| Library / Tipiṭaka / д̇ибидага • Tipiṭaka / милинд̣̇абан̃хабаал̣и • Milindapañhapāḷi |
8. абхзж̇ж̇абарисабан̃хо
8. Abhejjaparisapañho
8. ‘‘бханд̇з нааг̇асзна, д̇умхз бхан̣ат̇а ‘д̇ат̇ааг̇ад̇о абхзж̇ж̇абарисо’д̇и, буна жа бхан̣ат̇а ‘д̣̇звад̣̇ад̇д̇зна згаббахаарам̣ бан̃жа бхигкусад̇аани бхиннааний’д̇и. яад̣̇и, бханд̇з нааг̇асзна, д̇ат̇ааг̇ад̇о абхзж̇ж̇абарисо, д̇зна хи д̣̇звад̣̇ад̇д̇зна згаббахаарам̣ бан̃жа бхигкусад̇аани бхиннаанийд̇и яам̣ важанам̣, д̇ам̣ мижчаа. яад̣̇и д̣̇звад̣̇ад̇д̇зна згаббахаарам̣ бан̃жа бхигкусад̇аани бхиннаани, д̇зна хи ‘д̇ат̇ааг̇ад̇о абхзж̇ж̇абарисо’д̇и д̇амби важанам̣ мижчаа. аяамби убхад̇о годиго бан̃хо д̇аваануббад̇д̇о, г̇амбхийро д̣̇уннивзтияо, г̇ан̣тид̇оби г̇ан̣тид̇аро, зд̇т̇ааяам̣ ж̇ано аавадо нивуд̇о овуд̇о бихид̇о барияонад̣̇д̇хо, зд̇т̇а д̇ава н̃аан̣аб̣алам̣ д̣̇ассзхи бараваад̣̇зсуу’’д̇и.
8. ‘‘Bhante nāgasena, tumhe bhaṇatha ‘tathāgato abhejjapariso’ti, puna ca bhaṇatha ‘devadattena ekappahāraṃ pañca bhikkhusatāni bhinnānī’ti. Yadi, bhante nāgasena, tathāgato abhejjapariso, tena hi devadattena ekappahāraṃ pañca bhikkhusatāni bhinnānīti yaṃ vacanaṃ, taṃ micchā. Yadi devadattena ekappahāraṃ pañca bhikkhusatāni bhinnāni, tena hi ‘tathāgato abhejjapariso’ti tampi vacanaṃ micchā. Ayampi ubhato koṭiko pañho tavānuppatto, gambhīro dunniveṭhiyo, gaṇṭhitopi gaṇṭhitaro, etthāyaṃ jano āvaṭo nivuto ovuto pihito pariyonaddho, ettha tava ñāṇabalaṃ dassehi paravādesū’’ti.
‘‘абхзж̇ж̇абарисо, махаарааж̇а, д̇ат̇ааг̇ад̇о, д̣̇звад̣̇ад̇д̇зна жа згаббахаарам̣ бан̃жа бхигкусад̇аани бхиннаани, д̇ан̃жа бана бхзд̣̇агасса б̣алзна, бхзд̣̇агз виж̇ж̇амаанз над̇т̇и, махаарааж̇а, абхзж̇ж̇ам̣ наама. бхзд̣̇агз сад̇и маад̇ааби буд̇д̇зна бхиж̇ж̇ад̇и, буд̇д̇оби маад̇араа бхиж̇ж̇ад̇и, бид̇ааби буд̇д̇зна бхиж̇ж̇ад̇и, буд̇д̇оби бид̇араа бхиж̇ж̇ад̇и, бхаад̇ааби бхаг̇инияаа бхиж̇ж̇ад̇и, бхаг̇инийби бхаад̇араа бхиж̇ж̇ад̇и, сахааяоби сахааязна бхиж̇ж̇ад̇и, наавааби наанаад̣̇аарусан̇гхадид̇аа уумивзг̇асамбахаарзна бхиж̇ж̇ад̇и, ругкоби мад̇хугаббасамбаннапало анилаб̣алавзг̇аабхихад̇о бхиж̇ж̇ад̇и, суван̣н̣амби ж̇аад̇иманд̇ам̣ 1 лохзна бхиж̇ж̇ад̇и. аби жа, махаарааж̇а, нзсо ад̇хиббааяо вин̃н̃уунам̣, нзсаа б̣уд̣̇д̇хаанам̣ ад̇химуд̇д̇и, нзсо