| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
5. абхибхааяад̇анасуд̇д̇аван̣н̣анаа
5. Abhibhāyatanasuttavaṇṇanā
65. бан̃жамз абхибхааяад̇анаанийд̇и абхибхаванагааран̣аани. гим̣ абхибхаванд̇и? бажжанийгад̇хаммзби аарамман̣ааниби. д̇аани хи бадибагкабхаавзна бажжанийгад̇хаммз абхибхаванд̇и, буг̇г̇аласса н̃аан̣уд̇д̇арияад̇ааяа аарамман̣аани. аж̇жхад̇д̇ам̣ руубасан̃н̃ийд̇иаад̣̇ийсу бана аж̇жхад̇д̇аруубз баригаммавасзна аж̇жхад̇д̇ам̣ руубасан̃н̃ий наама ход̇и. аж̇жхад̇д̇ан̃хи нийлабаригаммам̣ гаронд̇о гзсз ваа бид̇д̇з ваа агкид̇аарагааяа ваа гарод̇и. бийд̇абаригаммам̣ гаронд̇о мзд̣̇з ваа чавияаа ваа хад̇т̇ад̇алабаад̣̇ад̇алзсу ваа агкийнам̣ бийд̇адтаанз ваа гарод̇и. лохид̇абаригаммам̣ гаронд̇о мам̣сз ваа лохид̇з ваа ж̇ивхааяа ваа агкийнам̣ рад̇д̇адтаанз ваа гарод̇и. од̣̇аад̇абаригаммам̣ гаронд̇о адтимхи ваа д̣̇анд̇з ваа накз ваа агкийнам̣ сзд̇адтаанз ваа гарод̇и. д̇ам̣ бана сунийлагам̣ субийд̇агам̣ сулохид̇агам̣ суод̣̇аад̇ам̣ на ход̇и, ависуд̣̇д̇хамзва ход̇и.
65. Pañcame abhibhāyatanānīti abhibhavanakāraṇāni. Kiṃ abhibhavanti? Paccanīkadhammepi ārammaṇānipi. Tāni hi paṭipakkhabhāvena paccanīkadhamme abhibhavanti, puggalassa ñāṇuttariyatāya ārammaṇāni. Ajjhattaṃ rūpasaññītiādīsu pana ajjhattarūpe parikammavasena ajjhattaṃ rūpasaññī nāma hoti. Ajjhattañhi nīlaparikammaṃ karonto kese vā pitte vā akkhitārakāya vā karoti. Pītaparikammaṃ karonto mede vā chaviyā vā hatthatalapādatalesu vā akkhīnaṃ pītaṭṭhāne vā karoti. Lohitaparikammaṃ karonto maṃse vā lohite vā jivhāya vā akkhīnaṃ rattaṭṭhāne vā karoti. Odātaparikammaṃ karonto aṭṭhimhi vā dante vā nakhe vā akkhīnaṃ setaṭṭhāne vā karoti. Taṃ pana sunīlakaṃ supītakaṃ sulohitakaṃ suodātaṃ na hoti, avisuddhameva hoti.
зго б̣ахид̣̇д̇хаа руубаани бассад̇ийд̇и яассзвам̣ баригаммам̣ аж̇жхад̇д̇ам̣ уббаннам̣ ход̇и, нимид̇д̇ам̣ бана б̣ахид̣̇д̇хаа, со звам̣ аж̇жхад̇д̇ам̣ баригаммасса б̣ахид̣̇д̇хаа жа аббанааяа васзна ‘‘аж̇жхад̇д̇ам̣ руубасан̃н̃ий зго б̣ахид̣̇д̇хаа руубаани бассад̇ий’’д̇и вужжад̇и. барид̇д̇аанийд̇и авад̣дхид̇аани. суван̣н̣ад̣̇уб̣б̣ан̣н̣аанийд̇и суван̣н̣аани ваа хонд̇у д̣̇уб̣б̣ан̣н̣аани ваа, барид̇д̇авасзнзва ид̣̇ам̣ абхибхааяад̇анам̣ вуд̇д̇анд̇и взд̣̇ид̇аб̣б̣ам̣. д̇аани абхибхуяяаад̇и яат̇аа наама самбаннаг̇г̇ахан̣иго гадажчумад̇д̇ам̣ бхад̇д̇ам̣ лабхид̇ваа ‘‘гим̣ зд̇т̇а бхун̃ж̇ид̇аб̣б̣ам̣ ад̇т̇ий’’д̇и сам̣гад̣дхид̇ваа згагаб̣ал̣амзва гарод̇и, звамзва н̃аан̣уд̇д̇ариго буг̇г̇ало висад̣̇ан̃аан̣о ‘‘гимзд̇т̇а барид̇д̇агз аарамман̣з самаабаж̇ж̇ид̇аб̣б̣ам̣ ад̇т̇и, нааяам̣ мама бхааро’’д̇и д̇аани руубаани абхибхавид̇ваа самаабаж̇ж̇ад̇и, саха нимид̇д̇уббаад̣̇знзвзд̇т̇а аббанам̣ баабзд̇ийд̇и ад̇т̇о. ж̇аанаами бассаамийд̇и иминаа банасса аабхог̇о гат̇ид̇о. со жа ко самаабад̇д̇ид̇о вудтид̇асса, на анд̇осамаабад̇д̇ияам̣. звам̣сан̃н̃ий ход̇ийд̇и аабхог̇асан̃н̃ааяаби жхаанасан̃н̃ааяаби звам̣сан̃н̃ий ход̇и. абхибхаванасан̃н̃аа хисса анд̇осамаабад̇д̇ияамби ад̇т̇и, аабхог̇асан̃н̃аа бана самаабад̇д̇ид̇о вудтид̇ассзва.
Eko bahiddhā rūpāni passatīti yassevaṃ parikammaṃ ajjhattaṃ uppannaṃ hoti, nimittaṃ pana bahiddhā, so evaṃ ajjhattaṃ parikammassa bahiddhā ca appanāya vasena ‘‘ajjhattaṃ rūpasaññī eko bahiddhā rūpāni passatī’’ti vuccati. Parittānīti avaḍḍhitāni. Suvaṇṇadubbaṇṇānīti suvaṇṇāni vā hontu dubbaṇṇāni vā, parittavaseneva idaṃ abhibhāyatanaṃ vuttanti veditabbaṃ. Tāni abhibhuyyāti yathā nāma sampannaggahaṇiko kaṭacchumattaṃ bhattaṃ labhitvā ‘‘kiṃ ettha bhuñjitabbaṃ atthī’’ti saṃkaḍḍhitvā ekakabaḷameva karoti, evameva ñāṇuttariko puggalo visadañāṇo ‘‘kimettha parittake ārammaṇe samāpajjitabbaṃ atthi, nāyaṃ mama bhāro’’ti tāni rūpāni abhibhavitvā samāpajjati, saha nimittuppādenevettha appanaṃ pāpetīti attho. Jānāmi passāmīti iminā panassa ābhogo kathito. So ca kho samāpattito vuṭṭhitassa, na antosamāpattiyaṃ. Evaṃsaññī hotīti ābhogasaññāyapi jhānasaññāyapi evaṃsaññī hoti. Abhibhavanasaññā hissa antosamāpattiyampi atthi, ābhogasaññā pana samāpattito vuṭṭhitasseva.
аббамаан̣аанийд̇и вад̣дхид̇аббамаан̣аани, маханд̇аанийд̇и ад̇т̇о. абхибхуяяаад̇и зд̇т̇а жа бана яат̇аа махаг̇гхасо бурисо згам̣ бхад̇д̇авад̣дхид̇агам̣ лабхид̇ваа ‘‘ан̃н̃ааби ход̇у, ан̃н̃ааби ход̇у, гим̣ зсаа маяхам̣ гариссад̇ий’’д̇и на д̇ам̣ маханд̇ад̇о бассад̇и, звамзва н̃аан̣уд̇д̇аро буг̇г̇ало висад̣̇ан̃аан̣о ‘‘гим̣ зд̇т̇а самаабаж̇ж̇ид̇аб̣б̣ам̣, наяид̣̇ам̣ аббамаан̣ам̣, на маяхам̣ жид̇д̇згаг̇г̇ад̇аагаран̣з бхааро ад̇т̇ий’’д̇и абхибхавид̇ваа самаабаж̇ж̇ад̇и, саха нимид̇д̇уббаад̣̇анзвзд̇т̇а аббанам̣ баабзд̇ийд̇и ад̇т̇о.
Appamāṇānīti vaḍḍhitappamāṇāni, mahantānīti attho. Abhibhuyyāti ettha ca pana yathā mahagghaso puriso ekaṃ bhattavaḍḍhitakaṃ labhitvā ‘‘aññāpi hotu, aññāpi hotu, kiṃ esā mayhaṃ karissatī’’ti na taṃ mahantato passati, evameva ñāṇuttaro puggalo visadañāṇo ‘‘kiṃ ettha samāpajjitabbaṃ, nayidaṃ appamāṇaṃ, na mayhaṃ cittekaggatākaraṇe bhāro atthī’’ti abhibhavitvā samāpajjati, saha nimittuppādanevettha appanaṃ pāpetīti attho.
аж̇жхад̇д̇ам̣ аруубасан̃н̃ийд̇и алаабхид̇ааяа ваа анад̇т̇игад̇ааяа ваа аж̇жхад̇д̇аруубз баригаммасан̃н̃аавирахид̇о.
Ajjhattaṃ arūpasaññīti alābhitāya vā anatthikatāya vā ajjhattarūpe parikammasaññāvirahito.
зго б̣ахид̣̇д̇хаа руубаани бассад̇ийд̇и яасса баригаммамби нимид̇д̇амби б̣ахид̣̇д̇хаа уббаннам̣, со звам̣ б̣ахид̣̇д̇хаа баригаммасса жзва аббанааяа жа васзна ‘‘аж̇жхад̇д̇ам̣ аруубасан̃н̃ий зго б̣ахид̣̇д̇хаа руубаани бассад̇ий’’д̇и вужжад̇и. сзсамзд̇т̇а жад̇уд̇т̇аабхибхааяад̇анз жа вуд̇д̇анаяамзва. имзсу бана жад̇уусу барид̇д̇ам̣ вид̇аггажарид̇авасзна ааг̇ад̇ам̣, аббамаан̣ам̣ мохажарид̇авасзна, суван̣н̣ам̣ д̣̇осажарид̇авасзна, д̣̇уб̣б̣ан̣н̣ам̣ рааг̇ажарид̇авасзна. зд̇зсан̃хи зд̇аани саббааяаани. саа жа нзсам̣ саббааяад̇аа висуд̣̇д̇химаг̇г̇з (висуд̣̇д̇хи. 1.43) жарияанид̣̇д̣̇зсз вуд̇д̇аа.
Eko bahiddhā rūpāni passatīti yassa parikammampi nimittampi bahiddhā uppannaṃ, so evaṃ bahiddhā parikammassa ceva appanāya ca vasena ‘‘ajjhattaṃ arūpasaññī eko bahiddhā rūpāni passatī’’ti vuccati. Sesamettha catutthābhibhāyatane ca vuttanayameva. Imesu pana catūsu parittaṃ vitakkacaritavasena āgataṃ, appamāṇaṃ mohacaritavasena, suvaṇṇaṃ dosacaritavasena, dubbaṇṇaṃ rāgacaritavasena. Etesañhi etāni sappāyāni. Sā ca nesaṃ sappāyatā visuddhimagge (visuddhi. 1.43) cariyaniddese vuttā.
бан̃жамаабхибхааяад̇анаад̣̇ийсу нийлаанийд̇и саб̣б̣асан̇г̇аахигавасзна вуд̇д̇ам̣. нийлаван̣н̣аанийд̇и ван̣н̣авасзна. нийланид̣̇ассанаанийд̇и нид̣̇ассанавасзна. абан̃н̃ааяамаанавивараани асамбхиннаван̣н̣аани зганийлаанзва худ̇ваа д̣̇иссанд̇ийд̇и вуд̇д̇ам̣ ход̇и. нийланибхаасаанийд̇и ид̣̇ам̣ бана обхаасавасзна вуд̇д̇ам̣, нийлобхаасаани нийлаббабхааяуд̇д̇аанийд̇и ад̇т̇о. зд̇зна нзсам̣ сувисуд̣̇д̇хад̇ам̣ д̣̇ассзд̇и. висуд̣̇д̇хаван̣н̣авасзнзва хи имаани абхибхааяад̇анаани вуд̇д̇аани. ‘‘нийлагасин̣ам̣ уг̇г̇ан̣ханд̇о нийласмим̣ нимид̇д̇ам̣ г̇ан̣хаад̇и бубпасмим̣ ваа вад̇т̇асмим̣ ваа ван̣н̣ад̇хаад̇уяаа ваа’’д̇иаад̣̇игам̣ банзд̇т̇а гасин̣агаран̣ан̃жа баригамман̃жа аббанаавид̇хаанан̃жа саб̣б̣ам̣ висуд̣̇д̇химаг̇г̇з (висуд̣̇д̇хи. 1.55) вид̇т̇аарад̇о вуд̇д̇амзваад̇и.
Pañcamaabhibhāyatanādīsu nīlānīti sabbasaṅgāhikavasena vuttaṃ. Nīlavaṇṇānīti vaṇṇavasena. Nīlanidassanānīti nidassanavasena. Apaññāyamānavivarāni asambhinnavaṇṇāni ekanīlāneva hutvā dissantīti vuttaṃ hoti. Nīlanibhāsānīti idaṃ pana obhāsavasena vuttaṃ, nīlobhāsāni nīlappabhāyuttānīti attho. Etena nesaṃ suvisuddhataṃ dasseti. Visuddhavaṇṇavaseneva hi imāni abhibhāyatanāni vuttāni. ‘‘Nīlakasiṇaṃ uggaṇhanto nīlasmiṃ nimittaṃ gaṇhāti pupphasmiṃ vā vatthasmiṃ vā vaṇṇadhātuyā vā’’tiādikaṃ panettha kasiṇakaraṇañca parikammañca appanāvidhānañca sabbaṃ visuddhimagge (visuddhi. 1.55) vitthārato vuttamevāti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 5. абхибхааяад̇анасуд̇д̇ам̣ • 5. Abhibhāyatanasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 1-5. ижчаасуд̇д̇аад̣̇иван̣н̣анаа • 1-5. Icchāsuttādivaṇṇanā
