| Library / Tipiṭaka / ਤਿਪਿਟਕ • Tipiṭaka / ਧਮ੍ਮਸਙ੍ਗਣਿ-ਅਟ੍ਠਕਥਾ • Dhammasaṅgaṇi-aṭṭhakathā |
ਅਭਿਭਾਯਤਨਕਥਾ
Abhibhāyatanakathā
੨੦੪. ਏવਂ ਅਟ੍ਠਸੁ ਕਸਿਣੇਸੁ ਰੂਪਾવਚਰਕੁਸਲਂ ਨਿਦ੍ਦਿਸਿਤ੍વਾ, ਇਦਾਨਿ ਯਸ੍ਮਾ ਸਮਾਨੇਪਿ ਆਰਮ੍ਮਣੇ ਭਾવਨਾਯ ਅਸਮਾਨਂ ਇਮੇਸੁ ਅਟ੍ਠਸੁ ਕਸਿਣੇਸੁ ਅਞ੍ਞਮ੍ਪਿ ਅਭਿਭਾਯਤਨਸਙ੍ਖਾਤਂ ਰੂਪਾવਚਰਕੁਸਲਂ ਪવਤ੍ਤਤਿ, ਤਸ੍ਮਾ ਤਂ ਦਸ੍ਸੇਤੁਂ ਪੁਨ ਕਤਮੇ ਧਮ੍ਮਾ ਕੁਸਲਾਤਿਆਦਿ ਆਰਦ੍ਧਂ। ਤਤ੍ਥ ਅਜ੍ਝਤ੍ਤਂ ਅਰੂਪਸਞ੍ਞੀਤਿ ਅਲਾਭਿਤਾਯ વਾ ਅਨਤ੍ਥਿਕਤਾਯ વਾ ਅਜ੍ਝਤ੍ਤਰੂਪੇ ਪਰਿਕਮ੍ਮਸਞ੍ਞਾવਿਰਹਿਤੋ। ਬਹਿਦ੍ਧਾ ਰੂਪਾਨਿ ਪਸ੍ਸਤੀਤਿ ਬਹਿਦ੍ਧਾ ਅਟ੍ਠਸੁ ਕਸਿਣੇਸੁ ਕਤਪਰਿਕਮ੍ਮਤਾਯ ਪਰਿਕਮ੍ਮવਸੇਨ ਚੇવ ਅਪ੍ਪਨਾવਸੇਨ ਚ ਤਾਨਿ ਬਹਿਦ੍ਧਾ ਅਟ੍ਠਸੁ ਕਸਿਣੇਸੁ ਰੂਪਾਨਿ ਪਸ੍ਸਤਿ। ਪਰਿਤ੍ਤਾਨੀਤਿ ਅવਡ੍ਢਿਤਾਨਿ। ਤਾਨਿ ਅਭਿਭੁਯ੍ਯਾਤਿ ਯਥਾ ਨਾਮ ਸਮ੍ਪਨ੍ਨਗਹਣਿਕੋ ਕਟਚ੍ਛੁਮਤ੍ਤਂ ਭਤ੍ਤਂ ਲਭਿਤ੍વਾ ‘ਕਿਂ ਏਤ੍ਥ ਭੁਞ੍ਜਿਤਬ੍ਬਂ ਅਤ੍ਥੀ’ਤਿ ਸਙ੍ਕਡ੍ਢਿਤ੍વਾ ਏਕਕਬਲ਼ਮੇવ ਕਰੋਤਿ, ਏવਮੇવ ਞਾਣੁਤ੍ਤਰਿਕੋ ਪੁਗ੍ਗਲੋ વਿਸਦਞਾਣੋ ‘ਕਿਮੇਤ੍ਥ ਪਰਿਤ੍ਤਕੇ ਆਰਮ੍ਮਣੇ ਸਮਾਪਜ੍ਜਿਤਬ੍ਬਂ ਅਤ੍ਥਿ, ਨਾਯਂ ਮਮ ਭਾਰੋ’ਤਿ ਤਾਨਿ ਰੂਪਾਨਿ ਅਭਿਭવਿਤ੍વਾ ਸਮਾਪਜ੍ਜਤਿ। ਸਹ ਨਿਮਿਤ੍ਤੁਪ੍ਪਾਦੇਨੇવੇਤ੍ਥ ਅਪ੍ਪਨਂ ਨਿਬ੍ਬਤ੍ਤੇਤੀਤਿ ਅਤ੍ਥੋ। ਜਾਨਾਮਿ ਪਸ੍ਸਾਮੀਤਿ ਇਮਿਨਾ ਪਨਸ੍ਸ ਪੁਬ੍ਬਭਾਗੋ ਕਥਿਤੋ। ਆਗਮਟ੍ਠਕਥਾਸੁ ਪਨ વੁਤ੍ਤਂ – ਇਮਿਨਾਸ੍ਸ ਪਨ ਆਭੋਗੋ ਕਥਿਤੋ। ਸੋ ਚ ਖੋ ਸਮਾਪਤ੍ਤਿਤੋ વੁਟ੍ਠਿਤਸ੍ਸ, ਨ ਅਨ੍ਤੋਸਮਾਪਤ੍ਤਿਯਨ੍ਤਿ (ਅ॰ ਨਿ॰ ਅਟ੍ਠ॰ ੩.੮.੬੫)।
