| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
2. அபி⁴த⁴ம்மபா⁴ஜனீயவண்ணனா
2. Abhidhammabhājanīyavaṇṇanā
32. இதா³னி அபி⁴த⁴ம்மபா⁴ஜனீயங் ஹோதி. தத்த² ரூபக்க²ந்த⁴னித்³தே³ஸோ ஹெட்டா² ரூபகண்டே³ வித்தா²ரிதனயேனேவ வேதி³தப்³போ³.
32. Idāni abhidhammabhājanīyaṃ hoti. Tattha rūpakkhandhaniddeso heṭṭhā rūpakaṇḍe vitthāritanayeneva veditabbo.
34. வேத³னாக்க²ந்த⁴னித்³தே³ஸே ஏகவிதே⁴னாதி ஏககொட்டா²ஸேன. ப²ஸ்ஸஸம்பயுத்தோதி ப²ஸ்ஸேன ஸம்பயுத்தோ. ஸப்³பா³பி சதுபூ⁴மிகவேத³னா. ஸஹேதுகது³கே ஸஹேதுகா சதுபூ⁴மிகவேத³னா, அஹேதுகா காமாவசராவ. இமினா உபாயேன குஸலபதா³தீ³ஹி வுத்தா வேத³னா ஜானிதப்³பா³. அபிசாயங் வேத³னாக்க²ந்தோ⁴ ஏகவிதே⁴ன ப²ஸ்ஸஸம்பயுத்ததோ த³ஸ்ஸிதோ, து³விதே⁴ன ஸஹேதுகாஹேதுகதோ, திவிதே⁴ன ஜாதிதோ , சதுப்³பி³தே⁴ன பூ⁴மந்தரதோ, பஞ்சவிதே⁴ன இந்த்³ரியதோ. தத்த² ஸுகி²ந்த்³ரியது³க்கி²ந்த்³ரியானி காயப்பஸாத³வத்து²கானி காமாவசரானேவ. ஸோமனஸ்ஸிந்த்³ரியங் ச²ட்ட²வத்து²கங் வா அவத்து²கங் வா தேபூ⁴மகங் . தோ³மனஸ்ஸிந்த்³ரியங் ச²ட்ட²வத்து²கங் காமாவசரங். உபெக்கி²ந்த்³ரியங் சக்கா²தி³சதுப்பஸாத³வத்து²கங் ச²ட்ட²வத்து²கங் அவத்து²கஞ்ச சதுபூ⁴மகங். ச²ப்³பி³தே⁴ன வத்து²தோ த³ஸ்ஸிதோ. தத்த² புரிமா பஞ்ச வேத³னா பஞ்சப்பஸாத³வத்து²கா காமாவசராவ ச²ட்டா² அவத்து²கா வா ஸவத்து²கா வா சதுபூ⁴மிகா.
34. Vedanākkhandhaniddese ekavidhenāti ekakoṭṭhāsena. Phassasampayuttoti phassena sampayutto. Sabbāpi catubhūmikavedanā. Sahetukaduke sahetukā catubhūmikavedanā, ahetukā kāmāvacarāva. Iminā upāyena kusalapadādīhi vuttā vedanā jānitabbā. Apicāyaṃ vedanākkhandho ekavidhena phassasampayuttato dassito, duvidhena sahetukāhetukato, tividhena jātito , catubbidhena bhūmantarato, pañcavidhena indriyato. Tattha sukhindriyadukkhindriyāni kāyappasādavatthukāni kāmāvacarāneva. Somanassindriyaṃ chaṭṭhavatthukaṃ vā avatthukaṃ vā tebhūmakaṃ . Domanassindriyaṃ chaṭṭhavatthukaṃ kāmāvacaraṃ. Upekkhindriyaṃ cakkhādicatuppasādavatthukaṃ chaṭṭhavatthukaṃ avatthukañca catubhūmakaṃ. Chabbidhena vatthuto dassito. Tattha purimā pañca vedanā pañcappasādavatthukā kāmāvacarāva chaṭṭhā avatthukā vā savatthukā vā catubhūmikā.
ஸத்தவிதே⁴ன தத்த² மனோஸம்ப²ஸ்ஸஜா பே⁴த³தோ த³ஸ்ஸிதா, அட்ட²விதே⁴ன தத்த² காயஸம்ப²ஸ்ஸஜா பே⁴த³தோ, நவவிதே⁴ன ஸத்தவித⁴பே⁴தே³ மனோவிஞ்ஞாணதா⁴துஸம்ப²ஸ்ஸஜா பே⁴த³தோ, த³ஸவிதே⁴ன அட்ட²வித⁴பே⁴தே³ மனோவிஞ்ஞாணதா⁴துஸம்ப²ஸ்ஸஜா பே⁴த³தோ. ஏதேஸு ஹி ஸத்தவித⁴பே⁴தே³ மனோஸம்ப²ஸ்ஸஜா மனோதா⁴துஸம்ப²ஸ்ஸஜா, மனோவிஞ்ஞாணதா⁴துஸம்ப²ஸ்ஸஜாதி த்³விதா⁴ பி⁴ன்னா. அட்ட²வித⁴பே⁴தே³ தாய ஸத்³தி⁴ங் காயஸம்ப²ஸ்ஸஜாபி ஸுகா² து³க்கா²தி த்³விதா⁴ பி⁴ன்னா. நவவித⁴பே⁴தே³ ஸத்தவிதே⁴ வுத்தா மனோவிஞ்ஞாணதா⁴துஸம்ப²ஸ்ஸஜா குஸலாதி³வஸேன திதா⁴ பி⁴ன்னா. த³ஸவித⁴பே⁴தே³ அட்ட²விதே⁴ வுத்தா மனோவிஞ்ஞாணதா⁴துஸம்ப²ஸ்ஸஜா குஸலாதி³வஸேனேவ திதா⁴ பி⁴ன்னா.
Sattavidhena tattha manosamphassajā bhedato dassitā, aṭṭhavidhena tattha kāyasamphassajā bhedato, navavidhena sattavidhabhede manoviññāṇadhātusamphassajā bhedato, dasavidhena aṭṭhavidhabhede manoviññāṇadhātusamphassajā bhedato. Etesu hi sattavidhabhede manosamphassajā manodhātusamphassajā, manoviññāṇadhātusamphassajāti dvidhā bhinnā. Aṭṭhavidhabhede tāya saddhiṃ kāyasamphassajāpi sukhā dukkhāti dvidhā bhinnā. Navavidhabhede sattavidhe vuttā manoviññāṇadhātusamphassajā kusalādivasena tidhā bhinnā. Dasavidhabhede aṭṭhavidhe vuttā manoviññāṇadhātusamphassajā kusalādivaseneva tidhā bhinnā.
குஸலத்திகோ செத்த² கேவலங் பூரணத்த²மேவ வுத்தோ. ஸத்தவித⁴அட்ட²வித⁴னவவித⁴பே⁴தே³ஸு பன நயங் தா³துங் யுத்தட்டா²னே நயோ தி³ன்னோ. அபி⁴த⁴ம்மஞ்ஹி பத்வா ததா²க³தேன நயங் தா³துங் யுத்தட்டா²னே நயோ அதி³ன்னோ நாம நத்தி². அயங் தாவ து³கமூலகே ஏகோ வாரோ.
Kusalattiko cettha kevalaṃ pūraṇatthameva vutto. Sattavidhaaṭṭhavidhanavavidhabhedesu pana nayaṃ dātuṃ yuttaṭṭhāne nayo dinno. Abhidhammañhi patvā tathāgatena nayaṃ dātuṃ yuttaṭṭhāne nayo adinno nāma natthi. Ayaṃ tāva dukamūlake eko vāro.
ஸத்தா² ஹி இமஸ்மிங் அபி⁴த⁴ம்மபா⁴ஜனீயே வேத³னாக்க²ந்த⁴ங் பா⁴ஜெந்தோ திகே க³ஹெத்வா து³கேஸு பக்கி²பி, து³கே க³ஹெத்வா திகேஸு பக்கி²பி, திகே ச து³கே ச உப⁴தோவட்³ட⁴னநீஹாரேன ஆஹரி; ஸத்தவிதே⁴ன, சதுவீஸதிவிதே⁴ன, திங்ஸவிதே⁴ன, ப³ஹுவிதே⁴னாதி ஸப்³ப³தா²பி ப³ஹுவிதே⁴ன வேத³னாக்க²ந்த⁴ங் த³ஸ்ஸேஸி. கஸ்மா? புக்³க³லஜ்ஜா²ஸயேன சேவ தே³ஸனாவிலாஸேன ச. த⁴ம்மங் ஸோதுங் நிஸின்னதே³வபரிஸாய ஹி யே தே³வபுத்தா திகே ஆதா³ய து³கேஸு பக்கி²பித்வா கதி²யமானங் படிவிஜ்ஜி²துங் ஸக்கொந்தி, தேஸங் ஸப்பாயவஸேன ததா² கத்வா தே³ஸேஸி. யே இதரேஹி ஆகாரேஹி கதி²யமானங் படிவிஜ்ஜி²துங் ஸக்கொந்தி, தேஸங் தேஹாகாரேஹி தே³ஸேஸீதி. அயமெத்த² ‘புக்³க³லஜ்ஜா²ஸயோ’. ஸம்மாஸம்பு³த்³தோ⁴ பன அத்தனோ மஹாவிஸயதாய திகே வா து³கேஸு பக்கி²பித்வா, து³கே வா திகேஸு உப⁴தோவட்³ட⁴னேன வா, ஸத்தவிதா⁴தி³னயேன வா, யதா² யதா² இச்ச²தி ததா² ததா² தே³ஸேதுங் ஸக்கோதி. தஸ்மாபி இமேஹாகாரேஹி தே³ஸேஸீதி அயமஸ்ஸ ‘தே³ஸனாவிலாஸோ’.
Satthā hi imasmiṃ abhidhammabhājanīye vedanākkhandhaṃ bhājento tike gahetvā dukesu pakkhipi, duke gahetvā tikesu pakkhipi, tike ca duke ca ubhatovaḍḍhananīhārena āhari; sattavidhena, catuvīsatividhena, tiṃsavidhena, bahuvidhenāti sabbathāpi bahuvidhena vedanākkhandhaṃ dassesi. Kasmā? Puggalajjhāsayena ceva desanāvilāsena ca. Dhammaṃ sotuṃ nisinnadevaparisāya hi ye devaputtā tike ādāya dukesu pakkhipitvā kathiyamānaṃ paṭivijjhituṃ sakkonti, tesaṃ sappāyavasena tathā katvā desesi. Ye itarehi ākārehi kathiyamānaṃ paṭivijjhituṃ sakkonti, tesaṃ tehākārehi desesīti. Ayamettha ‘puggalajjhāsayo’. Sammāsambuddho pana attano mahāvisayatāya tike vā dukesu pakkhipitvā, duke vā tikesu ubhatovaḍḍhanena vā, sattavidhādinayena vā, yathā yathā icchati tathā tathā desetuṃ sakkoti. Tasmāpi imehākārehi desesīti ayamassa ‘desanāvilāso’.
தத்த² திகே ஆதா³ய து³கேஸு பக்கி²பித்வா தே³ஸிதவாரோ து³கமூலகோ நாம. து³கே ஆதா³ய திகேஸு பக்கி²பித்வா தே³ஸிதவாரோ திகமூலகோ நாம. திகே ச து³கே ச உப⁴தோ வட்³டெ⁴த்வா தே³ஸிதவாரோ உப⁴தோவட்³டி⁴தகோ நாம. அவஸானே ஸத்தவிதே⁴னாதிஆதி³வாரோ ப³ஹுவித⁴வாரோ நாமாதி இமே தாவ சத்தாரோ மஹாவாரா.
Tattha tike ādāya dukesu pakkhipitvā desitavāro dukamūlako nāma. Duke ādāya tikesu pakkhipitvā desitavāro tikamūlako nāma. Tike ca duke ca ubhato vaḍḍhetvā desitavāro ubhatovaḍḍhitako nāma. Avasāne sattavidhenātiādivāro bahuvidhavāro nāmāti ime tāva cattāro mahāvārā.
தத்த² து³கமூலகே து³கேஸு லப்³ப⁴மானேன ஏகேகேன து³கேன ஸத்³தி⁴ங் திகேஸு அலப்³ப⁴மானே வேத³னாத்திகபீதித்திகஸனித³ஸ்ஸனத்திகே அபனெத்வா, ஸேஸே லப்³ப⁴மானகே ஏகூனவீஸதி திகே யோஜெத்வா, து³தியது³கபட²மத்திகயோஜனவாராதீ³னி நவவாரஸதானி பஞ்ஞாஸஞ்ச வாரா ஹொந்தி. தே ஸப்³பே³பி பாளியங் ஸங்கி²பித்வா தத்த² தத்த² த³ஸ்ஸேதப்³ப³யுத்தகங் த³ஸ்ஸெத்வா வுத்தா. அஸம்முய்ஹந்தேன பன வித்தா²ரதோ வேதி³தப்³பா³.
