, ලාභසක්‌කාරසිලොකො කටුකො ඵරුසො අන්‌තරායිකො අනුත්‌තරස්‌ස යොගක්‌ඛෙමස්‌ස අධිගමාය. තස්‌මාතිහ, භික්‌ඛවෙ, එවං සික්‌ඛිතබ්‌බං – ‘උප්‌පන්‌නං ලාභසක්‌කාරසිලොකං පජහිස්‌සාම, න ච නො උප්‌පන්‌නො ලාභසක්‌කාරසිලොකො චිත්‌තං පරියාදාය ඨස්‌සතී’ති. එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. තෙරසමං.
187. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya. Idhāhaṃ , bhikkhave, ekaccaṃ puggalaṃ evaṃ cetasā ceto paricca pajānāmi – ‘na cāyamāyasmā pitupi hetu…pe… bhātupi hetu… bhaginiyāpi hetu… puttassapi hetu… dhītuyāpi hetu… pajāpatiyāpi hetu sampajānamusā bhāseyyā’ti. Tamenaṃ passāmi aparena samayena lābhasakkārasilokena abhibhūtaṃ pariyādiṇṇacittaṃ sampajānamusā bhāsantaṃ. Evaṃ dāruṇo kho, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya. Tasmātiha, bhikkhave, evaṃ sikkhitabbaṃ – ‘uppannaṃ lābhasakkārasilokaṃ pajahissāma, na ca no uppanno lābhasakkārasiloko cittaṃ pariyādāya ṭhassatī’ti. Evañhi vo, bhikkhave, sikkhitabba’’nti. Terasamaṃ.
චතුත්‌ථො වග්‌ගො.
Catuttho vaggo.
තස්‌සුද්‌දානං –
Tassuddānaṃ –
භින්‌දි මූලං දුවෙ ධම්‌මා, පක්‌කන්‌තං රථ මාතරි;
Bhindi mūlaṃ duve dhammā, pakkantaṃ ratha mātari;
පිතා භාතා ච භගිනී, පුත්‌තො ධීතා පජාපතීති.
Pitā bhātā ca bhaginī, putto dhītā pajāpatīti.
ලාභසක්‌කාරසංයුත්‌තං සමත්‌තං.
Lābhasakkārasaṃyuttaṃ samattaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7-13. මාතුසුත්‌තාදිවණ්‌ණනා • 7-13. Mātusuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7-13. මාතුසුත්‌තාදිවණ්‌ණනා • 7-13. Mātusuttādivaṇṇanā
