| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. অভযসুত্তং
6. Abhayasuttaṃ
২৩৭. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে। অথ খো অভযো রাজকুমারো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো অভযো রাজকুমারো ভগৰন্তং এতদৰোচ – ‘‘পূরণো, ভন্তে, কস্সপো এৰমাহ – ‘নত্থি হেতু, নত্থি পচ্চযো অঞ্ঞাণায অদস্সনায। অহেতু, অপ্পচ্চযো 1 অঞ্ঞাণং অদস্সনং হোতি। নত্থি হেতু, নত্থি পচ্চযো ঞাণায দস্সনায। অহেতু, অপ্পচ্চযো ঞাণং দস্সনং হোতী’তি। ইধ ভগৰা কিমাহা’’তি? ‘‘অত্থি, রাজকুমার, হেতু, অত্থি পচ্চযো অঞ্ঞাণায অদস্সনায। সহেতু, সপ্পচ্চযো 2 অঞ্ঞাণং অদস্সনং হোতি। অত্থি , রাজকুমার, হেতু, অত্থি পচ্চযো ঞাণায দস্সনায। সহেতু, সপ্পচ্চযো ঞাণং দস্সনং হোতী’’তি।
237. Evaṃ me sutaṃ – ekaṃ samayaṃ bhagavā rājagahe viharati gijjhakūṭe pabbate. Atha kho abhayo rājakumāro yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho abhayo rājakumāro bhagavantaṃ etadavoca – ‘‘pūraṇo, bhante, kassapo evamāha – ‘natthi hetu, natthi paccayo aññāṇāya adassanāya. Ahetu, appaccayo 3 aññāṇaṃ adassanaṃ hoti. Natthi hetu, natthi paccayo ñāṇāya dassanāya. Ahetu, appaccayo ñāṇaṃ dassanaṃ hotī’ti. Idha bhagavā kimāhā’’ti? ‘‘Atthi, rājakumāra, hetu, atthi paccayo aññāṇāya adassanāya. Sahetu, sappaccayo 4 aññāṇaṃ adassanaṃ hoti. Atthi , rājakumāra, hetu, atthi paccayo ñāṇāya dassanāya. Sahetu, sappaccayo ñāṇaṃ dassanaṃ hotī’’ti.
‘‘কতমো পন, ভন্তে, হেতু, কতমো পচ্চযো অঞ্ঞাণায অদস্সনায? কথং সহেতু, সপ্পচ্চযো অঞ্ঞাণং অদস্সনং হোতী’’তি? ‘‘যস্মিং খো, রাজকুমার, সমযে কামরাগপরিযুট্ঠিতেন চেতসা ৰিহরতি কামরাগপরেতেন, উপ্পন্নস্স চ কামরাগস্স নিস্সরণং যথাভূতং ন জানাতি ন পস্সতি – অযম্পি খো, রাজকুমার, হেতু, অযং পচ্চযো অঞ্ঞাণায অদস্সনায। এৰম্পি সহেতু সপ্পচ্চযো অঞ্ঞাণং অদস্সনং হোতি।
‘‘Katamo pana, bhante, hetu, katamo paccayo aññāṇāya adassanāya? Kathaṃ sahetu, sappaccayo aññāṇaṃ adassanaṃ hotī’’ti? ‘‘Yasmiṃ kho, rājakumāra, samaye kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṃ yathābhūtaṃ na jānāti na passati – ayampi kho, rājakumāra, hetu, ayaṃ paccayo aññāṇāya adassanāya. Evampi sahetu sappaccayo aññāṇaṃ adassanaṃ hoti.
‘‘পুন চপরং, রাজকুমার, যস্মিং সমযে ব্যাপাদপরিযুট্ঠিতেন চেতসা ৰিহরতি ব্যাপাদপরেতেন…পে॰… থিনমিদ্ধপরিযুট্ঠিতেন… উদ্ধচ্চকুক্কুচ্চপরিযুট্ঠিতেন… ৰিচিকিচ্ছাপরিযুট্ঠিতেন চেতসা ৰিহরতি ৰিচিকিচ্ছাপরেতেন, উপ্পন্নায চ ৰিচিকিচ্ছায নিস্সরণং যথাভূতং ন জানাতি ন পস্সতি – অযম্পি খো, রাজকুমার, হেতু, অযং পচ্চযো অঞ্ঞাণায অদস্সনায। এৰম্পি সহেতু সপ্পচ্চযো অঞ্ঞাণং অদস্সনং হোতী’’তি।
‘‘Puna caparaṃ, rājakumāra, yasmiṃ samaye byāpādapariyuṭṭhitena cetasā viharati byāpādaparetena…pe… thinamiddhapariyuṭṭhitena… uddhaccakukkuccapariyuṭṭhitena… vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṃ yathābhūtaṃ na jānāti na passati – ayampi kho, rājakumāra, hetu, ayaṃ paccayo aññāṇāya adassanāya. Evampi sahetu sappaccayo aññāṇaṃ adassanaṃ hotī’’ti.
‘‘কো নামাযং, ভন্তে, ধম্মপরিযাযো’’তি? ‘‘নীৰরণা নামেতে, রাজকুমারা’’তি। ‘‘তগ্ঘ, ভগৰা, নীৰরণা; তগ্ঘ, সুগত, নীৰরণা! একমেকেনপি খো, ভন্তে, নীৰরণেন অভিভূতো যথাভূতং ন জানেয্য ন পস্সেয্য, কো পন ৰাদো পঞ্চহি নীৰরণেহি?
‘‘Ko nāmāyaṃ, bhante, dhammapariyāyo’’ti? ‘‘Nīvaraṇā nāmete, rājakumārā’’ti. ‘‘Taggha, bhagavā, nīvaraṇā; taggha, sugata, nīvaraṇā! Ekamekenapi kho, bhante, nīvaraṇena abhibhūto yathābhūtaṃ na jāneyya na passeyya, ko pana vādo pañcahi nīvaraṇehi?
‘‘কতমো পন, ভন্তে, হেতু, কতমো পচ্চযো ঞাণায দস্সনায? কথং সহেতু, সপ্পচ্চযো ঞাণং দস্সনং হোতী’’তি? ‘‘ইধ , রাজকুমার, ভিক্খু সতিসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং। সো সতিসম্বোজ্ঝঙ্গং ভাৰিতেন চিত্তেন যথাভূতং জানাতি পস্সতি – অযম্পি খো, রাজকুমার, হেতু, অযং পচ্চযো ঞাণায দস্সনায। এৰম্পি সহেতু, সপ্পচ্চযো ঞাণং দস্সনং হোতি।
‘‘Katamo pana, bhante, hetu, katamo paccayo ñāṇāya dassanāya? Kathaṃ sahetu, sappaccayo ñāṇaṃ dassanaṃ hotī’’ti? ‘‘Idha , rājakumāra, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. So satisambojjhaṅgaṃ bhāvitena cittena yathābhūtaṃ jānāti passati – ayampi kho, rājakumāra, hetu, ayaṃ paccayo ñāṇāya dassanāya. Evampi sahetu, sappaccayo ñāṇaṃ dassanaṃ hoti.
‘‘পুন চপরং, রাজকুমার, ভিক্খু…পে॰… উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং। সো উপেক্খাসম্বোজ্ঝঙ্গং ভাৰিতেন চিত্তেন যথাভূতং জানাতি পস্সতি – অযম্পি খো, রাজকুমার, হেতু, অযং পচ্চযো ঞাণায দস্সনায। এৰং সহেতু, সপ্পচ্চযো ঞাণং দস্সনং হোতী’’তি।
‘‘Puna caparaṃ, rājakumāra, bhikkhu…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. So upekkhāsambojjhaṅgaṃ bhāvitena cittena yathābhūtaṃ jānāti passati – ayampi kho, rājakumāra, hetu, ayaṃ paccayo ñāṇāya dassanāya. Evaṃ sahetu, sappaccayo ñāṇaṃ dassanaṃ hotī’’ti.
‘‘কো নামাযং, ভন্তে, ধম্মপরিযাযো’’তি? ‘‘বোজ্ঝঙ্গা নামেতে, রাজকুমারা’’তি। ‘‘তগ্ঘ, ভগৰা, বোজ্ঝঙ্গা; তগ্ঘ, সুগত, বোজ্ঝঙ্গা! একমেকেনপি খো, ভন্তে, বোজ্ঝঙ্গেন সমন্নাগতো যথাভূতং জানেয্য পস্সেয্য, কো পন ৰাদো সত্তহি বোজ্ঝঙ্গেহি? যোপি মে, ভন্তে, গিজ্ঝকূটং পব্বতং আরোহন্তস্স কাযকিলমথো চিত্তকিলমথো, সোপি মে পটিপ্পস্সদ্ধো, ধম্মো চ মে অভিসমিতো’’তি। ছট্ঠং।
‘‘Ko nāmāyaṃ, bhante, dhammapariyāyo’’ti? ‘‘Bojjhaṅgā nāmete, rājakumārā’’ti. ‘‘Taggha, bhagavā, bojjhaṅgā; taggha, sugata, bojjhaṅgā! Ekamekenapi kho, bhante, bojjhaṅgena samannāgato yathābhūtaṃ jāneyya passeyya, ko pana vādo sattahi bojjhaṅgehi? Yopi me, bhante, gijjhakūṭaṃ pabbataṃ ārohantassa kāyakilamatho cittakilamatho, sopi me paṭippassaddho, dhammo ca me abhisamito’’ti. Chaṭṭhaṃ.
সাকচ্ছৰগ্গো ছট্ঠো।
Sākacchavaggo chaṭṭho.
তস্সুদ্দানং –
Tassuddānaṃ –
আহারা পরিযাযমগ্গি, মেত্তং সঙ্গারৰেন চ।
Āhārā pariyāyamaggi, mettaṃ saṅgāravena ca;
অভযো পুচ্ছিতো পঞ্হং, গিজ্ঝকূটম্হি পব্বতেতি॥
Abhayo pucchito pañhaṃ, gijjhakūṭamhi pabbateti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. অভযসুত্তৰণ্ণনা • 6. Abhayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. অভযসুত্তৰণ্ণনা • 6. Abhayasuttavaṇṇanā
