| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৮-৯-১০. অট্ঠম-নৰম-দসমসিক্খাপদং
8-9-10. Aṭṭhama-navama-dasamasikkhāpadaṃ
১২১০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভিক্খুনিযো সিক্খমানায উম্মদ্দাপেন্তিপি পরিমদ্দাপেন্তিপি…পে॰… সামণেরিযা উম্মদ্দাপেন্তিপি পরিমদ্দাপেন্তিপি…পে॰… গিহিনিযা উম্মদ্দাপেন্তিপি পরিমদ্দাপেন্তিপি। মনুস্সা ৰিহারচারিকং আহিণ্ডন্তা পস্সিত্ৰা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো গিহিনিযা উম্মদ্দাপেস্সন্তিপি পরিমদ্দাপেস্সন্তিপি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – কথঞ্হি নাম ভিক্খুনিযো গিহিনিযা উম্মদ্দাপেস্সন্তিপি পরিমদ্দাপেস্সন্তিপীতি…পে॰… সচ্চং কির, ভিক্খৰে, ভিক্খুনিযো গিহিনিযা উম্মদ্দাপেন্তিপি পরিমদ্দাপেন্তিপীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো গিহিনিযা উম্মদ্দাপেস্সন্তিপি পরিমদ্দাপেস্সন্তিপি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
1210. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo sikkhamānāya ummaddāpentipi parimaddāpentipi…pe… sāmaṇeriyā ummaddāpentipi parimaddāpentipi…pe… gihiniyā ummaddāpentipi parimaddāpentipi. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo gihiniyā ummaddāpessantipi parimaddāpessantipi, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhuniyo gihiniyā ummaddāpessantipi parimaddāpessantipīti…pe… saccaṃ kira, bhikkhave, bhikkhuniyo gihiniyā ummaddāpentipi parimaddāpentipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo gihiniyā ummaddāpessantipi parimaddāpessantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
১২১১. ‘‘যা পন ভিক্খুনী (সিক্খমানায…পে॰… সামণেরিযা…পে॰…) গিহিনিযা উম্মদ্দাপেয্য ৰা পরিমদ্দাপেয্য ৰা, পাচিত্তিয’’ন্তি।
1211.‘‘Yā pana bhikkhunī (sikkhamānāya…pe… sāmaṇeriyā…pe…) gihiniyā ummaddāpeyya vā parimaddāpeyya vā, pācittiya’’nti.
১২১২. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
1212.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
সিক্খমানা নাম দ্ৰে ৰস্সানি ছসু ধম্মেসু সিক্খিতসিক্খা।
Sikkhamānā nāma dve vassāni chasu dhammesu sikkhitasikkhā.
সামণেরী নাম দসসিক্খাপদিকা।
Sāmaṇerī nāma dasasikkhāpadikā.
গিহিনী নাম অগারিনী ৰুচ্চতি।
Gihinī nāma agārinī vuccati.
উম্মদ্দাপেয্য ৰাতি উম্মদ্দাপেতি, আপত্তি পাচিত্তিযস্স।
Ummaddāpeyyavāti ummaddāpeti, āpatti pācittiyassa.
পরিমদ্দাপেয্য ৰাতি সম্বাহাপেতি, আপত্তি পাচিত্তিযস্স।
Parimaddāpeyya vāti sambāhāpeti, āpatti pācittiyassa.
১২১৩. অনাপত্তি গিলানায 1, আপদাসু, উম্মত্তিকায, আদিকম্মিকাযাতি।
1213. Anāpatti gilānāya 2, āpadāsu, ummattikāya, ādikammikāyāti.
অট্ঠম নৰম দসমসিক্খাপদানি নিট্ঠিতানি।
Aṭṭhama navama dasamasikkhāpadāni niṭṭhitāni.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৮-৯-১০. অট্ঠমনৰমদসমসিক্খাপদৰণ্ণনা • 8-9-10. Aṭṭhamanavamadasamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮-১০. অট্ঠমাদিসিক্খাপদং • 8-10. Aṭṭhamādisikkhāpadaṃ
