| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
2. அபி⁴த⁴ம்மபா⁴ஜனீயவண்ணனா
2. Abhidhammabhājanīyavaṇṇanā
155. அபி⁴த⁴ம்மபா⁴ஜனீயே யதா² ஹெட்டா² விபஸ்ஸகானங் உபகாரத்தா²ய ‘‘சக்கா²யதனங் ரூபாயதன’’ந்தி யுக³லதோ ஆயதனானி வுத்தானி, ததா² அவத்வா அஜ்ஜ²த்திகபா³ஹிரானங் ஸப்³பா³காரதோ ஸபா⁴வத³ஸ்ஸனத்த²ங் ‘‘சக்கா²யதனங் ஸோதாயதன’’ந்தி ஏவங் அஜ்ஜ²த்திகபா³ஹிரவவத்தா²னநயேன வுத்தானி.
155. Abhidhammabhājanīye yathā heṭṭhā vipassakānaṃ upakāratthāya ‘‘cakkhāyatanaṃ rūpāyatana’’nti yugalato āyatanāni vuttāni, tathā avatvā ajjhattikabāhirānaṃ sabbākārato sabhāvadassanatthaṃ ‘‘cakkhāyatanaṃ sotāyatana’’nti evaṃ ajjhattikabāhiravavatthānanayena vuttāni.
156. தேஸங் நித்³தே³ஸவாரே தத்த² கதமங் சக்கா²யதனந்திஆதீ³னி ஹெட்டா² வுத்தனயேனேவ வேதி³தப்³பா³னி.
156. Tesaṃ niddesavāre tattha katamaṃ cakkhāyatanantiādīni heṭṭhā vuttanayeneva veditabbāni.
167. யங் பனேதங் த⁴ம்மாயதனநித்³தே³ஸே ‘‘தத்த² கதமா அஸங்க²தா தா⁴து? ராக³க்க²யோ தோ³ஸக்க²யோ மோஹக்க²யோ’’தி வுத்தங், தத்ராயமத்தோ² – அஸங்க²தா தா⁴தூதி அஸங்க²தஸபா⁴வங் நிப்³பா³னங். யஸ்மா பனேதங் ஆக³ம்ம ராகா³த³யோ கீ²யந்தி, தஸ்மா ராக³க்க²யோ தோ³ஸக்க²யோ மோஹக்க²யோதி வுத்தங். அயமெத்த² ஆசரியானங் ஸமானத்த²கதா².
167. Yaṃ panetaṃ dhammāyatananiddese ‘‘tattha katamā asaṅkhatā dhātu? Rāgakkhayo dosakkhayo mohakkhayo’’ti vuttaṃ, tatrāyamattho – asaṅkhatā dhātūti asaṅkhatasabhāvaṃ nibbānaṃ. Yasmā panetaṃ āgamma rāgādayo khīyanti, tasmā rāgakkhayo dosakkhayo mohakkhayoti vuttaṃ. Ayamettha ācariyānaṃ samānatthakathā.
விதண்ட³வாதீ³ பனாஹ – ‘பாடியேக்கங் நிப்³பா³னங் நாம நத்தி², கிலேஸக்க²யோவ நிப்³பா³ன’ந்தி. ‘ஸுத்தங் ஆஹரா’தி ச வுத்தே ‘‘நிப்³பா³னங் நிப்³பா³னந்தி கோ², ஆவுஸோ ஸாரிபுத்த, வுச்சதி; கதமங் நு கோ², ஆவுஸோ, நிப்³பா³னந்தி? யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ங் வுச்சதி நிப்³பா³ன’’ந்தி ஏதங் ஜம்பு³கா²த³கஸுத்தங் ஆஹரித்வா ‘இமினா ஸுத்தேன வேதி³தப்³ப³ங் பாடியேக்கங் நிப்³பா³னங் நாம நத்தி², கிலேஸக்க²யோவ நிப்³பா³ன’ந்தி ஆஹ. ஸோ வத்தப்³போ³ – ‘கிங் பன யதா² சேதங் ஸுத்தங் ததா² அத்தோ²’தி? அத்³தா⁴ வக்க²தி – ‘ஆம , நத்தி² ஸுத்ததோ முஞ்சித்வா அத்தோ²’தி. ததோ வத்தப்³போ³ – ‘இத³ங் தாவ தே ஸுத்தங் ஆப⁴தங்; அனந்தரஸுத்தங் ஆஹரா’தி. அனந்தரஸுத்தங் நாம – ‘‘அரஹத்தங் அரஹத்தந்தி, ஆவுஸோ ஸாரிபுத்த, வுச்சதி; கதமங் நு கோ², ஆவுஸோ, அரஹத்தந்தி? யோ கோ², ஆவுஸோ, ராக³க்க²யோ தோ³ஸக்க²யோ மோஹக்க²யோ – இத³ங் வுச்சதி அரஹத்த’’ந்தி (ஸங்॰ நி॰ 4.315) இத³ங் தஸ்ஸேவானந்தரங் ஆப⁴தஸுத்தங்.
Vitaṇḍavādī panāha – ‘pāṭiyekkaṃ nibbānaṃ nāma natthi, kilesakkhayova nibbāna’nti. ‘Suttaṃ āharā’ti ca vutte ‘‘nibbānaṃ nibbānanti kho, āvuso sāriputta, vuccati; katamaṃ nu kho, āvuso, nibbānanti? Yo kho, āvuso, rāgakkhayo dosakkhayo mohakkhayo – idaṃ vuccati nibbāna’’nti etaṃ jambukhādakasuttaṃ āharitvā ‘iminā suttena veditabbaṃ pāṭiyekkaṃ nibbānaṃ nāma natthi, kilesakkhayova nibbāna’nti āha. So vattabbo – ‘kiṃ pana yathā cetaṃ suttaṃ tathā attho’ti? Addhā vakkhati – ‘āma , natthi suttato muñcitvā attho’ti. Tato vattabbo – ‘idaṃ tāva te suttaṃ ābhataṃ; anantarasuttaṃ āharā’ti. Anantarasuttaṃ nāma – ‘‘arahattaṃ arahattanti, āvuso sāriputta, vuccati; katamaṃ nu kho, āvuso, arahattanti? Yo kho, āvuso, rāgakkhayo dosakkhayo mohakkhayo – idaṃ vuccati arahatta’’nti (saṃ. ni. 4.315) idaṃ tassevānantaraṃ ābhatasuttaṃ.
இமஸ்மிங் பன நங் ஆப⁴தே ஆஹங்ஸு – ‘நிப்³பா³னங் நாம த⁴ம்மாயதனபரியாபன்னோ த⁴ம்மோ, அரஹத்தங் சத்தாரோ க²ந்தா⁴. நிப்³பா³னங் ஸச்சி²கத்வா விஹரந்தோ த⁴ம்மஸேனாபதி நிப்³பா³னங் புச்சி²தோபி அரஹத்தங் புச்சி²தோபி கிலேஸக்க²யமேவ ஆஹ. கிங் பன நிப்³பா³னஞ்ச அரஹத்தஞ்ச ஏகங் உதா³ஹு நான’ந்தி? ‘ஏகங் வா ஹோது நானங் வா. கோ எத்த² தயா அதிப³ஹுங் சுண்ணீகரணங் கரொந்தேன அத்தோ²’? ‘ந த்வங் ஏகங் நானங் ஜானாஸீதி. நனு ஞாதே ஸாது⁴ ஹோதீ’தி ஏவங் புனப்புனங் புச்சி²தோ வஞ்சேதுங் அஸக்கொந்தோ ஆஹ – ‘ராகா³தீ³னங் கீ²ணந்தே உப்பன்னத்தா அரஹத்தங் ராக³க்க²யோ தோ³ஸக்க²யோ மோஹக்க²யோ’தி வுச்சதீதி. ததோ நங் ஆஹங்ஸு – ‘மஹாகம்மங் தே கதங். லஞ்ஜங் த³த்வாபி தங் வதா³பெந்தோ ஏததே³வ வதா³பெய்ய. யதே²வ ச தே ஏதங் விப⁴ஜித்வா கதி²தங், ஏவங் இத³ம்பி ஸல்லக்கே²ஹி – நிப்³பா³னஞ்ஹி ஆக³ம்ம ராகா³த³யோ கீ²ணாதி நிப்³பா³னங் ராக³க்க²யோ தோ³ஸக்க²யோ மோஹக்க²யோதி வுத்தங். தீணிபி ஹி ஏதானி நிப்³பா³னஸ்ஸேவ அதி⁴வசனானீ’தி.
Imasmiṃ pana naṃ ābhate āhaṃsu – ‘nibbānaṃ nāma dhammāyatanapariyāpanno dhammo, arahattaṃ cattāro khandhā. Nibbānaṃ sacchikatvā viharanto dhammasenāpati nibbānaṃ pucchitopi arahattaṃ pucchitopi kilesakkhayameva āha. Kiṃ pana nibbānañca arahattañca ekaṃ udāhu nāna’nti? ‘Ekaṃ vā hotu nānaṃ vā. Ko ettha tayā atibahuṃ cuṇṇīkaraṇaṃ karontena attho’? ‘Na tvaṃ ekaṃ nānaṃ jānāsīti. Nanu ñāte sādhu hotī’ti evaṃ punappunaṃ pucchito vañcetuṃ asakkonto āha – ‘rāgādīnaṃ khīṇante uppannattā arahattaṃ rāgakkhayo dosakkhayo mohakkhayo’ti vuccatīti. Tato naṃ āhaṃsu – ‘mahākammaṃ te kataṃ. Lañjaṃ datvāpi taṃ vadāpento etadeva vadāpeyya. Yatheva ca te etaṃ vibhajitvā kathitaṃ, evaṃ idampi sallakkhehi – nibbānañhi āgamma rāgādayo khīṇāti nibbānaṃ rāgakkhayo dosakkhayo mohakkhayoti vuttaṃ. Tīṇipi hi etāni nibbānasseva adhivacanānī’ti.
ஸசே ஏவங் வுத்தே ஸஞ்ஞத்திங் க³ச்ச²தி இச்சேதங் குஸலங்; நோ சே, ப³ஹுனிப்³பா³னதாய காரேதப்³போ³. கத²ங்? ஏவங் தாவ புச்சி²தப்³போ³ – ‘ராக³க்க²யோ நாம ராக³ஸ்ஸேவ க²யோ உதா³ஹு தோ³ஸமோஹானம்பி? தோ³ஸக்க²யோ நாம தோ³ஸஸ்ஸேவ க²யோ உதா³ஹு ராக³மோஹானம்பி? மோஹக்க²யோ நாம மோஹஸ்ஸேவ க²யோ உதா³ஹு ராக³தோ³ஸானம்பீ’தி? அத்³தா⁴ வக்க²தி – ‘ராக³க்க²யோ நாம ராக³ஸ்ஸேவ க²யோ, தோ³ஸக்க²யோ நாம தோ³ஸஸ்ஸேவ க²யோ, மோஹக்க²யோ நாம மோஹஸ்ஸேவ க²யோ’தி.
Sace evaṃ vutte saññattiṃ gacchati iccetaṃ kusalaṃ; no ce, bahunibbānatāya kāretabbo. Kathaṃ? Evaṃ tāva pucchitabbo – ‘rāgakkhayo nāma rāgasseva khayo udāhu dosamohānampi? Dosakkhayo nāma dosasseva khayo udāhu rāgamohānampi? Mohakkhayo nāma mohasseva khayo udāhu rāgadosānampī’ti? Addhā vakkhati – ‘rāgakkhayo nāma rāgasseva khayo, dosakkhayo nāma dosasseva khayo, mohakkhayo nāma mohasseva khayo’ti.
ததோ வத்தப்³போ³ – ‘தவ வாதே³ ராக³க்க²யோ ஏகங் நிப்³பா³னங் ஹோதி, தோ³ஸக்க²யோ ஏகங், மோஹக்க²யோ ஏகங்; திண்ணங் அகுஸலமூலானங் க²யே தீணி நிப்³பா³னானி ஹொந்தி, சதுன்னங் உபாதா³னானங் க²யே சத்தாரி, பஞ்சன்னங் நீவரணானங் க²யே பஞ்ச, ச²ன்னங் தண்ஹாகாயானங் க²யே ச², ஸத்தன்னங் அனுஸயானங் க²யே ஸத்த, அட்ட²ன்னங் மிச்ச²த்தானங் க²யே அட்ட², நவன்னங் தண்ஹாமூலகத⁴ம்மானங் க²யே நவ, த³ஸன்னங் ஸங்யோஜனானங் க²யே த³ஸ, தி³யட்³ட⁴கிலேஸஸஹஸ்ஸஸ்ஸ க²யே பாடியேக்கங் பாடியேக்கங் நிப்³பா³னந்தி ப³ஹூனி நிப்³பா³னானி ஹொந்தி. நத்தி² பன தே நிப்³பா³னானங் பமாணந்தி. ஏவங் பன அக்³க³ஹெத்வா நிப்³பா³னங் ஆக³ம்ம ராகா³த³யோ கீ²ணாதி ஏகமேவ நிப்³பா³னங் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீதி க³ண்ஹ’.
Tato vattabbo – ‘tava vāde rāgakkhayo ekaṃ nibbānaṃ hoti, dosakkhayo ekaṃ, mohakkhayo ekaṃ; tiṇṇaṃ akusalamūlānaṃ khaye tīṇi nibbānāni honti, catunnaṃ upādānānaṃ khaye cattāri, pañcannaṃ nīvaraṇānaṃ khaye pañca, channaṃ taṇhākāyānaṃ khaye cha, sattannaṃ anusayānaṃ khaye satta, aṭṭhannaṃ micchattānaṃ khaye aṭṭha, navannaṃ taṇhāmūlakadhammānaṃ khaye nava, dasannaṃ saṃyojanānaṃ khaye dasa, diyaḍḍhakilesasahassassa khaye pāṭiyekkaṃ pāṭiyekkaṃ nibbānanti bahūni nibbānāni honti. Natthi pana te nibbānānaṃ pamāṇanti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha’.
ஸசே பன ஏவங் வுத்தேபி ந ஸல்லக்கே²தி, ஓளாரிகதாய காரேதப்³போ³. கத²ங்? ‘அந்த⁴பா³லா ஹி அச்ச²தீ³பிமிக³மக்கடாத³யோபி கிலேஸபரியுட்டி²தா வத்து²ங் படிஸேவந்தி. அத² நேஸங் படிஸேவனபரியந்தே கிலேஸோ வூபஸம்மதி. தவ வாதே³ அச்ச²தீ³பிமிக³மக்கடாத³யோ நிப்³பா³னப்பத்தா நாம ஹொந்தி. ஓளாரிகங் வத தே நிப்³பா³னங் தூ²லங், கண்ணேஹி பிளந்தி⁴துங் ந ஸக்காதி. ஏவங் பன அக்³க³ஹெத்வா நிப்³பா³னங் ஆக³ம்ம ராகா³த³யோ கீ²ணாதி ஏகமேவ நிப்³பா³னங் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீதி க³ண்ஹ’.
Sace pana evaṃ vuttepi na sallakkheti, oḷārikatāya kāretabbo. Kathaṃ? ‘Andhabālā hi acchadīpimigamakkaṭādayopi kilesapariyuṭṭhitā vatthuṃ paṭisevanti. Atha nesaṃ paṭisevanapariyante kileso vūpasammati. Tava vāde acchadīpimigamakkaṭādayo nibbānappattā nāma honti. Oḷārikaṃ vata te nibbānaṃ thūlaṃ, kaṇṇehi piḷandhituṃ na sakkāti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha’.
ஸசே பன ஏவங் வுத்தேபி ந ஸல்லக்கே²தி, கொ³த்ரபு⁴னாபி காரேதப்³போ³. கத²ங்? ஏவங் தாவ புச்சி²தப்³போ³ – ‘த்வங் கொ³த்ரபு⁴ நாம அத்தீ²தி வதே³ஸீ’தி? ‘ஆம வதா³மீ’தி. ‘கொ³த்ரபு⁴க்க²ணே கிலேஸா கீ²ணா, கீ²யந்தி, கீ²யிஸ்ஸந்தீ’தி? ந கீ²ணா, ந கீ²யந்தி; அபிச கோ² கீ²யிஸ்ஸந்தீதி. ‘கொ³த்ரபு⁴ பன கிங் ஆரம்மணங் கரோதீ’தி? ‘நிப்³பா³னங்’. ‘தவ கொ³த்ரபு⁴க்க²ணே கிலேஸா ந கீ²ணா, ந கீ²யந்தி; அத² கோ² கீ²யிஸ்ஸந்தி. த்வங் அகீ²ணேஸுயேவ கிலேஸேஸு கிலேஸக்க²யங் நிப்³பா³னங் பஞ்ஞபேஸி, அப்பஹீனேஸு அனுஸயேஸு அனுஸயப்பஹானங் நிப்³பா³னங் பஞ்ஞபேஸி. தங் தே ந ஸமேதி. ஏவங் பன அக்³க³ஹெத்வா நிப்³பா³னங் ஆக³ம்ம ராகா³த³யோ கீ²ணாதி ஏகமேவ நிப்³பா³னங் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீதி க³ண்ஹ’.
Sace pana evaṃ vuttepi na sallakkheti, gotrabhunāpi kāretabbo. Kathaṃ? Evaṃ tāva pucchitabbo – ‘tvaṃ gotrabhu nāma atthīti vadesī’ti? ‘Āma vadāmī’ti. ‘Gotrabhukkhaṇe kilesā khīṇā, khīyanti, khīyissantī’ti? Na khīṇā, na khīyanti; apica kho khīyissantīti. ‘Gotrabhu pana kiṃ ārammaṇaṃ karotī’ti? ‘Nibbānaṃ’. ‘Tava gotrabhukkhaṇe kilesā na khīṇā, na khīyanti; atha kho khīyissanti. Tvaṃ akhīṇesuyeva kilesesu kilesakkhayaṃ nibbānaṃ paññapesi, appahīnesu anusayesu anusayappahānaṃ nibbānaṃ paññapesi. Taṃ te na sameti. Evaṃ pana aggahetvā nibbānaṃ āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānīti gaṇha’.
ஸசே பன ஏவங் வுத்தேபி ந ஸல்லக்கே²தி, மக்³கே³ன காரேதப்³போ³. கத²ங்? ஏவங் தாவ புச்சி²தப்³போ³ – ‘த்வங் மக்³க³ங் நாம வதே³ஸீ’தி? ‘ஆம வதே³மீ’தி. ‘மக்³க³க்க²ணே கிலேஸா கீ²ணா, கீ²யந்தி, கி²யிஸ்ஸந்தீ’தி? ஜானமானோ வக்க²தி – ‘கீ²ணாதி வா கீ²யிஸ்ஸந்தீதி வா வத்துங் ந வட்டதி, கீ²யந்தீதி வத்துங் வட்டதீ’தி. ‘யதி³ ஏவங், மக்³க³ஸ்ஸ கிலேஸக்க²யங் நிப்³பா³னங் கதமங்? மக்³கே³ன கீ²யனககிலேஸா கதமே? மக்³கோ³ கதமங் கிலேஸக்க²யங் நிப்³பா³னங் ஆரம்மணங் கத்வா கதமே கிலேஸே கே²பேதி? தஸ்மா மா ஏவங் க³ண்ஹ. நிப்³பா³னங் பன ஆக³ம்ம ராகா³த³யோ கீ²ணாதி ஏகமேவ நிப்³பா³னங் ராக³க்க²யோ தோ³ஸக்க²யோ மோஹக்க²யோதி வுச்சதி. தீணிபி ஹேதானி நிப்³பா³னஸ்ஸேவ அதி⁴வசனானீ’தி.
Sace pana evaṃ vuttepi na sallakkheti, maggena kāretabbo. Kathaṃ? Evaṃ tāva pucchitabbo – ‘tvaṃ maggaṃ nāma vadesī’ti? ‘Āma vademī’ti. ‘Maggakkhaṇe kilesā khīṇā, khīyanti, khiyissantī’ti? Jānamāno vakkhati – ‘khīṇāti vā khīyissantīti vā vattuṃ na vaṭṭati, khīyantīti vattuṃ vaṭṭatī’ti. ‘Yadi evaṃ, maggassa kilesakkhayaṃ nibbānaṃ katamaṃ? Maggena khīyanakakilesā katame? Maggo katamaṃ kilesakkhayaṃ nibbānaṃ ārammaṇaṃ katvā katame kilese khepeti? Tasmā mā evaṃ gaṇha. Nibbānaṃ pana āgamma rāgādayo khīṇāti ekameva nibbānaṃ rāgakkhayo dosakkhayo mohakkhayoti vuccati. Tīṇipi hetāni nibbānasseva adhivacanānī’ti.
ஏவங் வுத்தே ஏவமாஹ – ‘த்வங் ஆக³ம்ம ஆக³ம்மாதி வதே³ஸீ’தி? ‘ஆம வதே³மீ’தி. ‘ஆக³ம்ம நாமாதி இத³ங் தே குதோ லத்³த⁴’ந்தி? ‘ஸுத்ததோ லத்³த⁴’ந்தி . ‘ஆஹர ஸுத்த’ந்தி. ‘‘ஏவங் அவிஜ்ஜா ச தண்ஹா ச தங் ஆக³ம்ம, தம்ஹி கீ²ணா, தம்ஹி ப⁴க்³கா³, ந ச கிஞ்சி கதா³சீ’’தி. ஏவங் வுத்தே பரவாதீ³ துண்ஹீபா⁴வங் ஆபன்னோதி.
Evaṃ vutte evamāha – ‘tvaṃ āgamma āgammāti vadesī’ti? ‘Āma vademī’ti. ‘Āgamma nāmāti idaṃ te kuto laddha’nti? ‘Suttato laddha’nti . ‘Āhara sutta’nti. ‘‘Evaṃ avijjā ca taṇhā ca taṃ āgamma, tamhi khīṇā, tamhi bhaggā, na ca kiñci kadācī’’ti. Evaṃ vutte paravādī tuṇhībhāvaṃ āpannoti.
இதா⁴பி த³ஸாயதனானி காமாவசரானி, த்³வே பன சதுபூ⁴மகானி லோகியலோகுத்தரமிஸ்ஸகானீதி வேதி³தப்³பா³னி.
Idhāpi dasāyatanāni kāmāvacarāni, dve pana catubhūmakāni lokiyalokuttaramissakānīti veditabbāni.
அபி⁴த⁴ம்மபா⁴ஜனீயவண்ணனா.
Abhidhammabhājanīyavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 2. ஆயதனவிப⁴ங்கோ³ • 2. Āyatanavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 2. ஆயதனவிப⁴ங்கோ³ • 2. Āyatanavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 2. ஆயதனவிப⁴ங்கோ³ • 2. Āyatanavibhaṅgo