Tattha dukamūlake dukesu labbhamānena ekekena dukena saddhiṃ tikesu alabbhamāne vedanāttikapītittikasanidassanattike apanetvā, sese labbhamānake ekūnavīsati tike yojetvā, dutiyadukapaṭhamattikayojanavārādīni navavārasatāni paññāsañca vārā honti. Te sabbepi pāḷiyaṃ saṃkhipitvā tattha tattha dassetabbayuttakaṃ dassetvā vuttā. Asammuyhantena pana vitthārato veditabbā.
திகமூலகேபி திகேஸு லப்³ப⁴மானேன ஏகேகேன திகேன ஸத்³தி⁴ங் து³கேஸு அலப்³ப⁴மானே பட²மது³காத³யோ து³கே அபனெத்வா, ஸேஸே லப்³ப⁴மானகே ஸஹேதுகது³காத³யோ பஞ்ஞாஸ து³கே யோஜெத்வா, பட²மத்திகது³தியது³கயோஜனவாராதீ³னி நவவாரஸதானி பஞ்ஞாஸஞ்ச வாரா ஹொந்தி. தேபி ஸப்³பே³ பாளியங் ஸங்கி²பித்வா தத்த² தத்த² த³ஸ்ஸேதப்³ப³யுத்தகங் த³ஸ்ஸெத்வா வுத்தா. அஸம்முய்ஹந்தேன பன வித்தா²ரதோ வேதி³தப்³பா³.
Tikamūlakepi tikesu labbhamānena ekekena tikena saddhiṃ dukesu alabbhamāne paṭhamadukādayo duke apanetvā, sese labbhamānake sahetukadukādayo paññāsa duke yojetvā, paṭhamattikadutiyadukayojanavārādīni navavārasatāni paññāsañca vārā honti. Tepi sabbe pāḷiyaṃ saṅkhipitvā tattha tattha dassetabbayuttakaṃ dassetvā vuttā. Asammuyhantena pana vitthārato veditabbā.
உப⁴தோவட்³டி⁴தகே து³வித⁴பே⁴தே³ து³தியது³கங் திவித⁴பே⁴தே³ ச பட²மதிகங் ஆதி³ங் கத்வா லப்³ப⁴மானேஹி ஏகூனவீஸதியா து³கேஹி லப்³ப⁴மானே ஏகூனவீஸதிதிகே யோஜெத்வா து³தியது³கபட²மதிகயோஜனவாராத³யோ ஏகூனவீஸதிவாரா வுத்தா. ஏஸ து³கதிகானங் வஸேன உப⁴தோவட்³டி⁴தத்தா உப⁴தோவட்³டி⁴தகோ நாம ததியோ மஹாவாரோ.
Ubhatovaḍḍhitake duvidhabhede dutiyadukaṃ tividhabhede ca paṭhamatikaṃ ādiṃ katvā labbhamānehi ekūnavīsatiyā dukehi labbhamāne ekūnavīsatitike yojetvā dutiyadukapaṭhamatikayojanavārādayo ekūnavīsativārā vuttā. Esa dukatikānaṃ vasena ubhatovaḍḍhitattā ubhatovaḍḍhitako nāma tatiyo mahāvāro.
ப³ஹுவித⁴வாரஸ்ஸ ஸத்தவித⁴னித்³தே³ஸே ஆதி³தோ பட்டா²ய லப்³ப⁴மானேஸு ஏகூனவீஸதியா திகேஸு ஏகேகேன ஸத்³தி⁴ங் சதஸ்ஸோ பூ⁴மியோ யோஜெத்வா ஏகூனவீஸதி ஸத்தவித⁴வாரா வுத்தா. சதுவீஸதிவித⁴னித்³தே³ஸேபி தேஸங்யேவ திகானங் வஸேன ஏகூனவீஸதிவாரா வுத்தா. ததா² ப³ஹுவித⁴வாரே சாதி . திங்ஸவித⁴வாரோ ஏகோயேவாதி ஸப்³பே³பி அட்ட²பஞ்ஞாஸ வாரா ஹொந்தி. அயங் தாவெத்த² வாரபரிச்சே²த³வஸேன பாளிவண்ணனா.
Bahuvidhavārassa sattavidhaniddese ādito paṭṭhāya labbhamānesu ekūnavīsatiyā tikesu ekekena saddhiṃ catasso bhūmiyo yojetvā ekūnavīsati sattavidhavārā vuttā. Catuvīsatividhaniddesepi tesaṃyeva tikānaṃ vasena ekūnavīsativārā vuttā. Tathā bahuvidhavāre cāti . Tiṃsavidhavāro ekoyevāti sabbepi aṭṭhapaññāsa vārā honti. Ayaṃ tāvettha vāraparicchedavasena pāḷivaṇṇanā.
இதா³னி அத்த²வண்ணனா ஹோதி. தத்த² ஸத்தவித⁴னித்³தே³ஸோ தாவ உத்தானத்தோ²யேவ. சதுவீஸதிவித⁴னித்³தே³ஸே சக்கு²ஸம்ப²ஸ்ஸபச்சயா வேத³னாக்க²ந்தோ⁴ அத்தி² குஸலோதி காமாவசரஅட்ட²குஸலசித்தவஸேன வேதி³தப்³போ³. அத்தி² அகுஸலோதி த்³வாத³ஸஅகுஸலசித்தவஸேன வேதி³தப்³போ³. அத்தி² அப்³யாகதோதி திஸ்ஸோ மனோதா⁴துயோ, திஸ்ஸோ அஹேதுகமனோவிஞ்ஞாணதா⁴துயோ, அட்ட² மஹாவிபாகானி, த³ஸ காமாவசரகிரியாதி சதுவீஸதியா சித்தானங் வஸேன வேதி³தப்³போ³.
Idāni atthavaṇṇanā hoti. Tattha sattavidhaniddeso tāva uttānatthoyeva. Catuvīsatividhaniddese cakkhusamphassapaccayā vedanākkhandho atthi kusaloti kāmāvacaraaṭṭhakusalacittavasena veditabbo. Atthi akusaloti dvādasaakusalacittavasena veditabbo. Atthi abyākatoti tisso manodhātuyo, tisso ahetukamanoviññāṇadhātuyo, aṭṭha mahāvipākāni, dasa kāmāvacarakiriyāti catuvīsatiyā cittānaṃ vasena veditabbo.
தத்த² அட்ட² குஸலானி த்³வாத³ஸ அகுஸலானி ச ஜவனவஸேன லப்³ப⁴ந்தி. கிரியமனோதா⁴து ஆவஜ்ஜனவஸேன லப்³ப⁴தி. த்³வே விபாகமனோதா⁴துயோ ஸம்படிச்ச²னவஸேன, திஸ்ஸோ விபாகமனோவிஞ்ஞாணதா⁴துயோ ஸந்தீரணததா³ரம்மணவஸேன, கிரியாஹேதுகமனோவிஞ்ஞாணதா⁴து வொட்ட²ப்³ப³னவஸேன, அட்ட² மஹாவிபாகசித்தானி ததா³ரம்மணவஸேன, நவ கிரியசித்தானி ஜவனவஸேன லப்³ப⁴ந்தி. ஸோதகா⁴னஜிவ்ஹாகாயத்³வாரேஸுபி ஏஸேவ நயோ.
Tattha aṭṭha kusalāni dvādasa akusalāni ca javanavasena labbhanti. Kiriyamanodhātu āvajjanavasena labbhati. Dve vipākamanodhātuyo sampaṭicchanavasena, tisso vipākamanoviññāṇadhātuyo santīraṇatadārammaṇavasena, kiriyāhetukamanoviññāṇadhātu voṭṭhabbanavasena, aṭṭha mahāvipākacittāni tadārammaṇavasena, nava kiriyacittāni javanavasena labbhanti. Sotaghānajivhākāyadvāresupi eseva nayo.
மனொத்³வாரே பன அத்தி² குஸலோதி சதுபூ⁴மககுஸலவஸேன கதி²தங், அத்தி² அகுஸலோதி த்³வாத³ஸஅகுஸலவஸேன. அத்தி² அப்³யாகதோதி ஏகாத³ஸன்னங் காமாவசரவிபாகானங், த³ஸன்னங் கிரியானங் , நவன்னங் ரூபாவசராரூபாவசரகிரியானங், சதுன்னங் ஸாமஞ்ஞப²லானந்தி சதுத்திங்ஸசித்துப்பாத³வஸேன கதி²தங். தத்த² சதுபூ⁴மககுஸலஞ்சேவ அகுஸலஞ்ச ஜவனவஸேன லப்³ப⁴தி. கிரியதோ அஹேதுகமனோவிஞ்ஞாணதா⁴து ஆவஜ்ஜனவஸேன, ஏகாத³ஸ விபாகசித்தானி ததா³ரம்மணவஸேன, தேபூ⁴மககிரியா சேவ ஸாமஞ்ஞப²லானி ச ஜவனவஸேனேவ லப்³ப⁴ந்தி. தானி ஸத்தவிதா⁴தீ³ஸு யத்த² கத்த²சி ட²த்வா கதே²துங் வட்டந்தி. திங்ஸவிதே⁴ பன ட²த்வா தீ³பியமானானி ஸுக²தீ³பனானி ஹொந்தீதி திங்ஸவித⁴ஸ்மிங்யேவ ட²த்வா தீ³பயிங்ஸு.
Manodvāre pana atthi kusaloti catubhūmakakusalavasena kathitaṃ, atthi akusaloti dvādasaakusalavasena. Atthi abyākatoti ekādasannaṃ kāmāvacaravipākānaṃ, dasannaṃ kiriyānaṃ , navannaṃ rūpāvacarārūpāvacarakiriyānaṃ, catunnaṃ sāmaññaphalānanti catuttiṃsacittuppādavasena kathitaṃ. Tattha catubhūmakakusalañceva akusalañca javanavasena labbhati. Kiriyato ahetukamanoviññāṇadhātu āvajjanavasena, ekādasa vipākacittāni tadārammaṇavasena, tebhūmakakiriyā ceva sāmaññaphalāni ca javanavaseneva labbhanti. Tāni sattavidhādīsu yattha katthaci ṭhatvā kathetuṃ vaṭṭanti. Tiṃsavidhe pana ṭhatvā dīpiyamānāni sukhadīpanāni hontīti tiṃsavidhasmiṃyeva ṭhatvā dīpayiṃsu.
ஏதானி ஹி ஸப்³பா³னிபி சித்தானி சக்கு²த்³வாரே உபனிஸ்ஸயகோடியா, ஸமதிக்கமவஸேன, பா⁴வனாவஸேனாதி தீஹாகாரேஹி லப்³ப⁴ந்தி. ததா² ஸோதத்³வாரமனொத்³வாரேஸுபி. கா⁴னஜிவ்ஹாகாயத்³வாரேஸு பன ஸமதிக்கமவஸேன, பா⁴வனாவஸேனாதி த்³வீஹேவாகாரேஹி லப்³ப⁴ந்தீதி வேதி³தப்³பா³னி. கத²ங்? இத⁴ பி⁴க்கு² விஹாரசாரிகங் சரமானோ கஸிணமண்ட³லங் தி³ஸ்வா ‘கிங் நாமேத’ந்தி புச்சி²த்வா ‘கஸிணமண்ட³ல’ந்தி வுத்தே புன ‘கிங் இமினா கரொந்தீ’தி புச்ச²தி. அத²ஸ்ஸ ஆசிக்க²ந்தி – ‘ஏவங் பா⁴வெத்வா ஜா²னானி உப்பாதெ³த்வா, ஸமாபத்திபத³ட்டா²னங் விபஸ்ஸனங் வட்³டெ⁴த்வா, அரஹத்தங் பாபுணந்தீ’தி. அஜ்ஜா²ஸயஸம்பன்னோ குலபுத்தோ ‘பா⁴ரியங் ஏத’ந்தி அஸல்லக்கெ²த்வா ‘மயாபி ஏஸ கு³ணோ நிப்³ப³த்தேதுங் வட்டதி, ந கோ² பன ஸக்கா ஏஸ நிபஜ்ஜித்வா நித்³தா³யந்தேன நிப்³ப³த்தேதுங், ஆதி³தோவ வீரியங் காதுங் ஸீலங் ஸோதே⁴துங் வட்டதீ’தி சிந்தெத்வா ஸீலங் ஸோதே⁴தி. ததோ ஸீலே பதிட்டா²ய த³ஸ பலிபோ³தே⁴ உபச்சி²ந்தி³த்வா, திசீவரபரமேன ஸந்தோஸேன ஸந்துட்டோ², ஆசரியுபஜ்ஜா²யானங் வத்தபடிவத்தங் கத்வா, கம்மட்டா²னங் உக்³க³ண்ஹித்வா, கஸிணபரிகம்மங் கத்வா, ஸமாபத்தியோ உப்பாதெ³த்வா, ஸமாபத்திபத³ட்டா²னங் விபஸ்ஸனங் வட்³டெ⁴த்வா, அரஹத்தங் பாபுணாதி. தத்த² ஸப்³பா³பி பரிகம்மவேத³னா காமாவசரா, அட்ட²ஸமாபத்திவேத³னா ரூபாவசராரூபாவசரா, மக்³க³ப²லவேத³னா லோகுத்தராதி ஏவங் சக்கு²விஞ்ஞாணங் சதுபூ⁴மிகவேத³னானிப்³ப³த்தியா ப³லவபச்சயோ ஹோதீதி சதுபூ⁴மிகவேத³னா சக்கு²ஸம்ப²ஸ்ஸபச்சயா நாம ஜாதா. ஏவங் தாவ ‘உபனிஸ்ஸயவஸேன’ லப்³ப⁴ந்தி.
Etāni hi sabbānipi cittāni cakkhudvāre upanissayakoṭiyā, samatikkamavasena, bhāvanāvasenāti tīhākārehi labbhanti. Tathā sotadvāramanodvāresupi. Ghānajivhākāyadvāresu pana samatikkamavasena, bhāvanāvasenāti dvīhevākārehi labbhantīti veditabbāni. Kathaṃ? Idha bhikkhu vihāracārikaṃ caramāno kasiṇamaṇḍalaṃ disvā ‘kiṃ nāmeta’nti pucchitvā ‘kasiṇamaṇḍala’nti vutte puna ‘kiṃ iminā karontī’ti pucchati. Athassa ācikkhanti – ‘evaṃ bhāvetvā jhānāni uppādetvā, samāpattipadaṭṭhānaṃ vipassanaṃ vaḍḍhetvā, arahattaṃ pāpuṇantī’ti. Ajjhāsayasampanno kulaputto ‘bhāriyaṃ eta’nti asallakkhetvā ‘mayāpi esa guṇo nibbattetuṃ vaṭṭati, na kho pana sakkā esa nipajjitvā niddāyantena nibbattetuṃ, āditova vīriyaṃ kātuṃ sīlaṃ sodhetuṃ vaṭṭatī’ti cintetvā sīlaṃ sodheti. Tato sīle patiṭṭhāya dasa palibodhe upacchinditvā, ticīvaraparamena santosena santuṭṭho, ācariyupajjhāyānaṃ vattapaṭivattaṃ katvā, kammaṭṭhānaṃ uggaṇhitvā, kasiṇaparikammaṃ katvā, samāpattiyo uppādetvā, samāpattipadaṭṭhānaṃ vipassanaṃ vaḍḍhetvā, arahattaṃ pāpuṇāti. Tattha sabbāpi parikammavedanā kāmāvacarā, aṭṭhasamāpattivedanā rūpāvacarārūpāvacarā, maggaphalavedanā lokuttarāti evaṃ cakkhuviññāṇaṃ catubhūmikavedanānibbattiyā balavapaccayo hotīti catubhūmikavedanā cakkhusamphassapaccayā nāma jātā. Evaṃ tāva ‘upanissayavasena’ labbhanti.
சக்கு²த்³வாரே பன ரூபே ஆபாத²க³தே ‘இட்டே² மே ஆரம்மணே ராகோ³ உப்பன்னோ, அனிட்டே² படிகோ⁴, அஸமபெக்க²னாய மோஹோ, வினிப³ந்த⁴ஸ்ஸ பன மே மானோ உப்பன்னோ, பராமட்ட²ஸ்ஸ தி³ட்டி², விக்கே²பக³தஸ்ஸ உத்³த⁴ச்சங், அஸன்னிட்டா²க³தஸ்ஸ விசிகிச்சா², தா²மக³தஸ்ஸ அனுஸயோ உப்பன்னோ’தி பரிக்³க³ஹே டி²தோ குலபுத்தோ அத்தனோ கிலேஸுப்பத்திங் ஞத்வா ‘இமே மே கிலேஸா வட்³ட⁴மானா அனயப்³யஸனாய ஸங்வத்திஸ்ஸந்தி, ஹந்த³ நே நிக்³க³ண்ஹாமீ’தி சிந்தெத்வா ‘ந கோ² பன ஸக்கா நிபஜ்ஜித்வா நித்³தா³யந்தேன கிலேஸே நிக்³க³ண்ஹிதுங்; ஆதி³தோவ வீரியங் காதுங் வட்டதி ஸீலங் ஸோதே⁴து’ந்தி ஹெட்டா² வுத்தனயேனேவ படிபஜ்ஜித்வா அரஹத்தங் பாபுணாதி. தத்த² ஸப்³பா³பி பரிகம்மவேத³னா காமாவசரா, அட்ட²ஸமாபத்திவேத³னா ரூபாவசராரூபாவசரா, மக்³க³ப²லவேத³னா லோகுத்தராதி ஏவங் ரூபாரம்மணே உப்பன்னங் கிலேஸங் ஸமதிக்கமித்வா க³தாதி சதுபூ⁴மிகவேத³னா சக்கு²ஸம்ப²ஸ்ஸபச்சயா நாம ஜாதா. ஏவங் ‘ஸமதிக்கமவஸேன’ லப்³ப⁴ந்தி.
Cakkhudvāre pana rūpe āpāthagate ‘iṭṭhe me ārammaṇe rāgo uppanno, aniṭṭhe paṭigho, asamapekkhanāya moho, vinibandhassa pana me māno uppanno, parāmaṭṭhassa diṭṭhi, vikkhepagatassa uddhaccaṃ, asanniṭṭhāgatassa vicikicchā, thāmagatassa anusayo uppanno’ti pariggahe ṭhito kulaputto attano kilesuppattiṃ ñatvā ‘ime me kilesā vaḍḍhamānā anayabyasanāya saṃvattissanti, handa ne niggaṇhāmī’ti cintetvā ‘na kho pana sakkā nipajjitvā niddāyantena kilese niggaṇhituṃ; āditova vīriyaṃ kātuṃ vaṭṭati sīlaṃ sodhetu’nti heṭṭhā vuttanayeneva paṭipajjitvā arahattaṃ pāpuṇāti. Tattha sabbāpi parikammavedanā kāmāvacarā, aṭṭhasamāpattivedanā rūpāvacarārūpāvacarā, maggaphalavedanā lokuttarāti evaṃ rūpārammaṇe uppannaṃ kilesaṃ samatikkamitvā gatāti catubhūmikavedanā cakkhusamphassapaccayā nāma jātā. Evaṃ ‘samatikkamavasena’ labbhanti.
சக்கு²த்³வாரே பன ரூபே ஆபாத²க³தே ஏகோ ஏவங் பரிக்³க³ஹங் பட்ட²பேதி – ‘இத³ங் ரூபங் கிங் நிஸ்ஸித’ந்தி? ததோ நங் ‘பூ⁴தனிஸ்ஸித’ந்தி ஞத்வா சத்தாரி மஹாபூ⁴தானி உபாதா³ரூபஞ்ச ரூபந்தி பரிக்³க³ண்ஹாதி, ததா³ரம்மணே த⁴ம்மே அரூபந்தி பரிக்³க³ண்ஹாதி. ததோ ஸப்பச்சயங் நாமரூபங் பரிக³ண்ஹித்வா தீணி லக்க²ணானி ஆரோபெத்வா விபஸ்ஸனாபடிபாடியா ஸங்கா²ரே ஸம்மஸித்வா அரஹத்தங் பாபுணாதி. தத்த² ஸப்³பா³பி பரிகம்மவேத³னா காமாவசரா, அட்ட²ஸமாபத்திவேத³னா ரூபாவசராரூபாவசரா, மக்³க³ப²லவேத³னா லோகுத்தராதி ஏவங் ரூபாரம்மணங் ஸம்மஸித்வா நிப்³ப³த்திதாதி அயங் வேத³னா சக்கு²ஸம்ப²ஸ்ஸபச்சயா நாம ஜாதா. ஏவங் ‘பா⁴வனாவஸேன’ லப்³ப⁴ந்தி.
Cakkhudvāre pana rūpe āpāthagate eko evaṃ pariggahaṃ paṭṭhapeti – ‘idaṃ rūpaṃ kiṃ nissita’nti? Tato naṃ ‘bhūtanissita’nti ñatvā cattāri mahābhūtāni upādārūpañca rūpanti pariggaṇhāti, tadārammaṇe dhamme arūpanti pariggaṇhāti. Tato sappaccayaṃ nāmarūpaṃ parigaṇhitvā tīṇi lakkhaṇāni āropetvā vipassanāpaṭipāṭiyā saṅkhāre sammasitvā arahattaṃ pāpuṇāti. Tattha sabbāpi parikammavedanā kāmāvacarā, aṭṭhasamāpattivedanā rūpāvacarārūpāvacarā, maggaphalavedanā lokuttarāti evaṃ rūpārammaṇaṃ sammasitvā nibbattitāti ayaṃ vedanā cakkhusamphassapaccayā nāma jātā. Evaṃ ‘bhāvanāvasena’ labbhanti.
அபரோ பி⁴க்கு² ஸுணாதி – ‘கஸிணபரிகம்மங் கிர கத்வா ஸமாபத்தியோ உப்பாதெ³த்வா ஸமாபத்திபத³ட்டா²னங் விபஸ்ஸனங் வட்³டெ⁴த்வா அரஹத்தங் பாபுணந்தீ’தி. அஜ்ஜா²ஸயஸம்பன்னோ குலபுத்தோ ‘பா⁴ரியங் ஏத’ந்தி அஸல்லக்கெ²த்வா ‘மயாபி ஏஸ கு³ணோ நிப்³ப³த்தேதுங் வட்டதீ’தி புரிமனயேனேவ படிபஜ்ஜித்வா அரஹத்தங் பாபுணாதி. தத்த² ஸப்³பா³பி பரிகம்மவேத³னா காமாவசரா, அட்ட²ஸமாபத்திவேத³னா ரூபாவசராரூபாவசரா, மக்³க³ப²லவேத³னா லோகுத்தராதி ஏவங் ஸோதவிஞ்ஞாணங் சதுபூ⁴மிகவேத³னா நிப்³ப³த்தியா ப³லவபச்சயோ ஹோதீதி சதுபூ⁴மிகவேத³னா ஸோதஸம்ப²ஸ்ஸபச்சயா நாம ஜாதா. ஏவங் தாவ ‘உபனிஸ்ஸயவஸேன’ லப்³ப⁴ந்தி.
Aparo bhikkhu suṇāti – ‘kasiṇaparikammaṃ kira katvā samāpattiyo uppādetvā samāpattipadaṭṭhānaṃ vipassanaṃ vaḍḍhetvā arahattaṃ pāpuṇantī’ti. Ajjhāsayasampanno kulaputto ‘bhāriyaṃ eta’nti asallakkhetvā ‘mayāpi esa guṇo nibbattetuṃ vaṭṭatī’ti purimanayeneva paṭipajjitvā arahattaṃ pāpuṇāti. Tattha sabbāpi parikammavedanā kāmāvacarā, aṭṭhasamāpattivedanā rūpāvacarārūpāvacarā, maggaphalavedanā lokuttarāti evaṃ sotaviññāṇaṃ catubhūmikavedanā nibbattiyā balavapaccayo hotīti catubhūmikavedanā sotasamphassapaccayā nāma jātā. Evaṃ tāva ‘upanissayavasena’ labbhanti.
ஸோதத்³வாரே பன ஸத்³தே³ ஆபாத²க³தேதி ஸப்³ப³ங் சக்கு²த்³வாரே வுத்தனயேனேவ வேதி³தப்³ப³ங். ஏவங் ஸத்³தா³ரம்மணே உப்பன்னங் கிலேஸங் ஸமதிக்கமித்வா க³தாதி சதுபூ⁴மிகவேத³னா ஸோதஸம்ப²ஸ்ஸபச்சயா நாம ஜாதா. ஏவங் ‘ஸமதிக்கமவஸேன’ லப்³ப⁴ந்தி.
Sotadvāre pana sadde āpāthagateti sabbaṃ cakkhudvāre vuttanayeneva veditabbaṃ. Evaṃ saddārammaṇe uppannaṃ kilesaṃ samatikkamitvā gatāti catubhūmikavedanā sotasamphassapaccayā nāma jātā. Evaṃ ‘samatikkamavasena’ labbhanti.
ஸோதத்³வாரே பன ஸத்³தே³ ஆபாத²க³தே ஏகோ ஏவங் பரிக்³க³ஹங் பட்ட²பேதி – அயங் ஸத்³தோ³ கிங் நிஸ்ஸிதோதி ஸப்³ப³ங் சக்கு²த்³வாரே வுத்தனயேனேவ வேதி³தப்³ப³ங். ஏவங் ஸத்³தா³ரம்மணங் ஸம்மஸித்வா நிப்³ப³த்திதாதி அயங் வேத³னா ஸோதஸம்ப²ஸ்ஸபச்சயா நாம ஜாதா. ஏவங் ‘பா⁴வனாவஸேன’ லப்³ப⁴ந்தி.
Sotadvāre pana sadde āpāthagate eko evaṃ pariggahaṃ paṭṭhapeti – ayaṃ saddo kiṃ nissitoti sabbaṃ cakkhudvāre vuttanayeneva veditabbaṃ. Evaṃ saddārammaṇaṃ sammasitvā nibbattitāti ayaṃ vedanā sotasamphassapaccayā nāma jātā. Evaṃ ‘bhāvanāvasena’ labbhanti.
கா⁴னஜிவ்ஹாகாயத்³வாரேஸு பன க³ந்தா⁴ரம்மணாதீ³ஸு ஆபாத²க³தேஸு ‘இட்டே² மே ஆரம்மணே ராகோ³ உப்பன்னோ’தி ஸப்³ப³ங் சக்கு²த்³வாரே வுத்தனயேனேவ வேதி³தப்³ப³ங். ஏவங் க³ந்தா⁴ரம்மணாதீ³ஸு உப்பன்னங் கிலேஸங் ஸமதிக்கமித்வா க³தாதி சதுபூ⁴மிகவேத³னா கா⁴னஜிவ்ஹாகாயஸம்ப²ஸ்ஸபச்சயா நாம ஜாதா. ஏவங் தீஸு த்³வாரேஸு ‘ஸமதிக்கமவஸேன’ லப்³ப⁴ந்தி.
Ghānajivhākāyadvāresu pana gandhārammaṇādīsu āpāthagatesu ‘iṭṭhe me ārammaṇe rāgo uppanno’ti sabbaṃ cakkhudvāre vuttanayeneva veditabbaṃ. Evaṃ gandhārammaṇādīsu uppannaṃ kilesaṃ samatikkamitvā gatāti catubhūmikavedanā ghānajivhākāyasamphassapaccayā nāma jātā. Evaṃ tīsu dvāresu ‘samatikkamavasena’ labbhanti.
கா⁴னத்³வாராதீ³ஸு பன க³ந்தா⁴தீ³ஸு ஆபாத²க³தேஸு ஏகோ ஏவங் பரிக்³க³ஹங் பட்ட²பேதி – ‘அயங் க³ந்தோ⁴, அயங் ரஸோ, இத³ங் பொ²ட்ட²ப்³ப³ங் கிங் நிஸ்ஸித’ந்தி ஸப்³ப³ங் சக்கு²த்³வாரே வுத்தனயேனேவ வேதி³தப்³ப³ங். ஏவங் க³ந்தா⁴ரம்மணாதீ³னி ஸம்மஸித்வா நிப்³ப³த்திதாதி அயங் வேத³னா கா⁴னஜிவ்ஹாகாயஸம்ப²ஸ்ஸபச்சயா நாம ஜாதா. ஏவங் ‘பா⁴வனாவஸேன’ லப்³ப⁴ந்தி.
Ghānadvārādīsu pana gandhādīsu āpāthagatesu eko evaṃ pariggahaṃ paṭṭhapeti – ‘ayaṃ gandho, ayaṃ raso, idaṃ phoṭṭhabbaṃ kiṃ nissita’nti sabbaṃ cakkhudvāre vuttanayeneva veditabbaṃ. Evaṃ gandhārammaṇādīni sammasitvā nibbattitāti ayaṃ vedanā ghānajivhākāyasamphassapaccayā nāma jātā. Evaṃ ‘bhāvanāvasena’ labbhanti.
மனொத்³வாரே பன தீஹிபி ஆகாரேஹி லப்³ப⁴ந்தி. ஏகச்சோ ஹி ஜாதிங் ப⁴யதோ பஸ்ஸதி, ஜரங் ப்³யாதி⁴ங் மரணங் ப⁴யதோ பஸ்ஸதி, ப⁴யதோ தி³ஸ்வா ‘ஜாதிஜராப்³யாதி⁴மரணேஹி முச்சிதுங் வட்டதி, ந கோ² பன ஸக்கா நிபஜ்ஜித்வா நித்³தா³யந்தேன ஜாதிஆதீ³ஹி முச்சிதுங், ஆதி³தோவ வீரியங் காதுங் ஸீலங் ஸோதே⁴துங் வட்டதீ’தி சிந்தெத்வா சக்கு²த்³வாரே வுத்தனயேனேவ படிபஜ்ஜித்வா அரஹத்தங் பாபுணாதி. தத்த² ஸப்³பா³பி பரிகம்மவேத³னா காமாவசரா, அட்ட²ஸமாபத்திவேத³னா ரூபாவசராரூபாவசரா, மக்³க³ப²லவேத³னா லோகுத்தராதி ஏவங் ஜாதிஜராப்³யாதி⁴மரணங் சதுபூ⁴மிகவேத³னானிப்³ப³த்தியா ப³லவபச்சயோ ஹோதீதி சதுபூ⁴மிகவேத³னா மனோஸம்ப²ஸ்ஸபச்சயா நாம ஜாதா. ஏவங் தாவ ‘உபனிஸ்ஸயவஸேன’ லப்³ப⁴ந்தி.
Manodvāre pana tīhipi ākārehi labbhanti. Ekacco hi jātiṃ bhayato passati, jaraṃ byādhiṃ maraṇaṃ bhayato passati, bhayato disvā ‘jātijarābyādhimaraṇehi muccituṃ vaṭṭati, na kho pana sakkā nipajjitvā niddāyantena jātiādīhi muccituṃ, āditova vīriyaṃ kātuṃ sīlaṃ sodhetuṃ vaṭṭatī’ti cintetvā cakkhudvāre vuttanayeneva paṭipajjitvā arahattaṃ pāpuṇāti. Tattha sabbāpi parikammavedanā kāmāvacarā, aṭṭhasamāpattivedanā rūpāvacarārūpāvacarā, maggaphalavedanā lokuttarāti evaṃ jātijarābyādhimaraṇaṃ catubhūmikavedanānibbattiyā balavapaccayo hotīti catubhūmikavedanā manosamphassapaccayā nāma jātā. Evaṃ tāva ‘upanissayavasena’ labbhanti.
மனொத்³வாரே பன த⁴ம்மாரம்மணே ஆபாத²க³தேதி ஸப்³ப³ங் சக்கு²த்³வாரே வுத்தனயேனேவ வேதி³தப்³ப³ங். ஏவங் த⁴ம்மாரம்மணே உப்பன்னங் கிலேஸங் ஸமதிக்கமித்வா க³தாதி சதுபூ⁴மிகவேத³னா மனோஸம்ப²ஸ்ஸபச்சயா நாம ஜாதா. ஏவங் ‘ஸமதிக்கமவஸேன’ லப்³ப⁴ந்தி.
Manodvāre pana dhammārammaṇe āpāthagateti sabbaṃ cakkhudvāre vuttanayeneva veditabbaṃ. Evaṃ dhammārammaṇe uppannaṃ kilesaṃ samatikkamitvā gatāti catubhūmikavedanā manosamphassapaccayā nāma jātā. Evaṃ ‘samatikkamavasena’ labbhanti.
மனொத்³வாரே பன த⁴ம்மாரம்மணே ஆபாத²க³தே ஏகோ ஏவங் பரிக்³க³ஹங் பட்ட²பேதி – ‘ஏதங் த⁴ம்மாரம்மணங் கிங் நிஸ்ஸித’ந்தி? ‘வத்து²னிஸ்ஸித’ந்தி. ‘வத்து² கிங் நிஸ்ஸித’ந்தி? ‘மஹாபூ⁴தானி நிஸ்ஸித’ந்தி. ஸோ சத்தாரி மஹாபூ⁴தானி உபாதா³ரூபஞ்ச ரூபந்தி பரிக்³க³ண்ஹாதி, ததா³ரம்மணே த⁴ம்மே அரூபந்தி பரிக்³க³ண்ஹாதி. ததோ ஸப்பச்சயங் நாமரூபங் பரிக்³க³ண்ஹித்வா தீணி லக்க²ணானி ஆரோபெத்வா விபஸ்ஸனாபடிபாடியா ஸங்கா²ரே ஸம்மஸித்வா அரஹத்தங் பாபுணாதி. தத்த² ஸப்³பா³பி பரிகம்மவேத³னா காமாவசரா, அட்ட²ஸமாபத்திவேத³னா ரூபாவசராரூபாவசரா, மக்³க³ப²லவேத³னா லோகுத்தராதி ஏவங் த⁴ம்மாரம்மணங் ஸம்மஸித்வா நிப்³ப³த்திதாதி அயங் வேத³னா மனோஸம்ப²ஸ்ஸபச்சயா நாம ஜாதா. ஏவங் ‘பா⁴வனாவஸேன’ லப்³ப⁴ந்தி. யா பனேதா ஸப்³பே³ஸம்பி சதுவீஸதிவிதா⁴தீ³னங் வாரானங் பரியோஸானேஸு சக்கு²ஸம்ப²ஸ்ஸஜா வேத³னா…பே॰… மனோஸம்ப²ஸ்ஸஜா வேத³னாதி ச² ச² வேத³னா வுத்தா, தா ஸம்பயுத்தபச்சயவஸேன வுத்தாதி.
Manodvāre pana dhammārammaṇe āpāthagate eko evaṃ pariggahaṃ paṭṭhapeti – ‘etaṃ dhammārammaṇaṃ kiṃ nissita’nti? ‘Vatthunissita’nti. ‘Vatthu kiṃ nissita’nti? ‘Mahābhūtāni nissita’nti. So cattāri mahābhūtāni upādārūpañca rūpanti pariggaṇhāti, tadārammaṇe dhamme arūpanti pariggaṇhāti. Tato sappaccayaṃ nāmarūpaṃ pariggaṇhitvā tīṇi lakkhaṇāni āropetvā vipassanāpaṭipāṭiyā saṅkhāre sammasitvā arahattaṃ pāpuṇāti. Tattha sabbāpi parikammavedanā kāmāvacarā, aṭṭhasamāpattivedanā rūpāvacarārūpāvacarā, maggaphalavedanā lokuttarāti evaṃ dhammārammaṇaṃ sammasitvā nibbattitāti ayaṃ vedanā manosamphassapaccayā nāma jātā. Evaṃ ‘bhāvanāvasena’ labbhanti. Yā panetā sabbesampi catuvīsatividhādīnaṃ vārānaṃ pariyosānesu cakkhusamphassajā vedanā…pe… manosamphassajā vedanāti cha cha vedanā vuttā, tā sampayuttapaccayavasena vuttāti.
அயங் வேத³னாக்க²ந்த⁴னித்³தே³ஸோ.
Ayaṃ vedanākkhandhaniddeso.
ஸஞ்ஞாக்க²ந்தா⁴த³யோபி இமினா உபாயேன வேதி³தப்³பா³. கேவலஞ்ஹி ஸஞ்ஞாக்க²ந்த⁴னித்³தே³ஸே திகேஸு வேத³னாத்திகபீதித்திகாபி லப்³ப⁴ந்தி, து³கேஸு ச ஸுக²ஸஹக³தது³காத³யோபி. ஸங்கா²ரக்க²ந்த⁴னித்³தே³ஸே ப²ஸ்ஸஸ்ஸாபி ஸங்கா²ரக்க²ந்த⁴பரியாபன்னத்தா ப²ஸ்ஸஸம்பயுத்தோதி அவத்வா சித்தஸம்பயுத்தோதி வுத்தங். து³கேஸு செத்த² ஹேதுது³காத³யோபி லப்³ப⁴ந்தி. திகா ஸஞ்ஞாக்க²ந்த⁴ஸதி³ஸா ஏவ . விஞ்ஞாணக்க²ந்த⁴னித்³தே³ஸே சக்கு²ஸம்ப²ஸ்ஸஜாதி³பா⁴வங் அவத்வா சக்கு²விஞ்ஞாணந்திஆதி³ வுத்தங். ந ஹி ஸக்கா விஞ்ஞாணங் மனோஸம்ப²ஸ்ஸஜந்தி நித்³தி³ஸிதுங். ஸேஸமெத்த² ஸஞ்ஞாக்க²ந்தே⁴ வுத்தஸதி³ஸமேவ. இமேஸங் பன திண்ணம்பி க²ந்தா⁴னங் நித்³தே³ஸேயேவ வேத³னாக்க²ந்த⁴னித்³தே³ஸதோ அதிரேகதிகது³கா லத்³தா⁴. தேஸங் வஸேன வாரப்பபே⁴தோ³ வேதி³தப்³போ³தி.
Saññākkhandhādayopi iminā upāyena veditabbā. Kevalañhi saññākkhandhaniddese tikesu vedanāttikapītittikāpi labbhanti, dukesu ca sukhasahagatadukādayopi. Saṅkhārakkhandhaniddese phassassāpi saṅkhārakkhandhapariyāpannattā phassasampayuttoti avatvā cittasampayuttoti vuttaṃ. Dukesu cettha hetudukādayopi labbhanti. Tikā saññākkhandhasadisā eva . Viññāṇakkhandhaniddese cakkhusamphassajādibhāvaṃ avatvā cakkhuviññāṇantiādi vuttaṃ. Na hi sakkā viññāṇaṃ manosamphassajanti niddisituṃ. Sesamettha saññākkhandhe vuttasadisameva. Imesaṃ pana tiṇṇampi khandhānaṃ niddeseyeva vedanākkhandhaniddesato atirekatikadukā laddhā. Tesaṃ vasena vārappabhedo veditabboti.
அபி⁴த⁴ம்மபா⁴ஜனீயவண்ணனா.
Abhidhammabhājanīyavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 1. க²ந்த⁴விப⁴ங்கோ³ • 1. Khandhavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 1. க²ந்த⁴விப⁴ங்கோ³ • 1. Khandhavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 1. க²ந்த⁴விப⁴ங்கோ³ • 1. Khandhavibhaṅgo
