| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
8. абхаяамаад̇ут̇зрийг̇аат̇ааван̣н̣анаа
8. Abhayamātutherīgāthāvaṇṇanā
уд̣̇д̇хам̣ баад̣̇ад̇алаад̇иаад̣̇игаа абхаяамаад̇ааяа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз бун̃н̃аани убажинанд̇ий д̇иссасса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇ваа згад̣̇ивасам̣ сад̇т̇аарам̣ бин̣д̣ааяа жаранд̇ам̣ д̣̇исваа басаннамаанасаа бад̇д̇ам̣ г̇ахзд̇ваа гадажчумад̇д̇ам̣ бхигкам̣ ад̣̇ааси. саа д̇зна бун̃н̃агаммзна д̣̇звамануссзсу сам̣саранд̇ий имасмим̣ б̣уд̣̇д̇хуббаад̣̇з д̇аад̣̇исзна гамманиссанд̣̇зна уж̇ж̇знияам̣ бад̣̇умавад̇ий наама наг̇арасобхин̣ий ахоси. рааж̇аа б̣имб̣исааро д̇ассаа руубасамбад̇д̇иаад̣̇игз г̇ун̣з суд̇ваа бурохид̇асса аажигки – ‘‘уж̇ж̇знияам̣ гира бад̣̇умавад̇ий наама г̇ан̣игаа ахоси, д̇амахам̣ д̣̇адтугаамомхий’’д̇и. бурохид̇о ‘‘саад̇ху, д̣̇зваа’’д̇и манд̇аб̣алзна гумбхийрам̣ наама яагкам̣ аавахзд̇ваа яагкаанубхаавзна рааж̇аанам̣ д̇аавад̣̇зва уж̇ж̇знийнаг̇арам̣ нзси. рааж̇аа д̇ааяа сад̣̇д̇хим̣ згарад̇д̇им̣ сам̣ваасам̣ габбзси. саа д̇зна г̇аб̣бхам̣ г̇ан̣хи. ран̃н̃о жа аарожзси – ‘‘мама гужчияам̣ г̇аб̣бхо бад̇идтахий’’д̇и. д̇ам̣ суд̇ваа рааж̇аа нам̣ ‘‘сажз буд̇д̇о бхавзяяа, вад̣дхзд̇ваа мамам̣ д̣̇ассзхий’’д̇и вад̇ваа наамамуд̣̇д̣̇игам̣ д̣̇ад̇ваа аг̇амааси. саа д̣̇асамаасажжаязна буд̇д̇ам̣ виж̇ааяид̇ваа наамаг̇г̇ахан̣ад̣̇ивасз абхаяод̇и наамам̣ агааси. буд̇д̇ан̃жа сад̇д̇авассигагаалз ‘‘д̇ава бид̇аа б̣имб̣исаарамахаарааж̇аа’’д̇и ран̃н̃о санд̇игам̣ бахин̣и. рааж̇аа д̇ам̣ буд̇д̇ам̣ бассид̇ваа буд̇д̇асинзхам̣ бадилабхид̇ваа гумаарагабарихаарзна вад̣дхзси. д̇асса сад̣̇д̇хаабадилаабхо баб̣б̣аж̇ж̇аа висзсаад̇хиг̇амо жа хздтаа ааг̇ад̇оязва. д̇асса маад̇аа абарабхааг̇з буд̇д̇асса абхаяад̇т̇зрасса санд̇игз д̇хаммам̣ суд̇ваа бадилад̣̇д̇хасад̣̇д̇хаа бхигкунийсу баб̣б̣аж̇ид̇ваа вибассанааяа гаммам̣ гаронд̇ий нажирассзва саха бадисамбхид̣̇аахи арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зрий 2.1.60-70) –
Uddhaṃpādatalātiādikā abhayamātāya theriyā gāthā. Ayampi purimabuddhesu katādhikārā tattha tattha bhave puññāni upacinantī tissassa bhagavato kāle kulagehe nibbattitvā viññutaṃ patvā ekadivasaṃ satthāraṃ piṇḍāya carantaṃ disvā pasannamānasā pattaṃ gahetvā kaṭacchumattaṃ bhikkhaṃ adāsi. Sā tena puññakammena devamanussesu saṃsarantī imasmiṃ buddhuppāde tādisena kammanissandena ujjeniyaṃ padumavatī nāma nagarasobhiṇī ahosi. Rājā bimbisāro tassā rūpasampattiādike guṇe sutvā purohitassa ācikkhi – ‘‘ujjeniyaṃ kira padumavatī nāma gaṇikā ahosi, tamahaṃ daṭṭhukāmomhī’’ti. Purohito ‘‘sādhu, devā’’ti mantabalena kumbhīraṃ nāma yakkhaṃ āvahetvā yakkhānubhāvena rājānaṃ tāvadeva ujjenīnagaraṃ nesi. Rājā tāya saddhiṃ ekarattiṃ saṃvāsaṃ kappesi. Sā tena gabbhaṃ gaṇhi. Rañño ca ārocesi – ‘‘mama kucchiyaṃ gabbho patiṭṭhahī’’ti. Taṃ sutvā rājā naṃ ‘‘sace putto bhaveyya, vaḍḍhetvā mamaṃ dassehī’’ti vatvā nāmamuddikaṃ datvā agamāsi. Sā dasamāsaccayena puttaṃ vijāyitvā nāmaggahaṇadivase abhayoti nāmaṃ akāsi. Puttañca sattavassikakāle ‘‘tava pitā bimbisāramahārājā’’ti rañño santikaṃ pahiṇi. Rājā taṃ puttaṃ passitvā puttasinehaṃ paṭilabhitvā kumārakaparihārena vaḍḍhesi. Tassa saddhāpaṭilābho pabbajjā visesādhigamo ca heṭṭhā āgatoyeva. Tassa mātā aparabhāge puttassa abhayattherassa santike dhammaṃ sutvā paṭiladdhasaddhā bhikkhunīsu pabbajitvā vipassanāya kammaṃ karontī nacirasseva saha paṭisambhidāhi arahattaṃ pāpuṇi. Tena vuttaṃ apadāne (apa. therī 2.1.60-70) –
‘‘бин̣д̣ажаарам̣ жаранд̇асса, д̇иссанаамасса сад̇т̇уно;
‘‘Piṇḍacāraṃ carantassa, tissanāmassa satthuno;
гадажчубхигкам̣ баг̇г̇аяха, б̣уд̣̇д̇хасздтассад̣̇аасахам̣.
Kaṭacchubhikkhaṃ paggayha, buddhaseṭṭhassadāsahaṃ.
‘‘бадиг̇г̇ахзд̇ваа самб̣уд̣̇д̇хо, д̇иссо логаг̇г̇анааяаго;
‘‘Paṭiggahetvā sambuddho, tisso lokagganāyako;
вийт̇ияаа сан̣тид̇о сад̇т̇аа, агаа мз анумод̣̇анам̣.
Vīthiyā saṇṭhito satthā, akā me anumodanaṃ.
‘‘гадажчубхигкам̣ д̣̇ад̇ваана, д̇аавад̇им̣сам̣ г̇амиссаси;
‘‘Kaṭacchubhikkhaṃ datvāna, tāvatiṃsaṃ gamissasi;
чад̇д̇им̣сад̣̇зварааж̇уунам̣, махзсид̇д̇ам̣ гариссаси.
Chattiṃsadevarājūnaṃ, mahesittaṃ karissasi.
‘‘бан̃н̃аасам̣ жаггавад̇д̇ийнам̣, махзсид̇д̇ам̣ гариссаси;
‘‘Paññāsaṃ cakkavattīnaṃ, mahesittaṃ karissasi;
манасаа бад̇т̇ид̇ам̣ саб̣б̣ам̣, бадилажчаси саб̣б̣ад̣̇аа.
Manasā patthitaṃ sabbaṃ, paṭilacchasi sabbadā.
‘‘самбад̇д̇им̣ анубход̇ваана, баб̣б̣аж̇иссаси гин̃жанаа;
‘‘Sampattiṃ anubhotvāna, pabbajissasi kiñcanā;
саб̣б̣аасавз барин̃н̃ааяа, ниб̣б̣ааяиссасинаасаваа.
Sabbāsave pariññāya, nibbāyissasināsavā.
‘‘ид̣̇ам̣ вад̇ваана самб̣уд̣̇д̇хо, д̇иссо логаг̇г̇анааяаго;
‘‘Idaṃ vatvāna sambuddho, tisso lokagganāyako;
набхам̣ аб̣бхуг̇г̇амий вийро, хам̣сарааж̇аава амб̣арз.
Nabhaṃ abbhuggamī vīro, haṃsarājāva ambare.
‘‘суд̣̇иннам̣ мз д̣̇аанаварам̣, суяидтаа яааг̇асамбад̣̇аа;
‘‘Sudinnaṃ me dānavaraṃ, suyiṭṭhā yāgasampadā;
гадажчубхигкам̣ д̣̇ад̇ваана, бад̇д̇аахам̣ ажалам̣ бад̣̇ам̣.
Kaṭacchubhikkhaṃ datvāna, pattāhaṃ acalaṃ padaṃ.
‘‘д̣̇взнавуд̇з ид̇о габбз, яам̣ д̣̇аанамад̣̇ад̣̇им̣ д̇ад̣̇аа;
‘‘Dvenavute ito kappe, yaṃ dānamadadiṃ tadā;
д̣̇уг̇г̇ад̇им̣ наабхиж̇аанаами, бхигкаад̣̇аанассид̣̇ам̣ палам̣.
Duggatiṃ nābhijānāmi, bhikkhādānassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа ад̇д̇ано буд̇д̇зна абхаяад̇т̇зрзна д̇хаммам̣ гат̇знд̇зна оваад̣̇авасзна яаа г̇аат̇аа бхаасид̇аа, уд̣̇аанавасзна саяамби д̇аа зва бажжуд̣̇аахаранд̇ий –
Arahattaṃ pana patvā attano puttena abhayattherena dhammaṃ kathentena ovādavasena yā gāthā bhāsitā, udānavasena sayampi tā eva paccudāharantī –
33.
33.
‘‘уд̣̇д̇хам̣ баад̣̇ад̇алаа амма, ад̇хо вз гзсамад̇т̇агаа;
‘‘Uddhaṃ pādatalā amma, adho ve kesamatthakā;
бажжавзгкассумам̣ гааяам̣, асужим̣ бууд̇иг̇анд̇хигам̣.
Paccavekkhassumaṃ kāyaṃ, asuciṃ pūtigandhikaṃ.
34.
34.
‘‘звам̣ вихарамаанааяа, саб̣б̣о рааг̇о самуухад̇о;
‘‘Evaṃ viharamānāya, sabbo rāgo samūhato;
барил̣аахо самужчинно, сийд̇ибхууд̇аамхи ниб̣б̣уд̇аа’’д̇и. – ааха;
Pariḷāho samucchinno, sītibhūtāmhi nibbutā’’ti. – āha;
д̇ад̇т̇а батамаг̇аат̇ааяа д̇аава аяам̣ сан̇кзбад̇т̇о – амма бад̣̇умавад̇и, баад̣̇ад̇алад̇о уд̣̇д̇хам̣ гзсамад̇т̇агад̇о ад̇хо наанаббагаараасужибуурид̇ааяа асужим̣ саб̣б̣агаалам̣ бууд̇иг̇анд̇хавааяанад̇о бууд̇иг̇анд̇хигам̣, имам̣ гужчид̇аанам̣ ааяад̇анад̇ааяа гааяам̣ сарийрам̣ н̃аан̣ажагкунаа бажжавзгкассууд̇и. аяан̃хи д̇ассаа буд̇д̇зна оваад̣̇ад̣̇аанавасзна бхаасид̇аа г̇аат̇аа.
Tattha paṭhamagāthāya tāva ayaṃ saṅkhepattho – amma padumavati, pādatalato uddhaṃ kesamatthakato adho nānappakāraasucipūritāya asuciṃ sabbakālaṃ pūtigandhavāyanato pūtigandhikaṃ, imaṃ kucchitānaṃ āyatanatāya kāyaṃ sarīraṃ ñāṇacakkhunā paccavekkhassūti. Ayañhi tassā puttena ovādadānavasena bhāsitā gāthā.
саа д̇ам̣ суд̇ваа арахад̇д̇ам̣ бад̇ваа уд̣̇аанзнд̇ий аажарияабууж̇аавасзна д̇амзва г̇аат̇ам̣ батамам̣ вад̇ваа ад̇д̇ано бадибад̇д̇им̣ гат̇знд̇ий ‘‘звам̣ вихарамаанааяаа’’д̇и д̣̇уд̇ияам̣ г̇аат̇амааха.
Sā taṃ sutvā arahattaṃ patvā udānentī ācariyapūjāvasena tameva gāthaṃ paṭhamaṃ vatvā attano paṭipattiṃ kathentī ‘‘evaṃ viharamānāyā’’ti dutiyaṃ gāthamāha.
д̇ад̇т̇а звам̣ вихарамаанааяаад̇и звам̣ мама буд̇д̇зна абхаяад̇т̇зрзна ‘‘уд̣̇д̇хам̣ баад̣̇ад̇алаа’’д̇иаад̣̇инаа д̣̇иннз оваад̣̇з тад̇ваа саб̣б̣агааяам̣ асубхад̇о д̣̇исваа згаг̇г̇ажид̇д̇аа д̇ад̇т̇а бхууд̇убаад̣̇ааяабхзд̣̇з руубад̇хаммз д̇аббадиб̣ад̣̇д̇хз взд̣̇анаад̣̇игз аруубад̇хаммз бариг̇г̇ахзд̇ваа д̇ад̇т̇а д̇илагкан̣ам̣ ааробзд̇ваа анижжаанубассанаад̣̇ивасзна вихарамаанааяа. саб̣б̣о рааг̇о самуухад̇од̇и вудтаанаг̇ааминивибассанааяа маг̇г̇зна гхадид̇ааяа маг̇г̇абадибаадияаа аг̇г̇амаг̇г̇зна саб̣б̣о рааг̇о маяаа самуухад̇о самуг̇гхаадид̇о. барил̣аахо самужчиннод̇и д̇ад̇о зва саб̣б̣о гилзсабарил̣аахо саммад̣̇зва ужчинно, д̇асса жа самужчиннад̇д̇аа зва сийд̇ибхууд̇аа саубаад̣̇исзсааяа ниб̣б̣аанад̇хаад̇уяаа ниб̣б̣уд̇аа амхийд̇и.
Tattha evaṃ viharamānāyāti evaṃ mama puttena abhayattherena ‘‘uddhaṃ pādatalā’’tiādinā dinne ovāde ṭhatvā sabbakāyaṃ asubhato disvā ekaggacittā tattha bhūtupādāyabhede rūpadhamme tappaṭibaddhe vedanādike arūpadhamme pariggahetvā tattha tilakkhaṇaṃ āropetvā aniccānupassanādivasena viharamānāya. Sabbo rāgo samūhatoti vuṭṭhānagāminivipassanāya maggena ghaṭitāya maggapaṭipāṭiyā aggamaggena sabbo rāgo mayā samūhato samugghāṭito. Pariḷāho samucchinnoti tato eva sabbo kilesapariḷāho sammadeva ucchinno, tassa ca samucchinnattā eva sītibhūtā saupādisesāya nibbānadhātuyā nibbutā amhīti.
абхаяамаад̇ут̇зрийг̇аат̇ааван̣н̣анаа нидтид̇аа.
Abhayamātutherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 8. абхаяамаад̇ут̇зрийг̇аат̇аа • 8. Abhayamātutherīgāthā
