| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
8. அபே⁴ஜ்ஜபரிஸபஞ்ஹோ
8. Abhejjaparisapañho
8. ‘‘ப⁴ந்தே நாக³ஸேன, தும்ஹே ப⁴ணத² ‘ததா²க³தோ அபே⁴ஜ்ஜபரிஸோ’தி, புன ச ப⁴ணத² ‘தே³வத³த்தேன ஏகப்பஹாரங் பஞ்ச பி⁴க்கு²ஸதானி பி⁴ன்னானீ’தி. யதி³, ப⁴ந்தே நாக³ஸேன, ததா²க³தோ அபே⁴ஜ்ஜபரிஸோ, தேன ஹி தே³வத³த்தேன ஏகப்பஹாரங் பஞ்ச பி⁴க்கு²ஸதானி பி⁴ன்னானீதி யங் வசனங், தங் மிச்சா². யதி³ தே³வத³த்தேன ஏகப்பஹாரங் பஞ்ச பி⁴க்கு²ஸதானி பி⁴ன்னானி, தேன ஹி ‘ததா²க³தோ அபே⁴ஜ்ஜபரிஸோ’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, க³ம்பீ⁴ரோ து³ன்னிவேடி²யோ, க³ண்டி²தோபி க³ண்டி²தரோ, எத்தா²யங் ஜனோ ஆவடோ நிவுதோ ஓவுதோ பிஹிதோ பரியோனத்³தோ⁴, எத்த² தவ ஞாணப³லங் த³ஸ்ஸேஹி பரவாதே³ஸூ’’தி.
8. ‘‘Bhante nāgasena, tumhe bhaṇatha ‘tathāgato abhejjapariso’ti, puna ca bhaṇatha ‘devadattena ekappahāraṃ pañca bhikkhusatāni bhinnānī’ti. Yadi, bhante nāgasena, tathāgato abhejjapariso, tena hi devadattena ekappahāraṃ pañca bhikkhusatāni bhinnānīti yaṃ vacanaṃ, taṃ micchā. Yadi devadattena ekappahāraṃ pañca bhikkhusatāni bhinnāni, tena hi ‘tathāgato abhejjapariso’ti tampi vacanaṃ micchā. Ayampi ubhato koṭiko pañho tavānuppatto, gambhīro dunniveṭhiyo, gaṇṭhitopi gaṇṭhitaro, etthāyaṃ jano āvaṭo nivuto ovuto pihito pariyonaddho, ettha tava ñāṇabalaṃ dassehi paravādesū’’ti.
‘‘அபே⁴ஜ்ஜபரிஸோ, மஹாராஜ, ததா²க³தோ, தே³வத³த்தேன ச ஏகப்பஹாரங் பஞ்ச பி⁴க்கு²ஸதானி பி⁴ன்னானி, தஞ்ச பன பே⁴த³கஸ்ஸ ப³லேன, பே⁴த³கே விஜ்ஜமானே நத்தி², மஹாராஜ, அபே⁴ஜ்ஜங் நாம. பே⁴த³கே ஸதி மாதாபி புத்தேன பி⁴ஜ்ஜதி, புத்தோபி மாதரா பி⁴ஜ்ஜதி, பிதாபி புத்தேன பி⁴ஜ்ஜதி, புத்தோபி பிதரா பி⁴ஜ்ஜதி, பா⁴தாபி ப⁴கி³னியா பி⁴ஜ்ஜதி, ப⁴கி³னீபி பா⁴தரா பி⁴ஜ்ஜதி, ஸஹாயோபி ஸஹாயேன பி⁴ஜ்ஜதி, நாவாபி நானாதா³ருஸங்க⁴டிதா ஊமிவேக³ஸம்பஹாரேன பி⁴ஜ்ஜதி, ருக்கோ²பி மது⁴கப்பஸம்பன்னப²லோ அனிலப³லவேகா³பி⁴ஹதோ பி⁴ஜ்ஜதி, ஸுவண்ணம்பி ஜாதிமந்தங் 1 லோஹேன பி⁴ஜ்ஜதி. அபி ச, மஹாராஜ, நேஸோ அதி⁴ப்பாயோ விஞ்ஞூனங், நேஸா பு³த்³தா⁴னங் அதி⁴முத்தி, நேஸோ பண்டி³தானங் ச²ந்தோ³ ‘ததா²க³தோ பே⁴ஜ்ஜபரிஸோ’தி. அபி செத்த² காரணங் அத்தி², யேன காரணேன ததா²க³தோ வுச்சதி ‘அபே⁴ஜ்ஜபரிஸோ’தி. கதமங் எத்த² காரணங்? ததா²க³தஸ்ஸ, மஹாராஜ, கதேன அதா³னேன வா அப்பியவசனேன வா அனத்த²சரியாய வா அஸமானத்ததாய வா யதோ குதோசி சரியங் சரந்தஸ்ஸபி பரிஸா பி⁴ன்னாதி ந ஸுதபுப்³ப³ங், தேன காரணேன ததா²க³தோ வுச்சதி ‘அபே⁴ஜ்ஜபரிஸோ’தி. தயாபேதங், மஹாராஜ, ஞாதப்³ப³ங் ‘அத்தி² கிஞ்சி நவங்கே³ பு³த்³த⁴வசனே ஸுத்தாக³தங், இமினா நாம காரணேன போ³தி⁴ஸத்தஸ்ஸ கதேன ததா²க³தஸ்ஸ பரிஸா பி⁴ன்னா’தி? ‘‘நத்தி² ப⁴ந்தே, நோ சேதங் லோகே தி³ஸ்ஸதி நோபி ஸுய்யதி. ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Abhejjapariso, mahārāja, tathāgato, devadattena ca ekappahāraṃ pañca bhikkhusatāni bhinnāni, tañca pana bhedakassa balena, bhedake vijjamāne natthi, mahārāja, abhejjaṃ nāma. Bhedake sati mātāpi puttena bhijjati, puttopi mātarā bhijjati, pitāpi puttena bhijjati, puttopi pitarā bhijjati, bhātāpi bhaginiyā bhijjati, bhaginīpi bhātarā bhijjati, sahāyopi sahāyena bhijjati, nāvāpi nānādārusaṅghaṭitā ūmivegasampahārena bhijjati, rukkhopi madhukappasampannaphalo anilabalavegābhihato bhijjati, suvaṇṇampi jātimantaṃ 2 lohena bhijjati. Api ca, mahārāja, neso adhippāyo viññūnaṃ, nesā buddhānaṃ adhimutti, neso paṇḍitānaṃ chando ‘tathāgato bhejjapariso’ti. Api cettha kāraṇaṃ atthi, yena kāraṇena tathāgato vuccati ‘abhejjapariso’ti. Katamaṃ ettha kāraṇaṃ? Tathāgatassa, mahārāja, katena adānena vā appiyavacanena vā anatthacariyāya vā asamānattatāya vā yato kutoci cariyaṃ carantassapi parisā bhinnāti na sutapubbaṃ, tena kāraṇena tathāgato vuccati ‘abhejjapariso’ti. Tayāpetaṃ, mahārāja, ñātabbaṃ ‘atthi kiñci navaṅge buddhavacane suttāgataṃ, iminā nāma kāraṇena bodhisattassa katena tathāgatassa parisā bhinnā’ti? ‘‘Natthi bhante, no cetaṃ loke dissati nopi suyyati. Sādhu, bhante nāgasena, evametaṃ tathā sampaṭicchāmī’’ti.
அபே⁴ஜ்ஜபரிஸபஞ்ஹோ அட்ட²மோ.
Abhejjaparisapañho aṭṭhamo.
அபே⁴ஜ்ஜவக்³கோ³ து³தியோ.
Abhejjavaggo dutiyo.
இமஸ்மிங் வக்³கே³ அட்ட² பஞ்ஹா.
Imasmiṃ vagge aṭṭha pañhā.
Footnotes:
