| Library / Tipiṭaka / తిపిటక • Tipiṭaka / మిలిన్దపఞ్హపాళి • Milindapañhapāḷi |
౮. అభేజ్జపరిసపఞ్హో
8. Abhejjaparisapañho
౮. ‘‘భన్తే నాగసేన, తుమ్హే భణథ ‘తథాగతో అభేజ్జపరిసో’తి, పున చ భణథ ‘దేవదత్తేన ఏకప్పహారం పఞ్చ భిక్ఖుసతాని భిన్నానీ’తి. యది, భన్తే నాగసేన, తథాగతో అభేజ్జపరిసో, తేన హి దేవదత్తేన ఏకప్పహారం పఞ్చ భిక్ఖుసతాని భిన్నానీతి యం వచనం, తం మిచ్ఛా. యది దేవదత్తేన ఏకప్పహారం పఞ్చ భిక్ఖుసతాని భిన్నాని, తేన హి ‘తథాగతో అభేజ్జపరిసో’తి తమ్పి వచనం మిచ్ఛా. అయమ్పి ఉభతో కోటికో పఞ్హో తవానుప్పత్తో, గమ్భీరో దున్నివేఠియో, గణ్ఠితోపి గణ్ఠితరో, ఏత్థాయం జనో ఆవటో నివుతో ఓవుతో పిహితో పరియోనద్ధో, ఏత్థ తవ ఞాణబలం దస్సేహి పరవాదేసూ’’తి.
8. ‘‘Bhante nāgasena, tumhe bhaṇatha ‘tathāgato abhejjapariso’ti, puna ca bhaṇatha ‘devadattena ekappahāraṃ pañca bhikkhusatāni bhinnānī’ti. Yadi, bhante nāgasena, tathāgato abhejjapariso, tena hi devadattena ekappahāraṃ pañca bhikkhusatāni bhinnānīti yaṃ vacanaṃ, taṃ micchā. Yadi devadattena ekappahāraṃ pañca bhikkhusatāni bhinnāni, tena hi ‘tathāgato abhejjapariso’ti tampi vacanaṃ micchā. Ayampi ubhato koṭiko pañho tavānuppatto, gambhīro dunniveṭhiyo, gaṇṭhitopi gaṇṭhitaro, etthāyaṃ jano āvaṭo nivuto ovuto pihito pariyonaddho, ettha tava ñāṇabalaṃ dassehi paravādesū’’ti.
‘‘అభేజ్జపరిసో, మహారాజ, తథాగతో, దేవదత్తేన చ ఏకప్పహారం పఞ్చ భిక్ఖుసతాని భిన్నాని, తఞ్చ పన భేదకస్స బలేన, భేదకే విజ్జమానే నత్థి, మహారాజ, అభేజ్జం నామ. భేదకే సతి మాతాపి పుత్తేన భిజ్జతి, పుత్తోపి మాతరా భిజ్జతి, పితాపి పుత్తేన భిజ్జతి, పుత్తోపి పితరా భిజ్జతి, భాతాపి భగినియా భిజ్జతి, భగినీపి భాతరా భిజ్జతి, సహాయోపి సహాయేన భిజ్జతి, నావాపి నానాదారుసఙ్ఘటితా ఊమివేగసమ్పహారేన భిజ్జతి, రుక్ఖోపి మధుకప్పసమ్పన్నఫలో అనిలబలవేగాభిహతో భిజ్జతి, సువణ్ణమ్పి జాతిమన్తం 1 లోహేన భిజ్జతి. అపి చ, మహారాజ, నేసో అధిప్పాయో విఞ్ఞూనం, నేసా బుద్ధానం అధిముత్తి, నేసో పణ్డితానం ఛన్దో ‘తథాగతో భేజ్జపరిసో’తి. అపి చేత్థ కారణం అత్థి, యేన కారణేన తథాగతో వుచ్చతి ‘అభేజ్జపరిసో’తి. కతమం ఏత్థ కారణం? తథాగతస్స, మహారాజ, కతేన అదానేన వా అప్పియవచనేన వా అనత్థచరియాయ వా అసమానత్తతాయ వా యతో కుతోచి చరియం చరన్తస్సపి పరిసా భిన్నాతి న సుతపుబ్బం, తేన కారణేన తథాగతో వుచ్చతి ‘అభేజ్జపరిసో’తి. తయాపేతం, మహారాజ, ఞాతబ్బం ‘అత్థి కిఞ్చి నవఙ్గే బుద్ధవచనే సుత్తాగతం, ఇమినా నామ కారణేన బోధిసత్తస్స కతేన తథాగతస్స పరిసా భిన్నా’తి? ‘‘నత్థి భన్తే, నో చేతం లోకే దిస్సతి నోపి సుయ్యతి. సాధు, భన్తే నాగసేన, ఏవమేతం తథా సమ్పటిచ్ఛామీ’’తి.
‘‘Abhejjapariso, mahārāja, tathāgato, devadattena ca ekappahāraṃ pañca bhikkhusatāni bhinnāni, tañca pana bhedakassa balena, bhedake vijjamāne natthi, mahārāja, abhejjaṃ nāma. Bhedake sati mātāpi puttena bhijjati, puttopi mātarā bhijjati, pitāpi puttena bhijjati, puttopi pitarā bhijjati, bhātāpi bhaginiyā bhijjati, bhaginīpi bhātarā bhijjati, sahāyopi sahāyena bhijjati, nāvāpi nānādārusaṅghaṭitā ūmivegasampahārena bhijjati, rukkhopi madhukappasampannaphalo anilabalavegābhihato bhijjati, suvaṇṇampi jātimantaṃ 2 lohena bhijjati. Api ca, mahārāja, neso adhippāyo viññūnaṃ, nesā buddhānaṃ adhimutti, neso paṇḍitānaṃ chando ‘tathāgato bhejjapariso’ti. Api cettha kāraṇaṃ atthi, yena kāraṇena tathāgato vuccati ‘abhejjapariso’ti. Katamaṃ ettha kāraṇaṃ? Tathāgatassa, mahārāja, katena adānena vā appiyavacanena vā anatthacariyāya vā asamānattatāya vā yato kutoci cariyaṃ carantassapi parisā bhinnāti na sutapubbaṃ, tena kāraṇena tathāgato vuccati ‘abhejjapariso’ti. Tayāpetaṃ, mahārāja, ñātabbaṃ ‘atthi kiñci navaṅge buddhavacane suttāgataṃ, iminā nāma kāraṇena bodhisattassa katena tathāgatassa parisā bhinnā’ti? ‘‘Natthi bhante, no cetaṃ loke dissati nopi suyyati. Sādhu, bhante nāgasena, evametaṃ tathā sampaṭicchāmī’’ti.
అభేజ్జపరిసపఞ్హో అట్ఠమో.
Abhejjaparisapañho aṭṭhamo.
అభేజ్జవగ్గో దుతియో.
Abhejjavaggo dutiyo.
ఇమస్మిం వగ్గే అట్ఠ పఞ్హా.
Imasmiṃ vagge aṭṭha pañhā.
Footnotes:
