| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೬. ಅಭಯಸುತ್ತಂ
6. Abhayasuttaṃ
೨೩೭. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ। ಅಥ ಖೋ ಅಭಯೋ ರಾಜಕುಮಾರೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಅಭಯೋ ರಾಜಕುಮಾರೋ ಭಗವನ್ತಂ ಏತದವೋಚ – ‘‘ಪೂರಣೋ, ಭನ್ತೇ, ಕಸ್ಸಪೋ ಏವಮಾಹ – ‘ನತ್ಥಿ ಹೇತು, ನತ್ಥಿ ಪಚ್ಚಯೋ ಅಞ್ಞಾಣಾಯ ಅದಸ್ಸನಾಯ। ಅಹೇತು, ಅಪ್ಪಚ್ಚಯೋ 1 ಅಞ್ಞಾಣಂ ಅದಸ್ಸನಂ ಹೋತಿ। ನತ್ಥಿ ಹೇತು, ನತ್ಥಿ ಪಚ್ಚಯೋ ಞಾಣಾಯ ದಸ್ಸನಾಯ। ಅಹೇತು, ಅಪ್ಪಚ್ಚಯೋ ಞಾಣಂ ದಸ್ಸನಂ ಹೋತೀ’ತಿ। ಇಧ ಭಗವಾ ಕಿಮಾಹಾ’’ತಿ? ‘‘ಅತ್ಥಿ, ರಾಜಕುಮಾರ, ಹೇತು, ಅತ್ಥಿ ಪಚ್ಚಯೋ ಅಞ್ಞಾಣಾಯ ಅದಸ್ಸನಾಯ। ಸಹೇತು, ಸಪ್ಪಚ್ಚಯೋ 2 ಅಞ್ಞಾಣಂ ಅದಸ್ಸನಂ ಹೋತಿ। ಅತ್ಥಿ , ರಾಜಕುಮಾರ, ಹೇತು, ಅತ್ಥಿ ಪಚ್ಚಯೋ ಞಾಣಾಯ ದಸ್ಸನಾಯ। ಸಹೇತು, ಸಪ್ಪಚ್ಚಯೋ ಞಾಣಂ ದಸ್ಸನಂ ಹೋತೀ’’ತಿ।
237. Evaṃ me sutaṃ – ekaṃ samayaṃ bhagavā rājagahe viharati gijjhakūṭe pabbate. Atha kho abhayo rājakumāro yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho abhayo rājakumāro bhagavantaṃ etadavoca – ‘‘pūraṇo, bhante, kassapo evamāha – ‘natthi hetu, natthi paccayo aññāṇāya adassanāya. Ahetu, appaccayo 3 aññāṇaṃ adassanaṃ hoti. Natthi hetu, natthi paccayo ñāṇāya dassanāya. Ahetu, appaccayo ñāṇaṃ dassanaṃ hotī’ti. Idha bhagavā kimāhā’’ti? ‘‘Atthi, rājakumāra, hetu, atthi paccayo aññāṇāya adassanāya. Sahetu, sappaccayo 4 aññāṇaṃ adassanaṃ hoti. Atthi , rājakumāra, hetu, atthi paccayo ñāṇāya dassanāya. Sahetu, sappaccayo ñāṇaṃ dassanaṃ hotī’’ti.
‘‘ಕತಮೋ ಪನ, ಭನ್ತೇ, ಹೇತು, ಕತಮೋ ಪಚ್ಚಯೋ ಅಞ್ಞಾಣಾಯ ಅದಸ್ಸನಾಯ? ಕಥಂ ಸಹೇತು, ಸಪ್ಪಚ್ಚಯೋ ಅಞ್ಞಾಣಂ ಅದಸ್ಸನಂ ಹೋತೀ’’ತಿ? ‘‘ಯಸ್ಮಿಂ ಖೋ, ರಾಜಕುಮಾರ, ಸಮಯೇ ಕಾಮರಾಗಪರಿಯುಟ್ಠಿತೇನ ಚೇತಸಾ ವಿಹರತಿ ಕಾಮರಾಗಪರೇತೇನ, ಉಪ್ಪನ್ನಸ್ಸ ಚ ಕಾಮರಾಗಸ್ಸ ನಿಸ್ಸರಣಂ ಯಥಾಭೂತಂ ನ ಜಾನಾತಿ ನ ಪಸ್ಸತಿ – ಅಯಮ್ಪಿ ಖೋ, ರಾಜಕುಮಾರ, ಹೇತು, ಅಯಂ ಪಚ್ಚಯೋ ಅಞ್ಞಾಣಾಯ ಅದಸ್ಸನಾಯ। ಏವಮ್ಪಿ ಸಹೇತು ಸಪ್ಪಚ್ಚಯೋ ಅಞ್ಞಾಣಂ ಅದಸ್ಸನಂ ಹೋತಿ।
‘‘Katamo pana, bhante, hetu, katamo paccayo aññāṇāya adassanāya? Kathaṃ sahetu, sappaccayo aññāṇaṃ adassanaṃ hotī’’ti? ‘‘Yasmiṃ kho, rājakumāra, samaye kāmarāgapariyuṭṭhitena cetasā viharati kāmarāgaparetena, uppannassa ca kāmarāgassa nissaraṇaṃ yathābhūtaṃ na jānāti na passati – ayampi kho, rājakumāra, hetu, ayaṃ paccayo aññāṇāya adassanāya. Evampi sahetu sappaccayo aññāṇaṃ adassanaṃ hoti.
‘‘ಪುನ ಚಪರಂ, ರಾಜಕುಮಾರ, ಯಸ್ಮಿಂ ಸಮಯೇ ಬ್ಯಾಪಾದಪರಿಯುಟ್ಠಿತೇನ ಚೇತಸಾ ವಿಹರತಿ ಬ್ಯಾಪಾದಪರೇತೇನ…ಪೇ॰… ಥಿನಮಿದ್ಧಪರಿಯುಟ್ಠಿತೇನ… ಉದ್ಧಚ್ಚಕುಕ್ಕುಚ್ಚಪರಿಯುಟ್ಠಿತೇನ… ವಿಚಿಕಿಚ್ಛಾಪರಿಯುಟ್ಠಿತೇನ ಚೇತಸಾ ವಿಹರತಿ ವಿಚಿಕಿಚ್ಛಾಪರೇತೇನ, ಉಪ್ಪನ್ನಾಯ ಚ ವಿಚಿಕಿಚ್ಛಾಯ ನಿಸ್ಸರಣಂ ಯಥಾಭೂತಂ ನ ಜಾನಾತಿ ನ ಪಸ್ಸತಿ – ಅಯಮ್ಪಿ ಖೋ, ರಾಜಕುಮಾರ, ಹೇತು, ಅಯಂ ಪಚ್ಚಯೋ ಅಞ್ಞಾಣಾಯ ಅದಸ್ಸನಾಯ। ಏವಮ್ಪಿ ಸಹೇತು ಸಪ್ಪಚ್ಚಯೋ ಅಞ್ಞಾಣಂ ಅದಸ್ಸನಂ ಹೋತೀ’’ತಿ।
‘‘Puna caparaṃ, rājakumāra, yasmiṃ samaye byāpādapariyuṭṭhitena cetasā viharati byāpādaparetena…pe… thinamiddhapariyuṭṭhitena… uddhaccakukkuccapariyuṭṭhitena… vicikicchāpariyuṭṭhitena cetasā viharati vicikicchāparetena, uppannāya ca vicikicchāya nissaraṇaṃ yathābhūtaṃ na jānāti na passati – ayampi kho, rājakumāra, hetu, ayaṃ paccayo aññāṇāya adassanāya. Evampi sahetu sappaccayo aññāṇaṃ adassanaṃ hotī’’ti.
‘‘ಕೋ ನಾಮಾಯಂ, ಭನ್ತೇ, ಧಮ್ಮಪರಿಯಾಯೋ’’ತಿ? ‘‘ನೀವರಣಾ ನಾಮೇತೇ, ರಾಜಕುಮಾರಾ’’ತಿ। ‘‘ತಗ್ಘ, ಭಗವಾ, ನೀವರಣಾ; ತಗ್ಘ, ಸುಗತ, ನೀವರಣಾ! ಏಕಮೇಕೇನಪಿ ಖೋ, ಭನ್ತೇ, ನೀವರಣೇನ ಅಭಿಭೂತೋ ಯಥಾಭೂತಂ ನ ಜಾನೇಯ್ಯ ನ ಪಸ್ಸೇಯ್ಯ, ಕೋ ಪನ ವಾದೋ ಪಞ್ಚಹಿ ನೀವರಣೇಹಿ?
‘‘Ko nāmāyaṃ, bhante, dhammapariyāyo’’ti? ‘‘Nīvaraṇā nāmete, rājakumārā’’ti. ‘‘Taggha, bhagavā, nīvaraṇā; taggha, sugata, nīvaraṇā! Ekamekenapi kho, bhante, nīvaraṇena abhibhūto yathābhūtaṃ na jāneyya na passeyya, ko pana vādo pañcahi nīvaraṇehi?
‘‘ಕತಮೋ ಪನ, ಭನ್ತೇ, ಹೇತು, ಕತಮೋ ಪಚ್ಚಯೋ ಞಾಣಾಯ ದಸ್ಸನಾಯ? ಕಥಂ ಸಹೇತು, ಸಪ್ಪಚ್ಚಯೋ ಞಾಣಂ ದಸ್ಸನಂ ಹೋತೀ’’ತಿ? ‘‘ಇಧ , ರಾಜಕುಮಾರ, ಭಿಕ್ಖು ಸತಿಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ। ಸೋ ಸತಿಸಮ್ಬೋಜ್ಝಙ್ಗಂ ಭಾವಿತೇನ ಚಿತ್ತೇನ ಯಥಾಭೂತಂ ಜಾನಾತಿ ಪಸ್ಸತಿ – ಅಯಮ್ಪಿ ಖೋ, ರಾಜಕುಮಾರ, ಹೇತು, ಅಯಂ ಪಚ್ಚಯೋ ಞಾಣಾಯ ದಸ್ಸನಾಯ। ಏವಮ್ಪಿ ಸಹೇತು, ಸಪ್ಪಚ್ಚಯೋ ಞಾಣಂ ದಸ್ಸನಂ ಹೋತಿ।
‘‘Katamo pana, bhante, hetu, katamo paccayo ñāṇāya dassanāya? Kathaṃ sahetu, sappaccayo ñāṇaṃ dassanaṃ hotī’’ti? ‘‘Idha , rājakumāra, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. So satisambojjhaṅgaṃ bhāvitena cittena yathābhūtaṃ jānāti passati – ayampi kho, rājakumāra, hetu, ayaṃ paccayo ñāṇāya dassanāya. Evampi sahetu, sappaccayo ñāṇaṃ dassanaṃ hoti.
‘‘ಪುನ ಚಪರಂ, ರಾಜಕುಮಾರ, ಭಿಕ್ಖು…ಪೇ॰… ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವೇತಿ ವಿವೇಕನಿಸ್ಸಿತಂ ವಿರಾಗನಿಸ್ಸಿತಂ ನಿರೋಧನಿಸ್ಸಿತಂ ವೋಸ್ಸಗ್ಗಪರಿಣಾಮಿಂ। ಸೋ ಉಪೇಕ್ಖಾಸಮ್ಬೋಜ್ಝಙ್ಗಂ ಭಾವಿತೇನ ಚಿತ್ತೇನ ಯಥಾಭೂತಂ ಜಾನಾತಿ ಪಸ್ಸತಿ – ಅಯಮ್ಪಿ ಖೋ, ರಾಜಕುಮಾರ, ಹೇತು, ಅಯಂ ಪಚ್ಚಯೋ ಞಾಣಾಯ ದಸ್ಸನಾಯ। ಏವಂ ಸಹೇತು, ಸಪ್ಪಚ್ಚಯೋ ಞಾಣಂ ದಸ್ಸನಂ ಹೋತೀ’’ತಿ।
‘‘Puna caparaṃ, rājakumāra, bhikkhu…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. So upekkhāsambojjhaṅgaṃ bhāvitena cittena yathābhūtaṃ jānāti passati – ayampi kho, rājakumāra, hetu, ayaṃ paccayo ñāṇāya dassanāya. Evaṃ sahetu, sappaccayo ñāṇaṃ dassanaṃ hotī’’ti.
