| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. அபி⁴பா⁴யதனஸுத்தவண்ணனா
5. Abhibhāyatanasuttavaṇṇanā
65. பஞ்சமே அபி⁴பா⁴யதனானீதி அபி⁴ப⁴வனகாரணானி. கிங் அபி⁴ப⁴வந்தி? பச்சனீகத⁴ம்மேபி ஆரம்மணானிபி. தானி ஹி படிபக்க²பா⁴வேன பச்சனீகத⁴ம்மே அபி⁴ப⁴வந்தி, புக்³க³லஸ்ஸ ஞாணுத்தரியதாய ஆரம்மணானி. அஜ்ஜ²த்தங் ரூபஸஞ்ஞீதிஆதீ³ஸு பன அஜ்ஜ²த்தரூபே பரிகம்மவஸேன அஜ்ஜ²த்தங் ரூபஸஞ்ஞீ நாம ஹோதி. அஜ்ஜ²த்தஞ்ஹி நீலபரிகம்மங் கரொந்தோ கேஸே வா பித்தே வா அக்கி²தாரகாய வா கரோதி. பீதபரிகம்மங் கரொந்தோ மேதே³ வா ச²வியா வா ஹத்த²தலபாத³தலேஸு வா அக்கீ²னங் பீதட்டா²னே வா கரோதி. லோஹிதபரிகம்மங் கரொந்தோ மங்ஸே வா லோஹிதே வா ஜிவ்ஹாய வா அக்கீ²னங் ரத்தட்டா²னே வா கரோதி. ஓதா³தபரிகம்மங் கரொந்தோ அட்டி²ம்ஹி வா த³ந்தே வா நகே² வா அக்கீ²னங் ஸேதட்டா²னே வா கரோதி. தங் பன ஸுனீலகங் ஸுபீதகங் ஸுலோஹிதகங் ஸுஓதா³தங் ந ஹோதி, அவிஸுத்³த⁴மேவ ஹோதி.
65. Pañcame abhibhāyatanānīti abhibhavanakāraṇāni. Kiṃ abhibhavanti? Paccanīkadhammepi ārammaṇānipi. Tāni hi paṭipakkhabhāvena paccanīkadhamme abhibhavanti, puggalassa ñāṇuttariyatāya ārammaṇāni. Ajjhattaṃ rūpasaññītiādīsu pana ajjhattarūpe parikammavasena ajjhattaṃ rūpasaññī nāma hoti. Ajjhattañhi nīlaparikammaṃ karonto kese vā pitte vā akkhitārakāya vā karoti. Pītaparikammaṃ karonto mede vā chaviyā vā hatthatalapādatalesu vā akkhīnaṃ pītaṭṭhāne vā karoti. Lohitaparikammaṃ karonto maṃse vā lohite vā jivhāya vā akkhīnaṃ rattaṭṭhāne vā karoti. Odātaparikammaṃ karonto aṭṭhimhi vā dante vā nakhe vā akkhīnaṃ setaṭṭhāne vā karoti. Taṃ pana sunīlakaṃ supītakaṃ sulohitakaṃ suodātaṃ na hoti, avisuddhameva hoti.
ஏகோ ப³ஹித்³தா⁴ ரூபானி பஸ்ஸதீதி யஸ்ஸேவங் பரிகம்மங் அஜ்ஜ²த்தங் உப்பன்னங் ஹோதி, நிமித்தங் பன ப³ஹித்³தா⁴, ஸோ ஏவங் அஜ்ஜ²த்தங் பரிகம்மஸ்ஸ ப³ஹித்³தா⁴ ச அப்பனாய வஸேன ‘‘அஜ்ஜ²த்தங் ரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதீ’’தி வுச்சதி. பரித்தானீதி அவட்³டி⁴தானி. ஸுவண்ணது³ப்³ப³ண்ணானீதி ஸுவண்ணானி வா ஹொந்து து³ப்³ப³ண்ணானி வா, பரித்தவஸேனேவ இத³ங் அபி⁴பா⁴யதனங் வுத்தந்தி வேதி³தப்³ப³ங். தானி அபி⁴பு⁴ய்யாதி யதா² நாம ஸம்பன்னக்³க³ஹணிகோ கடச்சு²மத்தங் ப⁴த்தங் லபி⁴த்வா ‘‘கிங் எத்த² பு⁴ஞ்ஜிதப்³ப³ங் அத்தீ²’’தி ஸங்கட்³டி⁴த்வா ஏககப³ளமேவ கரோதி, ஏவமேவ ஞாணுத்தரிகோ புக்³க³லோ விஸத³ஞாணோ ‘‘கிமெத்த² பரித்தகே ஆரம்மணே ஸமாபஜ்ஜிதப்³ப³ங் அத்தி², நாயங் மம பா⁴ரோ’’தி தானி ரூபானி அபி⁴ப⁴வித்வா ஸமாபஜ்ஜதி, ஸஹ நிமித்துப்பாதே³னேவெத்த² அப்பனங் பாபேதீதி அத்தோ². ஜானாமி பஸ்ஸாமீதி இமினா பனஸ்ஸ ஆபோ⁴கோ³ கதி²தோ. ஸோ ச கோ² ஸமாபத்திதோ வுட்டி²தஸ்ஸ, ந அந்தோஸமாபத்தியங். ஏவங்ஸஞ்ஞீ ஹோதீதி ஆபோ⁴க³ஸஞ்ஞாயபி ஜா²னஸஞ்ஞாயபி ஏவங்ஸஞ்ஞீ ஹோதி. அபி⁴ப⁴வனஸஞ்ஞா ஹிஸ்ஸ அந்தோஸமாபத்தியம்பி அத்தி², ஆபோ⁴க³ஸஞ்ஞா பன ஸமாபத்திதோ வுட்டி²தஸ்ஸேவ.
Eko bahiddhā rūpāni passatīti yassevaṃ parikammaṃ ajjhattaṃ uppannaṃ hoti, nimittaṃ pana bahiddhā, so evaṃ ajjhattaṃ parikammassa bahiddhā ca appanāya vasena ‘‘ajjhattaṃ rūpasaññī eko bahiddhā rūpāni passatī’’ti vuccati. Parittānīti avaḍḍhitāni. Suvaṇṇadubbaṇṇānīti suvaṇṇāni vā hontu dubbaṇṇāni vā, parittavaseneva idaṃ abhibhāyatanaṃ vuttanti veditabbaṃ. Tāni abhibhuyyāti yathā nāma sampannaggahaṇiko kaṭacchumattaṃ bhattaṃ labhitvā ‘‘kiṃ ettha bhuñjitabbaṃ atthī’’ti saṃkaḍḍhitvā ekakabaḷameva karoti, evameva ñāṇuttariko puggalo visadañāṇo ‘‘kimettha parittake ārammaṇe samāpajjitabbaṃ atthi, nāyaṃ mama bhāro’’ti tāni rūpāni abhibhavitvā samāpajjati, saha nimittuppādenevettha appanaṃ pāpetīti attho. Jānāmi passāmīti iminā panassa ābhogo kathito. So ca kho samāpattito vuṭṭhitassa, na antosamāpattiyaṃ. Evaṃsaññī hotīti ābhogasaññāyapi jhānasaññāyapi evaṃsaññī hoti. Abhibhavanasaññā hissa antosamāpattiyampi atthi, ābhogasaññā pana samāpattito vuṭṭhitasseva.
அப்பமாணானீதி வட்³டி⁴தப்பமாணானி, மஹந்தானீதி அத்தோ². அபி⁴பு⁴ய்யாதி எத்த² ச பன யதா² மஹக்³க⁴ஸோ புரிஸோ ஏகங் ப⁴த்தவட்³டி⁴தகங் லபி⁴த்வா ‘‘அஞ்ஞாபி ஹோது, அஞ்ஞாபி ஹோது, கிங் ஏஸா மய்ஹங் கரிஸ்ஸதீ’’தி ந தங் மஹந்ததோ பஸ்ஸதி, ஏவமேவ ஞாணுத்தரோ புக்³க³லோ விஸத³ஞாணோ ‘‘கிங் எத்த² ஸமாபஜ்ஜிதப்³ப³ங், நயித³ங் அப்பமாணங், ந மய்ஹங் சித்தேகக்³க³தாகரணே பா⁴ரோ அத்தீ²’’தி அபி⁴ப⁴வித்வா ஸமாபஜ்ஜதி, ஸஹ நிமித்துப்பாத³னேவெத்த² அப்பனங் பாபேதீதி அத்தோ².
Appamāṇānīti vaḍḍhitappamāṇāni, mahantānīti attho. Abhibhuyyāti ettha ca pana yathā mahagghaso puriso ekaṃ bhattavaḍḍhitakaṃ labhitvā ‘‘aññāpi hotu, aññāpi hotu, kiṃ esā mayhaṃ karissatī’’ti na taṃ mahantato passati, evameva ñāṇuttaro puggalo visadañāṇo ‘‘kiṃ ettha samāpajjitabbaṃ, nayidaṃ appamāṇaṃ, na mayhaṃ cittekaggatākaraṇe bhāro atthī’’ti abhibhavitvā samāpajjati, saha nimittuppādanevettha appanaṃ pāpetīti attho.
அஜ்ஜ²த்தங் அரூபஸஞ்ஞீதி அலாபி⁴தாய வா அனத்தி²கதாய வா அஜ்ஜ²த்தரூபே பரிகம்மஸஞ்ஞாவிரஹிதோ.
Ajjhattaṃ arūpasaññīti alābhitāya vā anatthikatāya vā ajjhattarūpe parikammasaññāvirahito.
ஏகோ ப³ஹித்³தா⁴ ரூபானி பஸ்ஸதீதி யஸ்ஸ பரிகம்மம்பி நிமித்தம்பி ப³ஹித்³தா⁴ உப்பன்னங், ஸோ ஏவங் ப³ஹித்³தா⁴ பரிகம்மஸ்ஸ சேவ அப்பனாய ச வஸேன ‘‘அஜ்ஜ²த்தங் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதீ’’தி வுச்சதி. ஸேஸமெத்த² சதுத்தா²பி⁴பா⁴யதனே ச வுத்தனயமேவ. இமேஸு பன சதூஸு பரித்தங் விதக்கசரிதவஸேன ஆக³தங், அப்பமாணங் மோஹசரிதவஸேன, ஸுவண்ணங் தோ³ஸசரிதவஸேன, து³ப்³ப³ண்ணங் ராக³சரிதவஸேன. ஏதேஸஞ்ஹி ஏதானி ஸப்பாயானி. ஸா ச நேஸங் ஸப்பாயதா விஸுத்³தி⁴மக்³கே³ (விஸுத்³தி⁴॰ 1.43) சரியனித்³தே³ஸே வுத்தா.
Eko bahiddhā rūpāni passatīti yassa parikammampi nimittampi bahiddhā uppannaṃ, so evaṃ bahiddhā parikammassa ceva appanāya ca vasena ‘‘ajjhattaṃ arūpasaññī eko bahiddhā rūpāni passatī’’ti vuccati. Sesamettha catutthābhibhāyatane ca vuttanayameva. Imesu pana catūsu parittaṃ vitakkacaritavasena āgataṃ, appamāṇaṃ mohacaritavasena, suvaṇṇaṃ dosacaritavasena, dubbaṇṇaṃ rāgacaritavasena. Etesañhi etāni sappāyāni. Sā ca nesaṃ sappāyatā visuddhimagge (visuddhi. 1.43) cariyaniddese vuttā.
பஞ்சமஅபி⁴பா⁴யதனாதீ³ஸு நீலானீதி ஸப்³ப³ஸங்கா³ஹிகவஸேன வுத்தங். நீலவண்ணானீதி வண்ணவஸேன. நீலனித³ஸ்ஸனானீதி நித³ஸ்ஸனவஸேன. அபஞ்ஞாயமானவிவரானி அஸம்பி⁴ன்னவண்ணானி ஏகனீலானேவ ஹுத்வா தி³ஸ்ஸந்தீதி வுத்தங் ஹோதி. நீலனிபா⁴ஸானீதி இத³ங் பன ஓபா⁴ஸவஸேன வுத்தங், நீலோபா⁴ஸானி நீலப்பபா⁴யுத்தானீதி அத்தோ². ஏதேன நேஸங் ஸுவிஸுத்³த⁴தங் த³ஸ்ஸேதி. விஸுத்³த⁴வண்ணவஸேனேவ ஹி இமானி அபி⁴பா⁴யதனானி வுத்தானி. ‘‘நீலகஸிணங் உக்³க³ண்ஹந்தோ நீலஸ்மிங் நிமித்தங் க³ண்ஹாதி புப்ப²ஸ்மிங் வா வத்த²ஸ்மிங் வா வண்ணதா⁴துயா வா’’திஆதி³கங் பனெத்த² கஸிணகரணஞ்ச பரிகம்மஞ்ச அப்பனாவிதா⁴னஞ்ச ஸப்³ப³ங் விஸுத்³தி⁴மக்³கே³ (விஸுத்³தி⁴॰ 1.55) வித்தா²ரதோ வுத்தமேவாதி.
Pañcamaabhibhāyatanādīsu nīlānīti sabbasaṅgāhikavasena vuttaṃ. Nīlavaṇṇānīti vaṇṇavasena. Nīlanidassanānīti nidassanavasena. Apaññāyamānavivarāni asambhinnavaṇṇāni ekanīlāneva hutvā dissantīti vuttaṃ hoti. Nīlanibhāsānīti idaṃ pana obhāsavasena vuttaṃ, nīlobhāsāni nīlappabhāyuttānīti attho. Etena nesaṃ suvisuddhataṃ dasseti. Visuddhavaṇṇavaseneva hi imāni abhibhāyatanāni vuttāni. ‘‘Nīlakasiṇaṃ uggaṇhanto nīlasmiṃ nimittaṃ gaṇhāti pupphasmiṃ vā vatthasmiṃ vā vaṇṇadhātuyā vā’’tiādikaṃ panettha kasiṇakaraṇañca parikammañca appanāvidhānañca sabbaṃ visuddhimagge (visuddhi. 1.55) vitthārato vuttamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. அபி⁴பா⁴யதனஸுத்தங் • 5. Abhibhāyatanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-5. இச்சா²ஸுத்தாதி³வண்ணனா • 1-5. Icchāsuttādivaṇṇanā
