| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੪. ਅਭਯਸੁਤ੍ਤવਣ੍ਣਨਾ
4. Abhayasuttavaṇṇanā
੧੮੪. ਚਤੁਤ੍ਥੇ ਕਿਚ੍ਛਾਜੀવਿਤਕਾਰਣਟ੍ਠੇਨ ਰੋਗੋવ ਰੋਗਾਤਙ੍ਕੋ ਨਾਮ। ਫੁਟ੍ਠਸ੍ਸਾਤਿ ਤੇਨ ਰੋਗਾਤਙ੍ਕੇਨ ਸਮਨ੍ਨਾਗਤਸ੍ਸ। ਉਰਤ੍ਤਾਲ਼ਿਂ ਕਨ੍ਦਤੀਤਿ ਉਰਂ ਤਾਲ਼ੇਤ੍વਾ ਰੋਦਤਿ। ਅਕਤਕਲ੍ਯਾਣੋਤਿਆਦੀਸੁ ਕਲ੍ਯਾਣਂ વੁਚ੍ਚਤਿ ਪੁਞ੍ਞਕਮ੍ਮਂ , ਤਂ ਅਕਤਂ ਏਤੇਨਾਤਿ ਅਕਤਕਲ੍ਯਾਣੋ। ਸੇਸਪਦੇਸੁਪਿ ਏਸੇવ ਨਯੋ। ਪੁਞ੍ਞਕਮ੍ਮਮੇવ ਹਿ ਕੋਸਲ੍ਲਸਮ੍ਭੂਤਤ੍ਤਾ ਕੁਸਲਂ, ਭੀਤਸ੍ਸ ਪਰਿਤ੍ਤਾਯਕਤ੍ਤਾ ਭੀਰੁਤ੍ਤਾਣਨ੍ਤਿ વੁਚ੍ਚਤਿ। ਕਤਪਾਪੋਤਿਆਦੀਸੁ ਪਾਪਂ વੁਚ੍ਚਤਿ ਲਾਮਕਂ ਅਕੁਸਲਕਮ੍ਮਂ। ਲੁਦ੍ਦਨ੍ਤਿ ਕਕ੍ਖਲ਼ਕਮ੍ਮਂ। ਕਿਬ੍ਬਿਸਨ੍ਤਿ ਸਮਲਂ ਅਪਰਿਸੁਦ੍ਧਕਮ੍ਮਂ। ਕਙ੍ਖੀ ਹੋਤੀਤਿ ਬੁਦ੍ਧਧਮ੍ਮਸਙ੍ਘਗੁਣੇਸੁ ਚੇવ ਸਿਕ੍ਖਾਯ ਚ ਪੁਬ੍ਬਨ੍ਤੇ ਚ ਅਪਰਨ੍ਤੇ ਚ ਪੁਬ੍ਬਨ੍ਤਾਪਰਨ੍ਤੇ ਚ ਪਟਿਚ੍ਚਸਮੁਪ੍ਪਾਦੇ ਚਾਤਿ ਅਟ੍ਠਸੁ ਠਾਨੇਸੁ ਕਙ੍ਖਾਯ ਸਮਨ੍ਨਾਗਤੋ ਹੋਤਿ। વਿਚਿਕਿਚ੍ਛੀਤਿ વਿਚਿਕਿਚ੍ਛਾਯ ਸਮਨ੍ਨਾਗਤੋ ਸਾਸਨਸਦ੍ਧਮ੍ਮੇ ਨ ਨਿਟ੍ਠਂ ਗਤੋ, ਉਗ੍ਗਹਪਰਿਪੁਚ੍ਛਾવਸੇਨ ਨਿਟ੍ਠਂ ਗਨ੍ਤੁਂ ਨ ਸਕ੍ਕੋਤਿ। ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ વੇਦਿਤਬ੍ਬੋ।
184. Catutthe kicchājīvitakāraṇaṭṭhena rogova rogātaṅko nāma. Phuṭṭhassāti tena rogātaṅkena samannāgatassa. Urattāḷiṃ kandatīti uraṃ tāḷetvā rodati. Akatakalyāṇotiādīsu kalyāṇaṃ vuccati puññakammaṃ , taṃ akataṃ etenāti akatakalyāṇo. Sesapadesupi eseva nayo. Puññakammameva hi kosallasambhūtattā kusalaṃ, bhītassa parittāyakattā bhīruttāṇanti vuccati. Katapāpotiādīsu pāpaṃ vuccati lāmakaṃ akusalakammaṃ. Luddanti kakkhaḷakammaṃ. Kibbisanti samalaṃ aparisuddhakammaṃ. Kaṅkhī hotīti buddhadhammasaṅghaguṇesu ceva sikkhāya ca pubbante ca aparante ca pubbantāparante ca paṭiccasamuppāde cāti aṭṭhasu ṭhānesu kaṅkhāya samannāgato hoti. Vicikicchīti vicikicchāya samannāgato sāsanasaddhamme na niṭṭhaṃ gato, uggahaparipucchāvasena niṭṭhaṃ gantuṃ na sakkoti. Iminā nayena sabbattha attho veditabbo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. ਅਭਯਸੁਤ੍ਤਂ • 4. Abhayasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੪. ਅਭਯਸੁਤ੍ਤવਣ੍ਣਨਾ • 4. Abhayasuttavaṇṇanā