‘‘ಕೋ ನಾಮಾಯಂ, ಭನ್ತೇ, ಧಮ್ಮಪರಿಯಾಯೋ’’ತಿ? ‘‘ಬೋಜ್ಝಙ್ಗಾ ನಾಮೇತೇ, ರಾಜಕುಮಾರಾ’’ತಿ। ‘‘ತಗ್ಘ, ಭಗವಾ, ಬೋಜ್ಝಙ್ಗಾ; ತಗ್ಘ, ಸುಗತ, ಬೋಜ್ಝಙ್ಗಾ! ಏಕಮೇಕೇನಪಿ ಖೋ, ಭನ್ತೇ, ಬೋಜ್ಝಙ್ಗೇನ ಸಮನ್ನಾಗತೋ ಯಥಾಭೂತಂ ಜಾನೇಯ್ಯ ಪಸ್ಸೇಯ್ಯ, ಕೋ ಪನ ವಾದೋ ಸತ್ತಹಿ ಬೋಜ್ಝಙ್ಗೇಹಿ? ಯೋಪಿ ಮೇ, ಭನ್ತೇ, ಗಿಜ್ಝಕೂಟಂ ಪಬ್ಬತಂ ಆರೋಹನ್ತಸ್ಸ ಕಾಯಕಿಲಮಥೋ ಚಿತ್ತಕಿಲಮಥೋ, ಸೋಪಿ ಮೇ ಪಟಿಪ್ಪಸ್ಸದ್ಧೋ, ಧಮ್ಮೋ ಚ ಮೇ ಅಭಿಸಮಿತೋ’’ತಿ। ಛಟ್ಠಂ।
‘‘Ko nāmāyaṃ, bhante, dhammapariyāyo’’ti? ‘‘Bojjhaṅgā nāmete, rājakumārā’’ti. ‘‘Taggha, bhagavā, bojjhaṅgā; taggha, sugata, bojjhaṅgā! Ekamekenapi kho, bhante, bojjhaṅgena samannāgato yathābhūtaṃ jāneyya passeyya, ko pana vādo sattahi bojjhaṅgehi? Yopi me, bhante, gijjhakūṭaṃ pabbataṃ ārohantassa kāyakilamatho cittakilamatho, sopi me paṭippassaddho, dhammo ca me abhisamito’’ti. Chaṭṭhaṃ.
ಸಾಕಚ್ಛವಗ್ಗೋ ಛಟ್ಠೋ।
Sākacchavaggo chaṭṭho.
ತಸ್ಸುದ್ದಾನಂ –
Tassuddānaṃ –
ಆಹಾರಾ ಪರಿಯಾಯಮಗ್ಗಿ, ಮೇತ್ತಂ ಸಙ್ಗಾರವೇನ ಚ।
Āhārā pariyāyamaggi, mettaṃ saṅgāravena ca;
ಅಭಯೋ ಪುಚ್ಛಿತೋ ಪಞ್ಹಂ, ಗಿಜ್ಝಕೂಟಮ್ಹಿ ಪಬ್ಬತೇತಿ॥
Abhayo pucchito pañhaṃ, gijjhakūṭamhi pabbateti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಅಭಯಸುತ್ತವಣ್ಣನಾ • 6. Abhayasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೬. ಅಭಯಸುತ್ತವಣ್ಣನಾ • 6. Abhayasuttavaṇṇanā
