| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
8. абхаяад̇т̇зраг̇аат̇ааван̣н̣анаа
8. Abhayattheragāthāvaṇṇanā
руубам̣ д̣̇исваа сад̇и мудтаад̇и ааяасмад̇о абхаяад̇т̇зрасса г̇аат̇аа. гаа уббад̇д̇и? соби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ бун̃н̃ам̣ убажинанд̇о сумзд̇хасса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о згад̣̇ивасам̣ сумзд̇хам̣ бхаг̇аванд̇ам̣ д̣̇исваа басаннажид̇д̇о сал̣алабубпзхи бууж̇амагааси. со д̇зна бун̃н̃агаммзна д̣̇звзсу ниб̣б̣ад̇д̇ид̇ваа абараабарам̣ бун̃н̃аани гад̇ваа суг̇ад̇ийсуязва сам̣саранд̇о имасмим̣ б̣уд̣̇д̇хуббаад̣̇з саавад̇т̇ияам̣ б̣раахман̣агулз ниб̣б̣ад̇д̇ид̇ваа абхаяод̇и лад̣̇д̇ханаамо вин̃н̃уд̇ам̣ бад̇д̇о хзд̇усамбад̇д̇ияаа жод̣̇ияамаано згад̣̇ивасам̣ вихаарам̣ г̇ад̇о сад̇т̇у д̇хаммад̣̇зсанам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа гад̇абуб̣б̣агижжо вибассанааяа гаммам̣ гаронд̇о вихарад̇и. ат̇асса згад̣̇ивасам̣ г̇аамам̣ бин̣д̣ааяа бавидтасса алан̇гад̇абадияад̇д̇ам̣ маад̇уг̇аамам̣ д̣̇исваа аяонисоманасигааравасзна д̇асса руубам̣ аараб̣бха чанд̣̇арааг̇о уббаж̇ж̇и, со вихаарам̣ бависид̇ваа ‘‘сад̇им̣ виссаж̇ж̇ид̇ваа ологзнд̇асса руубаарамман̣з маяхам̣ гилзсо уббанно, аяуд̇д̇ам̣ маяаа гад̇а’’нд̇и ад̇д̇ано жид̇д̇ам̣ ниг̇г̇ан̣ханд̇о д̇аавад̣̇зва вибассанам̣ вад̣дхзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.15.43-47) –
Rūpaṃ disvā sati muṭṭhāti āyasmato abhayattherassa gāthā. Kā uppatti? Sopi purimabuddhesu katādhikāro tattha tattha bhave vivaṭṭūpanissayaṃ puññaṃ upacinanto sumedhassa bhagavato kāle kulagehe nibbattitvā viññutaṃ patto ekadivasaṃ sumedhaṃ bhagavantaṃ disvā pasannacitto saḷalapupphehi pūjamakāsi. So tena puññakammena devesu nibbattitvā aparāparaṃ puññāni katvā sugatīsuyeva saṃsaranto imasmiṃ buddhuppāde sāvatthiyaṃ brāhmaṇakule nibbattitvā abhayoti laddhanāmo viññutaṃ patto hetusampattiyā codiyamāno ekadivasaṃ vihāraṃ gato satthu dhammadesanaṃ sutvā paṭiladdhasaddho pabbajitvā katapubbakicco vipassanāya kammaṃ karonto viharati. Athassa ekadivasaṃ gāmaṃ piṇḍāya paviṭṭhassa alaṅkatapaṭiyattaṃ mātugāmaṃ disvā ayonisomanasikāravasena tassa rūpaṃ ārabbha chandarāgo uppajji, so vihāraṃ pavisitvā ‘‘satiṃ vissajjitvā olokentassa rūpārammaṇe mayhaṃ kileso uppanno, ayuttaṃ mayā kata’’nti attano cittaṃ niggaṇhanto tāvadeva vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 1.15.43-47) –
‘‘сумзд̇хо наама наамзна, саяамбхуу абарааж̇ид̇о;
‘‘Sumedho nāma nāmena, sayambhū aparājito;
вивзгамануб̣рууханд̇о, аж̇жхог̇ахи махааванам̣.
Vivekamanubrūhanto, ajjhogahi mahāvanaṃ.
‘‘сал̣алам̣ бубпид̇ам̣ д̣̇исваа, г̇ант̇ид̇ваана вадам̣сагам̣;
‘‘Saḷalaṃ pupphitaṃ disvā, ganthitvāna vaṭaṃsakaṃ;
б̣уд̣̇д̇хасса абхиробзсим̣, саммукаа логанааяагам̣.
Buddhassa abhiropesiṃ, sammukhā lokanāyakaṃ.
‘‘д̇им̣сагаббасахассамхи, яам̣ бубпамабхиробаяим̣;
‘‘Tiṃsakappasahassamhi, yaṃ pupphamabhiropayiṃ;
д̣̇уг̇г̇ад̇им̣ наабхиж̇аанаами, б̣уд̣̇д̇хабууж̇ааяид̣̇ам̣ палам̣.
Duggatiṃ nābhijānāmi, buddhapūjāyidaṃ phalaṃ.
‘‘уунавийсз габбасад̇з, сол̣асаасум̣ суниммид̇аа;
‘‘Ūnavīse kappasate, soḷasāsuṃ sunimmitā;
сад̇д̇арад̇анасамбаннаа, жаггавад̇д̇ий махаб̣б̣алаа.
Sattaratanasampannā, cakkavattī mahabbalā.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа ад̇д̇ано гилзсуббад̇д̇инид̣̇ассанзна ‘‘гилзсз анувад̇д̇знд̇асса ваддад̣̇угкад̇о над̇т̇зва сийсугкибанам̣. ахам̣ бана д̇з наанувад̇д̇и’’нд̇и д̣̇ассзнд̇о –
Arahattaṃ pana patvā attano kilesuppattinidassanena ‘‘kilese anuvattentassa vaṭṭadukkhato nattheva sīsukkhipanaṃ. Ahaṃ pana te nānuvatti’’nti dassento –
98.
