| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༥. ཨབྷིབྷཱཡཏནསུཏྟཝཎྞནཱ
5. Abhibhāyatanasuttavaṇṇanā
༦༥. པཉྩམེ ཨབྷིབྷཱཡཏནཱནཱིཏི ཨབྷིབྷཝནཀཱརཎཱནི། ཀིཾ ཨབྷིབྷཝནྟི? པཙྩནཱིཀདྷམྨེཔི ཨཱརམྨཎཱནིཔི། ཏཱནི ཧི པཊིཔཀྑབྷཱཝེན པཙྩནཱིཀདྷམྨེ ཨབྷིབྷཝནྟི, པུགྒལསྶ ཉཱཎུཏྟརིཡཏཱཡ ཨཱརམྨཎཱནི། ཨཛ྄ཛྷཏྟཾ རཱུཔསཉྙཱིཏིཨཱདཱིསུ པན ཨཛ྄ཛྷཏྟརཱུཔེ པརིཀམྨཝསེན ཨཛ྄ཛྷཏྟཾ རཱུཔསཉྙཱི ནཱམ ཧོཏི། ཨཛ྄ཛྷཏྟཉྷི ནཱིལཔརིཀམྨཾ ཀརོནྟོ ཀེསེ ཝཱ པིཏྟེ ཝཱ ཨཀྑིཏཱརཀཱཡ ཝཱ ཀརོཏི། པཱིཏཔརིཀམྨཾ ཀརོནྟོ མེདེ ཝཱ ཚཝིཡཱ ཝཱ ཧཏྠཏལཔཱདཏལེསུ ཝཱ ཨཀྑཱིནཾ པཱིཏཊྛཱནེ ཝཱ ཀརོཏི། ལོཧིཏཔརིཀམྨཾ ཀརོནྟོ མཾསེ ཝཱ ལོཧིཏེ ཝཱ ཛིཝ྄ཧཱཡ ཝཱ ཨཀྑཱིནཾ རཏྟཊྛཱནེ ཝཱ ཀརོཏི། ཨོདཱཏཔརིཀམྨཾ ཀརོནྟོ ཨཊྛིམྷི ཝཱ དནྟེ ཝཱ ནཁེ ཝཱ ཨཀྑཱིནཾ སེཏཊྛཱནེ ཝཱ ཀརོཏི། ཏཾ པན སུནཱིལཀཾ སུཔཱིཏཀཾ སུལོཧིཏཀཾ སུཨོདཱཏཾ ན ཧོཏི, ཨཝིསུདྡྷམེཝ ཧོཏི།
65. Pañcame abhibhāyatanānīti abhibhavanakāraṇāni. Kiṃ abhibhavanti? Paccanīkadhammepi ārammaṇānipi. Tāni hi paṭipakkhabhāvena paccanīkadhamme abhibhavanti, puggalassa ñāṇuttariyatāya ārammaṇāni. Ajjhattaṃ rūpasaññītiādīsu pana ajjhattarūpe parikammavasena ajjhattaṃ rūpasaññī nāma hoti. Ajjhattañhi nīlaparikammaṃ karonto kese vā pitte vā akkhitārakāya vā karoti. Pītaparikammaṃ karonto mede vā chaviyā vā hatthatalapādatalesu vā akkhīnaṃ pītaṭṭhāne vā karoti. Lohitaparikammaṃ karonto maṃse vā lohite vā jivhāya vā akkhīnaṃ rattaṭṭhāne vā karoti. Odātaparikammaṃ karonto aṭṭhimhi vā dante vā nakhe vā akkhīnaṃ setaṭṭhāne vā karoti. Taṃ pana sunīlakaṃ supītakaṃ sulohitakaṃ suodātaṃ na hoti, avisuddhameva hoti.
ཨེཀོ བཧིདྡྷཱ རཱུཔཱནི པསྶཏཱིཏི ཡསྶེཝཾ པརིཀམྨཾ ཨཛ྄ཛྷཏྟཾ ཨུཔྤནྣཾ ཧོཏི, ནིམིཏྟཾ པན བཧིདྡྷཱ, སོ ཨེཝཾ ཨཛ྄ཛྷཏྟཾ པརིཀམྨསྶ བཧིདྡྷཱ ཙ ཨཔྤནཱཡ ཝསེན ‘‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏཱི’’ཏི ཝུཙྩཏི། པརིཏྟཱནཱིཏི ཨཝཌྜྷིཏཱནི། སུཝཎྞདུབྦཎྞཱནཱིཏི སུཝཎྞཱནི ཝཱ ཧོནྟུ དུབྦཎྞཱནི ཝཱ, པརིཏྟཝསེནེཝ ཨིདཾ ཨབྷིབྷཱཡཏནཾ ཝུཏྟནྟི ཝེདིཏབྦཾ། ཏཱནི ཨབྷིབྷུཡྻཱཏི ཡཐཱ ནཱམ སམྤནྣགྒཧཎིཀོ ཀཊཙྪུམཏྟཾ བྷཏྟཾ ལབྷིཏྭཱ ‘‘ཀིཾ ཨེཏྠ བྷུཉྫིཏབྦཾ ཨཏྠཱི’’ཏི སཾཀཌྜྷིཏྭཱ ཨེཀཀབལ༹མེཝ ཀརོཏི, ཨེཝམེཝ ཉཱཎུཏྟརིཀོ པུགྒལོ ཝིསདཉཱཎོ ‘‘ཀིམེཏྠ པརིཏྟཀེ ཨཱརམྨཎེ སམཱཔཛྫིཏབྦཾ ཨཏྠི, ནཱཡཾ མམ བྷཱརོ’’ཏི ཏཱནི རཱུཔཱནི ཨབྷིབྷཝིཏྭཱ སམཱཔཛྫཏི, སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱིཏི ཨཏྠོ། ཛཱནཱམི པསྶཱམཱིཏི ཨིམིནཱ པནསྶ ཨཱབྷོགོ ཀཐིཏོ། སོ ཙ ཁོ སམཱཔཏྟིཏོ ཝུཊྛིཏསྶ, ན ཨནྟོསམཱཔཏྟིཡཾ། ཨེཝཾསཉྙཱི ཧོཏཱིཏི ཨཱབྷོགསཉྙཱཡཔི ཛྷཱནསཉྙཱཡཔི ཨེཝཾསཉྙཱི ཧོཏི། ཨབྷིབྷཝནསཉྙཱ ཧིསྶ ཨནྟོསམཱཔཏྟིཡམྤི ཨཏྠི, ཨཱབྷོགསཉྙཱ པན སམཱཔཏྟིཏོ ཝུཊྛིཏསྶེཝ།
Eko bahiddhā rūpāni passatīti yassevaṃ parikammaṃ ajjhattaṃ uppannaṃ hoti, nimittaṃ pana bahiddhā, so evaṃ ajjhattaṃ parikammassa bahiddhā ca appanāya vasena ‘‘ajjhattaṃ rūpasaññī eko bahiddhā rūpāni passatī’’ti vuccati. Parittānīti avaḍḍhitāni. Suvaṇṇadubbaṇṇānīti suvaṇṇāni vā hontu dubbaṇṇāni vā, parittavaseneva idaṃ abhibhāyatanaṃ vuttanti veditabbaṃ. Tāni abhibhuyyāti yathā nāma sampannaggahaṇiko kaṭacchumattaṃ bhattaṃ labhitvā ‘‘kiṃ ettha bhuñjitabbaṃ atthī’’ti saṃkaḍḍhitvā ekakabaḷameva karoti, evameva ñāṇuttariko puggalo visadañāṇo ‘‘kimettha parittake ārammaṇe samāpajjitabbaṃ atthi, nāyaṃ mama bhāro’’ti tāni rūpāni abhibhavitvā samāpajjati, saha nimittuppādenevettha appanaṃ pāpetīti attho. Jānāmi passāmīti iminā panassa ābhogo kathito. So ca kho samāpattito vuṭṭhitassa, na antosamāpattiyaṃ. Evaṃsaññī hotīti ābhogasaññāyapi jhānasaññāyapi evaṃsaññī hoti. Abhibhavanasaññā hissa antosamāpattiyampi atthi, ābhogasaññā pana samāpattito vuṭṭhitasseva.
ཨཔྤམཱཎཱནཱིཏི ཝཌྜྷིཏཔྤམཱཎཱནི, མཧནྟཱནཱིཏི ཨཏྠོ། ཨབྷིབྷུཡྻཱཏི ཨེཏྠ ཙ པན ཡཐཱ མཧགྒྷསོ པུརིསོ ཨེཀཾ བྷཏྟཝཌྜྷིཏཀཾ ལབྷིཏྭཱ ‘‘ཨཉྙཱཔི ཧོཏུ, ཨཉྙཱཔི ཧོཏུ, ཀིཾ ཨེསཱ མཡ྄ཧཾ ཀརིསྶཏཱི’’ཏི ན ཏཾ མཧནྟཏོ པསྶཏི, ཨེཝམེཝ ཉཱཎུཏྟརོ པུགྒལོ ཝིསདཉཱཎོ ‘‘ཀིཾ ཨེཏྠ སམཱཔཛྫིཏབྦཾ, ནཡིདཾ ཨཔྤམཱཎཾ, ན མཡ྄ཧཾ ཙིཏྟེཀགྒཏཱཀརཎེ བྷཱརོ ཨཏྠཱི’’ཏི ཨབྷིབྷཝིཏྭཱ སམཱཔཛྫཏི, སཧ ནིམིཏྟུཔྤཱདནེཝེཏྠ ཨཔྤནཾ པཱཔེཏཱིཏི ཨཏྠོ།
Appamāṇānīti vaḍḍhitappamāṇāni, mahantānīti attho. Abhibhuyyāti ettha ca pana yathā mahagghaso puriso ekaṃ bhattavaḍḍhitakaṃ labhitvā ‘‘aññāpi hotu, aññāpi hotu, kiṃ esā mayhaṃ karissatī’’ti na taṃ mahantato passati, evameva ñāṇuttaro puggalo visadañāṇo ‘‘kiṃ ettha samāpajjitabbaṃ, nayidaṃ appamāṇaṃ, na mayhaṃ cittekaggatākaraṇe bhāro atthī’’ti abhibhavitvā samāpajjati, saha nimittuppādanevettha appanaṃ pāpetīti attho.
ཨཛ྄ཛྷཏྟཾ ཨརཱུཔསཉྙཱིཏི ཨལཱབྷིཏཱཡ ཝཱ ཨནཏྠིཀཏཱཡ ཝཱ ཨཛ྄ཛྷཏྟརཱུཔེ པརིཀམྨསཉྙཱཝིརཧིཏོ།
Ajjhattaṃ arūpasaññīti alābhitāya vā anatthikatāya vā ajjhattarūpe parikammasaññāvirahito.
ཨེཀོ བཧིདྡྷཱ རཱུཔཱནི པསྶཏཱིཏི ཡསྶ པརིཀམྨམྤི ནིམིཏྟམྤི བཧིདྡྷཱ ཨུཔྤནྣཾ, སོ ཨེཝཾ བཧིདྡྷཱ པརིཀམྨསྶ ཙེཝ ཨཔྤནཱཡ ཙ ཝསེན ‘‘ཨཛ྄ཛྷཏྟཾ ཨརཱུཔསཉྙཱི ཨེཀོ བཧིདྡྷཱ རཱུཔཱནི པསྶཏཱི’’ཏི ཝུཙྩཏི། སེསམེཏྠ ཙཏུཏྠཱབྷིབྷཱཡཏནེ ཙ ཝུཏྟནཡམེཝ། ཨིམེསུ པན ཙཏཱུསུ པརིཏྟཾ ཝིཏཀྐཙརིཏཝསེན ཨཱགཏཾ, ཨཔྤམཱཎཾ མོཧཙརིཏཝསེན, སུཝཎྞཾ དོསཙརིཏཝསེན, དུབྦཎྞཾ རཱགཙརིཏཝསེན། ཨེཏེསཉྷི ཨེཏཱནི སཔྤཱཡཱནི། སཱ ཙ ནེསཾ སཔྤཱཡཏཱ ཝིསུདྡྷིམགྒེ (ཝིསུདྡྷི॰ ༡.༤༣) ཙརིཡནིདྡེསེ ཝུཏྟཱ།
Eko bahiddhā rūpāni passatīti yassa parikammampi nimittampi bahiddhā uppannaṃ, so evaṃ bahiddhā parikammassa ceva appanāya ca vasena ‘‘ajjhattaṃ arūpasaññī eko bahiddhā rūpāni passatī’’ti vuccati. Sesamettha catutthābhibhāyatane ca vuttanayameva. Imesu pana catūsu parittaṃ vitakkacaritavasena āgataṃ, appamāṇaṃ mohacaritavasena, suvaṇṇaṃ dosacaritavasena, dubbaṇṇaṃ rāgacaritavasena. Etesañhi etāni sappāyāni. Sā ca nesaṃ sappāyatā visuddhimagge (visuddhi. 1.43) cariyaniddese vuttā.
པཉྩམཨབྷིབྷཱཡཏནཱདཱིསུ ནཱིལཱནཱིཏི སབྦསངྒཱཧིཀཝསེན ཝུཏྟཾ། ནཱིལཝཎྞཱནཱིཏི ཝཎྞཝསེན། ནཱིལནིདསྶནཱནཱིཏི ནིདསྶནཝསེན། ཨཔཉྙཱཡམཱནཝིཝརཱནི ཨསམྦྷིནྣཝཎྞཱནི ཨེཀནཱིལཱནེཝ ཧུཏྭཱ དིསྶནྟཱིཏི ཝུཏྟཾ ཧོཏི། ནཱིལནིབྷཱསཱནཱིཏི ཨིདཾ པན ཨོབྷཱསཝསེན ཝུཏྟཾ, ནཱིལོབྷཱསཱནི ནཱིལཔྤབྷཱཡུཏྟཱནཱིཏི ཨཏྠོ། ཨེཏེན ནེསཾ སུཝིསུདྡྷཏཾ དསྶེཏི། ཝིསུདྡྷཝཎྞཝསེནེཝ ཧི ཨིམཱནི ཨབྷིབྷཱཡཏནཱནི ཝུཏྟཱནི། ‘‘ནཱིལཀསིཎཾ ཨུགྒཎྷནྟོ ནཱིལསྨིཾ ནིམིཏྟཾ གཎྷཱཏི པུཔྥསྨིཾ ཝཱ ཝཏྠསྨིཾ ཝཱ ཝཎྞདྷཱཏུཡཱ ཝཱ’’ཏིཨཱདིཀཾ པནེཏྠ ཀསིཎཀརཎཉྩ པརིཀམྨཉྩ ཨཔྤནཱཝིདྷཱནཉྩ སབྦཾ ཝིསུདྡྷིམགྒེ (ཝིསུདྡྷི॰ ༡.༥༥) ཝིཏྠཱརཏོ ཝུཏྟམེཝཱཏི།
Pañcamaabhibhāyatanādīsu nīlānīti sabbasaṅgāhikavasena vuttaṃ. Nīlavaṇṇānīti vaṇṇavasena. Nīlanidassanānīti nidassanavasena. Apaññāyamānavivarāni asambhinnavaṇṇāni ekanīlāneva hutvā dissantīti vuttaṃ hoti. Nīlanibhāsānīti idaṃ pana obhāsavasena vuttaṃ, nīlobhāsāni nīlappabhāyuttānīti attho. Etena nesaṃ suvisuddhataṃ dasseti. Visuddhavaṇṇavaseneva hi imāni abhibhāyatanāni vuttāni. ‘‘Nīlakasiṇaṃ uggaṇhanto nīlasmiṃ nimittaṃ gaṇhāti pupphasmiṃ vā vatthasmiṃ vā vaṇṇadhātuyā vā’’tiādikaṃ panettha kasiṇakaraṇañca parikammañca appanāvidhānañca sabbaṃ visuddhimagge (visuddhi. 1.55) vitthārato vuttamevāti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༥. ཨབྷིབྷཱཡཏནསུཏྟཾ • 5. Abhibhāyatanasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༥. ཨིཙྪཱསུཏྟཱདིཝཎྞནཱ • 1-5. Icchāsuttādivaṇṇanā
