| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. அப⁴யஸுத்தவண்ணனா
4. Abhayasuttavaṇṇanā
184. சதுத்தே² கிச்சா²ஜீவிதகாரணட்டே²ன ரோகோ³வ ரோகா³தங்கோ நாம. பு²ட்ட²ஸ்ஸாதி தேன ரோகா³தங்கேன ஸமன்னாக³தஸ்ஸ. உரத்தாளிங் கந்த³தீதி உரங் தாளெத்வா ரோத³தி. அகதகல்யாணோதிஆதீ³ஸு கல்யாணங் வுச்சதி புஞ்ஞகம்மங் , தங் அகதங் ஏதேனாதி அகதகல்யாணோ. ஸேஸபதே³ஸுபி ஏஸேவ நயோ. புஞ்ஞகம்மமேவ ஹி கோஸல்லஸம்பூ⁴தத்தா குஸலங், பீ⁴தஸ்ஸ பரித்தாயகத்தா பீ⁴ருத்தாணந்தி வுச்சதி. கதபாபோதிஆதீ³ஸு பாபங் வுச்சதி லாமகங் அகுஸலகம்மங். லுத்³த³ந்தி கக்க²ளகம்மங். கிப்³பி³ஸந்தி ஸமலங் அபரிஸுத்³த⁴கம்மங். கங்கீ² ஹோதீதி பு³த்³த⁴த⁴ம்மஸங்க⁴கு³ணேஸு சேவ ஸிக்கா²ய ச புப்³ப³ந்தே ச அபரந்தே ச புப்³ப³ந்தாபரந்தே ச படிச்சஸமுப்பாதே³ சாதி அட்ட²ஸு டா²னேஸு கங்கா²ய ஸமன்னாக³தோ ஹோதி. விசிகிச்சீ²தி விசிகிச்சா²ய ஸமன்னாக³தோ ஸாஸனஸத்³த⁴ம்மே ந நிட்ட²ங் க³தோ, உக்³க³ஹபரிபுச்சா²வஸேன நிட்ட²ங் க³ந்துங் ந ஸக்கோதி. இமினா நயேன ஸப்³ப³த்த² அத்தோ² வேதி³தப்³போ³.
184. Catutthe kicchājīvitakāraṇaṭṭhena rogova rogātaṅko nāma. Phuṭṭhassāti tena rogātaṅkena samannāgatassa. Urattāḷiṃ kandatīti uraṃ tāḷetvā rodati. Akatakalyāṇotiādīsu kalyāṇaṃ vuccati puññakammaṃ , taṃ akataṃ etenāti akatakalyāṇo. Sesapadesupi eseva nayo. Puññakammameva hi kosallasambhūtattā kusalaṃ, bhītassa parittāyakattā bhīruttāṇanti vuccati. Katapāpotiādīsu pāpaṃ vuccati lāmakaṃ akusalakammaṃ. Luddanti kakkhaḷakammaṃ. Kibbisanti samalaṃ aparisuddhakammaṃ. Kaṅkhī hotīti buddhadhammasaṅghaguṇesu ceva sikkhāya ca pubbante ca aparante ca pubbantāparante ca paṭiccasamuppāde cāti aṭṭhasu ṭhānesu kaṅkhāya samannāgato hoti. Vicikicchīti vicikicchāya samannāgato sāsanasaddhamme na niṭṭhaṃ gato, uggahaparipucchāvasena niṭṭhaṃ gantuṃ na sakkoti. Iminā nayena sabbattha attho veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. அப⁴யஸுத்தங் • 4. Abhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. அப⁴யஸுத்தவண்ணனா • 4. Abhayasuttavaṇṇanā