бан̣д̣ид̇аанам̣ чанд̣̇о ‘д̇ат̇ааг̇ад̇о бхзж̇ж̇абарисо’д̇и. аби жзд̇т̇а гааран̣ам̣ ад̇т̇и, язна гааран̣зна д̇ат̇ааг̇ад̇о вужжад̇и ‘абхзж̇ж̇абарисо’д̇и. гад̇амам̣ зд̇т̇а гааран̣ам̣? д̇ат̇ааг̇ад̇асса, махаарааж̇а, гад̇зна ад̣̇аанзна ваа аббияаважанзна ваа анад̇т̇ажарияааяа ваа асамаанад̇д̇ад̇ааяа ваа яад̇о гуд̇ожи жарияам̣ жаранд̇ассаби барисаа бхиннаад̇и на суд̇абуб̣б̣ам̣, д̇зна гааран̣зна д̇ат̇ааг̇ад̇о вужжад̇и ‘абхзж̇ж̇абарисо’д̇и. д̇аяаабзд̇ам̣, махаарааж̇а, н̃аад̇аб̣б̣ам̣ ‘ад̇т̇и гин̃жи наван̇г̇з б̣уд̣̇д̇хаважанз суд̇д̇ааг̇ад̇ам̣, иминаа наама гааран̣зна б̣од̇хисад̇д̇асса гад̇зна д̇ат̇ааг̇ад̇асса барисаа бхиннаа’д̇и? ‘‘над̇т̇и бханд̇з, но жзд̇ам̣ логз д̣̇иссад̇и ноби суяяад̇и. саад̇ху, бханд̇з нааг̇асзна, звамзд̇ам̣ д̇ат̇аа самбадижчаамий’’д̇и.
‘‘Abhejjapariso, mahārāja, tathāgato, devadattena ca ekappahāraṃ pañca bhikkhusatāni bhinnāni, tañca pana bhedakassa balena, bhedake vijjamāne natthi, mahārāja, abhejjaṃ nāma. Bhedake sati mātāpi puttena bhijjati, puttopi mātarā bhijjati, pitāpi puttena bhijjati, puttopi pitarā bhijjati, bhātāpi bhaginiyā bhijjati, bhaginīpi bhātarā bhijjati, sahāyopi sahāyena bhijjati, nāvāpi nānādārusaṅghaṭitā ūmivegasampahārena bhijjati, rukkhopi madhukappasampannaphalo anilabalavegābhihato bhijjati, suvaṇṇampi jātimantaṃ 2 lohena bhijjati. Api ca, mahārāja, neso adhippāyo viññūnaṃ, nesā buddhānaṃ adhimutti, neso paṇḍitānaṃ chando ‘tathāgato bhejjapariso’ti. Api cettha kāraṇaṃ atthi, yena kāraṇena tathāgato vuccati ‘abhejjapariso’ti. Katamaṃ ettha kāraṇaṃ? Tathāgatassa, mahārāja, katena adānena vā appiyavacanena vā anatthacariyāya vā asamānattatāya vā yato kutoci cariyaṃ carantassapi parisā bhinnāti na sutapubbaṃ, tena kāraṇena tathāgato vuccati ‘abhejjapariso’ti. Tayāpetaṃ, mahārāja, ñātabbaṃ ‘atthi kiñci navaṅge buddhavacane suttāgataṃ, iminā nāma kāraṇena bodhisattassa katena tathāgatassa parisā bhinnā’ti? ‘‘Natthi bhante, no cetaṃ loke dissati nopi suyyati. Sādhu, bhante nāgasena, evametaṃ tathā sampaṭicchāmī’’ti.
абхзж̇ж̇абарисабан̃хо адтамо.
Abhejjaparisapañho aṭṭhamo.
абхзж̇ж̇аваг̇г̇о д̣̇уд̇ияо.
Abhejjavaggo dutiyo.
имасмим̣ ваг̇г̇з адта бан̃хаа.
Imasmiṃ vagge aṭṭha pañhā.
Footnotes:
