| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
8-9-10. அட்ட²ம-நவம-த³ஸமஸிக்கா²பத³ங்
8-9-10. Aṭṭhama-navama-dasamasikkhāpadaṃ
1210. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ ஸிக்க²மானாய உம்மத்³தா³பெந்திபி பரிமத்³தா³பெந்திபி…பே॰… ஸாமணேரியா உம்மத்³தா³பெந்திபி பரிமத்³தா³பெந்திபி…பே॰… கி³ஹினியா உம்மத்³தா³பெந்திபி பரிமத்³தா³பெந்திபி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ கி³ஹினியா உம்மத்³தா³பெஸ்ஸந்திபி பரிமத்³தா³பெஸ்ஸந்திபி, ஸெய்யதா²பி கி³ஹினியோ காமபோ⁴கி³னியோ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – கத²ஞ்ஹி நாம பி⁴க்கு²னியோ கி³ஹினியா உம்மத்³தா³பெஸ்ஸந்திபி பரிமத்³தா³பெஸ்ஸந்திபீதி…பே॰… ஸச்சங் கிர, பி⁴க்க²வே, பி⁴க்கு²னியோ கி³ஹினியா உம்மத்³தா³பெந்திபி பரிமத்³தா³பெந்திபீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ கி³ஹினியா உம்மத்³தா³பெஸ்ஸந்திபி பரிமத்³தா³பெஸ்ஸந்திபி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1210. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo sikkhamānāya ummaddāpentipi parimaddāpentipi…pe… sāmaṇeriyā ummaddāpentipi parimaddāpentipi…pe… gihiniyā ummaddāpentipi parimaddāpentipi. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo gihiniyā ummaddāpessantipi parimaddāpessantipi, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhuniyo gihiniyā ummaddāpessantipi parimaddāpessantipīti…pe… saccaṃ kira, bhikkhave, bhikkhuniyo gihiniyā ummaddāpentipi parimaddāpentipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo gihiniyā ummaddāpessantipi parimaddāpessantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1211. ‘‘யா பன பி⁴க்கு²னீ (ஸிக்க²மானாய…பே॰… ஸாமணேரியா…பே॰…) கி³ஹினியா உம்மத்³தா³பெய்ய வா பரிமத்³தா³பெய்ய வா, பாசித்திய’’ந்தி.
1211.‘‘Yā pana bhikkhunī (sikkhamānāya…pe… sāmaṇeriyā…pe…) gihiniyā ummaddāpeyya vā parimaddāpeyya vā, pācittiya’’nti.
1212. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1212.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஸிக்க²மானா நாம த்³வே வஸ்ஸானி ச²ஸு த⁴ம்மேஸு ஸிக்கி²தஸிக்கா².
Sikkhamānā nāma dve vassāni chasu dhammesu sikkhitasikkhā.
ஸாமணேரீ நாம த³ஸஸிக்கா²பதி³கா.
Sāmaṇerī nāma dasasikkhāpadikā.
கி³ஹினீ நாம அகா³ரினீ வுச்சதி.
Gihinī nāma agārinī vuccati.
உம்மத்³தா³பெய்ய வாதி உம்மத்³தா³பேதி, ஆபத்தி பாசித்தியஸ்ஸ.
Ummaddāpeyyavāti ummaddāpeti, āpatti pācittiyassa.
பரிமத்³தா³பெய்ய வாதி ஸம்பா³ஹாபேதி, ஆபத்தி பாசித்தியஸ்ஸ.
Parimaddāpeyya vāti sambāhāpeti, āpatti pācittiyassa.
1213. அனாபத்தி கி³லானாய 1, ஆபதா³ஸு, உம்மத்திகாய, ஆதி³கம்மிகாயாதி.
1213. Anāpatti gilānāya 2, āpadāsu, ummattikāya, ādikammikāyāti.
அட்ட²ம நவம த³ஸமஸிக்கா²பதா³னி நிட்டி²தானி.
Aṭṭhama navama dasamasikkhāpadāni niṭṭhitāni.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 8-9-10. அட்ட²மனவமத³ஸமஸிக்கா²பத³வண்ணனா • 8-9-10. Aṭṭhamanavamadasamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8-10. அட்ட²மாதி³ஸிக்கா²பத³ங் • 8-10. Aṭṭhamādisikkhāpadaṃ