98.
‘‘руубам̣ д̣̇исваа сад̇и мудтаа, бияам̣ нимид̇д̇ам̣ манасигарод̇о;
‘‘Rūpaṃ disvā sati muṭṭhā, piyaṃ nimittaṃ manasikaroto;
саарад̇д̇ажид̇д̇о взд̣̇зд̇и, д̇ан̃жа аж̇жхоса д̇идтад̇и;
Sārattacitto vedeti, tañca ajjhosa tiṭṭhati;
д̇асса вад̣дханд̇и аасаваа, бхавамуулобаг̇аамино’’д̇и. – г̇аат̇ам̣ абхааси;
Tassa vaḍḍhanti āsavā, bhavamūlopagāmino’’ti. – gāthaṃ abhāsi;
д̇ад̇т̇а руубанд̇и раж̇ж̇анийяам̣ руубааяад̇анам̣, д̇ам̣ банзд̇т̇а ид̇т̇ируубам̣ ад̇хиббзд̇ам̣. д̣̇исваад̇и жагкунаа д̣̇исваа, жагкуд̣̇ваараанусаарзна нимид̇д̇аануб̣яан̃ж̇анасаллагкан̣авасзна д̇ам̣ г̇ахзд̇ваа, д̇асса д̇ат̇ааг̇ахан̣ахзд̇ууд̇и ад̇т̇о. сад̇и мудтаад̇и асубхасабхаавз гааяз ‘‘асубха’’нд̇взва бавад̇д̇анасад̇и надтаа. яат̇аа бана руубам̣ д̣̇исваа сад̇и надтаа, д̇ам̣ д̣̇ассзнд̇о ааха ‘‘бияам̣ нимид̇д̇ам̣ манасигарод̇о’’д̇и. яат̇ааубадтид̇ам̣ аарамман̣ам̣ ‘‘субхам̣ сука’’нд̇иаад̣̇инаа бияанимид̇д̇ам̣ гад̇ваа аяонисоманасигаарзна манасигарод̇о сад̇и мудтаад̇и яож̇анаа. д̇ат̇аа бхууд̇ова саарад̇д̇ажид̇д̇о взд̣̇зд̇ийд̇и судту рад̇д̇ажид̇д̇о худ̇ваа д̇ам̣ руубаарамман̣ам̣ анубхавад̇и абхинанд̣̇ад̇и, абхинанд̣̇анд̇о бана д̇ан̃жа аж̇жхоса д̇идтад̇и аж̇жхосааяа д̇ам̣ аарамман̣ам̣ г̇илид̇ваа баринидтабзд̇ваа вад̇д̇ад̇и жзва, звам̣бхууд̇асса жа д̇асса вад̣дханд̇и аасаваа бхавамуулобаг̇ааминод̇и бхавасса сам̣саарасса муулабхаавам̣ гааран̣абхаавам̣ убаг̇аманасабхааваа гаамаасаваад̣̇аяо жад̇д̇аароби аасаваа д̇асса буг̇г̇аласса убаруубари вад̣дханд̇иязва, на хааяанд̇и. маяхам̣ бана бадисан̇каанз тад̇ваа вибассанам̣ вад̣дхзд̇ваа сажжаани бадивиж̇жханд̇асса маг̇г̇абадибаадияаа д̇з жад̇д̇аароби аасаваа анавасзсад̇о бахийнаа баригкийн̣аад̇и ад̇хиббааяо.
Tattha rūpanti rajjanīyaṃ rūpāyatanaṃ, taṃ panettha itthirūpaṃ adhippetaṃ. Disvāti cakkhunā disvā, cakkhudvārānusārena nimittānubyañjanasallakkhaṇavasena taṃ gahetvā, tassa tathāgahaṇahetūti attho. Sati muṭṭhāti asubhasabhāve kāye ‘‘asubha’’ntveva pavattanasati naṭṭhā. Yathā pana rūpaṃ disvā sati naṭṭhā, taṃ dassento āha ‘‘piyaṃ nimittaṃ manasikaroto’’ti. Yathāupaṭṭhitaṃ ārammaṇaṃ ‘‘subhaṃ sukha’’ntiādinā piyanimittaṃ katvā ayonisomanasikārena manasikaroto sati muṭṭhāti yojanā. Tathā bhūtova sārattacitto vedetīti suṭṭhu rattacitto hutvā taṃ rūpārammaṇaṃ anubhavati abhinandati, abhinandanto pana tañca ajjhosa tiṭṭhati ajjhosāya taṃ ārammaṇaṃ gilitvā pariniṭṭhapetvā vattati ceva, evaṃbhūtassa ca tassa vaḍḍhanti āsavā bhavamūlopagāminoti bhavassa saṃsārassa mūlabhāvaṃ kāraṇabhāvaṃ upagamanasabhāvā kāmāsavādayo cattāropi āsavā tassa puggalassa uparūpari vaḍḍhantiyeva, na hāyanti. Mayhaṃ pana paṭisaṅkhāne ṭhatvā vipassanaṃ vaḍḍhetvā saccāni paṭivijjhantassa maggapaṭipāṭiyā te cattāropi āsavā anavasesato pahīnā parikkhīṇāti adhippāyo.
абхаяад̇т̇зраг̇аат̇ааван̣н̣анаа нидтид̇аа.
Abhayattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 8. абхаяад̇т̇зраг̇аат̇аа • 8. Abhayattheragāthā