204. Evaṃ aṭṭhasu kasiṇesu rūpāvacarakusalaṃ niddisitvā, idāni yasmā samānepi ārammaṇe bhāvanāya asamānaṃ imesu aṭṭhasu kasiṇesu aññampi abhibhāyatanasaṅkhātaṃ rūpāvacarakusalaṃ pavattati, tasmā taṃ dassetuṃ puna katame dhammā kusalātiādi āraddhaṃ. Tattha ajjhattaṃ arūpasaññīti alābhitāya vā anatthikatāya vā ajjhattarūpe parikammasaññāvirahito. Bahiddhā rūpāni passatīti bahiddhā aṭṭhasu kasiṇesu kataparikammatāya parikammavasena ceva appanāvasena ca tāni bahiddhā aṭṭhasu kasiṇesu rūpāni passati. Parittānīti avaḍḍhitāni. Tāni abhibhuyyāti yathā nāma sampannagahaṇiko kaṭacchumattaṃ bhattaṃ labhitvā ‘kiṃ ettha bhuñjitabbaṃ atthī’ti saṅkaḍḍhitvā ekakabaḷameva karoti, evameva ñāṇuttariko puggalo visadañāṇo ‘kimettha parittake ārammaṇe samāpajjitabbaṃ atthi, nāyaṃ mama bhāro’ti tāni rūpāni abhibhavitvā samāpajjati. Saha nimittuppādenevettha appanaṃ nibbattetīti attho. Jānāmi passāmīti iminā panassa pubbabhāgo kathito. Āgamaṭṭhakathāsu pana vuttaṃ – imināssa pana ābhogo kathito. So ca kho samāpattito vuṭṭhitassa, na antosamāpattiyanti (a. ni. aṭṭha. 3.8.65).
ਅਪ੍ਪਮਾਣਾਨੀਤਿ વਡ੍ਢਿਤਪ੍ਪਮਾਣਾਨਿ। ਅਭਿਭੁਯ੍ਯਾਤਿ ਏਤ੍ਥ ਪਨ ਯਥਾ ਮਹਗ੍ਘਸੋ ਪੁਰਿਸੋ ਏਕਂ ਭਤ੍ਤવਡ੍ਢਿਤਕਂ ਲਭਿਤ੍વਾ ‘ਅਞ੍ਞਾਪਿ ਹੋਤੁ ‘ਕਿਮੇਸਾ ਮਯ੍ਹਂ ਕਰਿਸ੍ਸਤੀ’ਤਿ ਤਂ ਨ ਮਹਨ੍ਤਤੋ ਪਸ੍ਸਤਿ, ਏવਮੇવ ਞਾਣੁਤ੍ਤਰੋ ਪੁਗ੍ਗਲੋ વਿਸਦਞ੍ਞਾਣੋ ‘ਕਿਮੇਤ੍ਥ ਸਮਾਪਜ੍ਜਿਤਬ੍ਬਂ, ਨ ਇਦਂ ਅਪ੍ਪਮਾਣਂ, ਨ ਮਯ੍ਹਂ ਚਿਤ੍ਤੇਕਗ੍ਗਤਾਕਰਣੇ ਭਾਰੋ ਅਤ੍ਥੀ’ਤਿ ਤਾਨਿ ਅਭਿਭવਿਤ੍વਾ ਸਮਾਪਜ੍ਜਤਿ। ਸਹ ਨਿਮਿਤ੍ਤੁਪ੍ਪਾਦੇਨੇવੇਤ੍ਥ ਅਪ੍ਪਨਂ ਨਿਬ੍ਬਤ੍ਤੇਤੀਤਿ ਅਤ੍ਥੋ।
Appamāṇānīti vaḍḍhitappamāṇāni. Abhibhuyyāti ettha pana yathā mahagghaso puriso ekaṃ bhattavaḍḍhitakaṃ labhitvā ‘aññāpi hotu ‘kimesā mayhaṃ karissatī’ti taṃ na mahantato passati, evameva ñāṇuttaro puggalo visadaññāṇo ‘kimettha samāpajjitabbaṃ, na idaṃ appamāṇaṃ, na mayhaṃ cittekaggatākaraṇe bhāro atthī’ti tāni abhibhavitvā samāpajjati. Saha nimittuppādenevettha appanaṃ nibbattetīti attho.
ਪਰਿਤ੍ਤਂ ਪਰਿਤ੍ਤਾਰਮ੍ਮਣਂ ਅਪ੍ਪਮਾਣਂ ਪਰਿਤ੍ਤਾਰਮ੍ਮਣਨ੍ਤਿ ਇਧ ਪਰਿਤ੍ਤਾਨੀਤਿ ਆਗਤਤ੍ਤਾ ਅਪ੍ਪਮਾਣਾਰਮ੍ਮਣਤਾ ਨ ਗਹਿਤਾ, ਪਰਤੋ ਅਪ੍ਪਮਾਣਾਨੀਤਿ ਆਗਤਤ੍ਤਾ ਪਰਿਤ੍ਤਾਰਮ੍ਮਣਤਾ। ਅਟ੍ਠਕਥਾਯਂ ਪਨ વੁਤ੍ਤਂ – ‘ਇਮਸ੍ਮਿਂ ਠਾਨੇ ਚਤ੍ਤਾਰਿ ਚਤ੍ਤਾਰਿ ਆਰਮ੍ਮਣਾਨਿ ਅਗ੍ਗਹੇਤ੍વਾ ਦ੍વੇ ਦ੍વੇવ ਗਹਿਤਾਨਿ । ਕਿਂ ਕਾਰਣਾ? ਚਤੂਸੁ ਹਿ ਗਹਿਤੇਸੁ ਦੇਸਨਾ ਸੋਲ਼ਸਕ੍ਖਤ੍ਤੁਕਾ ਹੋਤਿ, ਸਤ੍ਥਾਰਾ ਚ ਹੇਟ੍ਠਾ ਸੋਲ਼ਸਕ੍ਖਤ੍ਤੁਕਾ ਦੇਸਨਾ ਕਿਲਞ੍ਜਮ੍ਹਿ ਤਿਲੇ ਪਤ੍ਥਰਨ੍ਤੇਨ વਿਯ વਿਤ੍ਥਾਰਤੋ ਕਥਿਤਾ। ਤਸ੍ਸ ਇਮਸ੍ਮਿਂ ਠਾਨੇ ਅਟ੍ਠਕ੍ਖਤ੍ਤੁਕਂ ਦੇਸਨਂ ਕਾਤੁਂ ਅਜ੍ਝਾਸਯੋ। ਤਸ੍ਮਾ ਦ੍વੇ ਦ੍વੇਯੇવ ਗਹਿਤਾਨੀਤਿ વੇਦਿਤਬ੍ਬਾਨੀਤਿ।
Parittaṃ parittārammaṇaṃ appamāṇaṃ parittārammaṇanti idha parittānīti āgatattā appamāṇārammaṇatā na gahitā, parato appamāṇānīti āgatattā parittārammaṇatā. Aṭṭhakathāyaṃ pana vuttaṃ – ‘imasmiṃ ṭhāne cattāri cattāri ārammaṇāni aggahetvā dve dveva gahitāni . Kiṃ kāraṇā? Catūsu hi gahitesu desanā soḷasakkhattukā hoti, satthārā ca heṭṭhā soḷasakkhattukā desanā kilañjamhi tile pattharantena viya vitthārato kathitā. Tassa imasmiṃ ṭhāne aṭṭhakkhattukaṃ desanaṃ kātuṃ ajjhāsayo. Tasmā dve dveyeva gahitānīti veditabbānīti.
ਸੁવਣ੍ਣਦੁਬ੍ਬਣ੍ਣਾਨੀਤਿ ਪਰਿਸੁਦ੍ਧਾਪਰਿਸੁਦ੍ਧવਣ੍ਣਾਨਿ। ਪਰਿਸੁਦ੍ਧਾਨਿ ਹਿ ਨੀਲਾਦੀਨਿ ਸੁવਣ੍ਣਾਨਿ, ਅਪਰਿਸੁਦ੍ਧਾਨਿ ਚ ਦੁਬ੍ਬਣ੍ਣਾਨੀਤਿ ਇਧ ਅਧਿਪ੍ਪੇਤਾਨਿ। ਆਗਮਟ੍ਠਕਥਾਸੁ ਪਨ ‘ਸੁવਣ੍ਣਾਨਿ વਾ ਹੋਨ੍ਤੁ ਦੁਬ੍ਬਣ੍ਣਾਨਿ વਾ, ਪਰਿਤ੍ਤਅਪ੍ਪਮਾਣવਸੇਨੇવ ਇਮਾਨਿ ਅਭਿਭਾਯਤਨਾਨਿ ਦੇਸਿਤਾਨੀ’ਤਿ (ਅ॰ ਨਿ॰ ਅਟ੍ਠ॰ ੩.੮.੬੫) વੁਤ੍ਤਂ। ਇਮੇਸੁ ਪਨ ਚਤੂਸੁ ਪਰਿਤ੍ਤਂ વਿਤਕ੍ਕਚਰਿਤવਸੇਨ ਆਗਤਂ, ਅਪ੍ਪਮਾਣਂ ਮੋਹਚਰਿਤવਸੇਨ, ਸੁવਣ੍ਣਂ ਦੋਸਚਰਿਤવਸੇਨ, ਦੁਬ੍ਬਣ੍ਣਂ ਰਾਗਚਰਿਤવਸੇਨ। ਏਤੇਸਞ੍ਹਿ ਏਤਾਨਿ ਸਪ੍ਪਾਯਾਨਿ। ਸਾ ਚ ਤੇਸਂ ਸਪ੍ਪਾਯਤਾ વਿਤ੍ਥਾਰਤੋ વਿਸੁਦ੍ਧਿਮਗ੍ਗੇ (વਿਸੁਦ੍ਧਿ॰ ੧.੪੩) ਚਰਿਯਨਿਦ੍ਦੇਸੇ વੁਤ੍ਤਾ।
Suvaṇṇadubbaṇṇānīti parisuddhāparisuddhavaṇṇāni. Parisuddhāni hi nīlādīni suvaṇṇāni, aparisuddhāni ca dubbaṇṇānīti idha adhippetāni. Āgamaṭṭhakathāsu pana ‘suvaṇṇāni vā hontu dubbaṇṇāni vā, parittaappamāṇavaseneva imāni abhibhāyatanāni desitānī’ti (a. ni. aṭṭha. 3.8.65) vuttaṃ. Imesu pana catūsu parittaṃ vitakkacaritavasena āgataṃ, appamāṇaṃ mohacaritavasena, suvaṇṇaṃ dosacaritavasena, dubbaṇṇaṃ rāgacaritavasena. Etesañhi etāni sappāyāni. Sā ca tesaṃ sappāyatā vitthārato visuddhimagge (visuddhi. 1.43) cariyaniddese vuttā.
ਕਸ੍ਮਾ ਪਨ, ਯਥਾ ਸੁਤ੍ਤਨ੍ਤੇ ‘‘ਅਜ੍ਝਤ੍ਤਂ ਰੂਪਸਞ੍ਞੀ ਏਕੋ ਬਹਿਦ੍ਧਾ ਰੂਪਾਨਿ ਪਸ੍ਸਤਿ ਪਰਿਤ੍ਤਾਨੀ’’ਤਿਆਦਿ (ਦੀ॰ ਨਿ॰ ੨.੧੭੩; ਮ॰ ਨਿ॰ ੨.੨੪੯; ਅ॰ ਨਿ॰ ੮.੬੫) વੁਤ੍ਤਂ, ਏવਂ ਅવਤ੍વਾ ਇਧ ਚਤੂਸੁਪਿ ਅਭਿਭਾਯਤਨੇਸੁ ਅਜ੍ਝਤ੍ਤਂ ਅਰੂਪਸਞ੍ਞਿਤਾવ વੁਤ੍ਤਾਤਿ? ਅਜ੍ਝਤ੍ਤਰੂਪਾਨਂ ਅਨਭਿਭવਨੀਯਤੋ। ਤਤ੍ਥ વਾ ਹਿ ਇਧ વਾ ਬਹਿਦ੍ਧਾਰੂਪਾਨੇવ ਅਭਿਭવਿਤਬ੍ਬਾਨਿ, ਤਸ੍ਮਾ ਤਾਨਿ ਨਿਯਮਤੋ વਤ੍ਤਬ੍ਬਾਨੀਤਿ ਤਤ੍ਰਪਿ ਇਧਪਿ વੁਤ੍ਤਾਨਿ। ਅਜ੍ਝਤ੍ਤਂ ਅਰੂਪਸਞ੍ਞੀਤਿ ਇਦਂ ਪਨ ਸਤ੍ਥੁ ਦੇਸਨਾવਿਲਾਸਮਤ੍ਤਮੇવ। ਅਯਂ ਤਾવ ਚਤੂਸੁ ਅਭਿਭਾਯਤਨੇਸੁ ਅਪੁਬ੍ਬਪਦવਣ੍ਣਨਾ। ਸੁਦ੍ਧਿਕਨਯਪਟਿਪਦਾਭੇਦੋ ਪਨੇਤ੍ਥ ਪਥવੀਕਸਿਣੇ વੁਤ੍ਤਨਯੇਨੇવ ਏਕੇਕਸ੍ਮਿਂ ਅਭਿਭਾਯਤਨੇ વੇਦਿਤਬ੍ਬੋ। ਕੇવਲਞ੍ਚੇਤ੍ਥ ਆਰਮ੍ਮਣਚਤੁਕ੍ਕਂ ਆਰਮ੍ਮਣਦੁਕਂ ਹੋਤਿ, ਸੋਲ਼ਸਕ੍ਖਤ੍ਤੁਕਞ੍ਚ ਅਟ੍ਠਕ੍ਖਤ੍ਤੁਕਂ। ਸੇਸਂ ਤਾਦਿਸਮੇવ। ਏવਮੇਤ੍ਥ ਏਕੇਕਸ੍ਮਿਂ ਅਭਿਭਾਯਤਨੇ ਏਕੋ ਸੁਦ੍ਧਿਕਨવਕੋ, ਚਤ੍ਤਾਰੋ ਪਟਿਪਦਾਨવਕਾ, ਦ੍વੇ ਆਰਮ੍ਮਣਨવਕਾ, ਆਰਮ੍ਮਣਪਟਿਪਦਾਮਿਸ੍ਸਕੇ ਅਟ੍ਠ ਨવਕਾਤਿ ਪਨ੍ਨਰਸ ਨવਕਾਤਿ ਚਤੂਸੁਪਿ ਅਭਿਭਾਯਤਨੇਸੁ ਸਮਸਟ੍ਠਿ ਨવਕਾ વੇਦਿਤਬ੍ਬਾ।
Kasmā pana, yathā suttante ‘‘ajjhattaṃ rūpasaññī eko bahiddhā rūpāni passati parittānī’’tiādi (dī. ni. 2.173; ma. ni. 2.249; a. ni. 8.65) vuttaṃ, evaṃ avatvā idha catūsupi abhibhāyatanesu ajjhattaṃ arūpasaññitāva vuttāti? Ajjhattarūpānaṃ anabhibhavanīyato. Tattha vā hi idha vā bahiddhārūpāneva abhibhavitabbāni, tasmā tāni niyamato vattabbānīti tatrapi idhapi vuttāni. Ajjhattaṃ arūpasaññīti idaṃ pana satthu desanāvilāsamattameva. Ayaṃ tāva catūsu abhibhāyatanesu apubbapadavaṇṇanā. Suddhikanayapaṭipadābhedo panettha pathavīkasiṇe vuttanayeneva ekekasmiṃ abhibhāyatane veditabbo. Kevalañcettha ārammaṇacatukkaṃ ārammaṇadukaṃ hoti, soḷasakkhattukañca aṭṭhakkhattukaṃ. Sesaṃ tādisameva. Evamettha ekekasmiṃ abhibhāyatane eko suddhikanavako, cattāro paṭipadānavakā, dve ārammaṇanavakā, ārammaṇapaṭipadāmissake aṭṭha navakāti pannarasa navakāti catūsupi abhibhāyatanesu samasaṭṭhi navakā veditabbā.
੨੪੬. ਪਞ੍ਚਮਅਭਿਭਾਯਤਨਾਦੀਸੁ ਨੀਲਾਨੀਤਿ ਸਬ੍ਬਸਙ੍ਗਾਹਿਕવਸੇਨ વੁਤ੍ਤਂ। ਨੀਲવਣ੍ਣਾਨੀਤਿ વਣ੍ਣવਸੇਨ, ਨੀਲਨਿਦਸ੍ਸਨਾਨੀਤਿ ਨਿਦਸ੍ਸਨવਸੇਨ, ਅਪਞ੍ਞਾਯਮਾਨવਿવਰਾਨਿ, ਅਸਮ੍ਭਿਨ੍ਨવਣ੍ਣਾਨਿ, ਏਕਨੀਲਾਨੇવ ਹੁਤ੍વਾ ਦਿਸ੍ਸਨ੍ਤੀਤਿ વੁਤ੍ਤਂ ਹੋਤਿ। ਨੀਲਨਿਭਾਸਾਨੀਤਿ ਇਦਂ ਪਨ ਓਭਾਸਨવਸੇਨ વੁਤ੍ਤਂ; ਨੀਲੋਭਾਸਾਨਿ ਨੀਲਪ੍ਪਭਾਯੁਤ੍ਤਾਨੀਤਿ ਅਤ੍ਥੋ। ਏਤੇਨ ਨੇਸਂ ਸੁવਿਸੁਦ੍ਧਤਂ ਦਸ੍ਸੇਤਿ। ਸੁવਿਸੁਦ੍ਧવਣ੍ਣવਸੇਨ ਹਿ ਇਮਾਨਿ ਚਤ੍ਤਾਰਿ ਅਭਿਭਾਯਤਨਾਨਿ વੁਤ੍ਤਾਨਿ। ਪੀਤਾਨੀਤਿਆਦੀਸੁਪਿ ਇਮਿਨਾવ ਨਯੇਨ ਅਤ੍ਥੋ વੇਦਿਤਬ੍ਬੋ। ਨੀਲਕਸਿਣਂ ਉਗ੍ਗਣ੍ਹਨ੍ਤੋ ਨੀਲਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ। ਪੁਪ੍ਫਸ੍ਮਿਂ વਾ વਤ੍ਥਸ੍ਮਿਂ વਾ વਣ੍ਣਧਾਤੁਯਾ વਾਤਿਆਦਿਕਂ ਪਨੇਤ੍ਥ ਕਸਿਣਕਰਣਞ੍ਚ ਪਰਿਕਮ੍ਮਞ੍ਚ ਅਪ੍ਪਨਾવਿਧਾਨਞ੍ਚ ਸਬ੍ਬਂ વਿਸੁਦ੍ਧਿਮਗ੍ਗੇ (વਿਸੁਦ੍ਧਿ॰ ੧.੯੩ ਆਦਯੋ) વਿਤ੍ਥਾਰਤੋ વੁਤ੍ਤਮੇવ। ਯਥਾ ਚ ਪਥવੀਕਸਿਣੇ ਏવਮੇਤ੍ਥ ਏਕੇਕਸ੍ਮਿਂ ਅਭਿਭਾਯਤਨੇ ਪਞ੍ਚવੀਸਤਿ ਪਞ੍ਚવੀਸਤਿ ਨવਕਾ વੇਦਿਤਬ੍ਬਾ।
246. Pañcamaabhibhāyatanādīsu nīlānīti sabbasaṅgāhikavasena vuttaṃ. Nīlavaṇṇānīti vaṇṇavasena, nīlanidassanānīti nidassanavasena, apaññāyamānavivarāni, asambhinnavaṇṇāni, ekanīlāneva hutvā dissantīti vuttaṃ hoti. Nīlanibhāsānīti idaṃ pana obhāsanavasena vuttaṃ; nīlobhāsāni nīlappabhāyuttānīti attho. Etena nesaṃ suvisuddhataṃ dasseti. Suvisuddhavaṇṇavasena hi imāni cattāri abhibhāyatanāni vuttāni. Pītānītiādīsupi imināva nayena attho veditabbo. Nīlakasiṇaṃ uggaṇhanto nīlasmiṃ nimittaṃ gaṇhāti. Pupphasmiṃ vā vatthasmiṃ vā vaṇṇadhātuyā vātiādikaṃ panettha kasiṇakaraṇañca parikammañca appanāvidhānañca sabbaṃ visuddhimagge (visuddhi. 1.93 ādayo) vitthārato vuttameva. Yathā ca pathavīkasiṇe evamettha ekekasmiṃ abhibhāyatane pañcavīsati pañcavīsati navakā veditabbā.
ਅਭਿਭਾਯਤਨਕਥਾ।
Abhibhāyatanakathā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਧਮ੍ਮਸਙ੍ਗਣੀਪਾਲ਼ਿ • Dhammasaṅgaṇīpāḷi / ਰੂਪਾવਚਰਕੁਸਲਂ • Rūpāvacarakusalaṃ
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਧਮ੍ਮਸਙ੍ਗਣੀ-ਮੂਲਟੀਕਾ • Dhammasaṅgaṇī-mūlaṭīkā / ਅਭਿਭਾਯਤਨਕਥਾવਣ੍ਣਨਾ • Abhibhāyatanakathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਧਮ੍ਮਸਙ੍ਗਣੀ-ਅਨੁਟੀਕਾ • Dhammasaṅgaṇī-anuṭīkā / ਅਭਿਭਾਯਤਨਕਥਾવਣ੍ਣਨਾ • Abhibhāyatanakathāvaṇṇanā
