| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. அப⁴யராஜகுமாரஸுத்தவண்ணனா
8. Abhayarājakumārasuttavaṇṇanā
83. ஜாதியா அஸமானோ நிஹீனாசரியோ பரத³த்தூபஜீவிகாய மாதுயா குச்சி²யங் ஜாதோ பாத³ஸிகபுத்தோ. நிந்தா³வஸேன வத³தி ஏதேனாதி வாதோ³ அகு³ணோதி ஆஹ – ‘‘வாத³ங் ஆரோபேஹீதி தோ³ஸங் ஆரோபேஹீ’’தி. நிப்³ப³த்தவஸேன நிரயங் அரஹதி, நிரயஸங்வத்தனியேன வா கம்மேன நிரயே நியுத்தோ நேரயிகோ. ஆபாயிகோதி எத்தா²பி ஏஸேவ நயோ. அவீசிம்ஹி உப்பஜ்ஜித்வா தத்த² ஆயுகப்பஸஞ்ஞிதங் அந்தரகப்பங் திட்ட²தீதி கப்பட்டோ². நிரயூபபத்திபரிஹரணவஸேன திகிச்சி²துங் ஸக்குணெய்யோதி தேகிச்சோ², ந தேகிச்சோ² அதேகிச்சோ². த்³வே அந்தே மோசெத்வாதி ப²ருஸங் வா அப்பியங் வா கப்பெய்யாதி த்³வே கொட்டா²ஸே முஞ்சித்வா தே அனாமஸித்வா புச்சி²தங் அத்த²ங் ததோ ப³ஹி கரொந்தோ உக்³கி³லதி நாம. தங் பன ஏவங் காதுங் ந ஸக்கோதீதி ஆஹ – ‘‘உக்³கி³லிதுங் ப³ஹி நீஹரிதுங் ந ஸக்கி²தீ’’தி. ஏவமேவாயங் புச்சா² ந க³ஹேதப்³பா³, அயமெத்த² தோ³ஸோதி தங் அபுச்ச²ங் கரொந்தோ அபனயந்தோ ஓகி³லதி நாம, ததா² பன அஸக்கொந்தோ பதிட்டா²பெந்தோ ந ஓகி³லதி நாம, ப⁴க³வா பன தமத்த²ங் ஓகாஸம்பி அகரொந்தோ உப⁴யதா²பி அஸக்கீ²தி வேதி³தப்³போ³. கத²ங்? ப⁴க³வா ஹி ‘‘ந க்²வெத்த² ராஜகுமார ஏகங்ஸேனா’’தி வத³ந்தோ நிக³ண்ட²ஸ்ஸ அதி⁴ப்பாயங் விபரிவத்தேதி, உபோ⁴ அந்தே மோசெத்வா பஞ்ஹங் விஸ்ஸஜ்ஜேஸி, ஏவங் தாவ உக்³கி³லிதுங் அஸக்கி². ‘‘ந தத்ர ராஜகுமார ஏகங்ஸேனா’’தி வத³ந்தோ ஏவ ச ‘‘நாயங் புச்சா² ஏவங் அவிபா⁴கே³ன புச்சி²தப்³பா³, விப⁴ஜித்வா பன புச்சி²தப்³பா³’’தி புச்சா²ய தோ³ஸங் தீ³பெந்தோ தங் ஹாரெந்தோ ஓகி³லிதும்பி ஸக்க²தீதி.
83. Jātiyā asamāno nihīnācariyo paradattūpajīvikāya mātuyā kucchiyaṃ jāto pādasikaputto. Nindāvasena vadati etenāti vādo aguṇoti āha – ‘‘vādaṃ āropehīti dosaṃ āropehī’’ti. Nibbattavasena nirayaṃ arahati, nirayasaṃvattaniyena vā kammena niraye niyutto nerayiko. Āpāyikoti etthāpi eseva nayo. Avīcimhi uppajjitvā tattha āyukappasaññitaṃ antarakappaṃ tiṭṭhatīti kappaṭṭho. Nirayūpapattipariharaṇavasena tikicchituṃ sakkuṇeyyoti tekiccho, na tekiccho atekiccho. Dve ante mocetvāti pharusaṃ vā appiyaṃ vā kappeyyāti dve koṭṭhāse muñcitvā te anāmasitvā pucchitaṃ atthaṃ tato bahi karonto uggilati nāma. Taṃ pana evaṃ kātuṃ na sakkotīti āha – ‘‘uggilituṃ bahi nīharituṃ na sakkhitī’’ti. Evamevāyaṃ pucchā na gahetabbā, ayamettha dosoti taṃ apucchaṃ karonto apanayanto ogilati nāma, tathā pana asakkonto patiṭṭhāpento na ogilati nāma, bhagavā pana tamatthaṃ okāsampi akaronto ubhayathāpi asakkhīti veditabbo. Kathaṃ? Bhagavā hi ‘‘na khvettha rājakumāra ekaṃsenā’’ti vadanto nigaṇṭhassa adhippāyaṃ viparivatteti, ubho ante mocetvā pañhaṃ vissajjesi, evaṃ tāva uggilituṃ asakkhi. ‘‘Na tatra rājakumāra ekaṃsenā’’ti vadanto eva ca ‘‘nāyaṃ pucchā evaṃ avibhāgena pucchitabbā, vibhajitvā pana pucchitabbā’’ti pucchāya dosaṃ dīpento taṃ hārento ogilitumpi sakkhatīti.
உட்டா²துங் ந ஸக்கி²ஸ்ஸதி சித்தஸ்ஸ அஞ்ஞதா² பவத்தியா. அப⁴யோ த்³வே மக்³கே³ கதபரிசயோ சே²கோ நிபுணோ வாத³ஸீலோ ச ஹுத்வா விசரதி. தேனாஹ – ‘‘ஸோ வாத³ஜ்ஜா²ஸயதாய தஸ்ஸ வசனங் ஸம்படிச்ச²ந்தோ ‘ஏவங், ப⁴ந்தே’தி ஆஹா’’தி.
Uṭṭhātuṃ na sakkhissati cittassa aññathā pavattiyā. Abhayo dve magge kataparicayo cheko nipuṇo vādasīlo ca hutvā vicarati. Tenāha – ‘‘so vādajjhāsayatāya tassa vacanaṃ sampaṭicchanto ‘evaṃ, bhante’ti āhā’’ti.
85. ஏவரூபந்தி யா பரேஸங் அப்பியா அமனாபா து³ருத்தவாசா, ஏவரூபா வாசா, ந பன ப²ருஸவாசா. ப²ருஸவாசாய ஹி ஸேதுகா⁴தோ ததா²க³தானங். சேதனாப²ருஸதாய ஹி ப²ருஸவாசா இச்சி²தா, ந பரேஸங் அப்பியதாமத்தேன. நட்டா² நிக³ண்டா² ஓகி³லிகாதி³ஸம்மதஸ்ஸ பஞ்ஹஸ்ஸ ஏகவசனேன வித்³த⁴ங்ஸிதத்தா.
85.Evarūpanti yā paresaṃ appiyā amanāpā duruttavācā, evarūpā vācā, na pana pharusavācā. Pharusavācāya hi setughāto tathāgatānaṃ. Cetanāpharusatāya hi pharusavācā icchitā, na paresaṃ appiyatāmattena. Naṭṭhā nigaṇṭhā ogilikādisammatassa pañhassa ekavacanena viddhaṃsitattā.
86. தா³ரகஸ்ஸ அங்கே நிஸீத³னஸ்ஸ காரணங் த³ஸ்ஸேதுங் ‘‘லேஸவாதி³னோ’’திஆதி³ வுத்தங். தத்த² லேஸவாதி³னோதி ச²லவாதி³னோ, வாத³மக்³கே³ வா அபரிபுண்ணதாய லேஸமத்தேனேவ வாத³ஸீலா. ஓஸடஸங்கா³மோதி அனேகவாரங் பரவாத³மத்³த³னவஸேன ஓதிண்ணவாத³ஸங்கா³மோ. விஜ்ஜி²த்வாதி நகே²ன விஜ்ஜி²த்வா. இமமேவாதி ய்வாயங் தா³ரகோ அத்தனோ வாத³ப⁴ங்க³பரிஹரணத்த²ங் இமினா அங்கே நிஸீதா³பிதோ, இமமேவ அஸ்ஸ தா³ரகங் உபமங் நிஸ்ஸயங் கத்வா வாத³ங் பி⁴ந்தி³ஸ்ஸாமி. ‘‘அஸ்ஸ வாத³ங் அப்படிததாய உபமாய ப⁴ஞ்ஜிஸ்ஸாமீ’’தி சிந்தெத்வா.
