| Library / Tipiṭaka / तिपिटक • Tipiṭaka / भिक्खुनीविभङ्ग • Bhikkhunīvibhaṅga |
८-९-१०. अट्ठम-नवम-दसमसिक्खापदं
8-9-10. Aṭṭhama-navama-dasamasikkhāpadaṃ
१२१०. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन भिक्खुनियो सिक्खमानाय उम्मद्दापेन्तिपि परिमद्दापेन्तिपि…पे॰… सामणेरिया उम्मद्दापेन्तिपि परिमद्दापेन्तिपि…पे॰… गिहिनिया उम्मद्दापेन्तिपि परिमद्दापेन्तिपि। मनुस्सा विहारचारिकं आहिण्डन्ता पस्सित्वा उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो गिहिनिया उम्मद्दापेस्सन्तिपि परिमद्दापेस्सन्तिपि, सेय्यथापि गिहिनियो कामभोगिनियो’’ति! अस्सोसुं खो भिक्खुनियो तेसं मनुस्सानं उज्झायन्तानं खिय्यन्तानं विपाचेन्तानं। या ता भिक्खुनियो अप्पिच्छा…पे॰… ता उज्झायन्ति खिय्यन्ति विपाचेन्ति – कथञ्हि नाम भिक्खुनियो गिहिनिया उम्मद्दापेस्सन्तिपि परिमद्दापेस्सन्तिपीति…पे॰… सच्चं किर, भिक्खवे, भिक्खुनियो गिहिनिया उम्मद्दापेन्तिपि परिमद्दापेन्तिपीति? ‘‘सच्चं, भगवा’’ति। विगरहि बुद्धो भगवा…पे॰… कथञ्हि नाम, भिक्खवे, भिक्खुनियो गिहिनिया उम्मद्दापेस्सन्तिपि परिमद्दापेस्सन्तिपि! नेतं, भिक्खवे, अप्पसन्नानं वा पसादाय…पे॰… एवञ्च पन, भिक्खवे, भिक्खुनियो इमं सिक्खापदं उद्दिसन्तु –
1210. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo sikkhamānāya ummaddāpentipi parimaddāpentipi…pe… sāmaṇeriyā ummaddāpentipi parimaddāpentipi…pe… gihiniyā ummaddāpentipi parimaddāpentipi. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo gihiniyā ummaddāpessantipi parimaddāpessantipi, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhuniyo gihiniyā ummaddāpessantipi parimaddāpessantipīti…pe… saccaṃ kira, bhikkhave, bhikkhuniyo gihiniyā ummaddāpentipi parimaddāpentipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo gihiniyā ummaddāpessantipi parimaddāpessantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
१२११. ‘‘या पन भिक्खुनी (सिक्खमानाय…पे॰… सामणेरिया…पे॰…) गिहिनिया उम्मद्दापेय्य वा परिमद्दापेय्य वा, पाचित्तिय’’न्ति।
1211.‘‘Yā pana bhikkhunī (sikkhamānāya…pe… sāmaṇeriyā…pe…) gihiniyā ummaddāpeyya vā parimaddāpeyya vā, pācittiya’’nti.
१२१२. या पनाति या यादिसा…पे॰… भिक्खुनीति…पे॰… अयं इमस्मिं अत्थे अधिप्पेता भिक्खुनीति।
1212.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
सिक्खमाना नाम द्वे वस्सानि छसु धम्मेसु सिक्खितसिक्खा।
Sikkhamānā nāma dve vassāni chasu dhammesu sikkhitasikkhā.
सामणेरी नाम दससिक्खापदिका।
Sāmaṇerī nāma dasasikkhāpadikā.
गिहिनी नाम अगारिनी वुच्चति।
Gihinī nāma agārinī vuccati.
उम्मद्दापेय्य वाति उम्मद्दापेति, आपत्ति पाचित्तियस्स।
Ummaddāpeyyavāti ummaddāpeti, āpatti pācittiyassa.
परिमद्दापेय्य वाति सम्बाहापेति, आपत्ति पाचित्तियस्स।
Parimaddāpeyya vāti sambāhāpeti, āpatti pācittiyassa.
१२१३. अनापत्ति गिलानाय 1, आपदासु, उम्मत्तिकाय, आदिकम्मिकायाति।
1213. Anāpatti gilānāya 2, āpadāsu, ummattikāya, ādikammikāyāti.
अट्ठम नवम दसमसिक्खापदानि निट्ठितानि।
Aṭṭhama navama dasamasikkhāpadāni niṭṭhitāni.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / भिक्खुनीविभङ्ग-अट्ठकथा • Bhikkhunīvibhaṅga-aṭṭhakathā / ८-९-१०. अट्ठमनवमदसमसिक्खापदवण्णना • 8-9-10. Aṭṭhamanavamadasamasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ८-१०. अट्ठमादिसिक्खापदं • 8-10. Aṭṭhamādisikkhāpadaṃ