86. Dārakassa aṅke nisīdanassa kāraṇaṃ dassetuṃ ‘‘lesavādino’’tiādi vuttaṃ. Tattha lesavādinoti chalavādino, vādamagge vā aparipuṇṇatāya lesamatteneva vādasīlā. Osaṭasaṅgāmoti anekavāraṃ paravādamaddanavasena otiṇṇavādasaṅgāmo. Vijjhitvāti nakhena vijjhitvā. Imamevāti yvāyaṃ dārako attano vādabhaṅgapariharaṇatthaṃ iminā aṅke nisīdāpito, imameva assa dārakaṃ upamaṃ nissayaṃ katvā vādaṃ bhindissāmi. ‘‘Assa vādaṃ appaṭitatāya upamāya bhañjissāmī’’ti cintetvā.
அபனெய்யங் அஸ்ஸ அஹந்தி அஸ்ஸ தா³ரகஸ்ஸ முக²தோ அஹங் தங் அபனெய்யங். அபூ⁴தத்தோ²வ அபூ⁴தங் உத்தரபத³லோபேனாதி ஆஹ ‘‘அபூ⁴தந்தி அபூ⁴தத்த²’’ந்தி. அதச்ச²ந்தி தஸ்ஸேவ வேவசனந்தி ஆஹ ‘‘அதச்ச²ந்தி ந தச்ச²’’ந்தி. அபூ⁴தந்தி வா அஸந்தங் அவிஜ்ஜமானங். அதச்ச²ந்தி அததா²காரங். அனத்த²ஸங்ஹிதந்தி தி³ட்ட²த⁴ம்மிகேன, ஸம்பராயிகேன வா அனத்தே²ன ஸங்ஹிதங், அனத்தே² வா ஸங்ஹிதங், ந அத்தோ²தி வா அனத்தோ², அத்த²ஸ்ஸ படிபக்கோ² ஸபா⁴வோ, தேன ஸங்ஹிதந்தி அனத்த²ஸங்ஹிதங், பிஸுணவாசங் ஸம்ப²ப்பலாபஞ்சாதி அத்தோ². ஏவமெத்த² சதுப்³பி³த⁴ஸ்ஸபி வசீது³ச்சரிதஸ்ஸ க³ஹிததா த³ட்ட²ப்³பா³.
Apaneyyaṃassa ahanti assa dārakassa mukhato ahaṃ taṃ apaneyyaṃ. Abhūtatthova abhūtaṃ uttarapadalopenāti āha ‘‘abhūtanti abhūtattha’’nti. Atacchanti tasseva vevacananti āha ‘‘atacchanti na taccha’’nti. Abhūtanti vā asantaṃ avijjamānaṃ. Atacchanti atathākāraṃ. Anatthasaṃhitanti diṭṭhadhammikena, samparāyikena vā anatthena saṃhitaṃ, anatthe vā saṃhitaṃ, na atthoti vā anattho, atthassa paṭipakkho sabhāvo, tena saṃhitanti anatthasaṃhitaṃ, pisuṇavācaṃ samphappalāpañcāti attho. Evamettha catubbidhassapi vacīduccaritassa gahitatā daṭṭhabbā.
து³ப்பயுத்தோதி து³ப்படிபன்னோ. ந தங் ததா²க³தோ பா⁴ஸதி அபூ⁴ததாதி³தோ³ஸது³ட்ட²த்தா. தம்பி ததா²க³தோ ந பா⁴ஸதி பூ⁴தத்தே²பி அனத்த²ஸங்ஹிததாதி³தோ³ஸது³ட்ட²த்தா.
Duppayuttoti duppaṭipanno. Na taṃ tathāgato bhāsati abhūtatādidosaduṭṭhattā. Tampi tathāgato na bhāsati bhūtatthepi anatthasaṃhitatādidosaduṭṭhattā.
டா²னங் காரணங் ஏதிஸ்ஸா அத்தீ²தி டா²னியா க-காரஸ்ஸ ய-காரங் கத்வா, ந டா²னியாதி அட்டா²னியா, நிக்காரணா அயுத்தியுத்தா, ஸா ஏவ கதா²தி அட்டா²னியகதா². அத்தபச்சக்க²கத²ங் கதே²மாதி அத்தனா ஏவ பச்சக்க²ங் கத்வா பவத்தியமானங் ச²லகத²ங் கதே²ம.
Ṭhānaṃ kāraṇaṃ etissā atthīti ṭhāniyā ka-kārassa ya-kāraṃ katvā, na ṭhāniyāti aṭṭhāniyā, nikkāraṇā ayuttiyuttā, sā eva kathāti aṭṭhāniyakathā. Attapaccakkhakathaṃ kathemāti attanā eva paccakkhaṃ katvā pavattiyamānaṃ chalakathaṃ kathema.
கா³மிகமஹல்லகோ ‘‘இமே மங் வஞ்சேதுகாமா, அஹமேவ தா³னி இமே வஞ்செஸ்ஸாமீ’’தி சிந்தெத்வா ‘‘ஏவங் ப⁴விஸ்ஸதீ’’திஆதி³மாஹ. ‘‘ந மயங் தா³ஸா’’திபி வத்துங் நாஸக்கி²ங்ஸு புப்³பே³ ததா²கதிகாய கதத்தா.
Gāmikamahallako ‘‘ime maṃ vañcetukāmā, ahameva dāni ime vañcessāmī’’ti cintetvā ‘‘evaṃ bhavissatī’’tiādimāha. ‘‘Na mayaṃ dāsā’’tipi vattuṃ nāsakkhiṃsu pubbe tathākatikāya katattā.
ததியங் ததியமேவாதி த்³வீஸுபி பக்கே²ஸு ததியங் ததியமேவ வாசங். பா⁴ஸிதப்³ப³காலங் அனதிக்கமித்வாதி யஸ்ஸ யதா³ யதா² பா⁴ஸிதப்³ப³ங், தஸ்ஸ ததா³ ததே²வ ச பா⁴ஸனதோ பா⁴ஸிதப்³ப³ங் காரணங் பா⁴ஸிதப்³ப³காலஞ்ச அனதிக்கமித்வாவ பா⁴ஸதி.
Tatiyaṃ tatiyamevāti dvīsupi pakkhesu tatiyaṃ tatiyameva vācaṃ. Bhāsitabbakālaṃ anatikkamitvāti yassa yadā yathā bhāsitabbaṃ, tassa tadā tatheva ca bhāsanato bhāsitabbaṃ kāraṇaṃ bhāsitabbakālañca anatikkamitvāva bhāsati.
87. டா²னுப்பத்திகஞாணேனாதி டா²னே ஏவ உப்பஜ்ஜனகஞாணேன. தஸ்மிங் தஸ்மிங் காரணே தஸ்ஸ தங் தங் அவத்தா²ய உப்பஜ்ஜனகஞாணேன, த⁴ம்மானங் யதா²ஸபா⁴வதோ அவபு³ஜ்ஜ²னஸபா⁴வோதி த⁴ம்மஸபா⁴வோ. த⁴ம்மே ஸபா⁴வத⁴ம்மே அனவஸேஸே வா யாதா²வதோ உபதா⁴ரேதீதி த⁴ம்மதா⁴து, ஸப்³ப³ஞ்ஞுதா. தேனாஹ ‘‘ஸப்³ப³ஞ்ஞுதஞ்ஞாணஸ்ஸேதங் அதி⁴வசன’’ந்தி. ஸுப்படிவித்³த⁴ந்தி ஸப்³ப³ங் ஞெய்யத⁴ம்மங் ஸுட்டு² படிவிஜ்ஜ²னவஸேன, ஸுட்டு² படிவித்³த⁴ந்தி அத்தோ². தேனாஹ ‘‘ஹத்த²க³தங் ப⁴க³வதோ’’தி. நெய்யபுக்³க³லவஸேன பரினிட்டி²தாதி கதா²பரிவிபா⁴கே³ன அயமேவ தே³ஸனா சத்தாரி அரியஸச்சானி த³ஸ்ஸெந்தோ அரஹத்தங் பச்சக்கா²ஸீதி.
87.Ṭhānuppattikañāṇenāti ṭhāne eva uppajjanakañāṇena. Tasmiṃ tasmiṃ kāraṇe tassa taṃ taṃ avatthāya uppajjanakañāṇena, dhammānaṃ yathāsabhāvato avabujjhanasabhāvoti dhammasabhāvo. Dhamme sabhāvadhamme anavasese vā yāthāvato upadhāretīti dhammadhātu, sabbaññutā. Tenāha ‘‘sabbaññutaññāṇassetaṃ adhivacana’’nti. Suppaṭividdhanti sabbaṃ ñeyyadhammaṃ suṭṭhu paṭivijjhanavasena, suṭṭhu paṭividdhanti attho. Tenāha ‘‘hatthagataṃ bhagavato’’ti. Neyyapuggalavasena pariniṭṭhitāti kathāparivibhāgena ayameva desanā cattāri ariyasaccāni dassento arahattaṃ paccakkhāsīti.
அப⁴யராஜகுமாரஸுத்தவண்ணனாய லீனத்த²ப்பகாஸனா ஸமத்தா.
Abhayarājakumārasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. அப⁴யராஜகுமாரஸுத்தங் • 8. Abhayarājakumārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. அப⁴யராஜகுமாரஸுத்தவண்ணனா • 8. Abhayarājakumārasuttavaṇṇanā
